Aepa Gemae 28 - The Keyagana NT and 25 OT books

¹ Aisakiʼa ani gemo afitenoʼaeʼmo Yekopufeʼmo ge huʼnigeno eʼnigenoʼaeʼmo alino auleno atetenoʼaeʼmo, Kenani a mafaʼne anagaʼaipatiʼmo oʼaliyo, huno ha paiʼniye.

² He tika Mesopatemiya kotegamo itakamo afoʼamoʼmo Metuveli notegamo uka itakamo asaʼamoʼmo Lepani a mafaʼne anagaʼaipatiʼmo aligane.

³ Gotiʼa muki lokiyaʼamo haneʼniya vekamoʼmo alino auleno katesigeka asole mafaʼnemo alika apatesanageʼa asole vayaʼmo aliʼa alu aiʼa maigae.

⁴ Gotiʼa Emalehamuʼmo alino auleno ateʼniya kava huno kagaeʼe kaginago vayakaʼefeʼmo alino auleno lapategaiye. Nata neka eka maiʼnana mopamo Gotiʼa Emalehamuʼmo amiʼniya mopamo kaha maeno alino kamino, huno ha paiʼniye.

⁵ Aisakiʼa mani geʼamo ha paiteno Yekopuʼmo alino ateʼnigeno Mesopatemiya kotega Metuveli mafaʼnemo Lipeka asaʼamoʼmo Lepaniʼa Siliya nofi vekalegamo uʼniye.

Isoʼa mago aʼmo aliʼniya gemae

⁶ Aisakiʼa Yekopuʼmo alino ateʼnigeno visiyafeʼmo alino auleno atetenoʼaeʼmo, Kenani nofi vayaʼai a mafaʼnemo oʼaliyo, huno ha paiʼniya gemo Isoʼeʼmo afiʼniye.

⁷ Ageyana Yekopuʼmo itaʼafoʼalaʼmoganimo huʼnaʼa gemo akame huno Mesopatemiya kotegamo uʼniye, huno ageʼniye.

⁸ Aisakiʼmo Kenani nofi vayaʼai a mafaʼneeʼmo ohauʼniya kavafeʼmo Isoʼmo ageʼniye.

⁹ Ageʼniyaʼmofeʼmo Isoʼmo uno Emalehamu mafaʼnemo Isameli a mafaʼnemo Mahalataʼmo Nemayoti asaʼamoʼmo aliʼniye. Hogoteno mago aʼne anagaʼmo aliʼnenoʼaeʼmo ani afinaʼmo Mahalataʼmo aliʼniye.

Yekopuʼa alagamunamo ageʼniya gemae

¹⁰ Yekopuʼa Miyasipa kotegatiʼmo uno Halani taoni kategamo neʼvigeno

¹¹ yegemo ago lamino faleʼnigeno Yekopuʼa uno folagapiʼmo havaeʼniye. Ani yatetiʼmo mago yafaʼmo alino afita aiteno havaeʼniye.

¹² Au kaleʼnenoʼaeʼmo alagamuna ageyana mago hakayamo mopaleti kokuʼnapiʼmo uno haiʼnigeno ageʼniye. Aepaʼamo mopafiʼmo hanetegeno avoyaʼamo kokuʼnapiʼmo uno haiʼnigeno ageʼniye. Ageʼniyana Goti enisole vayaʼamo ani hakayaleʼmo emi eteʼa uʼa haiteʼa huʼa maiʼnageno apakeʼniye.

¹³ Yekopuʼa ageyana Ala kava neʼmoʼa ani hakayamo anagaʼmo maiʼneno, Nagaemo Ala kava neʼmo kaginago vekamo Emalehamu Gotiʼamoʼnamo maiʼneʼna Aisaki Gotiʼamoʼnamo maiʼnove. Ani havaeʼnana mopamo kagaikaʼe kaginago vayaʼeʼmo lapamiguve.

¹⁴ Kaginago vayaʼmogimo ani kahaepagana vayaʼmo afole aiteʼa ma mopafi muki haopalegamo yegemo haine neʼeya kotegagi uno lamino nefaleya kotegagi hoga haopalegagi lamaga haopalegagi huʼa aiʼa atagu faeʼa maigae. Gotiʼa kagaetetiʼe kaginago vayaʼaitetiʼeʼmo muki ma mopafi nofi vayaʼaifeʼmo aliʼna auleʼna apategauve.

¹⁵ Afiyo, huʼna, Nagaemo muki umenitata hisana kotegamo kagaeʼeʼmo lokaeʼna maiʼneʼna alagepa huʼna yagaiʼna kateteʼna halate mani mopaleʼmo kavaleliʼna egauve. Nagaemo muki kaha paiʼnova kavaʼmo aliʼna afole aiʼna atesuvafeʼmo alagi okatalegauve, huno ha paiʼniye.

¹⁶ Huno ha paiʼnigeno Yekopuʼa aupatiʼmo he tinoʼaeʼmo, Alagi lama gemo huve, huno, Ala kava neʼmo manile maiʼniyaʼmonanafa maiʼniye, huʼna oʼageʼnove, huno huʼniye.

¹⁷ Amoʼya aiʼnigenoʼaeʼmo, Mani maiʼnova koʼmo nahau neʼauva koʼmo haneʼniye. Mani mopaleʼmo Goti noʼamo haneʼniye. He, kokuʼnapi kipaʼmo manile haneʼniye, huno huʼniye.

¹⁸ Yekopuʼa gotilamiyapiʼmo he tino ani afita aino havaeʼniya yafaʼmo alino aeno he tino faino ateteno aote yafaʼmo hanesiyafeʼmo uvelimo lakino ateʼniye.

¹⁹ Ani koʼmo agiʼamo Metoli kone huno ateʼniye. Ani agimo aepaʼamo Goti none. Hiyaʼmonanafa ani taonieʼmo hogoteʼa Lusa taonie huʼa agi aeʼnae.

²⁰ Yekopuʼa polomasi gemo hunoʼaeʼmo Gotiʼa nagaeʼeʼmo magokepi lokaeno maiʼneno visuva kotegamo neʼyaʼmo namige kukenaʼnimo namige huteno yagaino natesigeno

²¹ naipamoʼmo falu huʼninageʼna afoʼnimo koteʼmo eʼna avaʼyi hisuvana inagi Ala kava neʼmo Gotiʼnimogamo maigane.

²² Mani faiʼna ateʼnova yafaʼmoʼa mani mopaeʼmo Goti nomae, huno hugiye. Nagaemo muki namisana yaʼafatiʼmo aliʼna fako hisugenoʼaeʼmo naya loleʼamo hisiya yapatiʼmo magoke yaʼmo kamiguve, huno ha paiʼniye.