Aepa Gemae 27 - The Keyagana NT and 25 OT books

Yekopuʼa afoʼamoʼmo humi ateteno Iso aulena geʼamo aliʼniya gemae

¹ Aisakiʼa ago kosuna leʼniyaʼmofeʼmo aulagamo hosuʼnigeno oʼageʼniye. Agaemo yege mafaʼneʼamo Isofeʼmo ge huʼnigeno eʼnigenoʼaeʼmo, mafaʼneʼnimo Iso, huno huʼnigenoʼaeʼmo ove, maiʼnove, huno huʼniye.

² Aisakiʼa hunoʼaeʼmo, Afiyo, huno, Ago kosuna leʼnove. Falisuva afinaʼnimo oʼageʼnove.

³ Ani kava huʼnovaʼmofeʼmo kahaoke hovanagi ati kevekaʼe keve kukaʼeʼmo aliteka uka yahaofilagatiʼmo afela afu kahauya huka haeka alinikeka namiyo.

⁴ Hogoteka haekaeʼmo kaeka namiʼnanageno haga neʼnahaiya agufa kava huka kaeka alinika eno. Neteʼnaeʼmo aliʼna auleʼna kateteʼna faliguve, huno ha paiʼniye.

⁵ Lipekaʼmo afiʼnigenoʼaeʼmo Aisakiʼa Isofeʼmo ani gemo huno ha paiʼniye. Isoʼa afela afumo haeno alinino esiyafeʼmo yahaofilagamo ago uʼniye.

⁶ Lipekaʼa Yekopufeʼmo ha painoʼaeʼmo, hemenimo afiʼnogeno afokamoʼmo nepukamo Isofeʼmo ha painoʼaeʼmo,

⁷ Uka afela afumo haeka alinikeka haga nahaisiya agufa kava huka kaeka namigeʼna neteʼna Ala kava neʼmo aulagaleʼmo aliʼna auleʼna kateteʼna faliguve, huno ha paiʼniye.

⁸ Inagi mafaʼneʼnimogae, huʼna, hisuva geʼnimo afiteka akame huvo.

⁹ Hemenimo uka meme anagapatiʼmo ageka hogote aikeli memelaʼmo anavalelika nagaetegamo egeʼnao afokamoʼmo haga hauʼnigeno neʼneya agufa neʼyaʼmo kaegauve.

¹⁰ Kaesugeka Afokamoʼmo alinikuka amisanageno netenoʼaeʼmo alino auleno kateteno faligiye, huno ha paiʼniye.

¹¹ Ani ge huʼnigenoʼaeʼmo Yekopuʼa hunoʼaeʼmo, Afiyo, huno, Isoʼmo muki agufaʼalegamo ayoka kauʼe vekamo maiʼnigeʼna nagaemo nayoka oʼaeniya nagufaʼe vekamo maiʼnove.

¹² Fiku yanageno afoʼnimoʼmo nagufalegamo alino agetenoʼaeʼmo nagaefeʼmo humi natesana vekamoga nehane, huno huteno Gotiʼa alino auleno natesiya gemo naha opaino lifana kegeʼmo naha paigiye, huno ha paiʼniye.

¹³ Ha paiʼniyaʼmonanafa itaʼamoʼmo hunoʼaeʼmo, Mafaʼneʼnimo, huno, Hosu lifana gemo kaha paisiyaʼmoʼmo ani gemo nagaeteʼmo hanegaiye. Afaʼa geʼnimo akame huka uka lole memelaʼmo anavalelika nagaetegamo eno, huno ha paiʼniye.

¹⁴ Yekopuʼa uno lole memelaʼmo anavalelino itaʼamotegamo eʼnigeno itaʼamoʼa afoʼamoʼmo haga hauʼniya agufa neʼyaʼmo kaeʼniye.

¹⁵ Lipeka nopiʼmo Iso kukena yaʼamo maleʼniya yapatiʼmo ageno alagepa kukenamo alino henaga mafaʼneʼamo Yekopuʼmo vaino ateʼniye.

¹⁶ Vaino ateteno aikeli memelaʼmogani anakufaletiʼmo ayatalateʼe lugoʼafiʼeʼmo hayaeno ateʼniye.

¹⁷ Hayaeno atetenoʼaeʼmo haga hauʼniya neʼyaʼmo kaeʼniya neʼyaʼe peleti mayaʼeʼmo alino Yekopuʼmo amiʼniye.

¹⁸ Inagi Yekopuʼa afoʼamotegamo alininunoʼaeʼmo, Afo, huno huʼnigeno, Aisakiʼa ove, maiʼnogi mafaʼneʼnimo ina lagae, huno afi geʼniye.

¹⁹ Yekopuʼa hunoʼaeʼmo, nagaemo Isoʼnamo yege mafaʼnekamae. Nagaemo naha paiʼnana kavakeʼmo akame huʼna afela afumo ameʼamo kaeʼna aliniʼna eʼnove. Kahaoke hovanagi he tika alika neteka alika auleka nato, huno ha paiʼniye.

²⁰ Ha paiʼnigenoʼaeʼmo Aisakiʼa hunoʼaeʼmo, Mafaʼneʼnimogae, huno, haiya kava huka malage huka haeka alinika eʼnane, huno afi geʼnigenoʼaeʼmo, Ala kava neʼmo Gotikamokeʼmo naha maeteno nagaetegamo alino ateʼnigeno eʼnigeʼnaeʼmo haeʼnove, huno ha paiʼniye.

²¹ Aisakiʼa Yekopufeʼmo hunoʼaeʼmo, Kahaoke hovanagi nahaopaʼaleʼmo eʼnegeʼna kagufaleʼmo atafauʼna ageteʼna mafaʼneʼnimo Isogamo maiʼnapi huʼna kageno, huno huʼniye.

²² Yekopuʼa afoʼamo Aisaki haopaʼaleʼmo uʼnigeno agufaleʼmo atafauno alagepa huno agufaleʼmo atafauno agetenoʼaeʼmo, kagaemo Yekopu neʼaiya agufa kageʼmo neʼainaʼmonanafa kayatalaʼmo Iso ayatalakana huʼniye, huno huʼniye.

²³ Agaemo Yekopuʼae, huno ageno alagepa osuʼniye. Ayatalaʼmoʼa Iso ayatalakanaʼmo huʼniyaʼmofeʼmo alino auleno ateʼniye.

²⁴ Agaemo, Alagi lama ge huka kagaemo mafaʼneʼnimo Isogamofiye, huno afigeʼnigenoʼaeʼmo Yekopuʼa, he, nagaekeʼmae, huno huʼniye.

²⁵ Aisakiʼa hunoʼaeʼmo, Nagaemo aliʼna auleʼna katesuvafeʼmo ani neʼyaʼmo aliʼnikeka namigeʼna neno, huno huʼnigeno alinineno amiʼnigeno neʼnegenoʼaeʼmo nofi alagafati aniʼeʼmo amigeno neʼniye.

²⁶ Neteno Aisakiʼa hunoʼaeʼmo, mafaʼneʼnimogae, huno, hemenimo eka nahaopaletiʼmo nahaeka no, huno huʼniye.

²⁷ Yekopuʼa eno haopaletiʼmo haeno neʼnegenoʼaeʼmo kukenaʼaleʼmo atu faino afitenoʼaeʼmo alino auleno ateʼniye. Alagi lama ge huve, huno, mafaʼneʼnimo alagepa atuʼamoʼmo Ala kava neʼmoʼa alino auleno ateʼniya hoyafatiʼmo neʼaiya agufa alagepa atumo aiʼniye.

²⁸ Haniʼilagamo Gotiʼa kokuʼnapati lao yaʼmo alino ataleʼnigeno emineno alagepa mopafatiʼmo asole neʼyaʼe nofi alagafati aniʼeʼmo afole aigiye.

²⁹ Vayaʼmogimo aliʼyakamo aliʼa kategae. Muki kotega vayaʼmogimo kagae kaiyafiʼmo maigae. Kagaemo konagakamogiteʼmo yagaika apatesanageʼa kaiyafiʼmo maigae. Ala kava neʼmoʼa muki vayaʼmogi kagaemo aliʼa hosu huʼa katesaya vayaʼaifeʼmo lifana huno apategaiye. Ala kava neʼmoʼa aliʼa auleʼa katesaya vayaʼaina aulena gemo hapa paigiye, huno ha paiʼniye.

³⁰ Ani gemo huno ha paitegenoʼaeʼmo Yekopuʼa ago ataleno uʼniye. Neʼvigenoʼaeʼmo anile Isoʼmo yahaofilagatiʼmo eno avaʼyi huʼniye.

³¹ Agaemo afoʼamoʼmo haga hauʼniya agufa neʼyaʼmo kaeno alinino afoʼamotegamo eno, afoʼnimoʼmo he tino mafaʼneʼamoʼmo afela afumo ameʼamo kaeno alinino eʼniya neʼyaʼmo alino negaiye. Kagaemo Ala kava neʼmoʼa naha maesiyafeʼmo alika auleka nato, huno huʼniye.

³² Afoʼamo Aisakiʼa, ina lagamae, huno afi geʼnigenoʼaeʼmo, nagaemo yege mafaʼnekamo Isoʼnamae, huno ha paiʼniye.

³³ Aisakiʼa ani gemo afitenoʼaeʼmo lusi kava huno atete hutenoʼaeʼmo, hogoteno afela afumo haeno kaeno alinineno namiʼniya vekamo ina laʼmae. Oʼmeʼnanageʼnaeʼmo ago neteʼna Ala kava neʼmoʼa alino auleno atesiya gemo ago ha paiʼnovanageno Ala kava neʼmoʼa alino auleno ategaiye, huno huʼniye.

³⁴ Isoʼa afoʼamoʼmo huʼniya gemo afiʼnigenoʼaeʼmo aipamoʼmo lusi kava huno kana huʼnigeno alopa gefatiʼmo keya aeʼniye. O afoʼnimogae, huno, nagaeʼeʼmo Ala kava neʼmoʼa alino auleno natesiya gemo naha paiyo, huno huʼniyaʼmonanafa

³⁵ Aisakiʼa hunoʼaeʼmo, Kaganakamoʼmo ago eno nagaefeʼmo humi nateteno Ala kava neʼmoʼa alino auleno katesiya gemo afiteno uʼniye, huno ha paiʼniye.

³⁶ Isoʼa hunoʼaeʼmo, Hemenimo lole afinaʼmo humi gemo kateteno nagae naimuʼyamo ago aliʼniye. Ani kava huʼniyaʼmofeʼmo Yekopuʼmae agimo alagi alagepa huno haneʼniye. (Yekopuʼae agimo aepaʼamo alu vekamo aimuʼyamo alisiya vekae.) Nagaekeʼmo yege mafaʼnemogi neʼaliya yaʼmo alisuva vekamo maiʼnovaʼmonanafa agaemo ago aliteno nagae naimuʼyamo ago aliʼniye. Ageʼnapiye. Hemeniʼeʼmo Ala kava neʼmoʼa alino auleno natesiya gemo ago aliʼniye. Ala kava neʼmoʼa alino auleno natesiya gemo magoʼe ohaneʼnifiye, huno afi geʼniye.

³⁷ Aisakiʼa Iso geʼaleʼmo aeno atagaina huno ha painoʼaeʼmo, Nagaemo ala vekamo aliʼna ateʼnovanageno agaemo yagaino kategaiye. Nagaemo muki konagaʼamogimo aliʼyaʼamo alisaya vayaʼmo maigae, huteʼna ago aliʼna auleʼna ateʼnove. Nagaemo neʼyaʼe nofi alagafati aniʼeʼmo alisiyafeʼmo aliʼna auleʼna ateʼnove. Mafaʼneʼnimogae, huno, Kaha maesiya kavaʼmo na agufa kavaʼmo hisuve, huno huʼniye.

³⁸ Isoʼa afoʼamofeʼmo, Kagaemo mago alika auleka natesana gemo haneʼnifiye. Afoʼnimogae, huno, Kagaemo nagaeʼeʼmo alika auleka nato, huno huteno alopa gefatiʼmo huno kage kage huno aviʼyaʼmo huʼniye.

³⁹ Afoʼamo Aisakiʼa ha painoʼaeʼmo, kokamo alagepa mopaleʼmo ohanesigeno kokuʼnapati lao yaʼmo hoyakafiʼmo emiʼnoʼmegaiye.

⁴⁰ Kagaemo naipekaletiʼmo neʼyakaeʼmo kahauya huge alagepa huka maisana kavafeʼmo kahauya huge hugane. Kaganakamo aliʼyaʼamo alitekaeʼmo maika falu osuganaʼmofeʼmo henagaʼamo geʼamo amagika atalesanagenoʼaeʼmo yagaino okategaiye, huno ha paiʼniye.

⁴¹ Afoʼamoʼmo Yekopukeʼmo alino auleno ateʼniyaʼmofeʼmo Isoʼmo Yekopufeʼmo lusi kava huno aini huʼniye. Isoʼa aipafiʼmo hunoʼaeʼmo, afoʼnimoʼmo aise afinaʼmo maiteno falisigeta yulagefa aita maita hano nehutaeʼmo Yekopuna kamitimo amagisugeno faligiye, huno huʼniye.

⁴² Lipekaʼa hogote mafaʼneʼamo Isoʼa hisiya kavafeʼmo huʼniya gemo ago ha paiʼnae. Inagi agaemo henaga mafaʼneʼamo Yekopufeʼmo ge huʼnigeno ha painoʼaeʼmo, Afiyo, huno, Nepukamo Isoʼa hunoʼaeʼmo, alagi kamitimo amagisugeno naipamoʼmo falu hugiye, huno huʼniye.

⁴³ Ani agufa gemo nehiyaʼmofeʼmo mafaʼneʼnimogae, huno, ge hisuva gemo afiteka he tika kaune heka uka nasaʼnimo Lepaniʼmo Halani taonifi maiʼnegaiyanagi agaeʼeʼmo maiyo.

⁴⁴ Uka nasaʼnimoʼeʼmo aise afinaʼmo maiʼnegeno nepukamo aipamoʼmo falu hino.

⁴⁵ Maiʼnegenoʼaeʼmo huʼnana kavafeʼmo agekanisigeno aipamoʼmo falu nehisigeʼnaeʼmo mago vekamo aliʼna atesugeno uno kavalelino egaiye. Magokepiʼmo mafaʼneʼnilaʼmo nataletana falisaʼa kavafeʼmo oʼnahaiye, huno ha paiʼniye.

Aisakiʼa Yekopuʼmo alino ateʼnigeno Lepanitegamo uʼniya gemae

⁴⁶ Henagaʼamo Lipekaʼa Aisakifeʼmo ha painoʼaeʼmo, Hiti nofi vayaʼmogi a mafaʼnemogi nehaya kavaʼapieʼmo alagaʼmo neʼnahae. Yekopuʼa ani a mafaʼne anagapatiʼmo alisigeʼnaeʼmo nagaemo alagepa huʼna oʼmaiguvanageʼna faliguve, huno ha paiʼniye.