Aepa Gemae 25 - The Keyagana NT and 25 OT books

Emalehamuʼmo mago alu aginago vayaʼamogi apakimo haneʼniya gemae

^1-2 Emalehamuʼa mago alu aʼmo agiʼamo Ketulaʼmo aliteno Simalaniʼagi Yokasaniʼagi Metaniʼagi Mitiyaniʼagi Isimakiʼagi Suvaʼagi huno alino apateʼniye.

³ Yokasaniʼa Semaʼe Nenaʼeʼmo alino anateʼniye. Nena mafaʼne anagaʼmo Asulimiʼagi Letusimiʼagi Leyumimiʼagi huʼa maiʼnae.

⁴ Mitiyani mafaʼne anagaʼmo Efaʼagi Efeʼagi Hanokiʼagi Amitaʼagi Alataʼagi huʼa maiʼnae. Muki ani nofi vayaʼmo Ketula mafaʼne anagaʼmae.

⁵ Emalehamuʼa muki haneʼniya kagemi yaʼamo alino Aisakina amiʼniye.

⁶ Amiʼniyaʼmonanafa henagaʼaʼamo aliʼniya atala ani mafaʼne anagaʼmo mago amuse yaʼmo fiku hapa maeno apamiteno Aisaki maisiya haopaʼaleʼmo oʼmaisayafeʼmo yegemo haine neʼeya haopalegamo alino apateʼnigeʼa uʼnae.

Emalehamuʼmo faliʼnigeʼana Aisakiʼe Isameliʼeʼmo kiʼana ateʼnaʼa gemae

⁷ Emalehamuʼa vani hataleti seveti faefuʼa kafugamo maiteno faliʼniye.

⁸ Emalehamuʼa alagi kosunamo leteno kafugaʼamoʼmo alopa huʼnigeno aipamoʼmo falu huʼnigeno faliʼnigenoʼaeʼmo Gotiʼa aginago vayaʼaʼeʼmo alino anupa huno ateʼniye.

⁹ Faliʼnigeʼanaeʼmo lole mafaʼneʼalaʼmo Aisakiʼe Isameliʼeʼmo mago yafa kaʼmo agiʼamo Makipela yafa kaʼmo Yohaʼa Hiti nofi vekamo mafaʼnemo Efaloni mopamo Mamile taonimo haopale haneʼniya yafa kapiʼmo kiʼana ateʼnaʼae.

¹⁰ Emalehamuʼa Hiti nofi vayaʼmogi mopamo miya faiteno Selaʼmo kino ateʼniya mopaleʼmo Emalehamuʼmo kiʼana ateʼnaʼae.

¹¹ Inagi Emalehamuʼa ago falitegenoʼaeʼmo Gotiʼa Aisakiʼmo alino auleno ateʼniye. Aisakiʼa Mia Lahai Loi ani keli kotuʼmo haopaleʼmo maiʼniye.

¹² Emalehamuʼa Isipi a kanomoʼmo Sela aliʼyaʼamo aliʼniya aʼmo Hegaʼmo alino ateʼniya mafaʼnemo Isameli aginago vayaʼai apakimae.

^13-15 Isameli mafaʼne anagaʼmogi apakiʼapimo yege mafaʼneʼamo Nemahotiʼmo alino atetenoʼaeʼmo Ketaʼagi Aʼmiliʼagi Mimisamaʼagi Misimaʼagi Numaʼagi Masaʼagi Hataʼagi Temaʼagi Yetuliʼagi Nafisiʼagi Ketemaʼagi huno alino apateʼniye.

¹⁶ Isameli ve mafaʼne anagaʼamogi apakiʼapimae. Mani tuolofuʼa mafaʼne anagaʼmogimo muki maiʼnayate maiʼnaya haopalegamo taoniʼaeʼmo apakaiʼapi apakileʼmo ateʼnae. Mani tuolofuʼa konagaʼmogimo tuolofuʼa nofi vayaʼai apakinago vayaʼmo maiʼnae.

¹⁷ Isameliʼa vani hataleti teti seveniʼa kafugamo maiteno faliʼnigeʼapaeʼmo vayaʼamo eʼa aliʼa anupa huʼnae.

¹⁸ Isameli aginago vayaʼmo Havila koʼe Su koʼeʼmo hanetegeʼa folagapiʼmo maiʼnae. Isipi koʼmo hanetegeʼa yegemo haine neʼeya haopalegamo Su koteʼmo maiʼnae. Apakaemo vayaʼapimogi folagapiʼmo maiʼnae.

Lipekaʼa Isoʼe Yekopuʼeʼmo alino anateʼniya gemae

¹⁹ Mani gemo Emalehamu mafaʼnemo Aisakifeʼmo ava gemo haneʼniye.

²⁰ Aisakiʼa fotiʼa kafugamo maitenoʼaeʼmo aʼamo Lipekaʼmo aliʼniye. Lipeka afoʼamoʼmo Metuveliʼa Siliya nofi vekamo Pata Alami kotegamo maiʼniya vekamo a mafaʼnemae. Lipeka asaʼamoʼmo Lepaniʼeʼmo Siliya nofi vekamae.

²¹ Aisaki aʼmo Lipekaʼa mafaʼnemo alino oʼateʼnigenoʼaeʼmo Aisakiʼmo Ala kava nefeʼmo nunumuʼmo huʼnigeno Ala kava neʼmoʼa afitenoʼaeʼmo ha maeʼnigeno Lipekaʼmo aipaguʼeʼmo maiʼniye.

²² Lole mafaʼnelaʼmo aipafi maiʼneʼana kanage huʼnaʼae. Lipekaʼa, na kava higenoʼaeʼmo mani agufa kavaʼmo nagaetega afole neʼaiye, huno huteno ani kavaʼmo aepaʼamo afisiyafeʼmo Ala kava netegamo uno nunumuʼmo huno ge huno afi geʼniye.

²³ Ala kava neʼmoʼa Lipekafeʼmo ha painoʼaeʼmo, Kaipafiʼmo lole nofi vekalaʼmo maiʼnaʼae. Kagaepatiʼmo lole nofi vekalaʼmo aliʼana fako huʼana mago nofi vekamo vayaʼmogi alu nofi vekamo vayaʼmo aeʼa apaka seʼa maigae. Yege mafaʼnemoʼmo aganaʼamo aiyafiʼmo maiʼneno aliʼyaʼamo aligiye, huno ha paiʼniye.

²⁴ Lipekaʼa mafaʼnemo alino atesiya kanaʼamo ago hano hutegenoʼaeʼmo lagoʼya mafaʼnelaʼmo alino anateʼniye.

²⁵ Hogoteno afole aiʼniya mafaʼnemo haesa agufamo haneʼnigeno muki agufaʼalegamo asole ayokaʼmo aeʼniyaʼmofeʼmo agiʼamo Isoʼae huʼa ateʼnae.

²⁶ Henagaʼamo aganaʼamoʼmo afole neʼainoʼaeʼmo Iso aiya kigupaleʼmo ayatetiʼmo atafauʼniye. Ina kava huʼniyaʼmofeʼmo agiʼamo Yekopuʼae huʼa ateʼnae. Aisakiʼa sigisitiʼa kafugamo neʼmaigenoʼaeʼmo Lipekaʼmo ani lole mafaʼnelaʼmo alino anateʼniye.

Isoʼa yege mafaʼnemogimo neʼaliya yaʼamo ataleʼniya gemae

²⁷ Lole mafaʼnelaʼmo ago kositeʼanaeʼmo Isoʼa umenitata huno yahaofilagatiʼmo yagagafamo haesiya kavaʼmo ageʼniya vekamo maiʼnigeno Yekopuʼa yuna vekamo maiʼneno noteʼmo seli nopikeʼmo neʼmaiya vekamo maiʼniye.

²⁸ Isoʼa afela afumo haeno kaeno alinineno Aisakiʼmo amiʼniyaʼmofeʼmo Isofeʼmo hau ayamopafi hauʼnigeno Lipekaʼa Yekopufeʼmo hau ayamopafiʼmo hauʼniye.

²⁹ Mago afinaʼmo Yekopuʼa hefa samofiʼmo haga nehiya agufa yaʼmo ateteno nekaegeno Isoʼa yahaofilagatiʼmo aga teʼnigeno aunena aisiya agufa kavaʼmo huʼnigeno eʼniye.

³⁰ Isoʼa Yekopufeʼmo hunoʼaeʼmo, naunena aisiya agufa kavaʼmo nehigi ani haesa hefa samokafatiʼmo mago hatika namigeʼna neno, huno huʼniye. Ani ge huʼniyaʼmofeʼmo Isofeʼmo alu agiʼamo Itomiʼae, huʼa ateʼnae. Itomiʼae agimo aepaʼamo haesane.

³¹ Yekopuʼa hunoʼaeʼmo, Hogoteka kagaemo yege mafaʼnemogi neʼaliya aulena yaʼmo nagaeteʼmo maketi hugeʼna nagaemo neʼyatetiʼmo miya faitesugekaekeʼmo negane, huno huʼnigeno

³² Isoʼa hunoʼaeʼmo, Afiyo, huno, ago hogoʼamo falisuva kavaʼmo nehuvaʼmofeʼmo yege mafaʼnemoʼnamo aliʼnova yaʼnimoʼa haiya kava huno naha maegaiye, huno huʼnigenoʼaeʼmo

³³ Yekopuʼa hunoʼaeʼmo, He, alagi lama gemo nehuvanageʼna afaʼa kamiguve, huka kagoʼyamo ataleteka naha paiyo, huno huʼnigenoʼaeʼmo Isoʼa agoʼyamo ataleteno kamiguve, huno huteno amiʼniye.

³⁴ Amitegeno Yekopuʼa Isoʼmo peleti mayaʼe haesa hefaʼeʼmo amiʼnigeno aniʼeʼmo neteno he tino uʼniye. Isoʼa ani kavaʼmo huʼniya kavatetiʼmo yege mafaʼnemoʼmo aliʼniya yaʼaeʼmo ina agufa yane, huno huʼniye.