Aepa Gemae 23 - The Keyagana NT and 25 OT books

Selaʼmo faliʼnigenoʼaeʼmo kino atesiya mopamo Emalehamuʼa miya faiʼniya gemae

^1-2 Selaʼa vani hataleti tuveti seveniʼa kafugamo maiteno Kiyati Ama taonimo alu agiʼamo Hemiloni taonifi Kenani mopaleʼmo faliʼniye. Faliʼnigenoʼaeʼmo Emalehamuʼa hau huʼnigeno aviʼyaʼmo huʼniye.

³ Emalehamuʼmo Sela agufaʼamo haneʼniya yateʼmo maiʼniyatetiʼmo he tino Hiti nofi vayaʼaifeʼmo hunoʼaeʼmo,

⁴ Nagaemo kalaga hageʼna kalaga vekamo eʼna lapakae folagapiʼmo maiʼnove. Aʼnimo ago faliʼniyanageʼna kiʼna atesuvafeʼmo mago mopamo miya faigesuve, huno ge huno apafi geʼnigeʼapaeʼmo

⁵ Hiti mafaʼne anagaʼmogimo Emalehamu geʼaleʼmo aeʼa atagaina huʼapaeʼmo,

⁶ Ala vekae, huʼa, getimo afiyo. Kagaemo hogote lokiya vekamo lagaeteʼmo vayatama vekamo maiʼnanaʼmofeʼmo lagae mopaleʼmo alagepa kanolufiʼmo afaʼa kika ategane. Haiya mopale kanoluʼmo aliguve, huka hisapi ani kanoluʼmo afoʼamoʼmo afaʼa kamisigeka akamo kika ategane, huʼa ha paiʼnae.

⁷ Inagi Emalehamuʼa ani gemo afitenoʼaeʼmo mopa aepa vayaʼmo Hiti mafaʼne anagaʼai apaulagaleʼmo he tino maiʼneno ape huʼniye.

^8-9 Agaemo ina ge huno hapa paiʼniye. Lapakaemo mani haopalegamo aʼnimo kiʼna atesuvafeʼmo lapauʼnisiyaʼmoʼmo Efaloniʼa Soha mafaʼneeʼmo ge hutapa afitapa nategenoʼao agaemo Makapela yafa kaʼmo mopaʼamo agiʼnaleʼmo nateno, huno hapa paiʼniye.

¹⁰ Efaloniʼa Hiti mafaʼnemogi folagapiʼmo fai maiʼneno muki ani Hiti mafaʼne anagaʼai apaulagaleʼe taoniʼamo kegiʼya kipatetiʼmo eʼa hai eʼnaya vayaʼai apaulagaleʼeʼmo Emalehamufeʼmo ha painoʼaeʼmo,

¹¹ Ala vekaʼnimogae, huno, Geʼnimo afiyo. Ani yafa kaʼmo miya ofaigane. Nagaemo yafa kaʼe ani mopaʼaʼeʼmo afaʼa kamiguve. Nagaemo vayaʼnimogi apaulagaleʼmo fikumo kamuvanagi akamo afaʼa kika ato, huno ha paiʼniye.

¹² Inagi Emalehamuʼa ani gemo afitenoʼaeʼmo ani vayaʼai apaulagaleʼmo ape huʼniye.

¹³ Huteno agaemo muki ani mopale vayaʼai apaulagaleʼmo Efalonifeʼmo ina ge huno ha paiʼniye. Kagaemo mopamo namigefe hisanana kahaoke hovanagi geʼnimo afiyo. Nagaemo ani mopakamo miya faiguvanagi monimo aliyo. Aʼnimo ani yate kiʼna ategauve, huno ha paiʼniye.

^14-15 Efaloniʼa geʼaleʼmo aeno atagaina huno ha painoʼaeʼmo, Ala vekaʼnie, huno, afiyo. Ani mopalefeʼmo miyaʼamo faefu kilo siluva yafaʼmo haneʼniyaʼmonanafa laʼagaitiʼamogeka akamo afaʼa kika ategane.

¹⁶ Emalehamuʼa Efaloniʼmo huʼniya geleʼmo, he, huteno faefu kilo siluva yafaʼmo sigelileʼmo maleno ageteno amiʼniye. Emalahamuʼa Efaloniʼmo muki vayaʼai apaulagaleʼmo ani aliguve huno agi aeʼniya siluva yafaʼmo amiʼniye.

^17-18 Amiʼnigeno Efaloniʼa Makipela mopamo Mamali taonimo haneʼniya haopaleʼmo haneʼniya mopagi anile haneʼniya yafa kanagi muki ani mopaleʼmo haneʼniya yosagi huno Emalehamuʼmo amiʼniye. Agaemo Hiti mafaʼne anagaʼai apaulagaleʼe taonimo yafa kegiʼya kipatetiʼmo eʼa hai eʼnaya vayaʼai apaulagaleʼeʼmo amiʼniye.

¹⁹ Inagi ani kavaʼmo hutenoʼaeʼmo Emalehamu aʼamo Selaʼmo ani Makipela mopamo Mamali taonimo alu agiʼamo Hemaloni taonimo haopale Kenani koteʼmo haneʼniya yafa kapiʼmo kino ateʼniye.

²⁰ Ani haopalegamo Hiti nofi vayaʼai mopaleʼmo haneʼniya yafa kaʼmo Emalehamuʼmo amiʼnageno agaiʼa mopaleʼmo kanoluʼmo haneʼniye.