Aepa Gemae 20 - The Keyagana NT and 25 OT books

Emalehamuʼe Amimelekiʼefeʼmo huʼniya gemae

¹ Emalehamuʼa aniletiʼmo ataleno hoga haopalegamo uno Kanesi taoniʼe Su koʼeʼmo aluga alugamo hanetaʼageno folagapiʼmo aʼamo Selaʼeʼmo maigeʼana halate inaleti atale uʼana Gela taonifiʼmo kalaga hageʼana uʼana kalaga vayaʼmo maiʼnaʼae.

² Emalehamuʼa Gela taonifi vayaʼaifeʼmo hapa painoʼaeʼmo, Selaʼmo nasaʼnimoʼae, huno hapa paiʼnigeno Amimelekiʼa Gela kini vekamoʼmo mago vayaʼmo alino apateʼnigeʼa uʼa Selaʼmo avaleliʼa eʼnageno aliʼniye.

³ Aliʼnigeno Gotiʼa haniʼilagamo Amimelekitegamo emineno alagamuna kategatiʼmo ha painoʼaeʼmo, ani aliʼnana a kanomo vele aʼmo aliʼnananageka hemenimo faligane, huno ha paiʼniye.

⁴ Huʼniyaʼmonanafa Amimelekiʼmo Sela haopaleʼmo oʼuʼniyaʼmofeʼmo, Ala kava nene, huno, fatago nofi vayaʼeʼmo afaʼa fikumo apamagigapiye.

⁵ Emalehamuʼa hunoʼaeʼmo, Nasaʼnimoʼae, huno huʼniye. Aʼamoʼeʼmo hunoʼaeʼmo, Emalehamuʼmo nasaʼnimoʼae, huno naha paiʼniyaʼmofeʼmo mani a kanomo aliʼnovana hosu kavaʼmo huʼnove, huʼna oʼageʼnove, huno ha paiʼniye.

⁶ Ha paiʼnigeno Gotiʼa alagamuna kategatiʼmo ha painoʼaeʼmo, He, huno, kageʼnovana kagaemo alagepa kaipa kagesamo haneʼnigekaeʼmo ani kavaʼmo huʼnane. Nagaetegamo hosu kavaʼmo osisanafeʼmo ka akaniʼna kateʼnovaʼmofeʼmo agufaleʼmo afaʼa ame oʼaliʼnane.

⁷ Ani kava huʼniyaʼmofeʼmo hemenimo alika ategeno anauʼamotegamo vino. Agaemo aune gemo nehiya vekaʼnimo maiʼniyanageno nagaefeʼmo nunumuʼmo huno katesigeka ofaligane. Ani a kanomo anauʼamotegamo alika atesanageno oʼvisiyaʼmoʼmo kagaikaʼe vayakaʼeʼmo ago alagi faligune, huka kagesamo afiyo.

⁸ Inagi gotilamiyapiʼmo Amimelekiʼa he tino muki aliʼyaʼamo neʼaliya vayaʼaifeʼmo keya aeno ge huʼnigeʼa eʼnagenoʼaeʼmo Ala kava neʼmo ha paiʼniya gemo hapa paiʼnigeʼapaeʼmo lusi kava huʼa koli huʼnae.

⁹ Amimelekiʼa Emalehamufeʼmo keya aeno ge huʼnigeno eʼnigeno ha painoʼaeʼmo, Lagaetegamo na agufa kavaʼmo huʼnane. Nagaemo na agufa hosu kavaʼmo kagaetegamo huʼnogekaeʼmo nagaeʼe muki yagaiʼna neʼapatova vayaʼeʼmo vaiʼmo lamiʼnane. Kagaemo nagaetegamo huʼnana kavaʼmo alagi osisana agufa kavaʼmo huʼnane.

¹⁰ Na agufa kavafeʼmo kagesamo afitekaeʼmo ani kavaʼmo huʼnane, huno afi geʼnigenoʼaeʼmo,

¹¹ Emalehamuʼa hunoʼaeʼmo, Mani kote maiʼnaya vayaʼmogi Gotifeʼmo koli nosayanageʼa aʼniletifeʼmo kamitimo namagigae, huʼna nagesamo afiʼnove.

¹² He lama gemo huno Selaʼmo nasaʼnimoʼae. Afoʼnimo aʼmafaʼnemo maiʼniyaʼmonanafa itaʼnimo aʼmafaʼnemo oʼmaiʼniyaʼmofeʼmo aʼnimo maisiyafeʼmo aliʼnove.

¹³ Gotiʼa alino he tino nateʼniyaʼmofeʼmo afoʼnimoʼmo ataleʼna alu vayaʼai kotegamo umenitata huʼna neʼmauvanageʼna Selafeʼmo huʼnaeʼmo, Nagaemo alagepa huka naha maesanafeʼmo laʼagaemo haiya haopalegamo visuʼafi kagaemo muki vayaʼaifeʼmo, Emalehamuʼmo nasaʼnimoʼae, huka hapa paiyo, huʼna ha paiʼnove, huno ha paiʼniye.

¹⁴ Inagi Amimelekiʼa halate Selaʼmo avaleno Emalehamuna amiteno sipisipigi pulumakagi aliʼyaʼamo neʼaliya vayanagi huno apavaleno amiʼniye.

¹⁵ Amimelekiʼa hunoʼaeʼmo, Ago, huno, muki ma mopaʼamo nagae mopamo haneʼniyanagi amuse hisana haopalegamo afa uka maiyo, huno ha paiteno

¹⁶ Selafeʼmo hunoʼaeʼmo, Ago, huno, Nagaemo kasakamoʼmo vani tauseniʼa siluva yafaʼmo amuve. Amuva kavatetiʼmo kagaetegamo afole aiʼniya kana yaʼmo aliʼna fako huvanageʼa kagaeʼeʼmo magokepi lokaeʼa maiʼnaya vayaʼmogiʼe muki vayaʼmogiʼeʼmo, Selaʼa hosu kavaʼmo osuʼniye, huʼa hisayafeʼmo ani miyaʼmo ago amuve. Ani gemo huʼniya geletiʼmo alino api aino ateʼniye.

^17-18 Ala kava neʼmoʼa Selateʼmo afole aiʼniya kavatetiʼmo Amimeleki nofi vayaʼai aʼne anagaʼmogi apaipamo alino akani maleʼnigeʼa mafaʼnemo afaʼa aliʼa oʼateʼnae. Huʼniyaʼmofeʼmo Emalehamuʼa Gotifeʼmo nunumuʼmo huʼnigeno Gotiʼa Amimelekiʼagi aʼagi aliʼyaʼamo neʼaliya aʼne anaganagi huno mafaʼnemo aliʼa atesayafeʼmo alino kanale huno apateʼnigeʼa henagaʼamo mafaʼne aliʼa apateʼnae.