Aepa Gemae 19 - The Keyagana NT and 25 OT books

Satomi taonifi maiʼnaya vayaʼmogimo hosu kavaʼmo huʼnaya gemae

¹ Lotiʼa uneʼmo Satomi taonile yafa lafi kegiʼyamo alopa kipateʼmo fai maiʼnigeʼanaeʼmo lole enisole vekalaʼmo Emalehamutegamo eʼnaʼa vekalaʼmo agaetegamo eʼnaʼageno anaketenoʼaeʼmo he tino uno anakaeteʼmo aleʼyaʼmo faino ape huʼniye.

² Agaemo hunoʼaeʼmo, Ala vekalane, huno, nagae notegamo eʼao. Nagae nopiʼmo etana lanaiyamo sese hutesaʼageta havaegaune. Inagi netepiʼmo he titana ugaʼae, huno huʼniyana, Haʼao, laʼagaemo manileʼmo aliʼa anupa huʼa neʼmaiya yateʼmo havaegauʼae, huʼana huʼnaʼaʼmonanafa

³ Lotiʼa lokiya gefatiʼmo magoʼe gemo hunoʼaeʼmo, ugune, huno huʼnigeʼana ataleʼana agae notegamo uʼa noʼafiʼmo uʼa haiʼnae. Lotiʼa yisimo oʼateʼniya peleti mayamo kaeteno alopa neʼyaʼmo kaeno anateʼnigeʼana neʼnaʼae.

⁴ Ohavaeʼana maiʼnaʼageʼapaeʼmo ani Satomi taonifati neya vayaʼe alopa vayaʼeʼmo muki haopaʼalegatiʼmo ete ete huʼa noteʼmo faiʼa vego huʼnae.

⁵ Apakaemo Lotifeʼmo keya aeʼa ge huʼapaeʼmo, Ani kagaeʼeʼmo havaesaʼafeʼmo eʼnaʼa vekalaʼmo haiyate maiʼnaʼae. Ani lole vekalaʼmo alika anategeʼana kumategamo emi esaʼageta anakaeʼeʼmo kumai kavaʼmo hugesune, huʼa ge huʼnae.

⁶ Inagi Lotiʼa kipatetiʼmo kumatega uno nelaminoʼaeʼmo akamelegatiʼmo kita ki maleteno,

⁷ Vayaʼnimogitapae, huno, lapaoke hovanagi lapakaemo ani agufa hosu kavaʼmo osiyo.

⁸ Loleʼa mafaʼneʼnilaʼmo mago veʼeʼmo lokaeʼana ohavaeʼnaʼae. Nagaemo anavaleliʼna eminesugetapa lapakaemo lapauʼnisiya kavaʼmo anakaeʼeʼmo afaʼa hugae. Hugayaʼmonanafa ani lole vekalaʼmo noʼnifi havaesaʼafeʼmo eʼana maiʼnaʼanageʼna ani anakaeteʼmo alagepa huʼnagekeʼmo yagaiʼna anategauvaʼmofeʼmo anakaetegamo mago agufa kavaʼmo afaʼa alagi osugae, huno hapa paiʼniye.

⁹ Apakaemo huʼapaeʼmo, alika ho huʼnegetao. Ani vekamo kalaga vekamoʼmo agaiʼamo he tino maiʼneno kavatimo alino fako hisiyafekeʼmo nehiye. Lagaemo lole vekalaʼanitegamo hosu kavaʼmo nehuta kagaetegamo magoʼe huta hosu kavaʼmo hugune, huʼa huteʼa apayamukiki huʼa aliʼa agoʼya failiʼa uʼa haiʼa kitamo maleʼa yakisaya agufa kavaʼmo huʼnae.

¹⁰ Huʼnayaʼmonanafa lole vekalaʼmoganimo anayaʼmo atalaʼageno emineʼnigeʼana Lotiʼmo heʼana avayu huliʼana nopilagamo uʼana nehaiʼanaeʼmo kitamo kiʼnaʼae.

¹¹ Anakaemo muki kumatega maiʼnaya vayaʼai apaulagaleʼmo aiʼana akaniʼnaʼageʼa kipafeʼmo lusi kava huʼa kahauya hugeteʼa alagaʼmo hapaeʼnigeʼa oʼageʼa ataleʼnae.

¹² Inagi lole vekalaʼmoganimo Lotifeʼmo ina ge huʼana ge huʼana afi geʼnaʼae. Mago vayakamo mani taonifiʼmo maiʼnafi oʼmaiʼnae. Kagaemo muki mafaʼne anagakagi kayemokamogimogi a mafaʼne anagakagi muki vayakagi huka mani taonifatiʼmo apavalelika uvo.

¹³ Alopa hosu kavaʼmoʼa mani taonifatiʼmo keya neʼaegeno Ala kava neʼmo aulagaleʼmo afole aiʼniyaʼmofeʼmo laʼagaemo alino laʼateʼnigetaʼa emiteʼnoʼanagetaʼa ago alitaʼa hano huta atalegauʼae.

¹⁴ Inagi Lotiʼa uno lamino ayemoʼalaʼmoganifeʼmo hana painoʼaeʼmo, Ala kava neʼmoʼa mani taonimo alino hano huno atalesiyafeʼmo hiyanagi mani taonifatiʼmo ataletana he titana viʼao, huno hana paiʼniyana ayemoʼalaʼmoganimo afaʼa kigi yokalo gegeʼmo nehiye, huʼana anakesamo afiʼnaʼae.

¹⁵ Konetigeʼanaeʼmo lole enisole vekalaʼmoganimo Lotifeʼmo, malage huka he tika akaʼe a mafaʼnekalaʼenagi huka apavaleteka mani taonifatiʼmo ataletapa viyo. Fiku yanageno lapakaeʼe mani taonifi maiʼnaya vayaʼeʼmo magokepi atamoʼmo leno lapasagaligiye, huʼana ha paiʼnaʼae.

¹⁶ Ha paiʼnaʼaʼmonanafa Lotiʼa malage huno he tino oʼuʼnigeʼanaeʼmo lole vekalaʼmoganimo Loti ayatenagi aʼamo ayatenagi lole a mafaʼneʼalaʼmogani anayatenagi huʼana aliteʼana apavaleli uʼana taonimo malaga apateʼnaʼae. Ala kava neʼmoʼa Lotifeʼmo hau huno ateʼniyaʼmofeʼmae.

¹⁷ Malaga uʼana apateteʼanaeʼmo mago enisole vekamoʼmo hunoʼaeʼmo, ofalitapa afaʼa maisayafeʼmo faita kasalo paetaletapa lapaune hetapa viyo. Neʼutapaeʼmo halate lapakamelegamo aita afe letapa oʼageyo. Lapakaemo mani otufiʼmo oʼmaitapa faita kasalo paetaletapa uta haitapa avelegamo maiyo fiku yanagetapa faligae, huno ha paiʼniye.

¹⁸ Lotiʼa hunoʼaeʼmo, Ala vekalane, huno, lanahaoke hove. Mani naha paiʼa kavaʼmo nagaemo afaʼa osuguve.

¹⁹ Nagaemo fikumo naha maeka namiʼnana kavaʼmo ago ageʼnove. Kagaemo magoʼe huka kahau huka nateteka nagufaʼnimo alika katika nateʼnanaʼmonanafa faiʼna kasalo paeʼna avelegamo uʼna haiʼna maisuvana mago hosu kavaʼmoʼa natafausigeʼna faliguve.

²⁰ Kagaemo mago aise taonimo uma haneʼniyanagi ago. Hogoʼaleʼmo haneʼniyanagi afaʼa natalegeʼna faiʼna kasalo paeʼna uʼna ani taonifiʼmo maino, huno ha paiʼniye.

²¹ Enisole vekamoʼmo, He, kanalene, huno, naha paina gelefeʼmo fikumo kaha maeʼna kamiguve. Ani taonimo aliʼna hano huʼna oʼatalegauve.

²² Mani taonifatiʼmo malage huka faika kasalo paetaleka uvo. Nagaemo mago kavaʼmo afaʼa osuʼna maiʼnisugeka umani taonifiʼmo uka avaʼyi hugane, huno ha paiʼniye. Ani taonimo agiʼamo Sova taoniye ani agimo aepaʼamo aiseʼamae.

Ala kava neʼmoʼa Satomi taoniʼe Gomola taoniʼeʼmo alino hano huno ataleʼniya gemae

²³ Yegemo ago haineno avaʼyi nehigenoʼaeʼmo Lotiʼa Sova taonifiʼmo uno avaʼyi huʼniye.

²⁴ Uno avaʼyi nehigenoʼaeʼmo Ala kava neʼmoʼa kokuʼnapatiʼmo atamo neleya yafaʼe ataʼeʼmo alino atalegeno Satomi taonifiʼe Gomola taonifiʼeʼmo asagauno aiʼniye.

²⁵ Ala kava neʼmoʼa ani kavaʼmo huno lole taonilanagi otu konagi muki ani taonilapiʼmo maiʼnaya vayanagi mopafatiʼmo lagiʼniya kahaugi yosagi neʼyanagi huno atamoʼmo leno sagalino hano huno ataleʼniye.

²⁶ Huʼniyaʼmonanafa Loti aʼmoʼmo Lotiʼmo akame huno neʼunoʼaeʼmo halate aino afe leno akamelegamo aulu heno neʼagegenoʼaeʼmo malage huno hage posi yosagana huno alino hamaleʼniye.

²⁷ Gotilamiyapiʼmo Emalehamuʼa Ala kava neʼmo aulagaleʼmo he tiʼniya haopalegamo uʼniye.

²⁸ Agaemo he tino aulu heno ageyana Satomi taonifatiʼe Gomola taonifatiʼenagi muki otu kotegatinagi huno alopa sitopufatiʼmo lusi halinamo neʼaiya kava huno aiʼnigeno ageʼniye.

²⁹ Gotiʼa muki otuleʼmo haneʼniya taoniʼamo ata kaeno sagalino ataleʼniyana Emalehamufeʼmo age okanino agesamo afige Loti maiʼniya taonimo alino hano huno ataleʼniyaʼmonanafa Lotiʼmo ago alino ateʼnigeno uge huʼniye.

³⁰ Inagi Lotiʼe lole a mafaʼneʼalaʼeʼmo Sova taonifatiʼmo ataleʼa mago avefiʼmo uʼa haiʼa yafa no kapiʼmo maiʼnae. Sova taonifiʼmo maisiyafeʼmo koli huʼniyaʼmofeʼmae.

³¹ Ani yafa nokapi maiʼneʼapaeʼmo yege a mafaʼneʼamoʼmo aganaʼamofeʼmo ina ge huno ha paiʼniye. Afotiʼamoʼmo ago kosuna leʼniyaʼmofeʼmo mago vemo laʼagaetegamo esageta muki ma mopafi vayaʼmogi nehaya kavaʼmo hutaʼa mago ve kanoʼeʼmo magokepi lokaetaʼa ohavaegauʼae. Mago vemo muki ma mopafiʼmo oʼmaiʼnayaʼmofeʼmae.

³² Inagi laʼagaemo malage hutaʼa ugetaʼao. Laʼagaemo nofi alagafati aniʼmo alinitutaʼa afotiʼamoʼmo amisuʼageno neteno negi nagi hugiye. Inagi laʼagaemo agaeʼeʼmo magokepi lokaetaʼa havaesuʼageno laʼagaepatiʼmo mago mafaʼnemo afole aigae. Afotiʼamo nofi vayaʼmo hano osuʼa afaʼa maisayafeʼmae.

³³ Inagi ani haniʼilagamo nofi alagafati aniʼmo amiʼnaʼageno netenoʼaeʼmo negi nagi huʼniye. Ani kavaʼmo huʼnigenoʼaeʼmo yege a mafaʼneʼamo uno agaeʼeʼmo magokepi lokaeno havaeʼniyaʼmonanafa Lotiʼmo a mafaʼneʼamo eno havaeʼniya kavaʼmo oʼagege he tino uʼniya kavaʼmo oʼagege huʼniye.

³⁴ Inagi egaʼamo yege a mafaʼneʼamoʼmo aganaʼamofeʼmo ha painoʼaeʼmo, Ega haniʼilagamo afoʼnimoʼeʼmo magokepi lokaetaʼa havaeʼnoʼae. Hemeni haniʼilagamo halate nofi alagafati aniʼmo amisuʼageno neteno negi nagi nehisigeka kagaemo uka ani kava huka agaeʼeʼmo magokepi lokaeka havaegane. Kagaemo mafaʼnemo alika atesanageʼapaeʼmo agae nofi vayaʼmo hano osuʼa afaʼa maigae, huno ha paiʼniye.

³⁵ Inagi haniʼilagamo anakaemo afoʼanimoʼmo halate ani kavaʼmo huʼana nofi alagafati aniʼmo amiʼnaʼageno netegeʼanaeʼmo aganaʼamoʼeʼmo magokepi lokaeʼana havaeʼnaʼae. Agaemo a mafaʼneʼamo eno havaeʼniya kavaʼmo oʼagege he tino uʼniya kavaʼmo oʼagege huʼniye.

³⁶ Lole a mafaʼneʼalaʼmoganimo ina kava huʼana afoʼanimo Loti anaipaguʼeʼmo maiʼnaʼae.

³⁷ Yege a mafaʼnemoʼmo ve mafaʼnemo alino ateteno agiʼamo Movapuʼae huno ateʼnigeno Movapu vayaʼai afoʼapimoʼmo maiʼnigeʼa agaepatiʼmo Movapu nofi vayaʼmo afole aiteʼa maime maime eʼa hemenimo maiʼnae.

³⁸ Aganaʼamoʼmo ani kava huno ve mafaʼnegeʼmo alino ateteno agiʼamo Menamiʼae huno ateʼnigeno Emoni vayaʼai afoʼapimoʼmo maiʼnigeʼa agaepatiʼmo Emo nofi vayaʼmo afole aiteʼa maime maime eʼa hemenimo kanaleʼmo maiʼnae.