Aepa Gemae 18 - The Keyagana NT and 25 OT books

Ala kava neʼmoʼa Selafeʼmo, ve mafaʼnemo alika ategane, huno ha paiʼniya gemae

¹ Henagaʼamo Mamale kotega alopa yosamo aepafiʼmo Ala kava neʼmo agaetegamo afole aiʼniyana Emalehamuʼmo lusi kava huno amuko huʼniya afinaʼmogeno seli noʼamo kipateʼmo itopaleʼmo fai maiʼniye.

² Emalehamuʼmo alino maku huno ageyana loleʼe magoʼe ve anagaʼmo he tiʼa maiʼnageno apakeʼniye. Apaketenoʼaeʼmo seli noʼamo ataleno malage huno nagu nagu huno uno apakaeteʼmo ape huʼniye.

³ Ape huʼnenoʼaeʼmo, Ala kava neʼnimogae, huno, Kaulagaleʼmo fikumo naha maeka namisana kaʼmo ageʼnisuvana aliʼyakamo neʼaluva vekamo naga setapa oʼviyo.

⁴ Kahaoke hove. Nagaemo aniʼmo hefiliʼneʼna lapaiyamo sese huʼna lapatetenagetapa yosa aepafiʼmo maitapa haga legae.

⁵ Nagaemo uʼna mago lapakufamo hamaeno alino lokiya vaino lapatesiyafeʼmo aise neʼyaʼmo aliniʼneʼna lapamisugetapa netetapaekeʼmo henagaʼamo afaʼa ugae. Lapakaemo nagae noteʼmo eʼnayaʼmofeʼmae, huno hapa paiʼnigeʼapaeʼmo kanalenagi kagaemo ani kavaʼmo afaʼa huvo, huʼa ha paiʼnae.

⁶ Emalehamuʼa malage huno seli nopiʼmo uno haino Selafeʼmo ha painoʼaeʼmo, Malage huka kanale falaovamo alopaʼamo alika peleti mayamo kao, huno ha paiteno

⁷ Emalehamuʼmo pulumaka anagaʼamo maiʼnayategamo nagu nagu huno uno mago alagepa afayaʼe aikeli pulumakamo avalelineno mago aliʼyaʼamo neʼaliya neya vekamo amiʼnigeno malage huno amagino afa kaiteno lagauno kaeʼniye.

⁸ Ameʼamo ago leʼnigenoʼaeʼmo Emalehamuʼa ani ameʼagi nuʼanuʼaletiʼmo alo hu maleʼnaya kalisigi nuʼanugi huno alinino uno apamiteno yosa aepafiʼmo he tino maiʼnigeʼa neʼnae.

⁹ Apakaemo neteʼapaeʼmo Emalehamufeʼmo huʼapaeʼmo, Akamo Selaʼmo haiyate maiʼniye, huʼa ge huʼa afi geʼnagenoʼaeʼmo, Ani seli nopiʼmo maiʼniye, huno hapa paiʼniye.

¹⁰ Apakaepatiʼmo mago vekamoʼmo hunoʼaeʼmo, anaga kafugamo mani agufa kaileʼmo halate kagaetegamo esugeno akamo Selaʼmo ve mafaʼnemo alino ategaiye, huno ha paiʼnigeno Selaʼmo ani vekamo akamelega seli noʼmo kipateʼmo maiʼneno ani huʼniya gemo afiʼniye.

¹¹ Emalehamuʼe Selaʼeʼmo ago anau anekalomo leʼnaʼaʼmofeʼmo Selaʼa mafaʼnemo alino atesiya kanaʼamo ago hano huʼniye.

¹² Huʼniyaʼmofeʼmo Sela aipafiʼmo kigi nehunoʼaeʼmo, nagaemo ago anekalomo maiʼnovanageʼna nagufaeʼmo namogaga aisufiye. Ani kavakeʼmo huno kava vekaʼniʼeʼmo ago kosunamo leʼniyaʼmofeʼmae, huno huʼniye.

¹³ Ala kava neʼmoʼa Emalehamufeʼmo, Selaʼmo na kava higenoʼaeʼmo kigi nehunoʼaeʼmo, ago anekalo leʼnovanageʼna haiya kava huʼna mafaʼnemo aliʼna ategauve, huno agesa neʼafiye.

¹⁴ Mago kavaʼmo Ala kava neʼmoʼa afaʼa osisiya agufa kavaʼmo haneʼnifiye. Lekana paiʼna ateʼnova afinaʼmo mani hemeni agufa afinaʼmo kagaetega halate esugenoʼaeʼmo Selaʼa ve mafaʼnemo alino ategaiye, huno ha paiʼniye.

¹⁵ Ha paiʼniyaʼmonanafa Selaʼmo koli huʼniyaʼmofeʼmo kigi osuʼnove, huno huʼnigenoʼaeʼmo Ala kava neʼmoʼa, he, huno, ago kigi huʼnane, huno ha paiʼniye.

Ala kava neʼmoʼa Satomi taonifiʼmo maiʼnaya vayaʼmo alino hano huno apatalesiyafeʼmo huʼniya gemae

¹⁶ Inagi ani loleʼe magoʼe ve anagaʼmo aniletiʼmo he tiʼa Satomi taonifilagamo aulu heteʼa visayafeʼmo huʼnagenoʼaeʼmo Emalehamuʼa apavalelino uno kategatiʼmo apatesiyafeʼmo magokepiʼmo lokaeʼa uʼnae.

^17-18 Ala kava neʼmoʼa hunoʼaeʼmo, Nagaemo hugefe hisuva kavafeʼmo Emalehamuʼmo ha opaiʼneʼna hisufiye. Emalehamupatikeʼmo lokiya nofi vayaʼmo afole aigae. Nagaemo agaetetikeʼmo muki ma mopafi nofi vayaʼmo aliʼna auleʼna apategauve.

¹⁹ Agaemo ina kavaʼmo hiyo ina kavaʼmo osiyo, huno hapa paisigeʼa mafaʼneʼaʼe nofi vayaʼamogiʼeʼmo fatago kavaʼmo huge alagepa huʼa aliʼa fako huʼa apamige hisayafeʼmo lekana paiʼna ateʼnovaʼmofeʼmo hisuva kavafeʼmo afaʼa aliʼna ave liguve.

^20-21 Inagi Ala kava neʼmoʼa hunoʼaeʼmo, Satomi taonifatiʼe Gomola taonifatiʼeʼmo hosu kavaʼmoʼa alopa gefatiʼmo keya aeno ge nehiyanageʼna uʼna lamiʼna nagaefeʼmo keya aeno ge nehiya kavaʼmo nehafi nosafi, huʼna agegauve, huno hutegeʼanaeʼmo.

^22-23 Inagi lole vekalaʼmo Satomi taoni kateʼmo utaʼageno Emalehamuʼa Ala kava neʼmo aulagaleʼmo he tino maiʼneno Ala kava neʼmo haopaleʼmo uno ina ge huno ge huno afi geʼniye, kagaemo fatago vayaʼe hosu vayaʼeʼmo magokepi alika hano huka apatalesanafeʼmo nehapiye.

²⁴ Fifitiʼa fatago vayaʼmo ani taonifiʼmo maiʼnisayana fifitiʼa fatago vayaʼaitefeʼmo afaʼa apakegeka oʼapateka ani taoniʼe muki vayaʼeʼmo alika hano huka apatalegapiye.

²⁵ Kagaemo fatago vayaʼe hosu vayaʼeʼmo magokepiʼmo alika lokaeka kamitimo apamagisanafeʼmo nehana kavaʼmo kagaemo alagi nosana agufa kavaʼmo hugane. Kagaemo fatago vayaʼaitegaʼe hosu vayaʼaitegaʼeʼmo magoke aiyaya kavaʼmo nosane. Kagaemo ma mopafi vayaʼmo alika fako nehana yasi vekamogamo fatago kavaʼmo alagi osugapiye, huno huʼniye.

²⁶ Huno huʼnigeno Ala kava neʼmoʼa geʼaleʼmo aeno atagaina huno ha painoʼaeʼmo, Nagaemo apakesuvana Satomi taonifiʼmo fifitiʼa fatago vayaʼmo maiʼnisayaʼmoʼmo apakaetefeʼmo muki vayaʼmo afaʼa apakegeʼna apategauve, huno ha paiʼniye.

²⁷ Emalehamuʼa magoʼe gemo hunoʼaeʼmo, Nagaemo afaʼa mumusopagana laʼnefagana huʼna maiʼneʼna ina agufa vekamo maiʼnovaʼmonanafa Ala kava netegamo ge hisuvafeʼmo nagaiʼnimo afaʼa he tiʼnove.

²⁸ Fifitiʼa fatago vayaʼmo oʼmaiʼnisayaʼmoʼmo foti faefuʼa vayaʼmo maiʼnisayana mago faefuʼa vayaʼmo oʼmaiʼnayaʼmofeʼmo muki ani taonimo afaʼa alika hano huka atalegapiye, huno afi geʼnigenoʼaeʼmo, Foti faefuʼa fatago vayaʼmo maiʼnisageʼnaeʼmo ani taonimo afaʼa aliʼna hano huʼna oʼategauve, huno ha paiʼniye.

²⁹ Emalehamuʼa halate magoʼe huno, Fotiʼa fatago vayaʼmo maiʼnisayaʼmoʼmo haiya kava hugane, huno afi geʼnigenoʼaeʼmo Ala kava neʼmoʼa ha painoʼaeʼmo, Inagi fotiʼa fatago vayaʼmo maiʼnisayaʼmoʼmo fotiʼa fatago vayaʼaitefeʼmo taonimo afaʼa aliʼna hano huʼna oʼatalegauve, huno ha paiʼniye.

³⁰ Huno ha paiʼnigenoʼaeʼmo, Kaipamo olenegeʼnao gemo halate hugesuvanagi. Tetiʼa fatago vayaʼmo maiʼnisayaʼmoʼmo haiya kava hugane, huno afi geʼnigenoʼaeʼmo, Inagi tetiʼa fatago vayaʼmo apakesuvana taonimo afaʼa aliʼna hano huʼna oʼatalegauve, huno ha paiʼniye.

³¹ Emalehamuʼa hunoʼaeʼmo, Ala kava nefeʼmo ge hisuvafeʼmo nagaiʼnimo alagepa huʼna he tiʼna maiʼnove. Inagi tuvetiʼa fatago vayaʼmo maiʼnisayaʼmoʼmo haiya kava hugane, huno afi geʼnigenoʼaeʼmo, Tuvetiʼa fatago vayaʼaitefeʼmo taonimo afaʼa aliʼna hano huʼna oʼatalegauve, huno ha paiʼniye.

³² Emalehamuʼa hunoʼaeʼmo, Kaipamo olenegeʼnao nagaemo magoʼe huʼna hano hisuva gemo hugesuve. Teniʼa fatago vayaʼmo maiʼnisayaʼmoʼmo haiya kava hugane, huno afi geʼnigenoʼaeʼmo, Teniʼa fatago vayaʼaitefeʼmo taonimo afaʼa aliʼna hano huʼna oʼatalegauve, huno ha paiteno

³³ Ala kava neʼmo ataleno uʼnigeno Emalehamuʼa noʼalegamo uʼniye.