Aepa Gemae 17 - The Keyagana NT and 25 OT books

Emalemiʼa saufa agimo ateʼniya gemae

¹ Emalemiʼa naeti naeniʼa kafugamo maitegenoʼaeʼmo Ala kava neʼmo agaetegamo afole aiʼniye. Afole aitenoʼaeʼmo, Nagaemo Gotiʼnamo muki himamu lokiyaʼnimo haneʼniyanagi naulagaleʼmo vaiʼmo oʼalisana kavaʼmo huka maiyo.

² Nagaemo kagaeʼeʼmo kotalakemo hu maleteʼna kaginago mafaʼnekamo asole vayaʼmo aliʼna afole aiʼna apategauve, huno ha paiʼnigeno

³ Emalemiʼa augosalegatiʼmo aino ati kaeno havaeʼnigeno Gotiʼa mago gemo ina ge huno ha paiʼniye.

⁴ Afiyo, huno, nagaiʼnilefeʼmo kagaeʼeʼmo kotalakemo hu malesugeka asole nofi vayaʼai afoʼapimogamo maigane.

⁵ Kagikamo magoʼe huno Emalemigae huno ohanegaiye. Hemenimo kagikamo Emalehamugae, huno hanegaiye. Asole nofi vayaʼai afoʼapimogamo aliʼna hamaleʼna kateʼnovaʼmofeʼmae.

⁶ Asole mafaʼnemo alika apatesanafeʼmo aliʼna hamaleʼna kateʼnovanageʼa asole nofi vayaʼmo kagaepatiʼmo aliʼna afole aiʼna apatesugeʼa kagaepatiʼmo kini vayaʼmo afole aigae.

⁷ Nagaemo kagaegi henagaʼamo kagaepati afole aisaya vayaʼenagi uʼa aiʼa atagu faesaya vayaʼenagi huʼna kotalakeʼnimo hu malegauve. Ani kotalakemo hanege hanege huno hanegaiye. Ani kotalakemo haneʼniyana nagaemo Gotikamoʼnamo maiʼneʼna kagae kakamelega kaginago vayaʼai Gotiʼapimoʼnaʼeʼmo maiguve.

⁸ Hemenimo maiʼnana mopamo Kenani nofi vayaʼai mopalekeʼmo kalagaʼmo eka maiʼnane. Hiyaʼmonanafa mani muki mopaʼamo kagaikagi kaginago vayaʼenagi huʼna lapamisugeno alagi lapakaitapi mopamo hanesigeʼna Gotitapimoʼnamo maiguve.

⁹ Gotiʼa Emalehamufeʼmo ha painoʼaeʼmo, Kagaikalefeʼmo kotalakeʼnimo akame huvo. Kagaeʼe afole aisaya kaginago vayaʼenagi uʼa aiʼa atagu faesaya vayaʼenagi hutapa mani kotalake gemo akame hiyo.

¹⁰ Nagaemo kotalakeʼnimo nagaeʼe kagaeʼenagi kagae kakamelegatiʼmo kaginago vayakaleʼefenagi huʼna hu malova kotalakeʼnimo alagena kavaʼamo ina kava hutapa muki lapakaepati ve mafaʼne anagaʼmogi apagufamo lagauta apateyo.

¹¹ Apakufamo lagauta apatesaya kavaʼmoʼa nagaemo lapakaeʼeʼmo hu malova kotalakemo alagena kavaʼamo hanegaiye.

¹² Muki ve mafaʼnetapimo eitiʼa afinaʼmo maiʼnisaya mafaʼne anagaʼmogi apakufamo lagauge notapifiʼmo aliʼyatapi neʼaliya vayaʼmogi aliʼa apatesaya mafaʼneʼai apakufamo lagauge alu nofi vayapatiʼmo miya faiʼnisaya vayaʼmogi mafaʼneʼai apakufamo lagauge hiyo.

¹³ Notapifiʼmo aliʼa atesaya mafaʼneʼai apakufamo lagauge miya faisaya vayaʼmogi mafaʼneʼai apakufamo lagauge hiyo. Nagae kotalakemo muki afinaʼmo hanege hanege huno hanesiya kotalakemo alagena kavaʼamo lapakufaleʼmo haneno.

¹⁴ Inagi mago vekamo agufamo lagauʼa oʼatesayaʼmoʼmo agaemo nagae kotalakeʼnimo amagino atalegaiyaʼmofeʼmo agaiʼa nofi vayapatiʼmo alitapa hafaitapa atalageno lapakaeʼeʼmo magoʼe huno lokaeno oʼmaino, huno ha paiʼniye.

¹⁵ Inagi Gotiʼa Emalehamufeʼmo ina ge huno hapaiʼniye. Ha painoʼaeʼmo, akaefeʼmo Selaiʼae huka agi oʼaeka hemenimo Selaʼae huno agi aegane.

¹⁶ Nagaemo aliʼna auleʼna atesugeno ve mafaʼnekamo alino atesigeʼna magoʼe huʼna aliʼna auleʼna atesugeno asole nofi vayaʼe kini vayaʼmogi itaʼapimoʼeʼmo maigiye, huno ha paiʼnigeno.

¹⁷ Emalehamuʼa augosalegatiʼmo asagauno aino ati kaeno maiʼneno kigi nehunoʼaeʼmo aipafiʼmo agesa afinoʼaeʼmo, vani hataletiʼa kafugamo maiʼnisiya vekamoʼmo mafaʼnemo afaʼa alino ategaifiye. Selaʼeʼmo naetiʼa kafugamo maiʼniyana mafaʼnemo afaʼa alino ategaifiye, huno huteno.

¹⁸ Gotifeʼmo hunoʼaeʼmo, O Gotiyo, Isameliʼa kaulagaleʼmo afaʼa maigiye, huno ha paiʼniyaʼmonanafa

¹⁹ Gotiʼa, haʼao, huno, Selaʼmo akamoʼmo ve mafaʼne alino ategaiyanagi agiʼamo Aisakiʼae huka ato. Nagaemo agaeʼe agae akamelegati aginago mafaʼneʼamogiʼenagi huʼna muki afinaʼmo hanege hanege huno hanesiya kotalakemo hu malegauve.

²⁰ Hu malegauvaʼmonanafa Isamelitefeʼmo huʼnana gekamo ago afiʼnove. Nagaemo aliʼna auleʼna ateʼnovanageno asole mafaʼnemo alagi magoʼe huno alino apategaiye. Agaemo tuolofuʼa nofi vayaʼai afoʼapimogimo alino apategaiyanageʼna ago alagi alopa nofi vayaʼmo aliʼna hamaleʼna ategauve.

²¹ Hiyaʼmonanafa mani agufa afinaʼmo henagaʼamo afole aisiya kafugafiʼmo Selaʼa Aisakiʼmo alino atesiya ve mafaʼnekaʼeʼmo kotalakeʼnimo hu malegauve,

²² Gotiʼa ani gemo huno ha paiteno ago ataleno uno haiʼniye.

²³ Inagi Emalehamuʼa ani afinatetiʼmo aepa faino Goti ha paiʼniya gemo akame huno Isameli agufamo lagauge noʼafiʼmo aliʼyaʼamo neʼaliya aʼnemogi aliʼa apateʼnaya mafaʼneʼai apakufamo lagauge miya faiʼniya vayaʼmogi mafaʼneʼai apakufamo lagauge muki agae nofi ve mafaʼnemogi apakufamo lagauge huʼniye.

^24-25 Emalehamuʼa naeti naeniʼa kafugamo maiʼnigeno Isameliʼa tetiniʼa kafugamo maiʼnigeno huʼneʼanaeʼmo anakufamo lagauʼnaʼae.

^26-27 Ani magoke afinakeʼmo Emalehamuʼagi mafaʼneʼamo Isameliʼagi noʼafiʼmo aliʼa apateʼnaya vayanagi muki miya faiʼniya vayanagi huʼa apakufamo lagauʼa apateʼnae.