Aepa Gemae 13 - The Keyagana NT and 25 OT books

Lotiʼa Emalemiʼmo ataleno uʼniya gemae

^1-2 Emalemiʼa asole kagemi yaʼamo pulumakagi sipisipigi siluva goli yafaʼagi huno haneʼniya vekamo maiʼniyana Isipi kotegamo ataleno muki ani yaʼamo aliteno uʼniye. Lotiʼeʼmo magokepi lokaeʼana Negevi kotegamo uʼnaʼae.

³ Agaemo vayaʼaʼeʼmo Negevi koʼmo aliʼa ataleʼa halate Meto taonifiʼmo hogoteno seli noʼamo haneʼniya Meto taonimo hanete Ai taonimo hanete hutegeno folagapiʼmo uʼnae.

⁴ Hogoteno Emalemiʼa ofalinimo nehaya agufa yafa hiʼyalamuʼmo hu maleʼniya yategamo eno halate Ala kava neʼmo agiʼaleʼmo keya aeno ge huno nunumuʼmo huʼniye.

⁵ Lotiʼa Emalemiʼmo avagi huno eʼniya vekamoʼeʼmo sipisipiʼagi pulumakaʼagi huno apavaleteno mago seli noʼamo kiʼniya selimogi huno aliteno eʼniye.

⁶ Emalemiʼe Lotiʼeʼmo asole kagemi yaʼanimo haneʼnigeno mopamo aiseʼamo haneʼniyaʼmofeʼmo magokepiʼmo alagepa huʼana lokaeʼana maisaʼa kavaʼmo osuʼniye.

⁷ Loti sipisipi anagaʼaleʼe pulumaka anagaʼaleʼeʼmo neʼyagaiya vayanagi Emalemi sipisipi anagaʼaleʼe pulumaka anagaʼaleʼemo neʼyagaiya vayanagi huʼa ke vaiʼnae. Ani afinaʼmo Kenani nofi vayaʼe Pelesi nofi vayaʼeʼmo ani haopaleʼmo maiʼnae.

⁸ Inagi Emalemiʼa Lotifeʼmo ha painoʼaeʼmo, Kahaoke hove, huno, laʼagaemo magoke afamotalaʼmo maiʼnoʼaʼmofeʼmo ge oʼvaisuʼageʼa afutiʼaleʼmo neʼyagaiya vayatiʼamogiʼeʼmo afaʼa ge oʼvaigae.

⁹ Ago, huno, kaulagaleʼmo alopa mopamo haneʼniyanagi kahao ke hovanagi kagaikamo mago mopamo lekana paiteka nagaemo nataleka uvo. Kagaemo hoga haopalegamo visanageʼnaeʼmo nagaemo lamaga haopalegamo uguve. Kagaemo lamaga haopalegamo visanageʼnaeʼmo nagaemo hoga haopalegamo uguve, huno ha paiʼniye.

¹⁰ Lotiʼa he tino alino maku huno ageyana mago otu mopamo haneʼnigeno ageʼniye. Ani haopalegamo asole aniʼmo haneʼnigeno alagi kanale hoyamo Ala kava neʼmo hoyagana huno hanege Isipi vayaʼai mopagana huno hanege huʼniye. Ani afinaʼmo Ala kava neʼmoʼa lole taonilaʼmo Satomi taoniʼe Gomola taoniʼeʼmo alino hosu huno oʼataleʼniya afinaʼmae.

¹¹ Lotiʼmo agaiʼa mopamo hanesiyafeʼmo Yoneni aniʼmo uno nelamiya kotega otu mopamo lekana paiteno yegemo haine neʼeya haopalegamo uʼniye. Lotiʼe Emalemiʼeʼmo ani afinaʼmo aliʼana fako huʼnaʼae.

¹² Emalemiʼa Kenani mopaleʼmo maiʼnigeno Lotiʼmo uno otu koʼmo Sotomi taonimo haopaleʼmo seli noʼmo alino he tino ateʼniye.

¹³ Sotomi taonifiʼmo maiʼnaya vayaʼmo alagi hosu vayaʼmogeʼa Ala kava netegamo lusi hosu kavaʼmo huʼnae.

¹⁴ Lotiʼmo utegenoʼaeʼmo Ala kava neʼmoʼa Emalemifeʼmo ha painoʼaeʼmo, Kagaemo manile maiʼneka muki haopalegamo aulu heka ago. Yegemo uno nelamiya haopalegamo agege yegemo haine neʼeya haopalegamo agege aluga aluga haopalegamo agege huvo.

¹⁵ Muki ani ageʼnisana mopamo kagaeʼe kaginago vayaʼeʼmo lapamiguve.

¹⁶ Nagaemo kaginago vayaʼmo ani kahaepagana agufa vayaʼmo aliʼna afole aiʼna apategauve. Apatesuva vayaʼmo ani kahaepamo vayaʼmogimo lekana nopai kava huʼa kaginago vayaʼmo afaʼa lekana opaigae.

¹⁷ Inagi he tika muki mopaʼaleʼmo uka haisanategamofi emikesanategamofi visanategamofi esanategamofi huka umenitata huka ageteka alagi kamisuva mopamo ago, huno ha paiʼniye.

¹⁸ Ha paitegenoʼaeʼmo Emalemiʼa ani kotetiʼmo ataleno uno Hipaloni taonifiʼmo alopa yosamo Mamali yosamo aepafiʼmo ofalinimo nehaya hiʼyalamuʼmo Ala kava netefeʼmo huʼniye.