Aepa Gemae 12 - The Keyagana NT and 25 OT books

Gotiʼa Emalemifeʼmo keya aeno ge huʼniya gemae

¹ Ala kava neʼmoʼa Emalemifeʼmo ina ge huno ha paiʼniye. Kagaemo kokamo atalege konagakamogimo apatalege muki vayakamo apatalege huteka nagaemo aliʼna kave lisuva mopaleʼmo uvo.

² Inagi nagaemo kagaepatiʼmo asole kaginago vayaʼmo aliʼna afole aiʼna apatesugeʼa magoke nofi vayaʼmo maigae. Nagaemo aliʼna auleʼna katesugeka ala kagimo aliteka aulena gemo hapa paisanageʼa aulena vayaʼmo maigae.

³ Kaha maesaya vayaʼmo aliʼna aulena apategauve. Lifana huʼa katesaya vayaʼmo lifana huʼna apategauve. Kagaetetiʼmo muki ma mopafi nofi vayaʼmo auleʼna vayaʼmo maigae, huno ha paiʼniye.

⁴ Inagi Emalemiʼa Ala kava neʼmoʼa ha paiʼniya gemo akame huno koʼamo ataleno Lotiʼeʼmo magokepi lokaeʼana uʼnaʼae. Emalemiʼa seveti faefuʼa kafugamo Halani taonifiʼmo maiteno ataleno uʼniye.

⁵ Emalemi aʼamo Selaiʼagi aganaʼamo mafaʼnemo Lotiʼagi muki aliʼniya kagemiyaʼaʼeʼmo aliteno apavalelino uʼniye. Muki aliʼyaʼamo neʼaliya vayaʼeʼmo apavaleʼnigeʼa muki yaʼapimo aliteʼa Halani taonifatiʼmo Kenani kotegamo uʼnae.

⁶ Emalemiʼa vayaʼaʼeʼmo uʼa Sekemi taonifi Mole haopalegamo mago alopa yosamo aepaleʼmo avaʼyi huʼnae. Ani afinaʼmo Kenani nofi vayaʼmo ani mopaleʼmo maiʼnae.

⁷ Ala kava neʼmoʼa Emalemitegamo afole aiteno ina ge huno ha paiʼniye. Nagaemo mani mopamo aliʼna kaginago vayaʼmo apamiguve, huno ha paiʼnigeno Emalemiʼa agaetegamo afole aiʼniya Ala kava netefeʼmo ofalinimo nehaya agufa yafa hiʼyalamuʼmo huʼniye.

⁸ Henagaʼamo Emalemiʼa ani kotetiʼmo ataleno Meto taonimo alino ataleno uno yegemo haine neʼeya kotegamo mago aveleʼmo avaʼyi huteno seli noʼamo alino atateno alino he tino ateʼniye. Meto taonimo yegemo uno lamino nefaleya haopalegamo hanete Ai taonimo yegemo haine neʼeya haopalegamo hanete hutegeno folagapiʼmo Ala kava netefeʼmo ofalinimo nehaya hiʼyalamuʼmo hu maleteno mono huno agiʼaleʼmo keya aeno ge huno nunumuʼmo huʼniye.

⁹ Henagaʼamo Emalemiʼe vayaʼaʼeʼmo ani kotetiʼmo ataleʼa lamaga haopalegamo uʼnae.

Emalemiʼa Isipi kotegamo uno maiʼniya gemae

¹⁰ Henagaʼamo ani koteʼmo alopa kafu kavaʼmo afole aiʼnigeʼa Emalemiʼe vayaʼaʼeʼmo Isipi kotegamo hageʼa kalaga uʼa kalaga vayaʼmo maiʼnae. Alopa kafu kavaʼmo afole aiʼniyaʼmofeʼmae.

¹¹ Isipi kotegamo uʼa hogo nehuʼapaeʼmo Emalemiʼa aʼamo Selaifeʼmo ina ge huno huʼniye. Afiyo, huno, nagaemo hemenimo kageʼnovana kagaemo kanale aʼmo maiʼnane.

¹² Isipi vayaʼmogimo kagaefeʼmo, aʼamo maiʼniye, huʼa kageteʼapaeʼmo nagaemo ago kamitimo namagiteʼa kagaemo afaʼa katesageka maigane.

¹³ Nagaetefeʼmo kanale hisigeʼna kagaetefeʼmo afaʼa maisuvafeʼmo kahaoke hovanagi apakaefeʼmo hapa paikaeʼmo nasaʼnimoʼae, hukageʼmo hapa paiyo, huno ha paiʼniye.

¹⁴ Apakaemo Isipi kotegamo ago uʼa avaʼyi huʼnageʼapaeʼmo Isipi ve anagaʼmogimo aʼamo alagepa aʼmo maiʼnigeʼa alagepa apaulagamo ageʼnae.

¹⁵ Isipi vayaʼmogi kini vekaʼapimo aliʼyaʼamo neʼaliya vayaʼmogimo Selaiʼmo ageteʼapaeʼmo kini vekaeʼmo ha paiʼapaeʼmo, mago kanale a kanomo eno maiʼniye, huʼa ha paiʼnae. Inagi Selaiʼmo avaleliʼuʼa kini vekamo nopiʼmo ateʼnae.

¹⁶ Kini vekamoʼmo Selaitefeʼmo Emalemitegamo alagepa kavaʼageʼmo huteno Emalemiʼmo sipisipigi pulumakagi nokigi kamogi aliʼyaʼmo neʼaliya ve aʼnegi huno apavaleno amiʼniye.

¹⁷ Amiʼniyaʼmonanafa Ala kava neʼmoʼa Selaitetifeʼmo kini vekalegaʼe vayaʼalegaʼeʼmo alopa kaitaʼmo apamiʼniye.

¹⁸ Kini vekaʼmoʼmo Emalemifeʼmo ge huʼnigeno egenoʼaeʼmo ina ge huno ha paiʼniye. Nagaetegamo na agufa kavaʼmo huʼnane. Na kava higekaeʼmo aʼnimo maiʼniye, huka naha opaiʼnane.

¹⁹ Kagaemo na kava higeka nasaʼnimoʼae, huka huʼnane. Nagaemo aʼnimo maisiyafeʼmo ago fiku aliʼnovesine. Akamo maiʼniyanagi avalelika uvo.

²⁰ Kini vekamoʼmo vayaʼaeʼmo hapa paiʼnigeʼapaeʼmo aliʼa hafaiʼa ataleʼnageno Emalemiʼa aʼagi muki vayaʼagi kagemi yaʼagi huno apavalelino uʼniye.