Aepa Gemae 11 - The Keyagana NT and 25 OT books

Ala kava neʼmoʼa vayaʼai apakemo alino fako huno alu apake alu apakemo apamiʼniya gemae

¹ Akeyaʼvilagamo ma mopafi vayaʼmogimo magoke apakeʼageʼmo aiʼa maiʼnae.

² Yegemo haine neʼeya haopalegamo maigeʼapaeʼmo atale uʼa Mamiloni otu koteʼmo maiʼnae.

³ Henagaʼamo apakaiʼapimo ge huge afige huʼapaeʼmo, Lagaemo mago kalipa mopamo alita hapa atiteta atafiʼmo kaesunageno no kisuna yafaʼmo alino hamalegaiye, huʼa huʼnae. Ani kavaʼmo huʼnagenoʼaeʼmo noʼmo kisaya yafaʼmo alino hamaleʼnigeʼa ani yafaʼmo agiʼa aeʼa kamaesiya yaʼaʼeʼmo aliʼnae.

⁴ Apakaemo huʼapaeʼmo, Egetao, huʼa, mago taonimo kiteta mago yatala noʼmo kilita kokuʼnapilagamo uta haigune. Ki maleʼnisunageʼapaeʼmo muki vayaʼmogimo ageteʼapaeʼmo lagitileʼmo aliʼa asagauʼa lategae. Fiku yanageta lagaemo atagu faeta uteta huta laote laote huta maigunanagetae, huʼa huʼnae.

⁵ Huʼnayaʼmonanafa Ala kava neʼmoʼa kiʼnaya taonimo agege yatala noʼmo agege hisiyafeʼmo emineʼniye.

⁶ Ala kava neʼmoʼa ina ge huno huʼniye. Muki vayaʼmo magoke vayaʼageʼmo maiteʼa magoke agufa apakemo neʼaiye. Mani agufa aliʼyaʼmo neʼaliyanageʼa muki alu kava alu kavaʼmo afaʼa hugae.

⁷ Uta lamigetao, lagaemo uta lamita alita fako huta alu apake alu apakemo apamisunageʼa mago vayaʼmogi hisaya gemo mago vayaʼmogi oʼafigae, huno huʼniye.

⁸ Inagi Ala kava neʼmoʼa alino atagu faeno apataleʼnigeʼapaeʼmo ma mopafi muki haopalegamo uʼeʼa huʼa maiteʼa ani taonimo kiʼa hano osuʼnae.

⁹ Inagi ani taonimo agimo Mamo taoniye huʼa agi ateʼnae. Ala kava neʼmoʼa apakemo alino alu apake alu apakemo apamiʼnigeʼa ma mopafiʼmo muki haopalegamo atagu fae uʼeʼa huʼa maiʼneʼa alu apake alu apakemo aiʼnayaʼmofeʼmae. Ani Mamo taoniye agimo aepaʼamo apakemo oʼafiʼnae.

¹⁰ Mani gemo Semi aginago vayaʼaifeʼmo huʼniye. Alopa aniʼmo heno hano hutegenoʼaeʼmo lole kafugamo utegeno Semiʼmo vani hataletiʼa kafugamo neʼmainoʼaeʼmo Apakasatiʼmo alino ateʼniye.

¹¹ Semiʼa Apakasatiʼmo alino atetenoʼaeʼmo faefu hataletiʼa kafugamo neʼmainoʼaeʼmo ve mafaʼnemo alino apatege a mafaʼnemo alino apatege huteno faliʼniye.

^12-13 Apakasatiʼmo teti faefuʼa kafugamo maiteno Salaʼmo alino atetenoʼaeʼmo fo hataleti taliʼa kafugamo neʼmainoʼaeʼmo ve mafaʼnemo alino apatege a mafaʼnemo alino apatege huteno faliʼniye.

^14-15 Salaʼmo tetiʼa kafugamo maiteno Imaʼmo alino atetenoʼaeʼmo fo hataleti taliʼa kafugamo neʼmainoʼaeʼmo ve mafaʼnemo alino apatege a mafaʼnemo alino apatege huteno faliʼniye.

^16-17 Imaʼmo teti foʼa kafugamo maiteno Pelekiʼmo alino atetenoʼaeʼmo fo hataleti tetiʼa kafugamo neʼmainoʼaeʼmo ve mafaʼnemo alino apatege a mafaʼnemo alino apatege huteno faliʼniye.

^18-19 Pelekiʼmo tetiʼa kafugamo maiteno Liyuʼmo alino atetenoʼaeʼmo tu hataleti naeniʼa kafugamo neʼmainoʼaeʼmo ve mafaʼnemo alino apatege a mafaʼnemo alino apatege huteno faliʼniye.

^20-21 Liyuʼmo teti tuʼa kafugamo maiteno Siluʼmo alino atetenoʼaeʼmo tu hataleti seveniʼa kafugamo neʼmainoʼaeʼmo ve mafaʼnemo alino apatege a mafaʼnemo alino apatege huteno faliʼniye.

^22-23 Siluʼmo tetiʼa kafugamo maiteno Nahoʼmo alino atetenoʼaeʼmo tu hataletiʼa kafugamo neʼmainoʼaeʼmo ve mafaʼnemo alino apatege a mafaʼnemo alino apatege huteno faliʼniye.

^24-25 Nahoʼmo tuveti naeniʼa kafugamo maiteno Telaʼmo alino atetenoʼaeʼmo vani hataleti naetiniʼa kafugamo neʼmainoʼaeʼmo ve mafaʼnemo alino apatege a mafaʼnemo alino apatege huteno faliʼniye.

²⁶ Telaʼmo sevetiʼa kafugamo maiteno Emalemiʼagi Nahoʼagi Halaniʼagi huno alino apateʼniye.

²⁷ Mani gemo Tela aginago vayaʼaifeʼmo huʼniye. Telaʼa Emalemiʼagi Nahoʼagi Halaniʼagi huno alino apateʼniye. Halaniʼa Lotiʼmo alino ateʼniye.

²⁸ Halaniʼmo ago hogoteno falitegenoʼaeʼmo afoʼamoʼmo henagaʼamo faliʼniye. Halaniʼa koʼaleʼmo Kalatiya kotega A taonifiʼmo faliʼniye.

²⁹ Falitegeʼanaeʼmo Emalemiʼe Nahoʼeʼmo lole atalaʼmo aliʼnaʼae. Emalemi aʼmo agiʼamo Selaʼae. Naho aʼmo Halani a mafaʼnemo agiʼamo Milikaʼmo aliʼniye. Halaniʼa Isaka afoʼamoʼeʼmo maiʼniye.

³⁰ Maiʼniyaʼmonanafa Selaʼa anamo maiteno mafaʼnemo alino oʼateʼniye.

³¹ Telaʼmo ve mafaʼneʼamo Emalemiʼagi agiyoʼamoʼmo Lotiʼagi Emalemi aʼmo anofeloʼamoʼmo Selaʼagi huno A taonimo Kalatiya kotegatiʼmo ataleʼa Kenani kotegamo visayafeʼmo apavalelino uʼniye. Apakaemo Halani taonifiʼmo uʼa avaʼyi huteʼa ani taonifiʼmo maiʼnae.

³² Telaʼmo tu hataleti faefuʼa kafugamo maiteno ani taonifiʼmo faliʼniye.