2 Timoti 4 - The Keyagana NT and 25 OT books

Goti geʼamo aeka hakalo huka hapa paiyo, huno ha paiʼniya gemae

¹ Ala kava netimo Yesu Kalaisiʼa muki vayaʼai apaulagaleʼmo afole aiteno agoti huno apatetenoʼaeʼmo vayaʼamogitaleʼmo yagaino lategaiye. Nagaemo agae aulagaleʼe Goti aulagaleʼeʼmo huʼnaeʼmo,

² Goti geʼamo aeka hakalo huka hapa paiyo. Muki afinaʼmo gekamo afigefe hisaya afinaʼe oʼafigefe hisaya afinaʼeʼmo alo huka maiʼnekaeʼmo, aise afinaʼmo haneʼniyanagi malage hutapa gemo afiyo, huka hapa paiyo. Apakesamo alika hapa paigeʼapao. Lapakaemo hosu kavaʼmo osiyo, huka hapa paiyo. Goti geʼamo akame hisayafeʼmo alika he tika apato. Ani kavaʼmo nehukaeʼmo yagu yaga kavaʼmo huka maime maime neʼukaeʼmo oʼataleka alika apaya malo.

³ Henagaʼamo kaita haugekana huno ohaneʼneno vayaʼmo alino hapageno neʼapateya geeʼmo ohapaugiyaʼmofeʼmo ani agufa gemo alika apaya malo. Apakaiʼapi nehapaiya kavaʼmo akame huteʼa hapauʼniya gemo afisayafeʼmo aliʼa apaya neʼmalaya vayaʼmo apavaleliʼa ete ete hugae.

⁴ Lama gelefeʼmo apakameʼya amiteʼa alagepa kaʼmo ataleʼa kaitene gegana agufa gemo afigae.

⁵ Afigayaʼmonanafa kagaemo muki afinaʼmo alagepa huka kagesamo afiteka kagaikaleʼmo alagepa huka yagaika kato. Hanageke yaʼmo neʼalikaeʼmo oʼataleka atafauka alagi huka maiyo. Uʼeʼa huʼa alagepa faigoko gemo aeʼa hakalo huʼa hapa nepaiya vayaʼmogi neʼaliya agufa aliʼyaʼmo lokiya vaika aliyo. Goti aliʼyaʼamo neʼalina aliʼyakamo muki agufa kavaʼalefeʼmo aliyo.

Aliʼyaʼnimo alagi aliʼna hano hisuvafeʼmo huve, huno huʼniya gemae

⁶ Nofi alagafati aniʼmo lakiʼa Gotiʼmo ofalinimo neʼamiya kava huʼna kolaʼnimo aiʼna lakiʼna mopamo ataleʼna visuva kana yaʼnimo alagi ago hogo huʼniyaʼmofeʼmae.

⁷ Kanale kamemo Goti vayaʼamogimo nehaya agufa kamemo ago huʼnove. Nagu nagu huʼna uʼna atupaleʼmo he tiʼnove. Apakesamo afiʼa fatago nehaya geleʼmo yagaiʼna ateʼnogeno afaʼa alagepa huno haneʼniye.

⁸ Hemenimo fatago vayaʼmogi alisaya agufa hetamaʼnimo nateʼniyanageʼna aliguve. Ala kava neʼmoʼa agoti gemo alino kanale huno alino fako huno neʼapateya vekamo afole aisiya afinaʼmo namigiye. Nagaiʼnigeʼmo oʼaliguvaʼmonanafa muki vayaʼmo eminesiyafeʼmo hapauʼnisiya vayaʼamogiʼeʼmo aligune.

Ge atupa gemo huʼniya gemae

⁹ Kayamukiki huka nagaetegamo malage huka eno.

¹⁰ Nimasiʼa hemeni haneʼniya ma mopafi yafekeʼmo hauʼnigeno alagi ago nataleno Tesalonaika taonifiʼmo uʼniye. Kilesenisiʼa Galesiya kotegamo uʼniye. Taitasiʼa Namalesiya kotegamo uʼniye.

¹¹ Lukiʼa agaiʼageʼmo nagaeʼeʼmo lokaeno maiʼniye. Makiʼa Goti aliʼyaʼmo neʼalinoʼaeʼmo alagepa huno naha maegaiyanagi avalelika eno.

¹² Nagaemo Tikikasiʼa aliʼna ateʼnogeno Efasasi taonifiʼmo uʼniye.

¹³ Ekaeʼmo nalonokuʼnimo Toloasi taonifiʼmo Kapasi nopiʼmo ataleʼnovanagi aliteka muki mukuʼaʼnimo alinika eganaʼmonanafa sipisipi agufaletiʼmo alo huʼnaya mukuʼniʼeʼmo lusi kava huno nahauʼniyanagi oʼataleka aliniteka eno.

¹⁴ Alekasaniʼa aenimo alo nehaya aliʼyaʼmo neʼaliya vekamoʼmo nagaetegamo alagi hosu kavaʼmo huʼniye. Ala kava neʼmoʼa anonaʼalefeʼmo amigiye.

¹⁵ Agaemo lusi kava huno ayamukiki huno lagaemo aeta hakalo huta hapa nepauna gelefeʼmo kamemo huno ateʼniyanagi agaefeʼmo maika halove huka ateteka ehekae.

¹⁶ Lomu gamani vayaʼmogimo hogote afinaʼmo agotimo huʼa nateʼnageʼnaeʼmo naha maesiya gemo huʼnogenoʼaeʼmo mago vekamoʼmo eno naha oʼmaeʼnifa muki vayaʼamo ago nataleʼa uʼnae. Inagi Gotiʼa hosu kavaʼapimo anonaʼapilefeʼmo oʼapamisiyafeʼmo nahauʼniye.

¹⁷ Nataleʼa uʼnayaʼmonanafa Ala kava neʼmoʼa nagae nahaopaleʼmo lokaeno maiʼnenoʼaeʼmo muki geʼamo aeʼna hakalo huʼna hano hisugeʼapaeʼmo muki alu nofi vayaʼmogimo alagepa faigoko geʼamo afisayafeʼmo lokiya vaino nateʼniye. Laiyonimoʼa nahaesiyafeʼmo nehigenoʼaeʼmo Gotiʼa nagufamo alino katino nateʼniye.

¹⁸ Inagi Ala kava neʼmoʼa muki hosu kavapatiʼmo nagufamo alino katino nateteno kokuʼnapiʼmo yagaino neʼapateya koteʼmo navalelino uno haino nategaiye. Muki afinaʼmo ha le konali agiʼamo alagi hanege hanege huno haneno. He, lama gemae.

¹⁹ Pilisilaʼe Akuvilaʼenagi Onesifolasi afamo anagaʼaʼenagi hutapa ge apamamaeyo.

²⁰ Ilasatasiʼa Kolitiyani taonifiʼmo maiʼnigeno Tolofimasiʼa kaitaʼmo hauʼnigeʼna Mailitasi taonifiʼmo ataleʼna eʼnove.

²¹ Yasi neʼaliya afinaʼmo afole aigiyanagi amalageka huka aeka agaseka eno. Yumiyulasiʼagi Piyunenesiʼagi Lainasiʼagi Kiloniyaʼagi muki konagatimogiʼeʼmogi huʼa ge kamamaeʼnae.

²² Ala kava neʼmoʼa kagaeʼeʼmo magokepiʼmo lokaeno maino. Gotiʼa fikumo lapa maeno lapamino. He, lama ge.