2 Timoti 3 - The Keyagana NT and 25 OT books

Atupa afinaʼmo asole hanageke yaʼmo afole aigiye, huno huʼniya gemae

¹ Mani hemenimo kaha paisuva gemo alagepa huka afiyo. Atupa afinaʼmo vayaʼmogimo lusi kava huʼa kana yaʼmo aligae.

² Vayaʼmogimo apakaiʼapiyekeʼmo hapauge monieʼmo hapaʼye huge apakaiʼapiyekeʼmo ge huʼa apakiʼapileʼmo aliʼa asaga huge ala vayaʼmo maiʼnone, huʼa apakesamo afige huʼa faipa huʼa apatege itaʼapi afoʼapimogi geʼapimo oʼafige hapao ke osege apaote kavaʼmo osuge hugae.

³ Apakaemo afamo anagaʼapieʼmo ohapauge vayaʼai hosu kavaʼapilefeʼmo afaʼa ateyo, huʼa osuge huʼa faipa huʼa apatege hapauʼniya kavateʼmo alagepa huʼa oʼyagaige hapau huʼa oʼapatege muki alagepa kavatefeʼmo apaini huge hugae.

⁴ Apakaemo kutulu yaʼmo nege apakesamo oʼafiʼneʼa malage huʼa hosu kavaʼmo huge ala vayaʼmo maiʼnone, huʼa himuʼnamu gemo huge huteʼa Gotifeʼmo ohapauʼnisigeʼa apakufamoʼmo hauʼniya kavafekeʼmo apamogaga aigae.

⁵ Apakaemo Gotifeʼmo amega apakufaletiʼmo mono nehayaʼmofeʼmo nehaya kavaʼapiletiʼmo huʼapaeʼmo, Goti himamuʼaletiʼmo apaipafiʼmo aliʼyaʼmo noʼaliye, huʼa aliʼa apave neliye. Ani agufa vayaʼmo apataleka kaote maiyo.

⁶ Mago ani agufa vayaʼmogimo vayaʼai nopiʼmo kesi katetiʼmo uʼa haiʼa alagepa huʼa apakesamo noʼafiya aʼne anagaʼmo geʼapiletiʼmo nofi kiʼa apategekana huʼa neʼapatae. Aʼne anagaʼmogi hosu kavaʼapimoʼmo lusi kava huno kana huʼnigeno asole yafeʼmo hapaʼye nehiya kavaʼapimoʼa aino apavayu hulino neʼviye.

⁷ Muki afinaʼmo gemo afige afige huʼa maiʼnayaʼmonanafa lama gemo afaʼa afiʼa aeto osugae.

⁸ Akeyaʼvilagamo Yanisiʼe Yamalisiʼeʼmo Mosesefeʼmo kame huʼana ateʼnaʼa kava huʼa ani vayaʼmogi lama gelefeʼmo kamemo huʼa neʼatae. Apaipa apakesamo hosuʼniya yakana huno haneʼnigeʼapaeʼmo aigofe apakesamo afiʼa fatago nehaya vayaʼmo maiʼnae.

⁹ Vayaʼmogi Yanisiʼe Yamalisiʼeʼmo hosu kavaʼanimo ageteʼapaeʼmo, negi kavaʼmo huʼnaʼae, huʼa huʼnaya kava huʼa hemenimo muki vayaʼmogimo ani vayaʼai hosu kavaʼapimo ago agegayaʼmofeʼmo magoʼe huʼa afaʼa humi oʼapategae.

Goti geʼaleʼmo atafauka alagi huvo, huno ha paiʼniya gemae

¹⁰ Nehayaʼmonanafa kagaemo nehuva kavaʼnimo ago ageteka akame huʼnane. Ago ageʼnanana aliʼna apaya maleʼnogeka nagege muki afinaʼmo na agufa kavaʼmo nehufi huka nagege neʼaluva aliʼyaʼmoʼa na agufa neʼyaʼmo afole aisiyafeʼmo aliʼyaʼmo neʼalufi huka nagege Gotifeʼmo nagesamo afiʼna fatago nehugeka nagege gemo noʼafiya vayaʼaitegamo yagu yaga kavaʼmo huʼnogeka nagege Gotiʼe konagatimogiʼefeʼmo nahau nayamopafiʼmo nahauʼnigeka nagege kana yaʼmo aliʼneʼnaeʼmo oʼataleʼna atafauʼna alagi huʼna maiʼnogeka nagege huʼnane.

¹¹ Apaini huʼa nateʼnageka nagege kana yaʼmo aliʼnogeka nagege huʼnane. Nagaemo Atiyoki taonifinagi Lisitiya taonifinagi Aikoniyamu taonifinagi huʼa hanageke yaʼmo namiʼnageka nageʼnane. Ala kava neʼmoʼa muki hanageke kavapatiʼmo nagufamo alino katino nateʼniye.

¹² He, muki vayaʼmo Yesu Kalaisipiʼmo maiʼneʼapaeʼmo Gotitefeʼmo alagepa kavaʼmo nehisaya vayaʼaifeʼmo apaini huʼa apategae.

¹³ Inagi hosu vayaʼmogi humi apatesaya vayaʼmo magoʼe magoʼe huʼa hosu kavaʼmo huʼa humi neʼapatesagenoʼaeʼmo Sataniʼa apakaeʼeʼmo humi apategaiye.

¹⁴ Humi apategaiyaʼmonanafa kagaemo alino kaya maleʼniya vekamo ago ageʼnanaʼmofeʼmo afiteka aliʼnana geleʼmo atafauka alagi huʼneka kagesamo afika fatago huʼnana kavateʼmo atafauka alagi hume hume uka maiyo.

¹⁵ Kagaemo aise mafaʼnemo maiʼnana afinatetiʼmo Goti aote mukufiʼmo avoʼmo kae maleʼnaya gemo afime afime eka hemenimo maiʼnane. Gotiʼa ani geletiʼmo afiteka agesana kaipamo afaʼa kamiteka Kalaisi Yesufeʼmo kagesamo afika fatago nehana kavatetiʼmo kagufamo alino katino kateteno kahau vaigiye.

¹⁶ Muki gemo Goti mukufiʼmo avoʼmo kae maleʼnaya gemo Gotiʼa avamusa aiʼniya gemo haneʼniye. Alagepa huno hapa maesiyafeʼmo alino apaya neʼmaleya gemo hanege hosu kavaʼapimo alino apave neliya gemo hanege alino api aino neʼapateya gemo hanege fatago kavaʼmo hisayafeʼmo alino ho huno neʼapateya gemo hanege huʼniye.

¹⁷ Gotiʼa ani geletiʼmo vayaʼamo alo huno neʼapateyanageʼa uʼa haiʼa hapaiteʼa muki alagepa kavaʼmo afaʼa hugae.