2 Timoti 2 - The Keyagana NT and 25 OT books

Alagepa ati vekamo maiyo, huno ha paiʼniya gemae

¹ Apakaemo nataleʼnayaʼmofeʼmo kagaemo mafaʼneʼnimogamo Kalaisi Yesuʼa fikumo kaha maeno kamiʼniya kavatetiʼmo lokiya vaika maiyo.

² Nagaemo muki vayaʼaifeʼmo aeʼna hakalo huʼna hapa paiʼnogekaeʼmo apakaeʼeʼmo magokepi lokaeka maiʼnekaeʼmo kagaemo ago afiʼnane. Kagaemo ani afiʼnana gemo muki afinaʼmo alagepa huʼa aliʼyaʼmo neʼaliya vayaʼmogi ani geleʼmo yagaiʼa atesayafeʼmo alika apamigeʼapao aliʼneʼa magoʼe huʼa alu vayaʼmo aliʼa apaya maleyo.

³ Ani kavatefeʼmo kagaemo Yesu Kalaisi alagepa ati vekaʼagana huka maiʼneka kana yaʼmo alige alige huka maiyo.

⁴ Ati vayaʼmogimo kamemo hisayafeʼmo ma mopafi yaʼmoʼa apatafauno apatesiya agufa aliʼyaʼmo noʼaliye. Ati aliʼyateʼmo apavaleno apateʼniya vekamoʼmo amuse huno apatesiyafeʼmae.

⁵ Nagu nagu huʼa yokalo nelaya vayaʼmogimo nagu nagu hisaya keʼaepa gemo akame osisayana maleʼnaya yaʼmo afaʼa oʼaligae.

⁶ Hoyamo haise vose huno ayamufa valeno alino neʼvaiya vekamoʼmo hogoteno hoyaʼafatiʼmo lesiya neʼyaʼmo aligiye.

⁷ Mani nehuva geeʼmo kagesa afifi huka maiʼnegenoʼao Ala kava neʼmoʼa kamisigekaeʼmo muki geʼamo afika aeto hugane.

⁸ Yesu Kalaisiʼa Nevini aginago vekaʼamoʼmo alagepa faigoko geʼnilefeʼmo faliʼniyatetiʼmo ago alino he tino ateʼniya kavafeʼmo kage okanika kagesa afifi huka maiyo.

⁹ Mani Goti gelefeʼmo huʼapaeʼmo, hosu kavaʼmo nehiya vekamo maiʼniye, huʼa huteʼa nofi kiʼa nateʼnayaʼmonanafa Goti geʼamo aino atagu ofaesiyafeʼmo nofi kiʼa oʼateʼnae.

¹⁰ Nagaemo lekana paino apateʼniya vayaʼmo Kalaisi Yesupiʼmo maiʼnisageno Gotiʼa apakufamo alino katino apatesigeʼapaeʼmo ha le konali yaʼamo aliteʼa maige maige huʼa maisayafeʼmo Goti aliʼyaʼamo oʼataleʼna neʼaliʼnaeʼmo muki alu kana ya alu kana yaʼmo neʼaluve.

¹¹ Lama geeʼmo lagesamo afita fatago nehuna gemo haneʼniyana, Agaeʼeʼmo faliʼnisunana agaeʼeʼmo afaʼa maigune.

¹² Alagi oʼataleta kana yaʼmo alime alime neʼvisunana kini vayakana huta agaeʼeʼmo magokepi lokaeta maiʼneta yagaita apategaune. Lagaemo agaefeʼmo oʼageʼnona vekae, huta nehisunana lagaefeʼmo oʼapakeʼnova vayane, huno hugiye.

¹³ Lagaemo hutaeʼmo, akame hugune, huta hutetaeʼmo akame nosisunana agaemo ani kavaʼmo huguve, huno hu maleʼnisiya gemo akame hugiye. Huguve, huno nehiya gemo alagi oʼataleno afaʼa akame nehiya vekamoʼmo maiʼniyaʼmofeʼmae.

Alagepa huka aliʼyaʼmo aliyo, huno ha paiʼniya gemae

¹⁴ Ani geeʼmo muki afinaʼmo apakesamo afisayafeʼmo ani gemo hapa paiyo. Ala kava neʼmo aulagaleʼmo maiʼneʼnaeʼmo, alu ge alu geletiʼmo kaveta osiyo, huka hapa paiyo. Ani agufa gemoʼmo afisaya vayaʼmo hapa oʼmaegaifa alino hosu hunoʼageʼmo apategaiye.

¹⁵ Gotiʼa kagaefeʼmo hunoʼaeʼmo, Naulagaleʼmo alagepa aliʼyaʼmo neʼaline, huno hisiyafeʼmo kayamukiki huvo. Avagage osisiya agufa aliʼyaʼmo neʼaliya vekagana huka lama gelefeʼmo alagepa huka aliʼyaʼmo aliyo.

¹⁶ Aliganaʼmonanafa ma mopafi geʼe afa geʼeʼmo nehisagekaeʼmo maika halove huka apato. Ani agufa gemoʼmo hapa oʼmaesigeʼa Gotifeʼmo mono osuʼa magoʼe huʼa hosu kavaʼmo hugae.

¹⁷ Ani agufa hosu gemoʼmo apamuʼmo apaleteno ko nesiya agufa kavakana huno aleme aleme uno ko sino alopa hugiye. Ani agufa gemo aliʼana apaya maleʼnaʼa vekalaʼmo Haimeniyasiʼe Failitasiʼeʼmo maiʼnaʼae.

¹⁸ Anakaemo alagepa kaʼmo atale uʼanaeʼmo, agaegiʼeʼmo ago he tiʼnonanageta falisunatetiʼmo halate he otigune, huʼana hapa paiʼnaʼageʼapaeʼmo mago vayaʼamogi apakesamo afiʼa fatago huʼnaya kavaʼapimo aliʼana ataleʼnaʼageno asagauno aiʼniye.

¹⁹ Asagauno aiʼniyaʼmonanafa Goti noʼamo lokiya yafateʼmo faino ateʼniya yafaʼmo afaʼa haneʼniye. Gotiʼa faino ateʼniya yafateʼmo alagena yaʼmo hu maleʼniya yateʼmo haneʼniya gemoʼmo hunoʼaeʼmo, Ala kava neʼmoʼa vayaʼamo apakeʼniye, huno huteno magoʼe gemoʼmo hunoʼaeʼmo, Muki vayaʼamogimo Kalaisi agiʼamo neʼaya vayaʼmogi hosu kavategatiʼmo ataleʼa viyo, huno hu maleʼniye.

²⁰ Goti vayaʼamo afaʼa maigayaʼmonanafa alopa nopatiʼmo lusi moniletiʼmo miya nefaiya yuvapamo goli yafatetiʼmo alo huʼnaya yuvapaʼe siluva yafatetiʼmo alo huʼnaya yuvapaʼageʼmo ohaneʼnifa yosaletiʼmo alo huʼnaya yuvapagi mopaletiʼmo alo huʼnaya yuvapaʼenagi huno haneʼniye. Mago yuvapaʼamo alagepa aliʼyaʼmo alisiya yuvapamo haneʼnigeno mago yuvapamoʼamo hosu aliʼyaʼmo alisiya yuvapamo haneʼniye.

²¹ Mago vekamoʼmo ani hosu yatefeʼmo aeno kalo paeno atalesigenoʼaeʼmo alagepa yuvapagana huno maiʼnisigeno kava vekaʼamoʼmo muki alagepa aliʼyaʼaleʼmo avaleno ategaiye.

²² Neya vayaʼmogimo apakufamoʼmo hauʼniya kavaʼmo nehaya kavategatiʼmo ataleka kaune heka eka yaveyave apaipafatiʼmo Ala kava nefeʼmo keya aeʼa ge nehaya vayaʼeʼmo magokepiʼmo lokaetapa maiʼnetapaeʼmo fatago kavanagi lapau lapayamopafiʼmo nelapaiya kavanagi yuna lapaipa nekaliya kavanagi hutapa atafausayafeʼmo vegala aeyo.

²³ Negi maleteʼa fiku gemo huge afige huʼa neʼmaisayaʼmoʼmo ago afiʼnanana gemo vaige vaige huʼa maigayanagi maika halove huka apato.

²⁴ Ala kava neʼmo aliʼyaʼamo neʼalisiya vekamoʼa geletiʼmo kaveta osuno muki vayaʼaitegamo yagu yaga kavakeʼmo huge alagepa huno alino apaya malege oʼafiʼnisaya vayaʼaifeʼmo aipamo leno oʼapateno yuna aipamo kalino apatege huno maigiye.

²⁵ Goti aliʼyaʼamo neʼalisiya vekamoʼmo gemo amagiʼa neʼatagaya vayaʼaifeʼmo himuʼnamu gefatiʼmo osuno vase vase gemo huno alino api aino apategaiye. Gotiʼa apakaemo lama gemo afiteʼa agesayafeʼmo apaipamo alino afe leno apatesifi, huteno vase vase gefatiʼmo hugiye.

²⁶ Sataniʼmo agaiʼa hauʼniya kavaʼmo akame hisayafeʼmo aneʼaifiʼmo heʼnageno apatafauʼniya vayaʼmogimo negi kavaʼmo ataleʼa apaipa apakesamo halate aliteʼa aneʼaifatiʼmo aiʼa hatu maesayafeʼmae.