Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Timoti 1 - The Keyagana NT and 25 OT books

1 Gotiʼa hunoʼaeʼmo, Kalaisi Yesupiʼmo maige maige huʼa maisaya yaʼmo apamiguve, huno huʼniye. Mani gelefeʼmo, Yesu Kalaisi apa vekaʼamo maigane, huno naha paiʼnigeʼnaeʼmo nagaemo Poloʼnamo aliʼyaʼamo alisuvafeʼmo hauʼnigeno navaleno nateʼniye.

2 Nahauʼniya mafaʼneʼnimo Timotigaeʼmo avoʼmo nekaove. Afotimo Gotiʼe Ala kava netimo Kalaisi Yesuʼeʼmo fikumo kaha maeʼana hanau huʼana katesaʼageno kaipamoʼmo falu hino.


Timotiʼmo lokiya vaino atesiya agufa gemo ha paiʼniya gemae

3 Naginago vayaʼmogi Gotitefeʼmo mono aliʼyaʼmo aliʼnaya kava huʼna nagupi mafaʼnemoʼmo hosu kavaʼmo hane, huno nosigeʼnaeʼmo mono aliʼyaʼmo neʼaluve. Ani kava huʼna kagaefeʼmo nagesamo afiteʼnaeʼmo Gotifeʼmo muki afinaʼae afinaʼaeʼmo okataleʼna felugaʼe haniʼilagaʼeʼmo hao ke heʼna nunumuʼmo nehuve.

4 Kaunumo nelamiya kavafeʼmo nagesamo afiteʼnaeʼmo kagesugenoʼaeʼmo naipafiʼmo namogaga aisiya yaʼmo havai tesiyafeʼmo nahauʼniye.

5 Kagaefeʼmo nagesamo afiʼna ho huʼnaeʼmo, lama gemo huno agesamo afino fatago huʼniye, huʼna nehuve. Mani agufa lama ge kavaʼmo hogoteno alemokamoʼmo Lovisi aipafiʼmo haneʼnigeno itakamoʼmo Yunisi aipafiʼeʼmo haneʼniya kavaʼmo huno kagae kaipafiʼmo haneʼniye, huʼna ago ageʼnovaʼmofeʼmo lole nagesamo oʼafiʼnofa magoke nagesamo neʼafuve.

6 Ani kavaʼmo huka maiʼnanaʼmofeʼmo kagesamo afika ho hisanafeʼmo kaha nepauve. Nagaemo kagaeteʼmo nayaʼmo maleʼna kateʼnogenoʼaeʼmo Gotiʼa lokiyaʼamo ago kamiʼniye. Kamiʼniya lokiyaʼamoʼmo ata legekana huno yu oseno magoʼe huno lesiyafeʼmo fu huka kaegeno leno.

7 Na kava nehiyaʼmofeʼmae. Gotiʼa lamiʼniya Aunemeʼamoʼmo laipafiʼmo aliʼyaʼmo neʼaligetaeʼmo lamoʼya oʼaita himamuʼamo aliʼneta lahau layamopafiʼmo lahauʼnigeta lagesamo neʼafuna kavateʼmo neʼyagaune.

8 Lamiʼniyaʼmofeʼmo Ala kava netimo faigoko geʼamo aeka hakalo huka hapa paisanafeʼmo kavagage osinageka Kalaisi agiʼalefeʼmo kalavusifiʼmo maiʼnova vekaeʼmo kavagage osino. Kavagagemo osinageka faigoko gelefeʼmo hanageke yaʼmo alisayafeʼmo Goti himamuʼaletiʼmo kana yaʼmo aliyo. Nagaemo kana yaʼmo aliʼnova kava huka kana yaʼmo aligetaʼao.

9 Gotiʼa alagepa kavatilefeʼmo lagaefeʼmo keya aeno ge osuʼnifa hisiya kavafeʼmo agesamo afiteno fikumo laha maeno lamiʼniya kavaʼaletiʼmo lagufamo alino katino lateʼniyanageta laote vayaʼamo maisunafeʼmo keya aeno ge huʼniye. Akeyaʼvilagamo ma mopamo alo osuʼniya afinaʼmo hogoteno Gotiʼa Kalaisi Yesupiʼmo maiʼnonagenoʼaeʼmo fikumo laha maeno lamiʼniye.

10 Akeyaʼvilagamo lamiʼniyaʼmonanafa Yesu Kalaisiʼa lagufamo alino katino lateteno lahau neʼvaiya vekamo afole aiʼnigenoʼaeʼmo hemenimo ani kavaʼmo laulagaleʼmo ago afole aiʼnigeta ageʼnone. Agaemo nefaluna kavaʼmo lokiyaʼamo alino hano huno ataleteno agaiʼaeʼmo alagepa faigoko geʼaletiʼmo maige maige huʼa maisaya yaʼmo alino afole aino ateʼniye.

11 Gotiʼa ani faigoko geʼamo aeʼna hakalo huʼna hapa nepauva vekamo maige apa vekaʼamo maige alu nofi vayaʼaina aliʼna apaya neʼmalova vekaʼamo maige huʼna maisuvafeʼmo ago lekana paino nateʼniye.

12 Ani aliʼyaʼmo neʼaluvaʼmofeʼmo mani kana yaʼmo aliʼna maiʼnovaʼmonanafa navagagemo alagi nosiye. Nagaemo naha maesiyafeʼmo ina lafeʼmo nagesamo afiʼna fatago huʼnofi huʼna ago ageʼna aeto huʼnove. Nagaemo ageteʼnaeʼmo amiʼnova yateʼmo afaʼa yagaino nateme nateme neʼviyanageno agaiʼa afinaʼmo afole aigiye, huʼna nagesamo afisuvafeʼmo alino nave liʼnigeʼna ago ageʼnove.

13 Kagaemo aliʼna kaya maleʼnogeka afiʼnana geleʼmo atafauka alagi huvo. Ani gemoʼa kaita haugekana huno ohaneʼneno vayaʼmo alino hapageno neʼapateya gemo akame hisana kavaʼmo auneʼamo aliʼna kave liʼnove. Kalaisi Yesupiʼmo maiʼnekaeʼmo kagesamo afika fatago nehukaeʼmo kahau kayamopafiʼmo kahauʼninageka ani geleʼmo atafauka alagi huvo.

14 Gotiʼa faigoko geʼaleʼmo yagaika atesanafeʼmo kamiʼniye. Ani faigoko geʼaleʼmo laipafiʼmo maiʼniya aote Aunemeʼamo himamuʼaletiʼmo yagaika ato.

15 Ago afiʼnanana muki Esiya kotega vayanagi Esiya vekalaʼmo Fiselasiʼagi Hemosenisiʼagi huʼa ago nataleʼnae.

16-17 Ala kava neʼmoʼa Onesifolasiʼe afamo anagaʼaʼeʼmo hau huno apateno. Onesifolasiʼa kalavusifiʼmo maiʼnova kavafeʼmo avagage osuʼnigeno Lomu taonifiʼmo eno avaʼyi huteno lusi kava huno kahauya huno nagetenoʼaeʼmo muki afinaʼmo naha maete naha maete huʼnigenoʼaeʼmo naipamoʼmo falu huʼniye.

18 Efasasi taonifiʼmo maiʼnogenoʼaeʼmo muki afinaʼaeʼmo naha maeʼniya kavaʼmo ago ageʼnane. Nagaemo Ala kava nefeʼmo, kagae afinaʼmo afole aisigekaeʼmo kahau huka ato, huʼna nunumuʼmo huʼna neʼatove.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ