2 Tesaloniyani 3 - The Keyagana NT and 25 OT books

Nunumuʼmo hutapa lateyo, huno hapa paiʼniya gemae

¹ Konagatimogitapae, huta, atupa gemo hutaeʼmo, Ala kava neʼmo geʼamo aino atagu faesigeʼa alagepa huʼa afiteʼa magoʼe huʼa ani geleʼmo aliʼa asaga hisayafeʼmo nunumuʼmo hutapa lateyo. Lapakaetegamo huʼniya agufa kavaʼmo huno muki haopalegamo maiʼnaya vayaʼaitegamo hisiyafeʼmo nunumuʼmo hutapa lateyo.

² Muki vayaʼmogimo apakesamo afiʼa fatago nosayaʼmofeʼmo hosu vayaʼai apayapatiʼmo lagufamo alino katino latesiyafeʼmo nunumuʼmo hutapa lateyo.

³ Apakaemo maiʼnayaʼmonanafa Ala kava neʼmoʼa huguve, huno huʼniya gemo alagi oʼataleno akame nehiya vekamoʼmo lokiya vaino lapateteno yagaino lapatesigeno hosu kavaʼmoʼa alino hosu huno olapategaiye.

⁴ Lagaemo Ala kava nefeʼmo lagesamo afita fatago nehutaeʼmo lapakaefeʼmo, lagaemo huʼnona gemo afiteʼa akame nehayanageʼa afaʼa akame hugae, huta lagesamo neʼafune.

⁵ Ala kava neʼmoʼa lapaipa lapakesamo alino ho huno lapatenagetapa Gotiʼa lagaefeʼmo hau ayamopafiʼmo hauʼniya kavaʼe Kalaisiʼa oʼataleno atafauno alagi huʼniya kavaʼeʼmo alagepa hutapa agetetapa afiyo.

Muki vayaʼamogitapamo aliʼyaʼmo aliyo, huno hapa paiʼniya gemae

⁶ Konagatimogitapae, huta, Ala kava netimo Yesu Kalaisi agiʼaletiʼmo lokiya gemo huta lapa paitaeʼmo, muki konagatapimogimo aliʼyaʼmo oʼaliʼa afaʼa maiʼneʼa hapa paiʼnona gemo oʼafiʼnaya vayaʼmo maitapa halove huta apateyo.

⁷ Lagaemo lapakaeʼeʼmo lokaeta maiʼnetaeʼmo afaʼa oʼmaita aliʼyaʼmo aliʼnone. Ani kava huta lakame hisayafeʼmo ago lageʼnae.

⁸ Neʼyatapimo fikumo alita oʼneʼnonaʼmonanafa laha maesayafeʼmo kana yaʼmo alita olapamisunafeʼmo felugaʼe haniʼilagaʼeʼmo aliʼyaʼmo aliʼnone.

⁹ Ani kavaʼmo huʼnonana lapakaetegatiʼmo neʼyaʼmo afaʼa fikumo alita nesuna lokiyatimo haneʼniyaʼmonanafa nehuna kavaʼmo agetetapa akame hisayafeʼmo aliʼyaʼmo aliteta neʼyatimo miya faita neʼnone.

¹⁰ Lapakaeʼeʼmo magokepi lokaeta maiʼnetaeʼmo, aliʼyaʼmo alisiyafeʼmo ohauʼnisiya vekamoʼmo neʼyatapimo oʼnegaiye, huta lokiya gemo huta lapa paiʼnone.

¹¹ Mago faigoko gemo huʼapaeʼmo, mago vayaʼmogi aliʼyaʼmo oʼaliʼa afaʼageʼmo maiʼneʼa himuʼnamu kavaʼmo huʼa alu vayaʼai yatefeʼmo yagaiʼa neʼmaiye, huʼa laha paiʼnageta afiʼnone.

¹² Lagaemo Ala kava netimo Yesu Kalaisitetiʼmo ani vayaʼaifeʼmo hutaeʼmo, himuʼnamu kavaʼmo osutapa aliʼyaʼmo alitetapa lapakaitapi neʼyaʼmo alita neyo, huta lokiya gemo nehune.

¹³ Konagatimogitapae, huta, apakaemo ani hosu kavaʼmo nehayaʼmonanafa lapakaemo alagepa kavaʼmo nehutapaeʼmo alagaʼmo olapaeno.

¹⁴ Mago vekamoʼmo mani avoʼmo nekaona gemo oʼafisiyaʼmoʼmo yagaita maiʼnetapa avagage hisiyafeʼmo maita halove hutapa ateyo.

¹⁵ Lapakaemo maita halove hutapa ategayaʼmonanafa kametimo maiʼniye, hutapa osuta konagatimoʼmo maiʼniye, hutetapa agaefeʼmo ehekae, hutapa ha paiyo.

Atupa gemo huʼniya gemae

¹⁶ Ala kava neʼmoʼa apaipamo alino falu huno neʼapateya kavaʼmo aepa vekamoʼmo fikumo lapa maeno lapaminageno muki afinaʼmo muki kavatetiʼmo lapaipamoʼmo falu hino. Ala kava neʼmoʼa mukiʼamogitapaʼeʼmo magokepi lokaeno maino.

¹⁷ Nagaemo Poloʼnamo mani gemo nagaiʼnimo avo kayoʼmo aliʼna avoʼmo kaeʼnaeʼmo, Poloʼnamo ge lapamamaeʼnove, huʼna avoʼmo nekaove. Muki avoʼmo nekaova gemo ani agufa kavaʼmo huʼna nekaove.

¹⁸ Ala kava netimo Yesu Kalaisiʼa fikumo lapa maeno lapaminagetapa mukiʼamo alagepa hutapa maiyo. He, lama ge.