2 Tesaloniyani 2 - The Keyagana NT and 25 OT books

Alagi hosu vekaeʼmo huʼniya gemae

¹ Konagatimogitapae, huʼna, Ala kava netimo Yesu Kalaisiʼa eminesigetaeʼmo magokepi lokaeta maisuna kavafeʼmo ava gemo hugesune.

² Mago vayaʼmogi huʼapaeʼmo, Kalaisi afinaʼmo ago afole aiʼniye, huʼa nehayaʼmonanafa lokiya gefatiʼmo hutaeʼmo, Goti Aunemeʼamoʼmo laha paiʼniye, huʼa huʼnisafi mago vayaʼmogi eʼa aeʼa hakalo huʼa laha paiʼnae, huʼa huʼnisafi mago vayaʼmogi huʼapaeʼmo, Poloʼeʼmo lagaefeʼmo avoʼmo kaeʼnae, huʼa lapa paiʼnisafigi ani geeʼmo afitapa lapau aitetapa lapausoli osiyo.

³ Mago vayaʼmogi alu ge alu geletiʼmo humi lapategayanagi oʼafiyo. Ala kava neʼmo afinaʼmo fikumo afole oʼaigiyaʼmonanafa hogoteʼa muki asole vayaʼmogimo Goti kaʼmo alagi atalesagenoʼaeʼmo hosu vekamo Gotiʼa ata kopiʼmo uno lamigiye, huno huʼniya vekamo afole aitesigenoʼaeʼmo ani afinaʼmo afole aigiye.

⁴ Ani vekamoʼmo Gotitimoʼa maiʼniye, huʼa nehaya vayaʼai gotiʼapimogifeʼmo kamemo huno apatege mono nehaya gotiʼapimogifeʼmo kamemo huno apatege huno nehunoʼaeʼmo, aeʼna apakaseʼna hogote vekamo maiʼnove, huno hugiye. Agaemo Goti mono nopiʼmo uno haino maiʼnenoʼaeʼmo, Gotiʼnamo maiʼnove, huno hugiye.

⁵ Lapakaeʼeʼmo maiʼneʼnaeʼmo ani gemo lapa paiʼnovana ago lapake kaniʼnifiye.

⁶ Lapakaemo ago ageʼnayana mago kavaʼmoʼa ka akani maleʼniyanageno afole aisiya afinaʼmo alagi afole aigiye.

⁷ Hemenimo mago vayaʼmogimo alagi hosu vekamoʼmo hisiya agufa kavaʼmo nehayaʼmonanafa kaʼmo neʼakaniya vekamoʼmo ka akanime akanime visigenoʼaeʼmo hosu vekamoʼmo muki vayapatiʼmo afole aigiye.

⁸ Ani afinaʼmo muki keʼaepa gemo amagino neʼataleya vekamoʼmo muki vayaʼai apaulagaleʼmo afole aisigenoʼaeʼmo Ala kava neʼmo alino alave nehisigeno emineno avamusa aisiya kayotetiʼmo alagi amagigiye.

⁹ Afole aiteno Satani himamuʼaletiʼmo lokiya alagena aune kavaʼmo noʼagaya aigofe aune kavaʼmo hugiye.

¹⁰ Agaemo muki agufa aigofe hosu kavaʼaletiʼmo Gotiʼa alino apagoʼya lagauno apatalesiya vayaʼaifeʼmo humi apategaiye. Apakaemo Gotiʼa apakufamo alino katino apatesiyafeʼmo lama geeʼmo alagi ohapauʼnisigeʼa afela hegae.

¹¹ Ani kavaʼmo hugayaʼmofeʼmo Gotiʼa, aigofe gemo afaʼa afigae, huteno huno apami malesigeʼa aigofe geeʼmo, lama gemo haneʼniye, huʼa hugae.

¹² Na kava hisiyafeʼmae. Goti lama geʼaeʼmo apakesamo afiʼa fatago osuʼneʼa hosu kavafekeʼmo apamogaga neʼaiya vayaʼmogi aigofe gemo afisageno agoti huno apatetenoʼaeʼmo, hosu vayaʼmo maiʼnae, huno hisiyafeʼmae.

Gotiʼa lapakufamo alino katino lapatesiyafeʼmo lekana paino lapateʼniye, huno hapa paiʼniya gemae

¹³ Ala kava neʼmoʼa hau ayamopafiʼmo hauʼniya konagatimogitapae, huta, Gotiʼa aepa faiʼniya afinatetiʼmo lekana paino lapateʼniye. Aunemeʼamoʼmo alino lapaote lapatesigetapa lama geʼaeʼmo lapakesamo afita fatago hisageno Gotiʼa lapakufamo alino katino lapatesiyafeʼmo lekana paino lapateʼniyaʼmofeʼmo muki afinaʼmo Gotifeʼmo hao ke heta lapatesuna kavaʼmo haneʼniye.

¹⁴ Lagaemo alagepa faigoko geʼamo aeta hakalo huta lapa nepaunagenoʼaeʼmo Gotiʼa Ala kava netimo Yesu Kalaisi ha le konali yaʼamo alisayafeʼmo keya aeno ge huʼniye.

¹⁵ Konagatimogitapae, huta, ani kavaʼmo huʼniyaʼmofeʼmo aeta hakalo huta lapa paiʼnona geleʼe avoʼmo kaeʼnona geleʼeʼmo oʼataletapa atafauta alagi hutapa maiyo.

^16-17 Afotimo Gotiʼa lagaefeʼmo hau ayamopafiʼmo hauʼnigeno muki afinaʼmo lokiya vaita maiʼneta lavayagunagu huta agava maisunafeʼmo fikumo laha maeno lamiʼniye. Agaeʼe Ala kava netimo Yesu Kalaisiʼeʼmo muki alagepa gemo huge muki alagepa kavaʼmo huge hutapa maisayafeʼmo lapa maeʼana lapaipamo aliʼana lokiya vaiʼana lapatesaʼagetapa maiyo.