2 Tesaloniyani 1 - The Keyagana NT and 25 OT books

¹ Nagaemo Poloʼnamogi Silivenisiʼagi Timotiʼagi huta Tesalonaika taonifiʼmo maiʼnaya vayaʼmogitapamo afotimo Gotipiʼe Ala kava netimo Yesu Kalaisipiʼeʼmo maiʼnaya siosi vayaʼmogitapaeʼmo mani avoʼmo nekaone.

² Afotimo Gotiʼe Ala kava netimo Yesu Kalaisiʼeʼmo fikumo lapa maeʼana lapamisaʼageno lapaipamoʼmo falu hino.

Kalaisiʼa eminesiya afinafeʼmo huʼniya gemae

³ Konagatimogitapae, huta, lapakesamo afita fatago nehaya kavaʼmoʼa ko sino alopa heʼnigetapaeʼmo konagatapimogifeʼmo lapauʼniyanageno magoʼe magoʼe huno nelapaiye. Ani kavaʼmo nehayaʼmofeʼmo kanale kavaʼmogeta lapakaefeʼmo muki afinaʼmo Gotifeʼmo hao ke hesuna kavaʼmo haneʼniye.

⁴ Apaini huʼa nelapatagetapa kana yaʼmo aliʼnetapaeʼmo lapakesamo afita fatago nehutapa oʼataleta atafauta alagi hutapa maiʼnayaʼmofeʼmo lagaemo Goti siosi vayaʼamo aliʼa anupa huʼa maiʼnaya yategaʼe yategaʼeʼmo hutaeʼmo, alagepa kavaʼmo huʼa neʼmaiye, huta lapakitapileʼmo alita asaga huta nelapatone.

⁵ Lapakaemo Gotiʼa yagaino neʼapateya koteʼmo afaʼa uta haitapa maisaya kavaʼmo hutapa maiʼnae, huno hisiyafeʼmo ani kana yaʼmo aligae, huteno fako huno lapamiʼnigetapa aliʼnae.

⁶ Gotiʼa kana yaʼmo aliʼa nelapamiya vayaʼai anonaʼapilefeʼmo alagepa kavaʼmo huno kana yaʼmo alino apamigiye.

⁷ Ala kava neʼmo Yesu Kalaisiʼagi himamuʼapiʼe enisole vayanagi huʼa ata vaipiʼmo kokuʼnapatiʼmo emiʼeʼa muki vayaʼai apaulagaleʼmo afole neʼaisagenoʼaeʼmo Gotiʼa lapakaemo kana yaʼmo aliʼnaya vayaʼmo alino falu huno lapatesigeta lagaeʼe lapakaeʼeʼmo magokepi maita haga legaune.

⁸ Kalaisiʼa Gotiʼmo oʼagege Ala kava netimo Yesu Kalaisifeʼmo alagepa faigoko geʼamo oʼafige huʼa neʼmaiya vayaʼmo anonaʼapilefeʼmo ata kayotetiʼmo apamagigiye.

⁹ Apakaemo Ala kava neʼmo aulagaleʼmo oʼmaigayaʼmonanafa ha le konali himamuʼaʼe yategatiʼmo alino hapa faino apataletenoʼaeʼmo muki afinaʼmo alino apagoʼya lagauno apatalete apatalete hugiye.

¹⁰ Ani afinaʼmo apaote vayaʼamo alino alagepa huno apatesigeʼapaeʼmo agiʼaleʼmo aliʼa asaga huʼa ategae. Muki vayaʼmo apakesamo afiʼa fatago nehaya vayaʼmogimo agaemo ageteʼapaeʼmo hapau aiteʼa apamogaga aigae. Lapakaemo lapa paiʼnona geeʼmo lapakesamo afita fatago huʼnayaʼmofeʼmo apakaeʼeʼmo magokepi lokaeta maigae.

Lagaemo nunumuʼmo huta neʼapatona gemae

¹¹ Gotiʼa hunoʼaeʼmo, Apakaemo keya aeʼna ge huʼnova agufa kavaʼmo huʼa maiʼnae, huno hisiyafeʼmo muki afinaʼmo nunumuʼmo nehune. Gotifeʼmo nunumuʼmo hutaeʼmo, Kagaemo Tesaloniyani vayaʼmo apaote maisayafeʼmo keya aeka ge huʼnane. Apaote maisayafeʼmo alika apaote apato. Apakaetegamo kahauʼnisiya kavaʼmo alagepa kavaʼmo huka himamukaletiʼmo apaipafiʼmo apakesamo afiʼa fatago huteʼa alagepa kavaʼmo hisayafeʼmo alo huteka alika afole aika ato, huta nunumuʼmo nehune.

¹² Na kava hisayafeʼmae. Gotiʼe Ala kava neʼmo Yesu Kalaisiʼeʼmo fikumo lapa maeʼana lapamiteʼana lapaipafiʼmo aliʼyaʼmo alisaʼageʼapaeʼmo vayaʼmogi ani kavaʼmo ageteʼapaeʼmo Ala kava netimo Yesu Kalaisi agiʼaleʼmo aliʼa asaga huʼa atesayafeʼmae. Ani kavaʼmo hisageʼa Kalaisitetiʼmo lapakitapileʼmo aliʼa asaga huʼa lapategae.