2 Sitoli 36 - The Keyagana NT and 25 OT books

Yihovahayiʼmo Yuta vayaʼmogi kini vekaʼapimo hamaleʼniya gemae

¹ Yosaiyaʼmo falitegeʼapaeʼmo Yuta vayaʼmogimo Yosaiya mafaʼnemo Yihovahayiʼmo avaleʼa afoʼamo aimuʼyaleʼmo Yulusalemu taonifi kini vekamo aliʼa hamaleʼa ateʼnae.

² Yihovahayiʼmo kini vekamo hamaleʼniya afinaʼmo tuveti taliʼa kafugamo maiteno Yulusalemu taonifiʼmo loleʼe magoʼe kaitomo yagaino apateʼniye.

³ Isipi kini vekamo Nikoʼmo Yulusalemu taonifilagamo eno Yihovahayiʼmo kini aliʼyaʼaletiʼmo ha faino ataleteno muki Yuta vayaʼmogimo takesi monimo amisaya kavaʼmo huʼnigeʼapaeʼmo tali tauseni fo hataleti kilo siluvaʼe teti fo kilo goli yafaʼeʼmo amiʼnae.

⁴ Ani Isipi kini vekamo Ilaiyakimiʼmo Yihovahayi aganaʼamoʼmo avaleno Yuta vayaʼmogiʼe Yulusalemu vayaʼmogiʼeʼmo kini vekaʼapimo alino hamaleno ateʼniye. Nikoʼmo Ilaiyakimi agiʼamo alino alu agimo Yihoiyakimiʼae huno ateʼniye. Inagi Yihovahayiʼmo nepuʼamoʼmo kalavusi huno ateteno avalelinuno Isipi kotegamo ateʼniye.

Yihoiyakimiʼmo Yuta vayaʼaiteʼmo yagaino apateʼniya gemae

⁵ Yihoiyakimiʼmo Yuta vayaʼmogi kini vekamo hamaleʼniya afinaʼmo tuveti faefuʼa kafugamo maitenoʼaeʼmo Yulusalemu taonifiʼmo leveniʼa kafugamo kini vekamo maiteno yagaino apateʼniye. Agaemo Ala kava neʼmo Gotiʼamo aulagaleʼmo hosu kavaʼmo huʼniye.

⁶ Inagi Mamiloni kini vekamo Nepukanesaʼmo eno Yuta vayaʼeʼmo kamemo huteno Yihoiyakimiʼmo kalavusi huno ateteno seli nofitetiʼmo kino ateteno avalelino Mamiloni taonifiʼmo uʼniye.

⁷ Nepukanesaʼmo mago Ala kava neʼmo mono nopiʼmo haneʼniya alagepa yaʼmo aliteno alininuno Mamiloni kotega mono noʼafiʼmo maleʼniye.

⁸ Yihoiyakimiʼmo ani alu kavaʼamo huʼniya kavafeʼmo ava gemo haneʼniya mukueʼmo agiʼamo Isaleli kini vayaʼmogiʼe Yuta kini vayaʼmogi apava geʼeʼmo haneʼniya mukufiʼmo haneʼniye. Ala kava neʼmoʼa huʼniya kavafeʼmo alagi ohauʼnigenoʼaeʼmo avenatuʼnaʼmo heno ataleʼniya kavaʼe agoti huno atesiya kavaʼeʼmo ani mukufiʼmo haneʼniye. Henagaʼamo Yihoiyakimi mafaʼneʼamo Yihoiyakinimo afoʼamo aimuʼyaleʼmo yagaino apateʼniye.

Yihoiyakiniʼmo Yuta vayaʼmogi kini vekamo maiʼniya gemae

⁹ Yihoiyakiniʼmo Yuta vayaʼmogi kini vekaʼapimo hamaleʼniya afinaʼmo eitiʼa kafugamo maitenoʼaeʼmo Yulusalemu taonifiʼmo loleʼe magoʼe kaiʼe teniʼa afinaʼatoʼeʼmo yagaino apateʼniye. Agaemo Ala kava neʼmo aulagaleʼmo hosu kavaʼmo huʼniye.

¹⁰ Ani kafugamo yasi afinaʼmo hano hugefeʼmo huʼnigenoʼaeʼmo kini vekamo Nepukanesaʼmo Yihoiyakinifeʼmo ge huʼnigeno eʼnigenoʼaeʼmo Mamiloni kotegamo avalelino uʼniye. Agaemo Ala kava neʼmo mono nopiʼmo haneʼniya yaʼmo alopa moniletiʼmo miya faiʼnaya agufa yaʼmo aliteno alinino uʼniye. Nepukanesaʼmo Yihoiyakimi aganaʼamoʼmo Yeʼnekaiyaʼmo Yuta vayaʼmogiʼe Yulusalemu taonifiʼmo maiʼnaya vayaʼmogiʼeʼmo kini vekaʼapimo alino hamaleno ateʼniye.

Yeʼnekaiyaʼmo Yuta vayaʼmogi kini vekamo maiʼniya gemae

¹¹ Yeʼnekaiyaʼmo Yuta vayaʼmogi kini vekamo hamaleʼniya afinaʼmo tuveti vaniʼa kafugamo maitenoʼaeʼmo Yulusalemu taonifiʼmo leveniʼa kafugamo maiʼneno yagaino apateʼniye.

¹² Agaemo Ala kava neʼmo Gotiʼamo aulagaleʼmo hosu kavaʼmo huʼniye. Agaemo Gotitegati gemo alinineno aeno hakalo huno hapa nepaiya vekamo Yelemaiya aulagaleʼmo agaiʼamo alino afepiʼmo oʼateʼniye. Yelemaiyaʼmo Ala kava neʼmo avayafatiʼmo huʼniya gemo ha paiʼniyana Yeʼnekaiyaʼmo oʼafiʼniye.

¹³ Kini vekamo Nepukanesaʼmo Yeʼnekaiyaʼa Goti agiʼaletiʼmo alagi lama gemo huvanageʼna kaiyafiʼmo maiʼneʼna gekamo afiguve, huno huteno agoʼyamo ataleʼniye, huno hisiyafeʼmo alino he tino ateʼniyaʼmonanafa Yeʼnekaiyaʼmo ha paiʼniya gemo amagino ataleʼniye. Agaemo augosaʼe aipaʼeʼmo alino lokiya vaino ateteno Ala kava neʼmo Isaleli vayaʼai Gotiʼapimofeʼmo aipamo alino afe leteno aino atagineno oʼmeʼniye.

¹⁴ Magoʼe huno hosu kavaʼamo afole aiʼniyana muki mono huʼa neʼapataya vayanagi muki vayatama vayanagi ve aʼnemogiʼenagi huʼa magoʼe magoʼe huʼa gemo amagiʼa ataleʼnae. Apakaemo muki malaga alu nofi alu nofi vayaʼmogimo alagi hosu atu aiʼniya kavaʼmo huʼa maiʼnaya agufa kava huʼa maiʼnae. Apakaemo Ala kava neʼmoʼa Yulusalemu taonifi mono noʼmo agaiʼalefeʼmo aote hu maleʼniya noʼamo aliʼa hosu huʼa ateʼnae.

Mamiloni ami vayaʼmogimo Yulusalemu vayaʼeʼmo kamemo huteʼa taonimo aliʼnaya gemae

¹⁵ Ala kava neʼmo apakinago vayaʼmogi Gotiʼapimoʼmo vayaʼaʼeʼmo maiʼniya mono noʼaeʼmo hauʼniyaʼmofeʼmo vayaʼmo gotilamiyapiʼmo he tiʼa aliʼyaʼmo neʼaliya kava huno Gotiʼa malage huno he tino apa vayaʼamo alino apateʼnigeʼa ute ute huʼa ehetapiye, huʼa hapa paiʼnae.

¹⁶ Hapa paiʼnayaʼmonanafa apa vayaʼaina huʼa apami maleteʼa kigi yokalo geʼmo huʼa apatege Goti geʼaeʼmo ina agufa gee huʼa huge Polofeti vayaʼaifeʼmo huʼa faipa huʼa apatege hume hume neʼagenoʼaeʼmo Ala kava neʼmoʼa vayaʼaeʼmo lusi kava huno aipamo leno neʼapateyanageno hapa maesiya yaʼmo alagi ohanegaiye.

¹⁷ Ani kavaʼmo huʼnayaʼmofeʼmo Ala kava neʼmoʼa Mamiloni kini vekaʼe ami vayaʼaʼeʼmo alino apateʼnigeʼa eʼa Yuta neya vayaʼmo mono nopiʼmo naipeletiʼmo apaiʼa kiʼa apateʼnae. Apakaemo muki vayaʼaifeʼmo hapau huʼa oʼapateʼnae. Apakaemo neya vayaʼmofi veleʼmo oʼmaiʼnaya aʼmafaʼnemofi kosuna vayaʼmofi anekalo aʼnemofi lokiya noʼvaiya vayaʼmofi huʼa hapau huʼa oʼapateʼnae. Gotiʼa muki vayaʼmo apavalelinuno Mamiloni kini vekamo ayapiʼmo apateʼniye.

¹⁸ Mamiloni kini vekamoʼmo Goti mono nopiʼmo haneʼniya yaʼmo muki agufa aise yaʼe alopa yaʼeʼmo aliʼniye. Agaemo Ala kava neʼmo nopatiʼmo muki yaʼmo lusi moniletiʼmo miya nefaiya agufa yaʼmo alige Yuta kini vekamo nopatiʼmo muki lusi moniletiʼmo miya nefaiya agufa yaʼmo alige yagaiʼnaya kini vayaʼamogi nopatiʼmo muki lusi moniletiʼmo miya nefaiya agufa yaʼmo alige huteno muki ani yaʼamo alinino Mamiloni kotegamo uʼniye.

¹⁹ Mamiloni ami vayaʼmogimo Goti mono noʼamo kaege Yulusalemu taonileʼmo lokiya yafa kegiʼyamo faino vego huʼniya kegiʼyamo aliʼa nakupaeʼa atalege muki kanale alopa nokoʼmo kaege lusi moniletiʼmo miya faiʼnaya yaʼmo muki kanale alagepa yaʼageʼmo aliʼa hosu huʼa atalege huʼnae.

^20-21 Mamiloni kini vekamo ami vayaʼamogi ohapaeʼnaya vayaʼmo apavalelinuno Mamiloni kotegamo apateʼniye. Apateʼnigeʼa aliʼyaʼamo alige kini vekamo mafaʼneʼamo aliʼyaʼamo alige hume hume neʼagenoʼaeʼmo Pesiya vayaʼmogimo uʼa yagaiʼa apateʼnae. Ala kava neʼmo geʼamo Yelemaiyaʼa afole aisiya kavafeʼmo avayafatiʼmo huʼniya gemo afole aisiyafeʼmo Isaleli vayaʼmogi mopaʼapileʼmo oʼmaiʼnageno sevetiʼa kafugamo mopaʼapimo kaʼme koʼmo haneʼniye. Ani mopaʼapileʼmo Sapati kavaʼmo afole aisiyafeʼmae.

²² Pelesiya koteʼmo Sailasiʼmo kini vekamo maiʼniya afinaʼmo hogote kafugaʼamo Ala kava neʼmoʼa Yelemaiya avayafatiʼmo geʼamo hapa paiʼniya gemo afole aisiyafeʼmo Ala kava neʼmoʼa Sailasiʼmo Pelesiya kote kini vekamo aipafiʼmo aliʼyaʼmo aliʼnigeno muki vayaʼmogi afisayafeʼmo Sailasiʼmo mago gemo avoʼmo kae maleʼniye.

²³ Sailasiʼa Pelesiya kote kini vekamoʼmo hunoʼaeʼmo, Ala kava neʼmo kokuʼnapi Gotiʼa muki kini vayaʼmogi mopaʼaleʼmo yagaisuvafeʼmo namitenoʼaeʼmo, Kagaemo Yuta kotega Yulusalemu taonifiʼmo noʼnimo kika nato, huno naha paiʼniye. Inagi vayaʼafatiʼmo haiya vayaʼmogi uʼa haiʼa noʼamo kigae. Ala kava neʼmo Gotiʼapimoʼmo apakaeʼeʼmo magokepi lokaeno maigiye, huno hapa paiʼniye.