2 Sitoli 35 - The Keyagana NT and 25 OT books

Kini vekamo Yosaiyaʼmo Ala kava netefeʼmo Pasova neʼyaʼmo nesayafeʼmo Isaleli vayaʼmo alino he tino apateʼniya gemae

¹ Kini vekamo Yosaiyaʼmo Yulusalemu taonifiʼmo Pasova neʼyaʼmo yagitamo hugune, huno huʼnigeʼa eʼa Yulusalemu taonifiʼmo aliʼa anupa huteʼa vani kaileʼmo fotini afinaʼmo asole Pasova aikeli sipisipimo lugo nofiʼapimo hatagauʼnae.

² Yosaiyaʼmo mono huʼa neʼapataya vayaʼmogimo aliʼyaʼapimo alisayafeʼmo aliʼyaʼmo alisaya yategamo alino apatege Ala kava neʼmo nopiʼmo aliʼyaʼmo alisayafeʼmo apaipa apakesamo alino lokiya vaino apatege huʼniye.

³ Agaemo Isaleli vayaʼmo aliʼa apaya neʼmalaya Livai nofi vayaʼmogi Ala kava netefeʼmo apaote maiʼnaya vayaʼaifeʼmo hapa painoʼaeʼmo, Ala kava neʼmo kotalake kesiʼamo alitapa kini vekamo Solomoniʼmo Nevini mafaʼnemoʼmo ki maleʼniya nopiʼmo maleyo. Lapakaemo magoʼe hutapa kotalake kesimo alita kofi litapa oʼugae. Hemenimo Ala kava neʼmo Gotitapimo aliʼyaʼamo alige Goti vayaʼamo Isaleli vayaʼmo hapa maege hutapa maiyo.

⁴ Lapakaemo magoke magoke afamo anaga vayaʼmo uta magoke agufa aliʼyaʼapimo neʼaliya afamo anaga vayaʼeʼmo magokepiʼmo lokaetapa maiyo. Lapakaemo mono aliʼyatapimo alisayafeʼmo kini vekamo Neviniʼe mafaʼneʼamo Solomoniʼeʼmo mukufi avoʼmo kae maleʼnaʼa gemo akame hutapa alo huta maiyo.

⁵ Isaleli nofi vayaʼmogi aliʼa fako huʼa apaote apaote huʼa aote mono noʼmo kumateʼmo he tiʼa maisaya kavatefeʼmo Livai nofi vayaʼmogi aliʼa fako huʼa apaote apaote huʼa maisaya kavateʼefeʼmo he titapa maiyo.

⁶ Pasova aikeli sipisipiʼe memeʼeʼmo lugo nofiʼapimo hatagaiyo. Ani ofalini aliʼyaʼmo alisayafeʼmo alita alagepa hutapa lapaote lapatetetapa Ala kava neʼmoʼa Mosesefeʼmo ha paiʼniya gemo akame hisayafeʼmo konagatapimo alo huta ateyo.

⁷ Kini vekamo Yosaiyaʼmo Pasova ofalini kavaʼmo hisayafeʼmo asole aikeli sipisipigi memegi huno teti tauseniʼagi ve pulumakamo tali tauseniʼagi huno apavaleno apamiʼniye.

⁸ Kini vekamoʼmo yagaiʼa neʼapataya vayaʼmo apamisayafeʼmo hapauʼnigeʼa Isaleli vayaʼaina apamige mono huʼa neʼapataya vayaʼaina apamige Livai nofi vayaʼaina apamige huʼnae. Hilikaiyaʼagi Sakalaiyaʼagi Yihaiyeliʼagi huʼa Goti mono noteʼmo neʼyagaiya vayaʼmogi Pasova ofalini kavafeʼmo mono huʼa neʼapataya vayaʼmo asole aikeli sipisipigi asole aikeli memegi huʼa tu tauseni sigisi hataletiʼagi tali hataletiʼa ve pulumakagi huʼa apavaleʼa apamiʼnae.

⁹ Livai nofi vayaʼaiteʼmo yagaiʼa apateʼnaya vayaʼmo Kananaiyaʼagi aganaʼalaʼmoganimo Yimayaʼagi Nitaneliʼagi Hayamaiyaʼagi Yiyaiyeʼagi Yayamatiʼagi huʼa apakaemo Pasova ofalini hisayafeʼmo faefu tauseni sipisipigi faefu hataleti ve pulumakagi huʼa Livai nofi vayaʼaina apavaleʼa apamiʼnae.

¹⁰ Apakaemo muki ofalinimo Gotina amisayafeʼmo ago alo hu maleteʼapaeʼmo inagi mono huʼa neʼapataya vayaʼe Livai nofi vayaʼeʼmo kini vekamo geʼamo akame huʼa uʼa maisaya yateʼmo he tiʼa maiʼnae.

¹¹ Apakaemo Pasova aikeli sipisipiʼe memeʼeʼmo lugo nofiʼapimo hatagauʼa kolaʼapimo mono huʼa neʼapataya vayaʼmogi aliʼa aiʼa fuli fuli huʼa falege Livai nofi vayaʼmogi afumogi apakufaʼamo heʼa kalo paeʼa atalege huʼnae.

¹² Apakaemo ofalini hiʼyalamuteʼmo kaesaya ofalinimo magoke magoke afamo anaga vayaʼmo apamisageʼa Ala kava neʼmo amisayafeʼmo aliʼa fako huʼa maleʼnae. Mosese keʼaepa gemo mukufiʼmo avoʼmo kae maleʼniya gemo akame huʼnae. Ani huʼnaya agufa kavaʼmo huʼa pulumakamo aliʼa fako huʼa maleʼnae.

¹³ Apakaemo Pasova ofalinimo keʼaepa gemoʼmo hiyo, huno huʼniya kavaʼmo huʼa atafiʼmo kaeʼnayaʼmonanafa alu aote ofalini ameʼamo aliʼa aise samofiʼe alopa samofiʼeʼmo anipiʼmo kaeʼnae. Ameʼamo ago leʼnigeʼapaeʼmo malage huʼa aliniʼuʼa ve aʼnemo aliʼa fako huʼa apamiʼnae.

¹⁴ Henagaʼamo Livai vayaʼmogimo apakaiʼapimo nesaya ameʼamo alo huʼa malege mono huʼa neʼapataya vayaʼmo Eloni nofi vayaʼmogi nesaya ameʼamo alo huʼa apatege huʼnae. Mono huʼa neʼapataya vayaʼmogimo lusi kava huʼa ofalinimo huge afayaʼamo kaege huliʼuʼa une tiʼnayaʼmofeʼmo Livai vayaʼmogimo apakaiʼapiʼe konagaʼapimogi Eloni mafaʼne anaga vayaʼeʼmo alo huʼnae.

¹⁵ Akeyaʼvilagamo kini vekamo Neviniʼagi Goti geʼamo alagamuna agegekana huno aeno hakalo huno hapa paiʼniya kini vekamo Yeʼnutaniʼagi Esafiʼagi Himaniʼagi huʼa hiyo, huʼa hapa paiʼnae. Ani afinaʼmo Esafi mafaʼne anagaʼmogi yokemo nehaya vayaʼmogi mani gemo akame huʼa uʼa noʼapile noʼapileʼmo maiʼnae. Ina kava huʼa kegiʼyamo kipateʼmo noʼapile noʼapileʼmo yagaiʼa maiʼnae. Konaga vayaʼapimogimo alu Livai nofi vayaʼmo ofalini neyaʼapimo alo huʼa apateʼnayaʼmofeʼmo kipateʼmo yagaiʼnaya yatetiʼmo ataleʼa oʼuʼnae.

¹⁶ Inagi ani magoke afinaʼmo apakaemo Ala kava neʼmo mono aliʼyaʼamo aliʼsayafeʼmo Pasova kavaʼmo huʼapaeʼmo Ala kava neʼmo yafa hiʼyalamuteʼmo atamoʼmo alagi leno saga lisiya ofalinimo maleʼneʼa yagita huʼnae. Kini vekamo Yosaiyaʼmo hiyo, huno hapa paiʼniya gemo akame huʼnae.

¹⁷ Muki Isaleli vayaʼmo eʼa maiʼnaya vayaʼmogimo Pasova hopa afina kavaʼmo huge seveniʼa afinaʼmo aeno apafu noleya peleti mayamo hopa afina kavaʼeʼmo huge huʼnae.

¹⁸ Apakaemo ani Pasova kavaʼmo huʼa yagitamo huʼnaya kavaʼmo alagi alagepa huno afole aiʼniye. Polofeti vekamo Samiyo afinatetiʼmo eno alu Isaleli kini vayaʼmogimo ani agufa Pasova yagitamo aliʼa afole aiʼa oʼateʼnafa kini vekamo Yosaiyaʼmo alino afole aino ateʼniya Pasova yagita kavaʼmo ago aeno aga seʼniye. Kini vekamo Yosaiyaʼagi mono huʼa neʼapataya vayanagi Livai nofi vayanagi muki Yuta kotega maiʼnaya vayanagi Isaleli kotega maiʼnaya vayanagi Yulusalemu taonifiʼmo maiʼnaya vayanagi huʼa ani Pasova hopa afina kavaʼmo huʼnae.

¹⁹ Kini vekamo Yosaiyaʼmo eitiniʼa kafugamo yagaino apateʼnigeʼapaeʼmo ani Pasova yagitamo huʼnae.

Isipi vayaʼmo eʼa Yuta vayaʼeʼmo kamemo huteʼa kini vekamo Yosaiyaʼmo kamitimo haeʼnaya gemae

²⁰ Kini vekamo Yosaiyaʼmo muki ani kavaʼmo huteno Ala kava neʼmo mono noʼmo alino kanale hu maletegeʼapaeʼmo Isipi kini vekamo Nikoʼmo ami vayaʼamo apavalelino Yufaletisi ani haigifiʼmo Kakemisi taonifiʼmo kame vayaʼapiʼeʼmo kamemo hisayafeʼmo eʼniye. Yosaiyaʼmo ani kavafeʼmo ava gemo afitenoʼaeʼmo agaemo ami vayaʼamo apavalelino Isipi vayaʼeʼmo kamemo hisiyafeʼmo uʼniye.

²¹ Uʼniyaʼmonanafa kini vekamo Nikoʼmo Yosaiyategamo apa vayaʼmo alino apateʼnigeʼa uʼnae. Apakaemo huʼapaeʼmo, kini vekamo Nikoʼmo kaha painoʼaeʼmo, Yuta kini vekae, huno, Afiyo, huno, Laʼagaetegamo na agufa kavaʼmo afole aiʼnigetaʼaene. Nagaemo kagaeʼeʼmo kame hisuvafeʼmo oʼmeʼnofa kame vayaʼnigeʼmo kamemo hapaesuvafekeʼmo eʼnove. Gotiʼa naha painoʼaeʼmo, Malage huka uka kamemo hapao, huno naha paiʼniye. Gotiʼa nahaopaleʼmo maiʼniyaʼmofeʼmo atafauka oʼato. Agaemo fiku yanageno alino hosu huno kategaiye.

²² Gotiʼa ani gemo kini vekamo Niko avayaletiʼmo ha paiʼniyaʼmonanafa Yosaiyaʼmo ataleno oʼuʼniye. Agaemo kini kukenaʼamo asagino maleteno Isipi vayaʼmogimo agaemae, huʼa oʼagesayafeʼmo alu kukenamo alino vaiʼniye. Inagi agaemo Megiʼno kagoʼmu kotegamo uno Isipi vayaʼeʼmo kamemo huʼniye.

²³ Apakaemo kame nehuʼapaeʼmo Isipi ati vayaʼmogimo mago kevemo hetalageno uʼniya kevemoʼmo Yosaiya agufafiʼmo uno haniʼniye. Inagi agaemo aliʼyaʼamo neʼaliya vayaʼaifeʼmo ina ge huno hapa paiʼniye. Kamitimo nahaeʼnayanagi ataletapa navalelita viyo.

²⁴ Inagi apakaemo ani maiʼniya kame talalafatiʼmo avaleliʼuʼa alu talalafiʼmo ateteʼa Yulusalemu taonifiʼmo avaleliʼa uʼnae. Ani kavatetiʼmo faliʼnigeʼapaeʼmo aginago vayaʼmo faliʼnageʼa kiʼa apateʼnaya nopiʼmo kiʼa ateʼnae. Inagi muki Yuta vayaʼe Yulusalemu vayaʼeʼmo lusi kava huʼa yulagefa aiʼa hapau huʼa ateʼnae.

²⁵ Gotitegati gemo alinineno aeno hakalo nehiya vekamo Yelemaiyaʼeʼmo Yosaiyafeʼmo yulagefa aino hau huno ateʼniye. Faliʼniya afinatetiʼmo yokemo nehaya ve aʼnemogimo Yosaiyafeʼmo ava gemo huʼa faiyosago yokemo hume hume eʼa hemeniʼeʼmo nehae. Isaleli vayaʼmogimo muki afinaʼmo ani faiyosago yokemo nehae. Ani faiyosago yokemo faiyosago yokemo haneʼniya mukufiʼmo haneʼniye.

^26-27 Kini vekamo Yosaiyaʼmo alu kavaʼmo huʼniya kavafeʼmo ava gegi Goti keʼaepa gemo akame huʼniya alagepa kavaʼaenagi kini vekamo aepa faino hamaleteno maime maime eno faliʼniya afinafenagi huno ava gemo mago mukuʼmo agiʼamo Isaleli kini vayaʼe Yuta kini vayaʼmogi apava geʼeʼmo haneʼniya mukufiʼmo haneʼniye.