2 Sitoli 34 - The Keyagana NT and 25 OT books

Yosaiyaʼmo kini vekamo maiteno Yuta vayaʼaiteʼmo yagaino apateʼniya gemae

¹ Yosaiyaʼmo Yuta vayaʼai kini vekamo hamaleʼniya afinaʼmo eitiʼa kafugamo maiteno Yulusalemu taonifiʼmo teti vaniʼa kafugamo yagaino apateʼniye.

² Agaemo Ala kava neʼmo aulagaleʼmo alagepa kavaʼmo huʼniye. Agaemo aginago kini vekamo Neviniʼmo huʼniya agufa kavaʼmo huʼniye. Agaemo alagepa kateʼmo neʼunoʼaeʼmo ataleno hoga haopalega kateʼmo oʼuge lamaga haopalega kateʼmo oʼuge huteno alagepa kategeʼmo uʼniye.

³ Yosaiyaʼmo eitiʼa kafugamo neya kini vekamo maiʼnenoʼaeʼmo aginago kini vekamo Nevini Gotiʼamoʼmo agesiyafeʼmo aepa faino kahauya huʼniye. Agaemo tuolofuʼa kafugamo yagaino apatetenoʼaeʼmo Yuta haopalegaʼe Yulusalemu taonifiʼeʼmo yosaletiʼmo alo huʼnaya aune yatefenagi aeniletiʼmo alo huʼnaya aune yatefenagi haginaletiʼmo alo huʼnaya aune yatefenagi huʼa ave koteʼmo mono huʼnaya yaʼmo aepa faino alino ataleʼniye.

⁴ Apakaemo uʼa Yosaiya aulagaleʼmo aigofe goti agiʼamo Meli ofalini hiʼyalamuʼmo aliʼa anakupaeʼa atalege anagamo haneʼniya hiʼyalamuteʼmo laʼnefamo kaeʼnageno halinaʼamoʼmo alagepa atumo neʼaiya hiʼyalamuʼmo aliʼa anakupaeʼa atalege aeto aeto agufa aune yaʼmo aiʼa atagige huteʼa amagiʼa aliʼa laʼnefagana huʼa ataleʼnae. Ani laʼnefamo aliniʼuʼa ani aigofe gotigitefeʼmo ofalinimo huʼnaya vayaʼmogi kanoluleʼmo aiʼa atagu faeʼa ataleʼnae.

⁵ Yosaiyaʼmo aigofe gotigitefeʼmo mono huʼa neʼapataya vayaʼmogi apayamufamo alino ofalini nehaya yafa hiʼyalamuʼapileʼmo kaeʼniye. Agaemo ani kavatetiʼmo hosu kavaʼapimo alino ataleteno Yuta kotegaʼe Yulusalemu taonifiʼeʼmo Ala kava ne; mo aulagaleʼmo alino alagepa huno ateʼniye.

⁶ Agaemo magoke agufa kavaʼmo huno Manase nofi vayaʼmogi taonifinagi Ifalemu nofi vayaʼmogi taonifinagi Simiyoni nofi vayaʼmogi taonifinagi huno uteno Nafatali taonifiʼenagi huno koʼneletiʼmo hosu yaʼmo heno halagape vaino ataleʼniye.

⁷ Agaemo muki ani Isaleli haopalegamo ofalini yafa hiyalamuʼmo alino anakupaege yosaletiʼmo alo huʼnaya aune yaʼmo heno vasagalino atalege haginaletiʼmo alo huʼnaya aune yaʼmo alino amagino latapaino laʼnefagana huno atalege muki laʼnefamo kaeʼnageno halinaʼamoʼmo alagepa atumo neʼaiya yafa hiʼyalamuʼmo alino anakupaeno atalege huteno halate Yulusalemu taonifilagamo aino atagineno eʼniye.

Hilikaiyaʼmo Ala kava neʼmo nopiʼmo keʼaepa gemo haneʼniya mukumo ageʼniya gemae

⁸ Yosaiyaʼmo eitiniʼa kafugamo kini vekamo maiʼnenoʼaeʼmo aigofe gotigimo Yuta mopaletiʼmo alino atalege Goti mono nopatiʼmo alino atalege huteno loleʼe magoʼe vayaʼmogimo Ala kava neʼmo mono noʼmo aliʼa alagepa huʼa atesayafeʼmo alino apateʼnigeʼa uʼnae. Apakiʼapimo Ayalaiya mafaʼnemo Yefaniʼagi Yulusalemu taonifiʼmo yagaiʼniya vekamo Mayaseyaʼagi Yovahaiya mafaʼnemo Yovaʼagi huʼa uʼnae. Yovaʼmo kini vekamo avoʼmo nekaeya vekamae.

⁹ Manase nofi vayanagi Ifalemu nofi vayanagi alu Isaleli nofi vayanagi Isaleli vayapatiʼmo logufaʼa Yuta nofi vayanagi Menisameni nofi vayanagi huʼa ofalini monimo aliniʼeʼa Yulusalemu taonifi mono nopiʼmo maleʼnageʼa Livai nofi vayaʼmogimo aliʼnae. Livai nofi vayaʼmogimo mono no kipateʼmo yagaiʼnae. Livai nofi vayaʼmogi ani monimo hogote vekamo mono huno neʼapateya vekamo Hilikaiyaʼmo amiʼnae.

¹⁰ Hilikaiyaʼmo ani monimo alino loleʼe magoʼe vayaʼmo mono noʼmo aliʼa alagepa huʼa atesayafeʼmo yagaiʼnaya vayaʼmo apamiʼniye.

¹¹ Ani loleʼe magoʼe vayaʼmo neʼyagaiya vayaʼmogimo ani moniletiʼmo amagiʼa naku paeʼnaya yafaʼe apalotiʼa atalavaiʼnaya yosaʼeʼmo miya faisayafeʼmo yafatetiʼmo noʼmo nekiya vayaʼmo apamige yafaʼmo apalo neʼatiya vayaʼmo apamige huʼnae. Ani noʼmo nekiya vayaʼmogimo mono noʼmo aliʼa alagepa huʼa atesayafeʼmo monimo aliʼnae. Yuta kini vayaʼmogi mono noteʼmo alagepa huʼa oʼyagaiʼnayaʼmofeʼmae.

¹² Ani no nekiya vayaʼmogimo monimo kumaya oʼaliʼa alagepa aliʼyaʼmo aliʼnae. No nekiya vayaʼaiteʼmo neʼyagaiya vayaʼmo Livai nofi vayaʼmo Yehatiʼagi Omanaiyaʼagi Sakalaiyaʼagi Miyalamiʼagi huʼa yagaiʼnae. Yehatiʼe Omanaiyaʼeʼmo huʼanaeʼmo Melali afamo anaga vekalaʼmo maiʼnoʼageʼana Sakalaiyaʼe Miyalamiʼeʼmo Kohati afamo anaga vekalaʼmo maiʼnaʼae. Muki Livai vayaʼmogimo yokemo huʼapaeʼmo alu age alu agemo neʼaiya kavaʼmo alagepa huʼa ageʼnae.

¹³ Mago Livai vayaʼmogimo noʼmo kisaya yaʼmo aliniʼa eʼnaya vayaʼaiteʼmo yagaiʼa apatege alu Livai vayaʼmogimo muki agufa aliʼyaʼmo aliʼnaya vayaʼaiteʼmo yagaiʼa apatege magoʼamogi avoʼmo kaege magoʼamogi kipateʼmo yagaige huʼnae.

¹⁴ Livai nofi vayaʼmogimo ofalini monimo Isaleli vayaʼmogi Ala kava neʼmo notegamo aliniʼa eʼnaya monimo aliniʼa visayafeʼmo hogote vekamo mono huno neʼapateya vekamo agiʼamo Hilikaiyaʼmo ageyana keʼaepa gemo haneʼniya mukumo haneʼnigeno ageʼniye. Ani mukufiʼmo Ala kava neʼmoʼa Mosesena amiʼniya keʼaepa gemo haneʼniye.

¹⁵ Inagi Hilikaiyaʼmo avoʼmo nekaeya vekamo Yefanifeʼmo ha painoʼaeʼmo, Nagaemo keʼaepa gemo haneʼniya mukumo Ala kava neʼmo mono noʼafiʼmo haneʼnigeʼna ageʼnove, huno ha paiteno ani mukumo alino Yefaniʼmo amiʼniye.

¹⁶ Yefaniʼmo ani mukumo alininuno kini vekaeʼmo ina ge huno ha paiʼniye. Lagaemo aliʼyakamo neʼaluna vayaʼmo muki lamiʼnana aliʼyaʼmo neʼalune.

¹⁷ Lagaemo Ala kava neʼmo mono nopatiʼmo ageʼnona monimo ago alita aliʼyateʼmo yagaiʼnaya vayaʼe mono nopiʼmo aliʼyaʼmo neʼaliya vayaʼeʼmo apamiʼnone.

¹⁸ Mono huno neʼapateya vekamo Hilikaiyaʼmo mago mukumo alino namiʼniye, huno huteno kini vekamo aulagaleʼmo lekana paino ha paiʼniye.

¹⁹ Inagi kini vekamoʼmo ani mukufiʼmo Goti keʼaepa geʼamo haneʼniya gemo afitenoʼaeʼmo lusi kava huno koli huʼniyaʼmofeʼmo kukena yaʼamo alino apake aiʼniye.

²⁰ Kini vekamoʼmo Hilikaiyafenagi Yefani mafaʼnemo Ehaikamifenagi Maika mafaʼnemo Amononifenagi avoʼmo nekaeya vekamo Yefanifenagi kini vekamo aliʼyaʼamo neʼaliya vekamo Asaiyafenagi huno hapa painoʼaeʼmo,

²¹ Laginago vayaʼmogimo ani mukufiʼmo Ala kava neʼmo keʼaepa geʼamo akame osuʼnayaʼmofeʼmo Ala kava neʼmoʼa lagaefeʼmo aipamo leno nelate. Lapakaemo utapa Ala kava nefeʼmo mukufiʼmo avoʼmo kae maleʼniya geʼaeʼmo ge hutapa afi geyo. Nagaegi ataleʼa oʼuʼnaya Isaleli vayanagi Yuta vayaʼenagi huta alagepa huta afisunafeʼmo utapa kahauya huta ge hutapa afi geyo, huno hapa paiʼniye.

²² Inagi Hilikaiyaʼe kini vekamoʼmo lekana paino apateʼniya vayaʼeʼmo Gotitegati gemo alinineno aeno hakalo nehiya aʼmo agiʼamo Haliʼnategamo uʼnae. Haliʼna anauʼamoʼmo Salamuʼmae. Salamuʼmo Tokahati mafaʼnemo maiʼnigeno Hasalaʼmo mafaʼneʼamo Tokahatiʼmo mono huʼa neʼapataya vayaʼai kukena yaʼapileʼmo yagaiʼniye. Hasala mafaʼnemo Tokahatiʼmo maiʼnigeno Tokahati mafaʼnemo Salamuʼmo maiʼniye. Haliʼnaʼmo saufa Yulusalemu taonifiʼmo maiʼniye. Apakaemo uʼa Haliʼnafeʼmo ani kavatefeʼmo ge huʼa afi geʼnae.

²³ Afi geʼnagenoʼaeʼmo ani geleʼmo aeno atagaina huno hapa painoʼaeʼmo, Ala kava neʼmo Isaleli vayaʼmogi Gotiʼapimoʼmo ina gemo hunoʼaeʼmo, Lapakaemo halate utapa ani alino lapateʼnigetapa eʼnaya vekaeʼmo ina ge hutapa ha paiyo.

²⁴ Ala kava neʼmoʼa hunoʼaeʼmo, Afiyo, huno, Nagaemo ani taoniʼe ani taonifiʼmo maiʼnaya vayaʼeʼmo alopa kayoʼmo apamiguve. Mukufiʼmo haneʼniya gemo Yuta kini vekaeʼmo lekana paiʼa ha paiʼnaya lifana gemo muki geʼamo alagi afole aigiye.

²⁵ Apakaemo apayatetiʼmo alo huʼnaya aigofe mono yatetiʼmo naipamo leʼna apatesuva kavaʼmo aliʼa he tiʼa neʼatae. Muki hosu kavaʼapiletiʼmo naipamo leʼna apatesuvafeʼmo nataleʼa uʼa alu gotitefeʼmo mono hisayafeʼmo alagepa atumo neʼaiya yaʼmo alu gotitefeʼmo kaeʼnayaʼmofeʼmo naipamo neleya kavaʼnimo hano osisigeʼna aniʼmo lakigekana huʼna kayoʼmo apamiguve.

²⁶ Ani agufa kayoʼmo apamiguvaʼmonanafa Yuta vayaʼmogi kini vekaʼapimoʼmo nagaefeʼmo ge huʼa nafi gesayafeʼmo alino lapateʼnigetapa eʼnaya vekaeʼmo ani gemo ha paiyo. Ala kava neʼmo Isaleli vayaʼmogi Gotiʼapimoʼnamo afiʼnana gelefeʼmo huʼnaeʼmo,

²⁷ Kagaemo Gotiʼa mani taonileʼe taonifiʼmo maiʼnaya vayaʼaitegaʼeʼmo hisiya kavafeʼmo huʼniya gemo afiʼnanageno kaipamoʼmo lokiya oʼvaino gemo afiteno alino amalagiʼniya kaipamo Goti aulagaleʼmo haneʼnigeka kagufamo alika afepiʼmo ateʼnane. Kagaemo naulagaleʼmo kagufamo alika afepiʼmo ateteka kukena yakamo alika apake aiteka aviʼyaʼmo huʼnane. Nagaemo ageteʼnaeʼmo nunumuʼmo huʼnana gemo afiʼnove, huno ha paiʼniye.

²⁸ Nagaemo afaʼa kateʼnisugeka ani hosu yaʼmo Yulusalemu taonifiʼe taonifiʼmo maiʼnaya vayaʼaitegaʼeʼmo afole aisiya kavaʼmo oʼagegane. Kagaemo falisanageʼna nagaemo kaginago vayakaʼeʼmo aliʼna anupa huʼna kategauve. Kagaemo alagepa hukageʼmo maiteka falisanageʼa alagepa huʼa kiʼa kategae, huno ha paiʼniye. Inagi apakaemo ani gemo halate aliniʼuʼa kini vekaeʼmo ha paiʼnae.

Kini vekamo Yosaiyaʼmo vayaʼmo alino anupa huno apateʼnigeʼa Ala kava neʼmo aiyafiʼmo maisayafeʼmo agaeʼeʼmo kotalakemo hu maleʼnaya gemae

²⁹ Inagi kini vekamo Yosaiyaʼmo muki Yuta vayatama vayaʼaifenagi Yulusalemu vayatama vayaʼaifenagi huno ge huʼnigeʼa eʼa aliʼa anupa huʼnae.

³⁰ Kini vekamoʼmo mono huʼa neʼapataya vayanagi Livai nofi vayanagi muki Yuta vayanagi Yulusalemu vayanagi huno apavaleno alino anupa huno apateʼnigeʼa Ala kava neʼmo noteʼmo uʼnae. Afa vayanagi ala apaki vayanagi muki vayanagi huʼa uʼnae. Aliʼa anupa huʼa maiʼnagenoʼaeʼmo kini vekamoʼmo Ala kava neʼmo noʼafiʼmo haneʼnigeʼa ageʼnaya kotalake mukumo alino muki mukufiʼmo haneʼniya geʼamo lekana paiʼnigeʼa afiʼnae.

³¹ Kini vekamo he netiya yateʼmo he tino maiʼneno Ala kava neʼeʼmo kotalakemo hu maleʼniye. Agaemo Ala kava neʼmo akame huge hiyo, huno huʼniya gegi avayafatiʼmo huʼniya gegi avoʼmo kae maleʼnaya keʼaepa geʼagi huno muki aipafatiʼe muki aunemepatiʼeʼmo akame huge hisayafeʼmo kotalakemo ani mukufiʼmo muki avoʼmo kaeʼnaya kotalake gemo huge hu maleʼniye.

³² Kini vekamoʼmo Menisameni nofi vayaʼe ani afinaʼmo muki alu nofi vayaʼmo Yulusalemu taonifiʼmo maiʼnaya vayaʼeʼmo ani kotalake gemo akame hisayafeʼmo Ala kava nefeʼmo polomasi gemo hiyo, huno lokiya gefatiʼmo huʼniye. Inagi Yulusalemu taonifiʼmo maiʼnaya vayaʼmogi apakinago vayaʼmogi Gotiʼapimoʼeʼmo kotalakemo hu maleʼnae.

³³ Ani afinaʼmo muki Isaleli haopalegamo asole aigofe gotigi apauneʼamo afaʼageʼmo haneʼnigenoʼaeʼmo ani yafeʼmo Ala kava neʼmoʼa alagi ohauʼnigenoʼaeʼmo avenatuʼnaʼmo heno neʼatale. Kini vekamo Yosaiyaʼmo ani kavatetiʼmo muki ani hosu yaʼmo muki Isaleli vayaʼmo maiʼnaya kotegatiʼmo alino ataleteno muki Isaleli vayaʼmogimo Ala kava neʼmo Gotiʼapimoʼmo alagi akame hisayafeʼmo alino he tino apateʼniye. Kini vekamo muki maiʼniya afinaʼmo apakaemo Ala kava neʼmo apakinago vayaʼmogi Gotiʼapimoʼmo alagi oʼataleʼnae.