2 Sitoli 33 - The Keyagana NT and 25 OT books

Manaseʼmo Yuta vayaʼmogi kini vekamo maiʼniya gemae

¹ Manaseʼmo kini vekamo hamaleʼniya afinaʼmo tuolofuʼa kafugamo maiteno Yulusalemu taonifiʼmo fifiti faefuʼa kafugamo kini vekamo maiʼneno yagaino apateʼniye.

² Yagaino apateʼniyaʼmonanafa Ala kava neʼmo aulagaleʼmo hosu kavaʼmo huʼniye. Alu nofi vayaʼmogi hogoteʼa ma mopafiʼmo maiʼneʼa hosu kavaʼmo huʼnageno Ala kava neʼmoʼa ohauʼnigeno avenatuʼnaʼmo heno atalegekana huno alino hapafaino apataleʼnigeʼa Isaleli vayaʼmo eʼa apakae apaimuʼyaleʼmo maiʼnae. Ani alu nofi vayaʼmogimo hosu kavaʼmo huʼnaya kava huno Manaseʼmo ani agufa hosu kavaʼmo huʼniye.

³ Manaseʼmo ani agufa kavaʼmo huno maiʼniye. Agaemo akeyaʼvilagamo afoʼamoʼmo Heyekaiyaʼmo alino hosu huno ataleʼniya aigofe gotiʼmo aveleʼmo haneʼnigeʼa mono nehaya koteʼmo halate alino kanale huʼniye. Agaemo aigofe gotigi apakiʼapimo Meligitefeʼmo ofalini hiʼyalamuʼmo huteno yosaletiʼmo aigofe gotigi apauneʼamo agiʼamo Aselaʼa alo huteno muki kokuʼnate kanefiteʼefeʼmo mono huteno aliʼyaʼapimo aliʼniye.

⁴ Agaemo magoʼe hosu kavaʼmo huno Ala kava neʼmo mono nopiʼmo aigofe gotigi ofalini yafa hiʼyalamuʼmo huʼniyaʼmonanafa akeyaʼvilagamo Ala kava neʼmoʼa hunoʼaeʼmo, Muki afinaʼmo nagiʼnimo Yulusalemu taonifiʼmo hanege hanege huno hanegaiye, huno huʼniye.

⁵ Agaemo mago ofalini yafa hiʼyalamuʼmo Ala kava neʼmo noʼmo kegiʼyafiʼmo lole kumateʼmo aliʼa anupa huʼa neʼmaiya kumateʼmo kanefitefeʼmo mono hisayafeʼmo alo huʼniye.

⁶ Agaemo Hinomi kagoʼmu kotegamo uno ve mafaʼne anagaʼamo apamagino atamoʼmo alagi leno asaga neliya agufa ofalinimo huge faliʼnaya vayaʼmogi apauneʼamogimo ha maesayafeʼmo keya aeno ge huge apaune vayaʼmogiʼe analisa vayaʼmogiʼeʼmo ha maesayafeʼmo ge huno apafige asole agufa aune kavaʼmo huge huʼniye. Agaemo Ala kava neʼmoʼa aipamo leno atesiyafeʼmo Ala kava neʼmo aulagaleʼmo asole hosu kavaʼmo huʼniye.

⁷ Agaemo aigofe goti auneʼamo alo huteno Goti mono nopiʼmo maleʼniye. Maleʼniyaʼmonanafa akeyaʼvilagamo Gotiʼa Neviniʼe mafaʼneʼamo Salomoniʼefeʼmo ina ge huno hana painoʼaeʼmo, Yulusalemu taonifiʼmo mani haneʼniya mono noʼmo nagaiʼnimo muki Isaleli nofi vayaʼmogi folagapiʼmo lekana pai maleʼnova nopiʼmo nagiʼnimo atesugeno hanege hanege huno hanegaiye.

⁸ Nagaemo lapakinago vayaʼmo maisaya mopamo lekana paiʼna apamiʼnovanageʼna halate Isaleli vayaʼmo aliʼna hapa faiʼna oʼapatalegauve. Apakaemo Mosese avayafatiʼmo akame hiyo, huʼna hapa paiʼnova gemo akame huge keʼaepa geʼnimo akame huge avoʼmo kae maleʼnaya gemo akame huge hisayana aliʼna hapa faiʼna oʼapatalegauve.

⁹ Ani alopa hosu kavaʼmo huteno Manaseʼmo Yuta vayaʼe Yulusalemu vayaʼeʼmo aino apavayu hulino uʼnigeʼa Ala kava neʼmoʼa alino hano huno apataleʼniya vayaʼmogimo huʼnaya hosu kavaʼmo aeʼa aga seʼa huʼnae.

Manaseʼmo aipamo alino afe leʼniya gemae

¹⁰ Ala kava neʼmoʼa Manaseʼe vayaʼaʼeʼmo hapa paiʼniyaʼmonanafa gemo afisayafeʼmo ohapauʼniye.

¹¹ Oʼafiʼnayaʼmofeʼmo Ala kava neʼmoʼa Asiliya ami vayaʼaiteʼmo yagaiʼa apateʼnaya vayaʼe ati vayaʼeʼmo alino apateʼnigeʼa eʼa Yuta vayaʼeʼmo kamemo huteʼa huʼa aeʼa apaka seʼnae. Apakaemo Manaseʼmo atafauʼa agoʼya kapiʼmo hukumo ateteʼa ayatalapiʼmo haesa aeni seli nofitetiʼmo kiʼa ateteʼa avaleliʼa Mamiloni kotegamo uʼnae.

^12-13 Inagi agaemo lusi kava huno kana hauʼnigenoʼaeʼmo Ala kava neʼmo Gotiʼamofeʼmo ge huteno aginago vayaʼmogi Gotiʼapimo aulagaleʼmo lusi kava huno agaiʼamo alino afepiʼmo ateteno nunumuʼmo huno ge huno afi geʼniye. Gotiʼa nunumuʼmo huʼniya geʼamo afitenoʼaeʼmo ha maeno Yulusalemu taonifiʼmo halate avalelineno ateʼnigeno kini vekamo maiʼnenoʼaeʼmo yagaino apateʼniye. Ani afinaʼmo Manaseʼmo ina kava huno ageno alagepa hutenoʼaeʼmo Ala kava nekeʼmo alagi Gotiʼmae, huno ageʼniye.

¹⁴ Ani kavaʼmo akamelegaʼamo Manaseʼmo Yulusalemu taoni malagamo Nevini taoniye, huʼa agi neʼaya taonileʼmo saufa yafa kegiʼyamo huʼniye. Ani kegiʼyamo magoʼe huno anaʼaleʼmo huʼniye. Yegemo uno lamino nefaleya haopalega Gihoni aniʼmo kagoʼmu kotetiʼmo kegiʼyamo aepa faiʼa huteʼa huliʼa hoga haopalegaeʼmo noyame kegiʼya kipane, huʼa agi neʼaya kipategamo uʼnae. Kegiʼyamo haopaleʼmo Ofeli taoniye, huʼa agi neʼaya taonileʼmo kegiʼyamo huʼa vego huliʼa kokuʼnapiʼmo uʼa haiʼnae. Manaseʼmo kegiʼyamo huno hano huteno ami vayaʼaiteʼmo neʼyagaiya vayaʼmo muki Yuta haopalega koteʼmo lokiya kegiʼyamo haneʼniya taonifiʼmo apateʼniye.

¹⁵ Agaemo alu nofi vayaʼmogi aigofe gotiʼapimogimo alino atalege ani agaiʼamo aigofe goti auneʼamo Ala kava neʼmo nopiʼmo maleʼniyatetiʼmo alino atalege huʼniye. Agaemo Ala kava neʼmo mono noʼmo haneʼniya aveleʼmo haneʼniya aigofe gotigi ofalini yafa hiʼyalamuʼmo alino naku paeno atalege Yulusalemu koteʼmo haneʼniya ofalini yafa hiʼyalamuʼmo alino naku paeno atalege huʼniye. Muki hosu yaʼmo taonifatiʼmo alininuno malagamo alagi yaga auno ataleʼniye.

¹⁶ Magoʼe kavaʼmo huno halate Ala kava neʼmo ofalini yafa hiʼyalamuʼmo huteno alino kanale huʼniye. Agaemo ani hiʼyalamuteʼmo Gotiʼeʼmo magoke apaipamo alisiya afu ofalinimo huge hao ke heʼniya afu ofalinimo huge huno Gotina amiʼniye. Agaemo Yuta vayaʼaifeʼmo ina gemo huno hapa painoʼaeʼmo, Ala kava neʼmo Isaleli vayaʼmogitapa Gotitapimofeʼmo mono hutetapa aliʼyaʼamo aliyo, huno hapa paiʼniye.

¹⁷ Ani kavaʼmo huʼniyaʼmonanafa Yuta vayaʼmogimo magoʼe huʼa anaga haopaleʼmo haneʼniya hiʼyalamuteʼmo ofalinimo osuʼnae. Huʼnayaʼmonanafa Ala kava neʼmo Gotiʼapimotefekeʼmo ofalinimo huʼnae.

Kini vekamo Manaseʼmo faliʼniya gemae

¹⁸ Kini vekamo Manaseʼmo ani alu kavaʼamo huʼniya kavafeʼmo ava gemo haneʼniya mukueʼmo agiʼamo Isaleli kini vayaʼmogi apava gemo haneʼniya mukufiʼmo haneʼniye. Ani mukufiʼmo Gotifeʼmo nunumuʼmo huʼniya kavafeʼmo ava gemo hanege Goti kavaʼamo ageteʼa Gotitegati gemo aliniʼeʼa aeʼa hakalo nehaya vayaʼmogimo agaefeʼmo Ala kava neʼmo Isaleli vayaʼmogi Gotiʼapimo agiʼaletiʼmo ha paiʼnaya gemo hanege huʼniye.

¹⁹ Manaseʼmo nunumuʼmo huʼnigeno Gotiʼa afiteno huʼniya kavafeʼmo ava gemo hanege muki huʼniya hosu kavaʼaeʼmo ava gemo muki kotegamo hanege aigofe gotigitefeʼmo mono huʼnaya kavafeʼmo ava gemo hanege hogoteno agufamo alino afepiʼmo oʼateʼniya kavafeʼmo huge aigofe gotigi apauneʼamo alo huge huʼniya gemo polofeti mukufiʼmo avoʼmo kae maleʼnageno haneʼniye.

²⁰ Manaseʼmo faliʼnigeʼapaeʼmo noʼamo kegiʼyafiʼmo kiʼa ateʼnae. Mafaʼneʼamo Emoniʼmo agae aimuʼyaleʼmo maiteno yagaino apateʼniye.

Emoniʼmo Yuta vayaʼmogi kini vekamo maiteno faliʼniya gemae

²¹ Emoniʼmo kini vekamo hamaleʼniya afinaʼmo tuveti tuʼa kafugamo maiteno lole kafugamo Yulusalemu taonifiʼmo kini vekamo maiʼneno yagaino apateʼniye.

²² Agaemo Ala kava neʼmo aulagaleʼmo afoʼamoʼmo Manaseʼmo huʼniya agufa hosu kavaʼmo huʼniye. Emoniʼmo afoʼamoʼmo aigofe gotigi apauneʼamo alo huno maleʼniya yatefeʼmo mono huteno ofalinimo apamige aliʼyaʼapimo alige huʼniye.

²³ Huʼniyaʼmonanafa agaemo afoʼamoʼmo Ala kava neʼmo aulagaleʼmo agaiʼamo alino afepiʼmo ateʼniya agufa kavaʼmo osuʼniye. Haʼao, Emoniʼmo magoʼe magoʼe huno hosu kavaʼmo huʼniye.

²⁴ Hosu kavaʼmo huʼnigeʼa aliʼyaʼamo neʼaliya vayaʼmogimo aliʼa anupa huʼa maiʼneʼa vegemo huteʼa kini nopiʼmo kamitimo amagiʼnageno faliʼniye.

²⁵ Henagaʼamo ani mopaleʼmo maiʼnaya vayaʼmogimo vegemo huteʼa kini vekamo Emoniʼmo kamitimo amagiʼnaya vayaʼmo kamitimo apamagiʼnageʼa faliʼnae. Apakaemo Emoni mafaʼnemo Yosaiyaʼmo Emoni aimuʼyaleʼmo lekana paiʼa ateʼnageno kini vekamo maiʼniye.