2 Sitoli 20 - The Keyagana NT and 25 OT books

¹ Henagaʼamo Movapu vayanagi Emoni vayanagi mago vayaʼmo Emoni kotega maiʼnaya vayaʼeʼmo aliʼa lokaeteʼa Yihasafatiʼe ami vayaʼaʼeʼmo kamemo hisayafeʼmo eʼnae.

² Mago vayaʼmo kini vekamo Yihosafatitegamo eʼa ina ge huʼa ha paiʼnae. Vae, huʼa, asole ami vayaʼmo Itomi kotegatiʼmo Netisi ani kotuʼmo haopaletiʼmo eʼa kamemo kahaesayafeʼmo maiʼnae. Hemenimo Hasasoni taonimo Tama kotegamo eʼa maiʼnae. Hasasoni Tama kotegaeʼmo alu agiʼamo Enigeti taonifiʼmae.

³ Kini vekamo Yihosafatiʼa ani gemo afitenoʼaeʼmo koli huʼniye. Agaemo lokiya agesamo afinoʼaeʼmo Ala kava neʼmoʼa hauʼniya kavaʼmo kahauya huno agesiyafeʼmo muki Yu vayaʼmo maiʼnaya kotegamo ge huno atalegeno uʼniya gemoʼmo neʼyaʼmo mo siʼnetapa Ala kava nefeʼmo nunumuʼmo hiyo, huno huʼniye.

⁴ Inagi muki Yuta vayaʼmo taonifatiʼmo ataleʼa Ala kava nefeʼmo nunumuʼmo huʼa ge huʼa afi gesageno hapa maesiyafeʼmo Yulusalemu taonifiʼmo uʼnae.

⁵ Muki Yuta vayaʼmo eʼa Yulusalemu taonifiʼmo maiʼnaya vayaʼeʼmo aliʼa anupa huteʼa Ala kava neʼmo noʼmo kumateʼmo kegiʼyafiʼmo saufa kumateʼmo aliʼa anupa huʼnae. Kini vekamo Yihosafatiʼmo uno ve aʼneʼmogi folagapiʼmo he tino maiʼnenoʼaeʼmo

⁶ ina ge huno nunumuʼmo huʼniye. O Ala kava neʼmo Gotiyo, huno, laginago vayaʼai Ala kava neʼapimogae, huno, kokunapiʼmo maiʼneka muki ma mopafi vayaʼaiteʼmo yagaika noʼapatapiye. Kagaemo lokiyakamo alopa yaʼmo magoʼe huno haneʼniyanageno mago vekamoʼmo kagaeʼeʼmo kamemo huno aeno kaga osesifiye.

⁷ Gotitimogamo oʼmaiʼnapiye, huno, kagaemo ago lageʼnane. Isaleli vayaʼmogita laginago vekamo Emalehamuʼmo kao vekamo mafaʼne anagaʼamo maiʼneta alagi kagaika vayakamo maiʼnone. Kagaemo akeyaʼvilagamo mani mopaleʼmo maiʼnaya vayaʼmo alika hapafaika apataleteka mani mopamo alika laginago vayaʼmo apamiʼnanageno muki afinaʼmo lagae mopamo haneʼnigeta

⁸ ani mopaleʼmo yatala afinaʼmo ago maiʼnone. Akeyaʼvilagamo laginago vayaʼmogimo ani mopaleʼmo kagikalefeʼmo alopa mono noʼmo ki maleteʼapaeʼmo kagaefeʼmo ina ge huʼa nunumuʼmo huʼnae.

⁹ Ala kava nene, huʼa, inagi mago hosu kavaʼmo lagaeteʼmo afole aisifi kame vayatimogi eʼa lagaeʼeʼmo kamemo hisafi lagaetegamo na agufa kavaʼmo hisapi mago alopa hosu kaitaʼmo afole aisifi lusi kafu hu afinaʼmo afole aige hisigetaeʼmo eta ani mono noʼmo aulagamo kagae kaulagaleʼmo he tita maiʼnetaeʼmo, (kagikamo ani alopa mono nopiʼmo haneʼniyaʼmofeʼmae) laha mao, huta nunumuʼmo hisunageka afiteka laha maegane, huʼa kaha paiʼnae.

¹⁰ Yihosafatiʼa magoʼe huno nunumuʼmo hunoʼaeʼmo, Ala kava nene, huno, Akeyaʼvilagamo laginago vayaʼmo Isipi kotegatiʼmo ataleʼa eʼapaeʼmo Emoni vayanagi Movapu vayanagi Inomi vayanagi huʼa maiʼnaya mopaleʼmo eʼa avaʼyi huʼnagekaeʼmo, lapakaemo kamemo hutetapa mopaʼapimo oʼaliyo, huka hapa paiʼnanageʼa ohapaeʼa apataleʼa uʼnae.

¹¹ Apataleʼa uʼnayaʼmonanafa hemenimo ani vayaʼmo lagaetegamo eʼnae. Apakaemo ago eʼnayanageʼa ani laginago vayaʼmogi apakaetegamo alagepa kavaʼmo huʼnaya kavaʼmo anonaʼapilefeʼmo aliʼa lahafaiʼa lataleteʼa akeyaʼvilagamo lamiʼnana mopamo alisayafeʼmo eʼnae.

¹² O Gotitimogae, huʼna, ani asole ami vayaʼmogimo lagaemo kamemo lahaesayafeʼmo neʼae. Lagaemo apakaeʼeʼmo kamemo hisuna agufa lokiyatimo ohaneʼniye. Na agufa kavaʼmo hisupi, huta oʼageʼnonaʼmonanafa aulu heta kageta maiʼnone. Kagaemo hosu kavaʼapimo anonaʼapilefeʼmo afaʼa alika fako huka oʼapategapiye, huno nunumuʼmo huʼniye.

¹³ Muki Yuta ve anaganagi aʼne anaganagi mafaʼne anagaʼapigi huʼa Ala kava neʼmo aulagaleʼmo mono noʼmo haopaleʼmo he tiʼa maiʼnae.

¹⁴ Mago Livai nofi vekamo agiʼamo Yahasiʼeliʼa ani vayaʼai folagapiʼmo maiʼniye. Yahasiʼeliʼmo Sekalaiya mafaʼnemo maiʼnigeno Sekalaiyaʼmo Menaiya mafaʼnemo maiʼnigeno Menaiyaʼmo Yiʼeli mafaʼnemo maiʼnigeno Yiʼeliʼmo Mataniya mafaʼnemo maiʼniye. Ani vayaʼmo Esapi aginago vayaʼmo maiʼnageno agaemo mago Livai nofi vekamo maiʼniye. Inagi Ala kava neʼmo Aunemeʼamoʼmo Yahasiʼeliteʼmo emineno lokiya vaino ateʼnigeno

¹⁵ ina ge huno huʼniye, kini vekamo Yihosafatigagi Yulusalemu vayanagi muki haopalega maiʼnaya Yuta vayanagi hutapa alagepa huta afiyo. Ala kava neʼmoʼa lapa painoʼaeʼmo, lapakaemo ani asole ami vayaʼaifeʼmo lapaipamoʼmo kana huʼninagetapa koli osiyo. Haʼao. Ani kamemo hisaya kavaʼmo lapakae yaʼmo ohaneʼnifa Gotiʼa agaiʼa yaʼmo haneʼniye.

¹⁶ Egamo kame vayaʼmo lapakaeʼeʼmo kamemo hisayafeʼmo Sisi avele kateʼmo eʼa hai egae. Lapakaemo uta lamiyo. Lamitapaeʼmo yegemo haine neʼeya haopalega Yeluveli kaʼme koʼmo atupaleʼmo apakegae.

¹⁷ Apakegayaʼmonanafa lapakaitapimo kamemo osutapa afaʼa maigae. Kamemo hisaya kumateʼmo utapa avaʼyi hutetapaeʼmo he tita lamitapa aulu hetapa ageta maiyo. Ala kava neʼmoʼa lapa maesigetapa agegayana lapakufamo alino katino lapatesigetapa agegae. Lapakaemo Yulusalemu vayaʼmogitapaʼe muki haopalega maiʼnaya Yuta vayaʼmogitapaʼeʼmo lapaipamoʼmo kana huʼninagetapa koli osiyo. Egamo lapakaemo kamemo hisayafeʼmo vigenoʼao Ala kava neʼmoʼa lapakaeʼeʼmo magokepi lokaeno vino, huno hapa paiʼniye.

¹⁸ Kini vekamo Yihosafatiʼmo ani gemo afitenoʼaeʼmo agoʼya faiʼneno augosamo mopafiʼmo ape huno maiʼnigeʼa ani agufa kavaʼmo huʼa Yuta nofi vayaʼe Yulusalemu taonifiʼmo maiʼnaya vayaʼeʼmo Ala kava neʼmo aulagaleʼmo apagoʼya faiʼneʼa Ala kava nefeʼmo mono huʼnae.

¹⁹ Mono huteʼa Livai nofi vayapatiʼmo lole nofi vayaʼmo Kohati nofi vayaʼe Kola nofi vayaʼmogiʼeʼmo he tiʼa alopa gefatiʼmo yokemo huʼa Ala kava neʼmo Isaleli vayaʼai Gotiʼapimo agiʼaleʼmo aliʼa asaga huʼnae.

²⁰ Gotilamiyapiʼmo muki Yuta vayaʼmo he tiʼa Tekova taoni haopalegamo kaʼme kotegamo neʼuʼapaeʼmo kini vekamo Yihosafatiʼmo he tino ina ge huno hapa paiʼniye. Hapa painoʼaeʼmo, Yuta vayanagi Yulusalemu taonifi vayanagi hutapa geʼnimo afiyo. Lapakaemo Ala kava neʼmo Gotitapimofeʼmo alita amufa amigenoʼao lokiya vaino lapatesigetapa he tiyo. Lapakaemo geʼamo alini eʼa aeʼa hakalo huʼa hapa nepaiya vayaʼai geʼapieʼmo lapakesamo afita fatago higenoʼao lapa maesigetapa alagepa hutapa maiyo, huno hapa paiʼniye.

²¹ Inagi agaemo vayaʼaeʼmo, na agufa yane, hutapa lapakesamo neʼafiye, huno ge huno apafi geʼnigeʼapaeʼmo ha paiʼnageno Ala kava nefeʼmo yokemo hisaya vayaʼmogi Ala kava neʼmo aote kavaʼamo ha le konali kavaʼalefeʼmo yokemo hisaya vayaʼmo lekana paino apateʼniye. Inagi apakaemo hogoteʼa uʼapaeʼmo, Muki afinaʼmo hau ayamopafiʼmo hauge hauge huno hauno neʼmaiyaʼmofeʼmo Ala kava neʼmo agiʼaleʼmo alita asaga hiyo, huʼa yokemo hume hume uʼnageʼa ati vayaʼmo apakame huʼa uʼnae.

²² Apakaemo aepa faiʼa Goti agiʼaleʼmo aliʼa asaga hisayafeʼmo yokemo nehagenoʼaeʼmo Ala kava neʼmoʼa Isaleli vayaʼai kame vayaʼapimo Emoni vayanagi Movapu vayanagi Siya aveleʼmo maiʼnaya Itomi vayanagi huʼa aliʼa fako huʼa apakaiʼapi apakaiʼapimo kamemo hisayafeʼmo alino he tino apateʼniye. Ala kava neʼmoʼa ani kavatetiʼmo aeno apaka seʼniye.

²³ Emoni vayaʼe Movapu vayaʼeʼmo Siya aveleʼmo maiʼnaya Itomi vayaʼeʼmo kamemo huʼa hano huʼnae. Kame huʼa hano huteʼa Emoni vayaʼmogi Movapu vayaʼeʼmo kamemo huteʼa apakaiʼapi apakaiʼapimo hapaeʼa hano huʼnae.

²⁴ Yuta vayaʼmo aveletiʼmo uʼa haiʼa afepilagamo agayana kaʼme kotegamo muki vayaʼmo ago faliʼnageno apakufaʼamo mopafiʼmo haneʼnigeʼa ageʼnae. Mago vayaʼmo faiʼa kasalo opaeʼnae. 2 Sit 23:16 Ani afinaʼmo mono huno neʼapateya vekamo agiʼamo Yehoyaʼna Isaleli vayanagi kini vekagi huʼa Ala kava neʼmo vayaʼamo maisayafeʼmo kotalakemo hu maleʼniye. 2 Sit 26:5 Sekalaiyaʼmo Gotiʼa alagamuna kategamo ageʼniya vekamo maiʼnigenoʼaeʼmo Kini vekamo Usaiyaʼmo Gotiʼa kahauya huno ageʼniye. Gotiʼa kahauya hume hume uno ageʼniya afinaʼmo Gotiʼa alagepa huno ha maeʼnigeno alagepa huno maiʼniye. 2 Sit 29:10 Kini vekamo Hesakaiyaʼa hunoʼaeʼmo, Ala kava neʼmo Isaleli vayaʼmogi Gotiʼapimoʼmo aipamo leno nelateya kavaʼamo atalesiyafeʼmo naipafiʼmo nagesamo afiʼnovanageʼna agaeʼeʼmo kotalakemo hu malegauve, huno hapa paiʼniye. 2 Sit 31:10 Asalaiyaʼmo Satoki afamo anagapati hogote vekamo mono huno neʼapateya vekamoʼa kini vekamo Hesakaiyafeʼmo ha painoʼaeʼmo, Aepa faiʼa ofalinimo aliniʼa eʼa Ala kava neʼmo noʼafiʼmo maleʼnagetaeʼmo neʼyatimo alagi haiʼmo aliʼnonageno magoʼe hunoʼageʼmo haneʼniye. Ala kava neʼmoʼa vayaʼamo alagepa huno hapa maeʼniyaʼmofeʼmo ani magoʼe huno asole alumo haneʼniye. 2 Sit 32:31 Ani afinaʼmo Gotiʼa kini vekamo Hesakaiya aipafiʼmo haneʼniya kavaʼaeʼmo amalageka huno agesiyafeʼmo ataleno uʼniye.