2 Sitoli 19 - The Keyagana NT and 25 OT books

¹ Ehapiʼa ago faliʼniyaʼmonanafa Yihasafatiʼmo afaʼa maiteno Yulusalemu taonifiʼmo noʼalegamo aino atagineno uʼniye.

² Afaʼa maiʼnigenoʼaeʼmo mago aune vekamo agiʼamo Yehuʼa Hanani mafaʼnemoʼmo Yihosafatitegamo uno ina ge huno ha paiʼniye. Kagaemo hosu vayaʼaina hapa maeʼnana kavakamo kanale kavapiye. Kagaemo Ala kava nefeʼmo apaini nehaya vayaʼaifeʼmo kahau kayamopafi kahauʼniya kavakamo kanale kavapiye. Hosu kavaʼmo huʼnanaʼmofeʼmo Ala kava neʼmoʼa aipamo leno nekateya kavaʼmo kagenopaleʼmo asagauno aiʼniye, huno ha paiʼniye.

³ Hosu kavaʼmo huʼnanaʼmonanafa mago alagepa kavaʼmo kaipafiʼmo haneʼniye. Mago aigofe gotimo akanomo auneʼamo agiʼamo Aselaʼmo kokalegamo haneʼniyanagi Yuta kotegatiʼmo alika ataleteka Gotifeʼmo kagesamo afiteka kahauya hisanafeʼmo kaipamo alo huʼnane, huno ha paiʼniye.

⁴ Yihasafatiʼmo Yulusalemu taonifiʼmo noʼafiʼmo maiʼnenoʼaeʼmo ataleno uno Miyasima taonifiʼmo umenitata huteno Ifalemu ave kotegamo uno halate apakinago vayaʼmogi Ala kava neʼmo Gotiʼapimotegamo geʼaletiʼmo apavalelineno apateʼniye.

⁵ Apatetenoʼaeʼmo agoti gemo afisaya vayaʼmo apateteno Yuta kotegamo muki lokiya yafa kegiʼyamo haneʼniya taonifiʼe taonifiʼeʼmo apateʼnigeʼa maiʼnae.

⁶ Agaemo ani yasi vayaʼaifeʼmo hapa painoʼaeʼmo, Lapakaemo agoti gemo afitetapa alita fako nehaya aliʼyatapimo vayaʼmogi aliʼyaʼapimo noʼalifa Ala kava neʼmoʼa afitetapa alita fako hisayafeʼmo magokepiʼmo lokaeno maiʼniya vekamo aliʼyaʼamo neʼaliyaʼmofeʼmo alagepa hutapa lapakesamo afitetapa aliʼyaʼmo aliyo.

⁷ Ala kava neʼmo Gotitimoʼmo agoti gemo afitetapaeʼmo lapao vayaʼageʼmo hapa neʼmaya kavafenagi aigofe kavafenagi moniletiʼmo lapakesamo nefaiya kavafenagi huno alagi ohauʼniyaʼmofeʼmo Ala kava nefeʼmo lapaipafatiʼmo koli huʼnetapaeʼmo kavatapileʼmo alagepa hutapa yagaiyo.

⁸ Yihasafatiʼmo Yulusalemu taonifiʼmo Ala kava neʼmo keʼaepa geʼamo amagiʼa ataleʼnaya kavaʼmo aliʼa api aiʼa apatege agotileʼmo huʼnaya gemo afiteʼa aliʼa api aiʼa apatege hisayafeʼmo mago Livai nofi vayanagi mago mono huʼa neʼapataya vayanagi mago Isaleli vayaʼaiteʼmo yagaiʼa neʼapataya vayatama vayanagi huno lekana paino apateʼniye.

⁹ Agaemo ani vayaʼaifeʼmo hapa painoʼaeʼmo, ina kavaʼmo hiyo, Ani aliʼyaʼmo alitapaeʼmo oʼataleta Ala kava nefeʼmo koli huʼnetapaeʼmo alagepa hutapa muki geʼamo akame hutapa aliʼyatapimo aliyo.

¹⁰ Mago Isaleli vayaʼmogimo taoniʼapifi taoniʼapifiʼmo maiʼnaya vayaʼmogi eʼa lapakaefeʼmo huʼapaeʼmo, Laha maeta agoti gemo afiyo, huʼa hisagetapaeʼmo agoti geʼapimo afiyo. Kamitimo apamagiʼnaya kavatefeʼmo agoti gemofi keʼaepa geʼe hiyo, huno huʼniya gegi keʼaepa gemo avoʼmo kae maleʼniya gegi huno hu maleʼniya geʼenagi huʼa amagiʼa ataleʼnaya geʼmofi hutapa afiyo. Agotileʼmo hisaya kavafeʼmo Ala kava netegamo hosu kavaʼmo osisayafeʼmo ehetapiye, hutapa hiyo. Hosu kavanageno Ala kava neʼmoʼa aipamo leno lapatesigetapa kana yaʼmo aligae. Geʼnimo afiteta afaʼa maiyo vaiʼmo oʼaligayanagi.

¹¹ Alagepa hutapa afiyo. Ala kava neʼmo kavaʼalefeʼmo Amalaiyaʼmo hogote vekamo mono huno neʼapateya vekamo yagaino lapatesigetapa aiyafiʼmo maigae. Kini vekamo kavaʼalefeʼmo Semanaiyaʼa Isameli mafaʼnemo Yuta nofi vayaʼaiteʼmo yagaiʼniya vekamoʼmo yagaino lapatesigetapa aiyafiʼmo maigae. Livai nofi vayaʼmogimo ani agoti gemo neʼafiya aliʼyaʼalefeʼmo lapa maegae. Koli osutapa lokiya vaita maigenoʼao Ala kava neʼmoʼa lapakaeʼeʼmo lokeno maigiyanagi.