2 Sitoli 18 - The Keyagana NT and 25 OT books

¹ Yihosafatiʼa Yuta vayaʼmogi kini vekaʼapimo maiʼnenoʼaeʼmo alopa kagemi yaʼamo haneʼnigeno ala agimo aliʼniye. Yihosafati mafaʼnemoʼmo Ehapi aʼmafaʼnemo aliʼnigeʼana Yihosafatiʼa Ehapiʼeʼmo magokepi lokaeno maiʼniye.

² Mago agufa kafugamo ago utegeno Yihosafatiʼa Ehapiʼmo agesiyafeʼmo Sameliya taonifiʼmo uno lamino maiʼniye. Ehapiʼa Yihosafatiʼe avagi huʼa eʼnaya vayaʼeʼmo nesayafeʼmo asole sipisipiʼe ve pulumakaʼeʼmo amagiʼa kaeʼa apateʼnae. Ehapiʼa hunoʼaeʼmo, Giliyati kotega Lamoti taonifiʼmo magokepi utaʼa kamemo huguʼae, huno agesamo faino ha paisiyafeʼmo neʼyaʼmo kaeno apamiʼniye.

³ Ehapiʼmo Isaleli vayaʼmogi kini vekaʼapimoʼmo Yuta vayaʼai kini vekaeʼmo ha painoʼaeʼmo, Kagaemo nagaeʼeʼmo Lamoti taonifiʼmo utaʼa kamemo hisuʼafiye, huno ge huno afi geʼnigenoʼaeʼmo, Nagaemo kagaekana huʼna maiʼnogeʼa vayaʼnimo vayakagana huʼa maiʼnae. Magokepi kamemo hugune, huno ha paiʼniye.

⁴ Ha paitenoʼaeʼmo, Hemenimo hogotetaʼa Ala kava neʼmoʼa hauʼniya kavafeʼmo kahauya hutaʼa agegauʼae, huno ha paiʼniye.

⁵ Inagi Ehapiʼmo fo hataletiʼa apaune vayaʼaifeʼmo ge huʼnigeʼa eʼa aliʼa anupa huʼa maiʼnae. Agaemo, uta kamemo hisupi afaʼa atesune, huno ge huno apafi geʼnigeʼapaeʼmo, uta haitapa kamemo hiyo. Gotiʼa ani taonimo alino kamigiye, huʼa ha paiʼnae.

⁶ Ha paiʼnayaʼmonanafa Yihosafatiʼmo hunoʼaeʼmo, Ala kava netegatiʼmo aune gemo alinineno aeno hakalo nehisiya vekaeʼmo ge hutaʼa afi gesuʼafeʼmo mago oʼmaiʼnifiye, huno huʼniye.

⁷ Ehapiʼmo ina ge huno huʼniye. Magoʼe huno aune vekamo maiʼniye, agiʼamo Mikaiyaʼmo Imila mafaʼnemo maiʼniyaʼmonanafa agaefeʼmo naini huʼnove. Ani vekaeʼmo ge hutaʼa afi gesuʼageno Ala kava neʼmoʼa hauʼniya kavafeʼmo afiguʼae. Maiʼniyaʼmonanafa muki afinaʼmo ani vekamoʼmo nagaetegamo alagepa kavaʼmo afole aisiyafeʼmo aune gemo naha nopaifa hosu gegeʼmo naha nepaiye, huno huʼnigeno Yihosafatiʼa ha painoʼaeʼmo, Ani agufa gemo osuvo, huno huʼniye.

⁸ Inagi Ehapiʼa mago yagaino neʼapateya vekaeʼmo ge huʼnigeno eʼnigenoʼaeʼmo, Kagaemo malage huka uka Mikaiyaʼmo Imila mafaʼnemo nagaetegamo avalelika eno, huno ha paiʼniye.

⁹ Isaleli kini vekamoʼe Yuta kini vekamo Yihosafatiʼeʼmo kini kukenaʼanileʼmo konali aliʼana ateteʼana anakaemo kini siyaʼanileʼmo fai maiʼnaʼae. Anakaemo vayaʼmogimo vitimo haletiʼyaʼamo haleʼa ataleteʼa neʼyaʼamo neʼaliya yateʼmo fai maiʼnaʼageno Sameliya taonile kegiʼyamo alopa kipaʼmo malagamo haneʼniye. Anaulagaleʼmo apaune vayaʼmogimo lole kini vekalafeʼmo apaune gemo hanaopaletiʼmo aeʼa hakalo huʼnae.

¹⁰ Seʼnekaiyaʼmo Kenana mafaʼnemo aeni atupamo alino pulumakamo lokiyaʼagana agufa yaʼmo alo huteno agenopaleʼmo maleno aliʼneno eno ina ge huno ha paiʼniye. Ala kava neʼmoʼa hunoʼaeʼmo, Kagaemo Siliya vayaʼeʼmo kamemo huka ani lokiyaʼaletiʼmo kamitimo hapaegane, huno huʼniye, huno hana paiʼniye.

¹¹ Muki apaune vayaʼmogiʼeʼmo magoke agufa gegeʼmo huʼnae. Inagi apaune gemo huʼapaeʼmo, Kagaemo uka Lamoti Giliyati vayaʼeʼmo kamemo huteka taoniʼapimo aligane. Ala kava neʼmoʼa kayapiʼmo alino ategaiye, huʼa huʼnae.

¹² Apa vekamoʼmo Mikaiyafeʼmo keya aeno ge hisiyafeʼmo uʼniya vekamoʼmo agaefeʼmo hunoʼaeʼmo, Alagepa huka afiyo. Muki apaune vayaʼmogiʼmo kini vekaeʼmo ha paiʼapaeʼmo, Kamemo huka aeka apaka segane, huʼa huʼnayaʼmofeʼmo kagaeʼeʼmo magoke agufa gemo kini vekaeʼmo ha paiteka lokiya vaika ato, huno huʼniye.

¹³ Huno ha paiʼniyaʼmonanafa Mikaiyaʼmo apa vekaeʼmo hunoʼaeʼmo, Ala kava neʼmo maiʼniya kava huʼna alagi lama gemo huguve. Gotiʼnimoʼmo na agufa gemo naha paisifigeʼna alagi ani gegeʼmo aeʼna hakalo huguve, huno huʼniye.

¹⁴ Mikaiyaʼmo uno kini vekalegamo avaʼyi huʼnigenoʼaeʼmo inagi kini vekamoʼmo agaefeʼmo ge huno afi geʼniye, Mikaiyao, huno, lagaemo afaʼa uta Lamoti Giliyati taonifi vayaʼeʼmo kamemo hisupi osisune, huno huʼnigeno Mikaiyaʼmo hunoʼaeʼmo, Kanalenagi uka kamemo hisanageno Gotiʼa kaha maesigeka taonimo aligane, huno ha paiʼniye.

¹⁵ Kini vekamoʼmo hunoʼaeʼmo, Na magi afinaʼmo kaha paiʼnaeʼmo, Lama geʼagekeʼmo Ala kava neʼmo agiʼalefeʼmo kagoʼyamo ataleteka naha paiyo, huʼna kaha paisufiye, huno huʼniye.

¹⁶ Inagi Mikaiyaʼa Ehapifeʼmo ina ge huno ha paiʼniye. Nagaemo ago apakeʼnovana muki Isaleli ami vayaʼmo atagu faeʼa avelegamo maiʼnageʼa sipisipigana huʼa maiʼnayana sipisipileʼmo yagaiʼnaya vayaʼmo oʼmaiʼnageʼapaeʼmo nehaya agufa kavaʼmo huʼa maiʼnae. Ala kava neʼmoʼa naha painoʼaeʼmo, Mani vayaʼaiteʼmo yagaino apatesiya vekamo oʼmaiʼniye. Kini vekamoʼmo apatalesigeʼa apakaemo kame nehaya kavaʼapimo ataleʼa atagineʼa uʼa koʼapilegamo alagepa huʼa maigae, huno naha paiʼniye, huno ha paiʼniye.

¹⁷ Kini vekamo Ehapiʼa ani gemo afitenoʼaeʼmo kini vekamo Yihasafatifeʼmo hunoʼaeʼmo, nagaemo ago kaha paiʼnova gemo hemenimo afole aiye, huno ha paiʼniye. Mani aune vekamoʼmo nagaefeʼmo alagepa gemo naha nopaiye. Muki afinaʼmo nagaetegamo hosu kavakeʼmo afole aisiya agufa kavafekeʼmo naha nepaiye, huno ha paiʼniye.

¹⁸ Mikaiyaʼa hapa painoʼaeʼmo, Inagi Ala kava neʼmo geʼamo afiyo. Nagaemo apakeʼnovana Ala kava neʼmoʼa yagaino neʼapateya siyaʼaleʼmo fai maiʼnigeʼa muki kokuʼnapi maiʼnaya vayaʼmogimo lamaga haopaleʼmo he tiʼa maige hoga haopaleʼmo he tiʼa maige huʼnageʼna apakeʼnove.

¹⁹ Ala kava neʼmoʼa ge huno apafi geʼniye, Ina laʼmo Isaleli vayaʼmogi kini vekaʼapimo Ehapitegamo uno Lamoti Giliyati kotegamo uno falisiyafeʼmo aipa agesamo alino ha paigiye, huno apafi geʼnigeno mago vekamoʼmo mago gemo huʼnigeno alu vekamoʼmo alu gemo huno ha paiʼniye.

²⁰ Mago aune vekamoʼmo eno Ala kava neʼmo aulagaleʼmo he tino maiʼneno ina ge huno ha paiʼniye. Nagaemo aipa agesamo aliʼna ha paiguve, huno ha paiʼnigeno Ala kava neʼmoʼa ha painoʼaeʼmo, haiya agufa gemo huka aipa agesamo aligane, huno ge huno afi geʼnigenoʼaeʼmo,

²¹ Nagaemo polofeti vayaʼmogi apavayafatiʼmo aigofe gemo nehuva naune vekamo maisugeʼa aigofe gemo hugae, huno ha paiʼnigenoʼaeʼmo, Ala kava neʼmoʼa hunoʼaeʼmo, He aipa agesamo afaʼa aliteka aeka aga segane. Uka lamika ani kavaʼmo huvo, huno ha paiʼniye.

²² Inagi apakeyo. Ala kava neʼmoʼa kagae polofeti vayaʼmogi apavayafatiʼmo aigofe gemo hisayafeʼmo ani aigofe aunemo alino ateʼnigeʼa aigofe gemo nehae. Ala kava neʼmoʼa hunoʼaeʼmo, hosu kavaʼmo Ehapitegamo afole aigiye, huno huʼniyaʼmofeʼmae, huno ha paiʼniye.

²³ Polofeti vekamo Setekaiʼmo Kenana mafaʼnemoʼmo Mikaiyategamo uno agalametaleʼmo amagiteno hunoʼaeʼmo, Ala kava netegatiʼmo emineʼniya aune vekamo haiya katetiʼmo nagaetegatiʼmo uno kaha paiʼniye, huno ge huno afi geʼniye.

²⁴ Mikaiyaʼa hunoʼaeʼmo, kagaemo kaune heka uka fala kisanafeʼmo nopiʼmo falekuka nehaikaeʼmo alagi agegane, huno ha paiʼniye.

²⁵ Ehapiʼa hapa painoʼaeʼmo, Lapakaemo Mikaiyaʼmo avalelitutapa taonifi vayaʼaiteʼmo yagaino apateʼniya vekamo Emoniʼe mafaʼneʼnimo Yovasiʼeʼmo yagaiʼana atesaʼafeʼmo ateyo.

²⁶ Kalavusi hutana atetetana aise aniʼe aise neʼyaʼeʼmo amime amime neʼvisaʼageʼnaeʼmo afaʼa egauve, hutapa hana paiyo, huno hapa paiʼniye.

²⁷ Mikaiyaʼa ha painoʼaeʼmo, Kagaemo alagepa huka maiʼneka aika atagineka esanagenoʼaeʼmo Ala kava neʼmoʼa navayafatiʼmo kaha opaiʼniyesine, huno ha paiteno, mukiʼamogitapae, huno, alagepa hutapa mani gemo afiyo, huno huʼniye.

Ehapiʼmo uno kamemo nehigenoʼaeʼmo kamitimo haeʼnigeno faliʼniya gemae

²⁸ Inagi Ehapiʼmo Isaleli kini vekaʼe Yihasafatiʼmo Yuta kini vekaʼeʼmo ati vayaʼanimo apavaleliʼuʼana Siliya vayaʼeʼmo kamemo hisayafeʼmo Lamoti taonimo Giliyati kotegamo uʼnae.

²⁹ Isaleli kini vekamoʼmo Yihasafatifeʼmo ha painoʼaeʼmo, Lagaemo kamefiʼmo neʼutaeʼmo nagaemo kini kukena yaʼmo asagiʼna maleteʼna alu kukenamo kame vayaʼmogimo nageʼa aeto osisayafeʼmo aliʼna vaiguvaʼmonanafa kagaemo kini konali yakamo vaika aliyo, huno huteno Isaleli kini vekamo Ehapiʼmo alu kukena yaʼmo alino vaitegeʼana anakaemo kamefiʼmo uʼnaʼae.

³⁰ Siliya kini vekamoʼmo kame neheya talalaleʼmo yagaiʼnaya vayaʼmo agaeʼeʼmo maiʼnaya vayaʼaifeʼmo hapa painoʼaeʼmo, Lapakaemo afa vayaʼeʼmofi ala vayaʼeʼmofi hutapa kame osugayaʼmonanafa Isaleli kini vekaʼekeʼmo kamemo hiyo, huno ago hapa paiʼniye.

³¹ Hapa paiʼnigeʼapaeʼmo kame talalaleʼmo yagaiʼnaya vayaʼmogi Yihasafatiʼmo ageteʼapaeʼmo, Ehapiʼmo Isaleli kini vekamae, huʼa apakesamo afiʼnae. Apakesamo afiʼnayaʼmofeʼmo uʼa haesayafeʼmo faiʼa vego huʼnagenoʼaeʼmo Yihasafatiʼmo keya aeno ge huʼnigeno Ala kava neʼmoʼa ha maeʼniye. Gotiʼa afaʼa apateʼnigeʼa uʼa kamemo ohaeʼnae.

³² Inagi kamemo nehaya talalaleʼmo yagaiʼnaya vayaʼmogi huʼapaeʼmo, Isaleli kini vekamo oʼmaiʼniye, huʼa ageʼnayaʼmofeʼmo agaemo vegala oʼaeʼa afaʼa ateʼnae.

³³ Ati vayaʼmogimo kamemo nehuʼapaeʼmo mago Siliya ati vekamoʼmo atimo yagaiteno kevemo mago vekamo lekana paino ohaeʼnifa fikumo hetalegeno uno Ehapiʼmo kame aeni kukenamo vaino aliʼniya kukenamo aise kapatiʼmo uno agufafiʼmo haniʼniye. Inagi Ehapiʼmo hosimo talalaleʼmo yagaiʼniya vekaeʼmo hunoʼaeʼmo, Kevemoʼmo ago eno nagufafiʼmo haniʼnigi kamemo nehaya yategamo ataleka alika aika atagineka ato, huno ha paiʼniye.

³⁴ Siliya ati vayaʼe Isaleli ati vayaʼeʼmo magoʼe huʼa lokiya vaiʼa kamemo huʼnagenoʼaeʼmo Isaleli kini vekamo asagauno oʼaisiyafeʼmo agaiʼamo mago yatetiʼmo agufaleʼmo maleno atafauno ateteno augosamo kamemo huʼnaya yategamo aino afeleno maime maime neʼegenoʼaeʼmo yegemo uno lamino nefalegenoʼaeʼmo faliʼniye.