2 Samiyo 24 - The Keyagana NT and 25 OT books

¹⁶ Mago enisole vekamo Yulusalemu taonifiʼmo eno avaʼyi huteno taonifiʼmo maiʼnaya vayaʼmo kamitimo apamagisiyafeʼmo alo huno maiʼnigenoʼaeʼmo Ala kava neʼmoʼa apamagisiya kavafeʼmo ohauʼnigeno hau huno apateteno alu aipa agesamo afiteno apamagisiyafeʼmo huʼniya enisole vekaeʼmo ina ge huno ha paiʼniye. Alaginagi afaʼa ato, huno ha paiʼniye. Ani afinaʼmo enisole vekamo mago vitimo haitaʼamo aliʼa neʼatalaya yateʼmo haopaleʼmo he tino maiʼniye.

¹⁷ Inagi Neviniʼmo ageyana mago enisole vekamoʼmo Isaleli vayaʼaina kamitimo apamagiʼnigeno agetenoʼaeʼmo Ala kava nefeʼmo hunoʼaeʼmo, Lama gemo haneʼniyana nagaemo alopa hosu kavaʼmo huʼnovaʼmonanafa mani vayaʼmogi sipisipigana huʼa maiʼnaya vayaʼmogimo haiya agufa hosu kavaʼmo huʼnae. Kagaemo nagaeʼe afamo anaga vayaʼniʼeʼmo kayoʼmo lamiyo, huno ha paiʼniye.

¹⁸ Ani afinaʼmo Gotitegati gemo alinineno aeno hakalo huno hapa nepaiya vekamo Gatiʼa Nevinitegamo eno ina ge huno ha paiʼniye. Kagaemo uka haika Alaunaʼmo Yemusi nofi vayapati vekamo mopaleʼmo viti alagamo haletiʼyaʼamo nehalaya mopaleʼmo Ala kava netefeʼmo ofalini yafa hiʼyalamuʼmo huvo.

¹⁹ Inagi Neviniʼmo Gatiʼa ha paiʼniya gemo Ala kava neʼmo geʼamo akame huvo, huno huʼniya gemo akame huno uno haiʼniye.

²⁰ Haiʼnigenoʼaeʼmo Alaunaʼmo apakeyana kini vekaʼe vayaʼaʼeʼmo agaetegamo eʼnageno apakeʼniye. Alaunaʼmo uno lamiʼnigeʼa fotu huteʼaeʼmo kini vekamo haopaleʼmo uno aleʼya faiʼneno ape huʼniye.

²¹ Alaunaʼmo Nevinifeʼmo hunoʼaeʼmo, Na kava higekaeʼmo ala vekaʼnimo kini vekaʼnimogamo nagaeteʼmo aliʼyakamo neʼaluva vekalegamo eʼnane, huno ha paiʼnigeno Neviniʼmo hunoʼaeʼmo, Muki vayaʼnilegamo alopa kaitaʼmo afole aiʼniya kaitaʼapimo hapagesiyafeʼmo viti alagamo haletiʼyaʼamo nehalana mopamo miya faiteʼna Ala kava netefeʼmo ofalini yafa hiʼyalamuʼmo hugesuve, huno ha paiʼniye.

²² Ha paiʼnigeno Alaunaʼmo Nevinifeʼmo hunoʼaeʼmo, Ala vekaʼnimo kini vekaʼnimogae, huʼna, ani mopamo afaʼa aliteka kahauʼnisiya yaʼmo alika ofalinimo amiyo. Ago, huno, ani pulumaka anagaʼamo apamagika kaeka ofalinimo Gotina amiyo. Haletiʼyaʼamo nehalona yosaʼe pulumakamo maleta neʼapatafauʼna yosaʼeʼmo alika ata kaeka ofalinimo amiyo.

²³ O kini vekae, huno, Alaunaʼnamo muki ani yaʼmo kini vekamo fiku amiʼnove. Ala kava neʼmo Gotikamoʼmo amuse huno kateno, huno ha paiʼniye.

²⁴ Kini vekamoʼa Alaunafeʼmo hunoʼaeʼmo, Haʼao, huno, Moniletiʼmo miya faiguve. Hosu kavanageʼna mago yaʼmo okamiʼna fiku alisuva yaʼmo Ala kava neʼmo Gotiʼnimo ani yaʼmo ofalinimo amiguve, huno ha paiteno Neviniʼa viti alagamo haletiʼyaʼamo haleʼnaya mopaʼe pulumaka anagaʼeʼmo fifatiʼa siluva yafatetiʼmo miya faiʼniye.

²⁵ Inagi Neviniʼmo ofalini amisiya hiʼyalamuʼmo huteno ata kaeno ofalinimo amige alino nanu aeno atesiya ofalinimo amige huʼniye. Inagi Ala kava neʼmoʼa Neviniʼmo Isaleli vayaʼaifeʼmo nunumuʼmo huʼniya gemo afiteno Isaleli vayaʼaitetiʼmo alopa kaitaʼapimo alino ataleʼniye.