2 Samiyo 12 - The Keyagana NT and 25 OT books

¹ Ala kava neʼmoʼa agaetegati gemo alinineno aeno hakalo huno hapa nepaiya vekamo Netaniʼa alino ateʼnigeno Nevinitegamo uʼniye. Agaemo Nevinifeʼmo hunoʼaeʼmo, Lole vekalaʼmo magoke taonifiʼmo maiʼnaʼae. Mago vekamo asole kagemiyaʼamo haneʼnigeno alu vekamo kagemiyaʼamo ohaneʼniya vekamo maiʼniye.

^2-3 Ani asole kagemiyaʼamo haneʼniya vekamo sipisipiʼamo asole yaʼmo maige pulumakaʼamo asole yaʼmo maige huʼniyaʼmonanafa kagemiyaʼamo ohaneʼniya vekamo mago yaʼamo alagi ohaneʼniyaʼmonanafa magokeʼage a sipisipi aikelitomo maiʼniye. Agaemo ani sipisipitomo alagepa huno yagaino ateʼniye. Sipisipiʼamoʼmo noʼafiʼmo maiʼneno ani vekamo mafaʼne anagaʼaʼeʼmo magokepi kosiʼniye. Ani sipisipimoʼa ani vekamo neʼyaʼmo nege kapuʼafatiʼmo aniʼmo nege huteno ani vekamo haifiʼyaleʼmo havaeno maiʼneno alagi agaiʼa a mafaʼneʼagana huno maiʼniye.

⁴ Mago afinaʼmo mago nata vekamo kagemiyaʼamo haneʼniya vekamo notegamo eʼnigenoʼaeʼmo kagemiyaʼaʼe vekamoʼa agaiʼa sipisipifatiʼmo oʼamagige pulumakafatiʼmo oʼamagige huʼniyaʼmonanafa kagemiyaʼamo ohaneʼniya vekamo magoke aikeli sipisipitoʼamo amagiteno kaeno nata vekamo eno noʼafiʼmo maiʼniya vekamo amiʼniye, huno ha paiʼniye.

⁵ Neviniʼa ani gemo afitenoʼaeʼmo kagemiyaʼamo haneʼniya vekaeʼmo aipamo leʼnigeno Netanifeʼmo ha painoʼaeʼmo, Nagaemo nagoʼyamo ataleteʼna Ala kava neʼmo agiʼaletiʼmo huʼnaeʼmo, ani vekamo falisiya kavaʼmo huʼniye.

⁶ Agaemo anonaʼalefeʼmo loleʼe loleʼe sipisipimo kagemiyaʼamo ohaneʼniya vekamo aeno amigiye. Alagi hosu kavaʼmo huteno mago aiseʼamo hau huno oʼateʼniye.

⁷ Inagi Netaniʼa Nevinifeʼmo ha painoʼaeʼmo, Ani kagemiyaʼamo haneʼniya vekamo kagaekeʼmo maiʼnane. Lagaemo Isaleli vayaʼmogita Ala kava neʼmo Gotitimoʼmo kagaefeʼmo hunoʼaeʼmo, Nagaemo Isaleli vayaʼmogi kini vekaʼapimo maisanafeʼmo uvelimo faleʼna kateteʼnaeʼmo Solo ayapatiʼmo kagufamo aliʼna katiʼna kateʼnove.

⁸ Nagaemo kini vekamo Soloʼa yagaiʼniya kavaʼmo aliʼna kamige aʼne anagaʼamo apavaleʼna kamige Isaleli nofi vayaʼmo apavaleʼna kamige Yuta nofi vayaʼmo apavaleʼna kamige huʼnove. Ho kaeno okateʼniyesinana magoʼe yaʼmo kamiʼnovesine.

⁹ Na kava higekaeʼmo Ala kava neʼmo geeʼmo ina agufa ge, huteka kakameʼyamo amiteka aulagaleʼmo hosu kavaʼmo huʼnane. Kagaemo naipeletiʼmo Yulaiyaʼmo aiʼnanageno falitegeka aʼamo aliʼnane. Kagaemo Amoni vayaʼai apayapatiʼmo amagiʼnanageno faliʼniye.

¹⁰ Inagi kagaemo nagaefeʼmo ina agufa vekamo maiʼniye, huka kagesamo afiteka Yulaiya aʼmo aliʼnanaʼmofeʼmo naipeletiʼmo kame huʼa katesageno hanageke kavaʼmoʼmo kagaeteʼe afamo anaga vayakaleʼeʼmo hanegaiye.

¹¹ Ala kava neʼmoʼa kaha painoʼaeʼmo, Afiyo, huno, Nagaemo afamo anagakafatiʼmo mago kame vayakamo aliʼna he tiʼna apatesugeʼa kana yaʼmo kamigae. Nagaemo kaulagaleʼmo aʼnekamo apavaleʼna kahaopaleʼmo maiʼniya vekamo amisugeno afole yateʼmo kumai kavaʼmo hugiye.

¹² Kagaemo fala kika hosu kavaʼmo huʼnanaʼmonanafa nagaemo mani kavaʼmo afole yateʼmo muki Isaleli vayaʼai apaulagaleʼmo huguve, huno kaha paiʼniye, huno ha paiʼniye.

¹³ Neviniʼa Netanifeʼmo ha painoʼaeʼmo, Nagaemo Ala kava netegamo hosu kavaʼmo huʼnove, huno huʼnigeno Netaniʼmo hunoʼaeʼmo, Ala kava neʼmoʼa hosu kavakamo alino ataleʼniyanageka afa ofaligane.

¹⁴ Kagaemo ani hosu kavatetiʼmo Ala kava neʼmo kame vayaʼamogimo huʼa faipa huʼa natesaya kaʼmo valika apateʼnanaʼmofeʼmo Matasimaʼa alino atesiya mafaʼnekamo faligiye, huno ha paiteno

¹⁵ Netaniʼa noʼalegamo uʼniye.