2 Samiyo 11 - The Keyagana NT and 25 OT books

¹ Yasimo alino hano nehiya afinaʼmo kini vayaʼmogimo ami vayaʼapimo apavaleliʼuʼa kame vayaʼapiʼeʼmo kamemo hute hute nehae. Ani kanaleʼmo Neviniʼmo Yoʼapuʼagi kini vayanagi muki Isaleli ati vayanagi huno alino apateʼnigeʼa uʼa Emoni vayaʼeʼmo kame huʼa aeʼa apaka seteʼa Lama taonileʼmo faiʼa vego huʼa kame huʼnae. Huʼnayaʼmonanafa Neviniʼa oʼuno Yulusalemu taonifikeʼmo maiʼniye.

² Mago uneʼmo Neviniʼa hipaʼaleʼmo havaeno maigeno he tino nokatomuʼmo otuleʼmo uno haino uneno huʼniye. Agaemo aulu heno mugalegamo ageyategamo mago a kanomoʼmo aniʼmo nefalegeno ageʼniye. Ani a kanomo alagi alagepa apaulagamo neʼagaya a kanoe.

³ Inagi agaemo ina laʼmofi huno agesiyafeʼmo Neviniʼa mago vekamo alino ateʼnigeno uʼniye. Ani vekamoʼa hunoʼaeʼmo, Matasimaʼmo Eliyamu a mafaʼnemo Hiti nofi vekamo Yulaiya aʼmo maiʼniye.

⁴ Neviniʼa afitenoʼaeʼmo mago vayaʼmo alino apateʼnigeʼa uʼa Matasimaʼmo avaleliʼa eʼnae. Ani afinaʼmo Matasimaʼmo aigu yaʼmo hauno hano hutegeno Yuta aʼne anagaʼmogi mono nehaya kavaʼmo akame huno halate alino kanale huʼniye. Inagi Nevinitegamo eʼnigeno Neviniʼa agaeʼeʼmo lokaeno havaeʼniye. Halate Matasimaʼa noʼalegamo uʼniye.

⁵ Henagaʼamo ageʼniyana aipaguʼeʼmo maitenoʼaeʼmo, naipaguʼeʼmo mauve, huno Nevinitegamo ge huno atalegeno uʼniye.

⁶ Neviniʼa afitenoʼaeʼmo Yovaputegamo ge huno atalegeno uʼniye. Kagaemo Yulaiyaʼmo vala Hiti nofi vekamo alika ategeno nagaetegamo eno. Yovapuʼa Yulaiyaʼmo alino ategeno Nevinitegamo eʼniye.

⁷ Yulaiyaʼmo Nevinitegamo eno avaʼyi huʼnigenoʼaeʼmo Neviniʼa ina ge huno ge huno afi geʼniye. Yovapuʼe ati vayaʼeʼmo alagepa huʼa maiʼnafiye. Kame huʼnaya kavaʼmo haiya kava huʼnae.

⁸ Neviniʼa Yulaiyafeʼmo ha painoʼaeʼmo, Hemenimo nokalegamo uka aniʼmo faletaleka maika haga lo, huno ha paiʼnigeno Yulaiyaʼa kini vekamo noʼamo ataleno kumatega uno lamiʼniye. Neviniʼa Yulaiyaʼmo fiku ha maeno amisiyafeʼmo mago vekamo mago yaʼmo amiteno Yulaiyategamo alino ategeno alinino uʼniye.

⁹ Yulaiyaʼa noʼalegamo oʼuʼnifa kini vekaʼamo aliʼyaʼamo neʼaliya vayaʼekeʼmo kini vekamo no kipa haopaleʼmo havaeʼniye.

¹⁰ Nevinifeʼmo ha paiʼapaeʼmo, Yulaiyaʼmo noʼalegamo oʼuʼniye, huʼa ha paiʼnagenoʼaeʼmo Neviniʼa Yulaiyafeʼmo hunoʼaeʼmo, Yatala kateʼmo eʼnananafa na kava higeka nokalegamo oʼuʼnane, huno afi geʼniye.

¹¹ Inagi Yulaiyaʼmo geʼaleʼmo ina ge huno aeno atagaina huno ha paiʼniye. Apakaemo Isaleli ati vayaʼe Yuta ati vayaʼeʼmo seli noʼapifiʼmo maiʼnageno kotalake kesimo apakaeʼeʼmo haneʼniye. Ala vekaʼnimo Yovapuʼe vayaʼaiteʼmo yagaiʼa neʼapataya ati vayaʼaʼeʼmo kahaufilaga maiʼnayaʼmofeʼmo nagaemo nagaiʼnigeʼmo noʼnilega uʼna neʼyaʼmo nege aniʼmo nege huteʼna aʼniʼeʼmo lokaeʼna havaesufiye. Haʼao, alagi ani agufa kavaʼmo osuguve. Nagaemo alagi lama ge nehuve, ani kavaʼmo afa osuguve, huno ha paiʼniye.

¹² Ha paiʼnigeno Neviniʼa hunoʼaeʼmo, Kanalenagi manileʼmo maiteka egamo aliʼna katesugeka ugane, huno ha paiʼniye. Inagi Yulaiyaʼmo Yulusalemu taonifi lole afinaʼmo maiʼniye.

¹³ Inagi ega uneʼmo Neviniʼa Yulaiyafeʼmo ge huʼnigeno eʼnigeʼana neʼyaʼmo nege aniʼmo magokepiʼmo nege huteʼanaeʼmo agaemo Yulaiyaʼmo aniʼmo amiʼnigeno neteno negi nagi hisiyafeʼmo amiʼniyaʼmonanafa ani haniʼilagamo Yulaiyaʼa noʼalegamo uno ohavaeʼnifa Nevini aliʼyaʼamo neʼaliya vayaʼeʼmo yakaiʼnonaleʼmo havaeʼniye.

¹⁴ Netepiʼmo Neviniʼa mago avoʼmo kaeno Yulaiyaʼmo amiteno alino ategeno alinino Yovaputegamo uʼniye.

¹⁵ Neviniʼa ani avopiʼmo ina ge huno kaeʼniye. Yulaiyaʼmo lokiya vaiʼa kame hisaya haopalegamo alika ato. Inagi lapakaemo ataletapa alime alime neʼegeʼa kame vayaʼmogi Yulaiyaʼmo haeyo.

¹⁶ Yovapuʼe ati vayaʼaʼeʼmo Lama taonimo alisayafeʼmo huʼnaya kamefiʼmo ani kavaʼmo afole aiʼniye. Yovapuʼa koli osuʼa lokiya vaiʼa kame nehaya haopalegamo Yulaiyaʼmo alino ateʼniye.

¹⁷ Lama taonifi vayaʼmogi taonifatiʼmo emiʼeʼa Yovapu ati vayaʼaʼeʼmo kamemo huʼnae. Ani kamefatiʼmo mago Nevini vayaʼe Hiti vekamo Yulaiyaʼeʼmo faliʼnae.

¹⁸ Yovapuʼmo ani kamemo huʼniya kavafeʼmo ava gemo hutalegeno Nevinitegamo uʼniye.

¹⁹ Yovapuʼa gemo alinino ugefe huʼniya vekaeʼmo ha painoʼaeʼmo, kagaemo kini vekaeʼmo muki mani kamefiʼmo afole aiʼniya kavafeʼmo ava gemo huka ha paiyo.

²⁰ Kini vekamoʼa aipamo lesigenoʼaeʼmo, na kava higetapaeʼmo kame hisayafeʼmo taoni kegiʼyamo haopaleʼmo uʼnae. Lapakaemo ago ageʼnayana kame vayatapimogi yafa kegiʼyaleʼmo maiʼnaya vayaʼmogimo, lahaegae, hutapa osuʼnae.

²¹ Akeyaʼvilaga Amimalekitegamo afole aiʼniya kavafeʼmo ava gemo ago afiʼnae. Amimalekiʼa Yalumaseti mafaʼnemo Temesi taonimo kegiʼya haneʼniya haopaleʼmo he tino maiʼnigenoʼaeʼmo ina laʼmo amagiʼniye. Mago a kanomoʼmo kegiʼyaleʼmo he tino maiʼneno alopa yafa kayotetiʼmo yaga auno amagiʼnigeno faliʼniye. Na kava higetapaeʼmo lapakaemo kegiʼya haopaleʼmo utapa hogo huʼnae, huno kafi gesigekaeʼmo, aliʼyakamo neʼaliya vekamo Hiti vekamo Yulaiyaʼeʼmo magokepi faliʼniye, huka ha paiyo, huno ha paiʼniye.

²² Gemo alinino uʼniya vekamoʼmo Nevinifeʼmo Yovapuʼa ha paiʼniya gemo ha paiʼniye.

²³ Agaemo hunoʼaeʼmo, Apakaemo kame vayaʼmogimo lokiya vaiʼa kame huteʼa taonifatiʼmo ataleʼa emiʼeʼa afole yateʼmo malagamo eʼnageta kame huteta hapaelita uta taoni kipateʼmo apateʼnone.

²⁴ Apateʼnonaʼmonanafa mago ati vayaʼmogi kegiʼyaleʼmo maiʼneʼa aliʼyakamo neʼaliya vayaʼmo hapaeʼnageʼa faliʼnae. Mago aliʼyakamo neʼaliya vekamo Hiti vekamo Yulaiyaʼeʼmo magokepi faliʼniye, huno ha paiʼniye.

²⁵ Neviniʼa ani apa vekaeʼmo ha painoʼaeʼmo, Yovapufeʼmo ina gemo huka ha paigeno lokiya vaino atesigeno kamemo hino. Yovapuo, huka, kaipamoʼmo kana osino. Ina laʼmo kamefiʼmo faligifi huta oʼagegaune. Emoni vayaʼeʼmo lokiya vaika kamemo huteka ani taonimo alika hosu huka atalo, huka ha paiyo.

²⁶ Matasimaʼmo afiʼniyana anauʼamoʼmo ago faliʼniye, huʼa huʼnageno afitenoʼaeʼmo hau huno anauʼamofeʼmo aviʼyaʼmo huʼniye.

²⁷ Hau huʼniya kanaʼamo uno hano hutegenoʼaeʼmo inagi Neviniʼa, Matasimaʼmo avalelitapa eyo, huno huʼnigeʼa avaleliʼa eʼa Nevini noʼafiʼmo ateʼnae. Neviniʼa ago aliʼnigeno mago mafaʼnemo Nevinitetiʼmo alino ateʼniye. Huʼniyaʼmonanafa Ala kava neʼmoʼa Neviniʼmo huʼniya kavafeʼmo ohauʼniye.