2 Pita 3 - The Keyagana NT and 25 OT books

Ala kava neʼmo halate eminegaiye, huno huʼniya gemae

¹ Nahauʼniya vayaʼnimogitapae, huʼna, ago afiʼnaya geeʼmo halate alagepa lapakesafatiʼmo magoʼe hutapa lapakesamo afisayafeʼmo aliʼna he tiʼna lapatesuvafeʼmo hogoteʼna avoʼmo kaeteʼnaeʼmo hemenimo halate henaga gemo avoʼmo nekaove.

² Lapakaemo akeyaʼvilaga apaote vayaʼmogi Gotitegati gemo alini eʼa aeʼa hakalo huʼa hapa nepaiya vayaʼmogi huʼnaya geʼe Ala kava neʼmo lagufamo alino katino nelateya vekamoʼmo apa vayaʼamogitaʼeʼmo hutaeʼmo, ani kavaʼmo hiyo, huta huʼnona getiʼeʼmo halate magoʼe hutapa lapakesamo afisayafeʼmo mani gemo avoʼmo nekaove.

³ Hogotetapa mani gemo alagepa hutapa afiyo. Mago vayaʼmogi huʼapaeʼmo, ina agufa gemo haneʼniye, huʼa huteʼa huʼa faipa huʼa atesaya vayaʼmo henagaʼamo hano hugefe hisiya afinaʼmo afole aiteʼa apakufamoʼmo hauʼniya kavaʼmo akame hugae.

⁴ Apakaemo huʼapaeʼmo, agaemo emiʼnegauve, huno huʼniyana hemenimo haiyatega maiʼniye. Ma mopamo alo huʼniya afinatetiʼmo muki yaʼamo afaʼa haneme haneme eno haneʼnigeʼa afotimogi ageteʼa falitageno hemeniʼeʼmo magoke agufa yakeʼmo haneʼniye, huʼa hugae.

^5-6 Huʼa hugayaʼmonanafa akeyaʼvilaga Gotiʼa hunoʼaeʼmo, afole aino, huno huʼnigeno ma mopaʼe kokuʼnaʼeʼmo afa yatetiʼmo afole aiʼniye. Mopamo anipatiʼmo afole aiʼnigeno solovala aniʼmoʼa faino vego huno ateʼnigeno mopamo folagapiʼmo haneʼniye. Haneʼniya mopamo haneʼnigeno aniʼmoʼa henagaʼamo ago aeno ati kaeʼnigeno atafa mopamo ago hano huʼniye. Ani vayaʼmogimo mani kavafeʼmo apakesamo afisayafeʼmo ohapauʼnigeʼa apaulagamo ali huʼnigeʼa noʼagae.

⁷ Ani kavaʼmo huno Gotiʼa ma mopaʼe kokuʼnaʼefeʼmohunoʼaeʼmo, afaʼa haneno, huno huʼnigeno haneʼniyanageno atamoʼa leno saga lisiyafeʼmo afaʼa haneʼniye. Gotiʼa yagaino ateʼnigeno haneme haneme neʼeyanageno Gotiʼa agaefeʼmo mono nosaya vayaʼaina agoti huno apateteno alino apagoʼya lagauno apatalegaiye.

⁸ Nahauʼniya vayaʼnimogitapae, huʼna, Goti aulagaleʼmo magoke afinaʼmo vani tauseniʼa kafugagana huno haneʼneno vani tauseniʼa kafugamoʼmo magoke afinakana huno haneʼniye. Ani kavatefeʼmo lapake okanino.

⁹ Mago vayaʼmogi Ala kava nefeʼmo huʼapaeʼmo, huguve, huno huʼniya kavaʼmo hisiyafeʼmo lagava maime maime neʼviye, huʼa nehayaʼmonanafa huguve, huno huʼniya kavaʼmo hisiyafeʼmo lagava neʼmaiye. Alino lagoʼya lagauno latalesiyafeʼmo ohauʼniyaʼmonanafa mukiʼamogitamo laipamo alita afe lesunafekeʼmo hauʼnigenoʼaeʼmo lagava neʼmaiye.

¹⁰ Kumaya vayaʼmogimo kava noʼyagaiya afinaʼmo neʼaya kava huno Ala kava neʼmo agaiʼa afinaʼmo afole aisigenoʼaeʼmo lusi kava huno avamusa gemoʼmo nehisigenoʼaeʼmo kokuʼnaʼmo alagi hano hugiye. Muki ma mopaʼe muki ma mopafiʼmo haneʼniya yaʼeʼmo atamoʼmo leno sagalino hano hugiye.

¹¹ Muki yaʼamo alagi hano hugiyaʼmofeʼmo hemenimo lapakaemo haiya agufa kavaʼmo hutapa maisaya kavaʼmo haneʼniye. Lapaote kavaʼmo nehutapaeʼmo Gotifekeʼmo mono hiyo.

¹² Muki yaʼamo ata lege kokuʼnaʼmo ata lege huno leno sagalino hano hugiyanagi Ala kava neʼmo afinafeʼmo agava maiʼnetapa malage huno afole aisiyafeʼmo alagepa kavaʼmo hiyo.

¹³ Hano hugiyaʼmonanafa Gotiʼa afole aigiye, huno hu maleʼniya gemo afole aisigenoʼaeʼmo fatago kavaʼagekeʼmo hanesiya saufa kokuʼnaʼe mopaʼeʼmo afole aisiyafeʼmo agava neʼmaune.

¹⁴ Nahauʼniya vayaʼnimogitapae, huʼna, afole aigiyaʼmofeʼmo agaemo kahauya huno lapakesiyana agava maiʼnetapaeʼmo hosu kavatapimo ohanesigetapa vaiʼmo oʼalita agaeʼeʼmo alagepa hutapa magokepi lokaeta maisayafeʼmo lapayamukiki hiyo.

¹⁵ Ala kava neʼmoʼa lagava maiʼniyanageno mukiʼamogita lagufamo alino katino lategaiye, huta lapakesamo afiyo. Lahauʼniya konagatimo Poloʼmo Gotiʼa amiʼniya yaʼmo ageteno afiʼniya geʼaletiʼmo ani kavatefeʼmo lapakaefeʼmo avoʼmo kaeʼniye.

¹⁶ Agaemo muki kaeʼniya avoʼamo ani kavafekeʼmo kaeʼniye. Mago avoʼmo kae maleʼniya gemo aepaʼamo afisayafeʼmo kana huʼniye. Kana huʼnigeʼa alagepa huʼa afiteʼa lokiya noʼvaiya vayaʼmogimo aliʼa afe leʼa alino apagoʼya lagauno apatalesiya agufa kavakeʼmo aliʼa afole aiʼa neʼatae. Ani kava huʼa muki gemo Goti mukufiʼmo avoʼmo kae maleʼnaya geeʼmo hosu gemo huʼa aliʼa afeleʼa nehae.

¹⁷ Nahauʼniya vayaʼnimogitapae, huʼna, mani kavafeʼmo ava gemo hogotetapa ago afiʼnayaʼmofeʼmo ehetapiye. Fiku yanagetapa keʼaepa gemo amagiʼa neʼatalaya vayaʼai geʼapimo afitetapa atafauta alagi hutapa maiʼnayatetiʼmo ataleta asagauta aigae.

¹⁸ Ani kavaʼmo osutapa Ala kava netimo lagufamo alino katino nelateya vekatimo Yesu Kalaisiʼa fikumo lapa maeno lapamiʼniya kavafekeʼmo magoʼe hutapa lapakesamo afita fatago hutetapa Kalaisifeʼmo magoʼe hutapa lapakesamo afitetapa ageta aeto hutetapaeʼmo kosita alopa vayaʼmo maiyo. Ha le konali yaʼamo hemenimo haneʼniyanageno muki afinaʼaeʼmo hanege hanege huno haneno. He, lama ge.