2 Pita 2 - The Keyagana NT and 25 OT books

¹ Huʼnayaʼmonanafa akeyaʼvilagamo mago aigofe apaune gemo aeʼa hakalo huʼa hapa nepaiya vayaʼmo Isaleli nofi vayaʼeʼmo magokepiʼmo lokaeʼa maiʼnae. Maiʼnaya kava huʼa aigofe tisa vayaʼmo lapakaeʼeʼmo magokepi lokaeʼa maiʼneʼapaeʼmo aigofe gemoʼa alino hosu huno lapatesiya agufa gemo kesi katetiʼmo alini eʼa aeʼa hakalo hugae. Apakaemo Ala kava neʼmo miya faino apateʼniya vekamo atalesagenoʼaeʼmo malage huno alino apagoʼya lagauno apatalegaiye.

² Asole vayaʼmo alino hosu huno apatesiya gemo akame hugayaʼmofeʼmo mago vayaʼmogimo alagepa kaʼmo alino apave neliya lama gelefeʼmo huʼa faipa huʼa ategae.

³ Apakaemo hapaʼye huʼninageʼa aigofe geʼapiletiʼmo lapakaetetiʼmo muki kagemi yatapiʼe monitapiʼeʼmo alisayafeʼmo hugae. Muki afinaʼmo agoti huno apatesiya vekamo fikumo noʼmaifa alo hunoʼageʼmo neʼmaiye. Alino apagoʼya lagauno apatalesiya vekamo muki afinaʼmo au nokale.

⁴ Enisole vayaʼmogimo hosu kavaʼmo huʼnagenoʼaeʼmo Gotiʼa apakeno oʼapataleʼnifa seli nofitetiʼmo kino apateteno ata kopiʼmo alino yaga auno apataleʼnigeʼa agoti huno apatesiya afinafeʼmo hani kopiʼmo maiʼneʼa agava maiʼnae.

⁵ Ani kava huno akeyaʼvilaga vayaʼmogi Gotifeʼmo mono osuʼnaya vayaʼaina Gotiʼa apakeno oʼapataleʼnifa aniʼmo ho, huno huʼnigeno aniʼmo heteno muki vayaʼamo ago aeno apati kaeʼniyaʼmonanafa Novaʼa fatago kavafeʼmo aeno hakalo huno hapa paiʼniya vekaʼe seveniʼa vayaʼeʼmo anipatiʼmo apakufamo alino katino apateʼniye.

⁶ Sotomi taonifiʼmo maiʼnaya vayaʼe Gomola taonifiʼmo maiʼnaya vayaʼeʼmo agoti huno apateteno lole alopa taonilaʼmo ataletiʼmo muki yaʼe vayaʼeʼmo alagi kaeno saga lino hano huno ataleʼniye. Ani agufa aune kavaʼmo Gotifeʼmo mono nosaya vayaʼaiteʼmo afole aigiye.

⁷ Lotiʼa fatago vekamo maiʼneno muki keʼaepa gemo amagiʼa ataleteʼa kumai kavaʼmo huʼnageno apaketenoʼaeʼmo aipamoʼmo lusi kava huno kana huʼniye.

⁸ Ani alagepa vekamoʼmo apakaeʼeʼmo magokepiʼmo lokaeno maiʼnenoʼaeʼmo muki afinaʼae afinaʼaeʼmo hosu geʼapimo afige hosu kavaʼapimo agege nehunoʼaeʼmo aipamoʼmo lusi kava huno kana huʼnigeno fatago agupi mafaʼnefatiʼmo agafu kiʼniye.

⁹ Inagi Ala kava neʼmoʼa agaefeʼmo mono nehaya vayaʼai apakufamo alino katino apatetenoʼaeʼmo hosu kavaʼmo huʼnaya vayaʼmo kayoʼmo apamiteno agoti huno apatesiya afinaʼmo yagaino apatesiyafeʼmo ageʼniye.

¹⁰ Ani kava huno apakufamoʼmo hauʼniya kavaʼmo akame huteʼa kumai kavaʼmo huge muki yagaiʼa neʼapataya vayaʼai geʼapimo oʼafige nehaya vayaʼmo magoʼe huno lusi hanageke yaʼmo apamigiye. Ani agufa aigofe tisa vayaʼmogi koli osuʼa lusi himuʼnamu kavaʼmo huteʼa ala apaki vayaʼaifeʼmo apakesamo oʼafiʼa huʼa faipa huʼa neʼapatae.

¹¹ Neʼapatayaʼmonanafa enisole vayaʼai lokiya himamuʼapimo aeno apakaseʼniyaʼmonanafa Ala kava neʼmo aulagaleʼmo ala apaki vayaʼaifeʼmo, hosu kavaʼmo nehae, huʼa huteʼa huʼa faipa huʼa noʼapatae.

¹² Gotiʼa afela afumo vayaʼmogi apamagisageʼa falisayafeʼmo alo huno apateʼniya afugana huʼa maiʼnae. Apakaemo oʼageʼnaya kavafeʼmo huʼapaeʼmo, hosu kavaʼmo haneʼniye, huʼa nehae. Huʼa huteʼa huʼa faipa huʼa neʼatayanageno Gotiʼa alino apagoʼya lagauno apatalegaiye.

¹³ Hosu kavaʼapimo anonaʼapilefeʼmo alino apagoʼya lagaugiye. Apakaemo felugamo ha leʼnigeʼapaeʼmo apakufamoʼmo hauʼniya kavaʼmo huʼa lusi neʼyaʼmo nege aniʼmo nege hosu kavaʼmo huge huteʼa apamogaga neʼaiye. Lapakaeʼeʼmo neʼyaʼmo neʼneʼapaeʼmo kukena yaʼapileʼmo oʼaniʼya faiʼnigeno alagena yaʼmo haneʼniya agufa yakana huʼa maiʼneʼa aigofe geʼapiletiʼmo humi lapateteʼapaeʼmo apamogaga neʼaiye.

¹⁴ Kumai kavaʼmoʼa apaulagafiʼmo havai teʼniyanageʼa hosu kavaʼmo alagi oʼatalegae. Apakaemo lokiya vaiʼa noʼmaiya vayaʼai apayate neʼaliye. Hapaʼye hisiya kavaʼmo alagi ago afiteʼa ageʼnae. Apakaemo lifana huno apateʼniya mafaʼnemo maiʼnae.

¹⁵ Meo mafaʼnemo Melamiʼa monieʼmo haʼye huʼnigeno hosu kavaʼmo huʼniya kava huʼa alagepa kaʼmo ago ataleʼa u eʼa huʼnae.

¹⁶ Hosimogimo apake noʼaiya afumo maiʼnayaʼmonanafa mago hosimoʼa vayaʼmogi nehaya agufa gemo huno Melamifeʼmo, hosu kavaʼmo nehane, huno ha paiʼniye. Melamiʼa gemo aeno hakalo huno hapa nepaiya vekamoʼmo negi kavaʼmo huʼnigenoʼaeʼmo ani kavaʼmo magoʼe huno osisiyafeʼmo huno atafauno ateʼniye.

¹⁷ Apakaemo ani kavaʼmo huʼa kelifiʼmo haneʼniya aniʼmo leno laneʼnigeno keliʼageʼmo haneʼniya keligana huʼa maiʼnae. Hiyaʼmo yasimoʼa alinino neʼviya hiyakana huʼa maiʼnae. Gotiʼa lusi hani huʼniya kopiʼmo maisayafeʼmo alo huno apateʼniyanageʼa maige maige huʼa maigae.

¹⁸ Apakaemo falo gefatiʼmo huteʼapaeʼmo himuʼnamu kavaʼmo huteʼa afa hosu gemo nehae. Nehuʼapaeʼmo kumai kavaʼmo hisayafeʼmo amega apakufamoʼmo hauʼniya hosu kavaʼmo nehaya vayaʼaitegatiʼmo faiʼa kasalo paeʼa eʼnaya vayaʼai apayateʼmo neʼaliye.

¹⁹ Apakaemo huʼapaeʼmo, lapakufamoʼmo hauʼniya kavaʼmo hisayana lapatafauno lapatesiya keʼaepa gemo alagi ohaneʼniyanagetapa afa vayaʼmo maigae, huʼa huteʼa aliʼa hosu huʼa neʼapataya kavaʼmoʼa apatafauno apateʼnigeʼa kalavusifiʼmo maiʼnae. Hosu kavaʼmoʼa aeno apakaseʼnisiya vayaʼmo nofi aeno apateʼnigeʼa maiʼnae.

²⁰ Apakaemo Ala kava neʼmoʼa apakufamo alino katino neʼapateya vekamo Yesu Kalaisiʼmo ageʼnaya kavatetiʼmo ma mopafi hosu oʼaniʼya kavategatiʼmo faiʼa kasalo paetaleʼa eʼnayanageno halate hosu kavaʼapimoʼmo nofi aegekana huno apatafauno apateʼneno aeno apakasesiyaʼmoʼmo aepa faiʼniya afinaʼmo hosu kava huʼa neʼmaiyaʼmonanafa atupa afinaʼapimo magoʼe huʼa alagi hosu kavaʼmo huʼa maigae.

²¹ Apakaemo fatago kavaʼmo alisaya kafeʼmo ava gemo oʼafiʼnaesinana alagepa huʼa maiʼnaesinaʼmonanafa aote gemo ani kavaʼmo hiyo, huno hapa paiʼniya keʼaepa gemo afiteʼa ataleʼnayaʼmofeʼmo alagi hosugiye.

²² Ani agufa vayaʼaifeʼmo alagi lama gemo huʼa aeʼa kalafefa gemo huʼapaeʼmo, kalamogimo mu valiʼa ataleʼa uteʼa halate aiʼa atagineʼa eʼa neʼnae. Ani kava huʼa afumo aniʼmo faleʼa ateʼnaya afumoʼmo halate uno hapafiʼmo kasepu neʼaiye, huʼa huʼnae.