2 Pita 1 - The Keyagana NT and 25 OT books

¹ Nagaemo Saimoni Pitaʼnamo Yesu Kalaisi aliʼyaʼamo neʼaluva vekamo maiʼneʼna apa vekaʼamo maiʼnove. Gotiʼa lagufamo alino katino nelateya Gotitimoʼa Yesu Kalaisi fatago kavaʼaletiʼmo fikumo lapamaeno lapamiʼnigetapa lapakesamo afita fatago huʼnaya vayaʼamogitapaeʼmo mani gemo avoʼmo nekaove. Lapakesamo afita fatago nehaya kavatapimo alopa monileʼyaʼmo aeno agaseʼniya kavaʼe lagesamo afita fatago nehuna kavatiʼeʼmo magoke aiyaya kavaʼmo haneʼniye.

² Lapakaemo Gotiʼe Ala kava netimo Yesuʼeʼmo lapakaemo anaketa aeto huʼnaya kavatetiʼmo fikumo lapa maeʼana lapamisaʼageno lapaipamoʼmo falu hino.

Lapakaefeʼmo keya aeno ge huʼniyanagi alu alagepa kava alu alagepa kavaʼmo magokepi alita lokaeta ateyo, huno huʼniya gemae

³ Gotiʼa yalagisa vekamoʼmo himamuʼaletiʼmo alagepa huta maiʼneta Gotifekeʼmo alagepa huta mono hisunafeʼmo muki yaʼamo fikumo laha maeno lamiʼniye. Lagaemo Gotiʼmo ageta alagepa huta ageʼnona kavatetiʼmo muki yaʼamo lamiʼnigeta aliʼnone. Ha le konali yaʼamo aliteta agaekana huta maisunafeʼmo lagaefeʼmo eyo, huno keya aeno ge huʼniye.

⁴ Gotiʼa ani kavatetiʼmo alopa monileʼyaʼmo aeno agaseʼniya geʼamo fikumo lapa maeʼna lapamiguve, huno hu maleʼniya geʼamo hemenimo ago laha paiʼniye. Lapakaemo ma mopafi kavafeʼmo hapaʼye huʼnigeno alino hosu huno neʼapateya kavategatiʼmo ago faita kasalo paeʼnayanagetapa Goti aipa agesamo alisayafeʼmo mani alopa kavatefeʼmo alagepa polomasi geʼamo ago lapa paiʼniye.

⁵ Gotiʼa ani kavaʼmo huʼniyaʼmofeʼmo lapakesamo afita fatago hutetapaeʼmo anileʼmo lokiya alagepa kavaʼmo hisayafeʼmo lapayamukiki hiyo. Lokiya alagepa kavaʼmo nehutapaeʼmo anileʼmo agetetapa afiʼnaya kavaʼmo aliyo.

⁶ Agetetapa afiʼnaya kavaʼmo aliʼnetapaeʼmo anileʼmo lapakufaleʼmo yagaitapa ateyo. Lapakufaleʼmo yagaitapa ateʼnetapaeʼmo anileʼmo oʼataleta atafautapa alagi hiyo. Oʼataleta atafautapa alagi hutapa maiʼnetapaeʼmo anileʼmo Gotifeʼmo mono hiyo.

⁷ Gotifeʼmo mono nehutapaeʼmo anileʼmo konagatapimo alita lapao yaʼmo hiyo. Konagatapimo alita lapao yaʼmo hu hutetapaeʼmo anileʼmo lapau lapayamopafiʼmo lapaino.

⁸ Mani kavaʼmo magoʼe magoʼe hutapa hisayana Ala kava netimo Yesu Kalaisiʼmo agetapa aeto huʼnaya kavatetiʼmo afaʼa oʼmaitapa alagamo aegae.

⁹ Mani muki kavaʼamo nosisaya vayaʼmogimo apaulaga ali huʼnigeʼa afagitegamo haneʼniya yaʼmo noʼagae. Apakaemo Gotiʼa hogote hosu kavaʼapimo alino ataleʼniya kavafeʼmo ago apake kaniʼniye.

¹⁰ Konagaʼnimogitapae, huʼna, Mani gemo huʼniyaʼmofeʼmo lapakaemo hutapaeʼmo, Gotiʼa lagaefeʼmo keya aeno ge huʼniye. He, lekana paino lateteno keya aeno ge huʼniye, hutapa ageta aeto hisayafeʼmo lapayamukiki hiyo. Lapakaemo muki mani kavaʼmo nehisayana alagi asagautapa oʼaigayanagi hiyo.

¹¹ Gotiʼa ani kavatetiʼmo lusi kava huno lapa maeno lapamiteno kitamo yakino lapatesigetapa Ala kava netimo lagufamo alino katino nelateya vekatimo Yesu Kalaisiʼa yagaino apatesiya koteʼmo hanege hanege huno hanesiya koteʼmo uta haitapa maigae.

¹² Inagi mani avoʼmo nekaova gemo afitetapa ani gelefeʼmo lokiya vaitapa maiʼnayaʼmonanafa aliʼna he tiʼna lapatesugetapa mani geeʼmo halate lapakesamo afisayafeʼmo afaʼa oʼmaigufa alagepa huʼna gemo lapa paiguve.

¹³ He, nagesamo afiʼnovana kanale kavanageʼna muki afinaʼmo ofaliʼna seli noʼnifiʼmo afaʼa maiʼneʼnaeʼmo aliʼna he tiʼna lapatesugetapa halate lapakesamo afisayafeʼmo mani gemo avoʼmo kaeʼna lapa nepauve.

¹⁴ Ala kava netimoʼmo falisuva kavaʼmo alino nave liʼnigeʼna ageʼnovanageʼna aise afinaʼmo utesigeʼna seli noʼnimo ataleʼna uguve.

¹⁵ Ani kavaʼmo huʼna falitesugetapaeʼmo halate mani geeʼmo lapakesamo afisayafeʼmo nayamukiki huʼna aliʼyaʼmo neʼaluve.

¹⁶ Lagaemo alagepa huta lagesamo afiteta alo huʼnona kaitene geletiʼmo humi lapatesiya agufa gemo lapa opaiʼnopa lagaemo laulagafatiʼmo ala agiʼaʼe himamuʼaʼeʼmo agetetaeʼmo, Ala kava netimo Yesu Kalaisiʼa himamuʼaletiʼmo afole aiʼniyanageno eminegaiye, huta lapa paiʼnone.

¹⁷ Gotiʼa afoʼamoʼmo ala agiʼaʼe ha le konali yaʼaʼeʼmo amiʼnigeta ageʼnone. Ha le konali kokuʼnapiʼmo maiʼniya vekamoʼmo ani yaʼmo alino amitenoʼaeʼmo, Mani vekaeʼmo nahau nayamopafiʼmo neʼnahaiya mafaʼneʼnimo maiʼniye. Nagaemo lusi kava huʼna amuse huʼna neʼatove, huno huʼniye.

¹⁸ Lagaitigeʼmo aote avefiʼmo agaeʼeʼmo uta haita magokepi lokaeta maiʼnonagenoʼaeʼmo kokuʼnapatiʼmo ge huʼnigeta afiʼnone.

¹⁹ Akeyaʼvilagamo Gotitegati gemo alini eʼa aeʼa hakalo huʼa hapa nepaiya vayaʼmogi ge huʼnageno afole aiʼniya geʼeʼmo haneʼniye. Kanalenagi mani gemo alagepa hutapa afiyo. Mani gemoʼa hanipiʼmo aeno ha neleya kanikana huno aeno ha leme ha leme neʼvigeno ko netigenoʼaeʼmo aeno ha neleya kanefikana huno lapaipafiʼmo aeno ha legaiye.

²⁰ Goti gemo aepaʼamo vayaʼai apaipafatiʼmo afaʼa afole noʼaiye, hutapa hogoteta alagepa huta lapakesamo afiyo.

²¹ Na kava higeʼapaene. Goti geʼamo vayaʼmogi hapauʼniya kavatetiʼmo vayaʼai apaipafatiʼmo afole noʼaiyaʼmonanafa Goti Aunemeʼamokeʼmo apaote vayaʼmo kaʼmo alino apaveliʼnigeʼapaekeʼmo Goti geʼamo aeʼa hakalo huʼa hapa paiʼnae.