2 Kolitiyani 9 - The Keyagana NT and 25 OT books

¹ Lapakaemo Yuta kotega maiʼnaya apaote vayaʼaina hapa maesaya ofalini monieʼmo avoʼmo kaesuva aliʼyaʼnimo ohaneʼniye.

² Nagaemo afiʼnovana afaʼa apamigune, hutapa huʼnaya gemo Masetoniya kotega siosiʼale siosiʼaleʼmo maiʼnaya vayaʼai apaulagaleʼmo lapakitapileʼmo aliʼna asaga huʼna lapateteʼnaeʼmo, Akaiya kotega siosiʼale siosiʼaleʼmo maiʼnaya vayaʼmogimo afe kafugafiʼmo alo huʼa maiʼnae, huʼna hapa paiʼnove. Asole vayaʼmogimo lapayamukiki nehaya kavafeʼmo lapava gemo afiteʼapaeʼmo he tiʼa ani kavaʼmo huʼa aliʼyaʼmo aliʼnae.

³ Ani gemo huvaʼmonanafa lapakitapileʼmo alita asaga huta lapatetetaeʼmo, ago alo huʼa maiʼnae, huta hapa paiʼnona gemo aigofe gemo ohaneʼnisigetapa alo hisayafeʼmo mani konagatimogimo aliʼna apateʼnogeʼa lapakaetegamo uʼnae.

⁴ Fiku yanageʼa Masetoniya vayaʼmogi nagaeʼeʼmo lokaeʼa uʼa lapaketeʼapaeʼmo, alo huʼa oʼmaiʼnae, huʼa hisagenoʼaeʼmo lavagage hugiye. He, lavagage hisigenoʼaeʼmo lapakaeʼeʼmo lapavagage hugiye.

⁵ Hugiyaʼmofeʼmo nagesamo afiʼnaeʼmo kanalenageʼna konagatimogifeʼmo hapa paisugeʼa hogoteʼa lapakaetegamo ugae. Uteʼapaeʼmo apamigune, hutapa huʼnaya ofalini monimo alo hutapa maigae. Hiyo, huta osugunanagi lapakaitapimo lapauʼnisigetapa hugae.

⁶ Ani geeʼmo huʼnaeʼmo, aise avina yaʼmo nehakalaya vayaʼmogimo aise neʼyaʼmo aligae. Asole avina yaʼmo nehakalaya vayaʼmogimo asole neʼyaʼmo aligae, huʼna lapa nepauve.

⁷ Aligayaʼmofeʼmo mukiʼamogitapamo lapamete lapamete hutapa lapaipafiʼmo lapakesamo afitetapaeʼmo, ani agufa monimo ofalini hugune, hutetapa ani kava hutapa hiyo. Fiku yanageno lapaipamoʼmo kana huʼnisigetapa huge lagaemofi mago vayaʼmogimofi huta lokiya gemo hisunagetapa huge hugayanagi lapamogaga aiʼnetapaekeʼmo hiyo. Gotiʼa apamogaga aiʼneʼa ofalini nehaya vayaʼaifeʼmo hau ayamopafiʼmo hauʼniyaʼmofeʼmae.

⁸ Gotiʼa magoʼe huno fikumo lapa maeno lapamisigeno muki afinaʼmo muki yatapimo magoʼe huno havai teʼnisigetapa muki alagepa aliʼyaʼmo afaʼa aligae.

⁹ Ani kavafeʼmo Goti mukufiʼmo avoʼmo kae maleʼniya gemoʼa hunoʼaeʼmo, Ani fatago vekamoʼmo kagemi yaʼamo alino fako huno kagemi yaʼapimo ohaneʼniya vayaʼaina apamiʼniye. Fatago kavaʼamoʼmo muki afinaʼmo hanege hanege huno hanegaiye, huno hu maleʼniye.

¹⁰ Avina yaʼmo nehakalaya vayaʼmo avina yaʼmo hakalesayafeʼmo apamige neʼyaʼmo neʼnaya vayaʼmo neʼyaʼmo nesayafeʼmo apamige nehiya vekamoʼmo avina yaʼmo lapamisigetapa hakalesaya avina yafeʼmo hago, huno hisigeno hagesigetapa fatago kavatapiletiʼmo magoʼe magoʼe hutapa aligae.

¹¹ Gotiʼa afaʼa apamisagenoʼaeʼmo magoʼe huno lapamisigetapa hisaya ofalini monimo alinituta apamisuna kavatiletiʼmo Gotifeʼmo hao ke hegae.

¹² Ani aliʼyaʼmo alitetapaeʼmo apaote vayaʼmo kafu huʼnaya vayaʼaina hapa maesaya kavaʼageʼmo afole oʼaigifa havai teteno aino vali nelamiya kava huno Goti agiʼaleʼmo aliʼa asaga hisaya kavaʼeʼmo magoʼe magoʼe huno afole aigiye.

¹³ Lapakaemo hapa maetapa apamitetapaeʼmo, Kalaisifeʼmo alagepa faigoko geʼaeʼmo lagesamo afita fatago nehune, hutapa alita apave lisageʼa ageteʼapaeʼmo, he lama gemo nehae, huteʼa, Kolitiyani vayaʼmogimo Goti geʼamo akame huteʼa lagaeʼe muki vayaʼeʼmo magoke agufa apaipa apakesafatiʼmo afalu afalugana kavaʼmo nehae, huʼa huteʼa Goti agiʼaleʼmo aliʼa asaga huʼa ategae.

¹⁴ Gotiʼa lusi kava huno fikumo lapa maeno lapamiʼniyaʼmofeʼmo lapakaefeʼmo hapau apayamopafiʼmo hapauʼninageʼa nunumu huʼa lapategae.

¹⁵ Gotiʼa lusi kava huno fikumo laha maeno lamiʼniya kavatefeʼmo uta haita ohapaiʼneta lavayaʼaletikeʼmo afa gemo osugunaʼmonanafa Gotifekeʼmo hao ke hegetao.