2 Kolitiyani 8 - The Keyagana NT and 25 OT books

Monimo ofalini hisaya kavafeʼmo huʼniya gemae

¹ Konagatimogitapae, huta, Gotiʼa Masetoniya kotega siosiʼale siosiʼaleʼmo maiʼnaya vayaʼaina fikumo hapa maeno apamiʼniya kavafeʼmo ava gemo afisayafeʼmo lahauʼniye.

² Alopa hanageke yaʼmoʼa apamalageka huʼnigeʼapaeʼmo lusi kava huʼa kafu huʼnayaʼmonanafa magoʼe huʼa apamogaga aiteʼapaeʼmo alopa monimo ofalinimo huʼnae.

^3-4 Hapa maesiya gemo huʼnaeʼmo, ofalinimo hisaya himamuʼapimo haneʼniya agufa kava huʼa huʼnae. He, ofalinimo hisaya himamuʼapimo magoʼe huʼa aeʼa agaseʼa huʼnae. Apakaiʼapimo huʼapaeʼmo, Lapao ke hone, huʼa, apaote vayaʼmo konaga kavaʼmo huta hapa maeta apamisuna monimo ofalini hugesune, huʼa huteʼa alisunafeʼmo ge huʼnae.

⁵ Ofaliniʼageʼmo hisayafeʼmo huʼnae, huta lagesamo afiʼnonaʼmonanafa hogoteʼa Gotiʼa hauʼniya kavaʼmo huʼa apakaiʼapi apakufamo Ala kava neʼmo amiteʼa ofalini monimo lamiʼnae.

⁶ Lamiʼnayaʼmofeʼmo Taitasiʼa lapakaetegamo uno fikumo hapa maesaya ofalinimo hisaya aliʼyaʼmo aepa faiʼniya vekaeʼmo, uka ani aliʼyaʼmo alime alime uka alika hano huvo, huta ha paiʼnone.

⁷ Lapakaemo muki alagepa kavaʼmo nehutapaeʼmo Gotifekeʼmo lapakesa afita fatago huge alagepa hutapa aeta hakalo huge alagepa hutapa afita aeto huge lapayamukiki huge lagaefeʼmo lapau lapayamopafiʼmo lapauge nehutapaeʼmo ani alagepa ofalinimo hisaya aliʼyaʼeʼmo aliyo.

⁸ Nagaemo mani kavaʼmo hiyo, huʼna osuʼnovaʼmonanafa mago vayaʼmogi apayamukiki huʼnaya kavatetiʼmo lama ge hutapa lapau lapayamopafiʼmo nelapaiya kavafeʼmo lapamalageka huʼna ge huʼna lapafi nekove.

⁹ Ala kava netimo Yesu Kalaisiʼa fikumo lapa maeno lapamiʼniya kavafeʼmo ava gemo ago afiʼnae. Hogoteno yahauve vekamo maiʼniyaʼmonanafa lapakaemo yahauve vayaʼmo maisayafeʼmo kagemi yaʼamo oʼhaneʼniya vekamo hamaleʼniye.

¹⁰ Nagae naipa nagesamo lapa paigesuve. Afe kafugamo ani aliʼyaʼmo aligune, hutetapa aepa faitapa aliʼnaya aliʼyaʼmo hemenimo alita hano hisayaʼmoʼmo alagepa huno lapa maegaiye.

¹¹ Hugune, hutapa lapayamukiki huʼnaya kava hutapa maleʼnisaya yapatiʼmo hutapa hano hisayafeʼmo lapayamukiki hiyo.

¹² Lapakaemo hogoteno lapauʼnisiyaʼmoʼmo maleʼnisaya yapatiʼmo alita fako hutapa magoke aiyaya hutapa hisagenoʼaeʼmo Gotiʼa haugiye. Gotiʼa moniʼapimo ohanesigeʼa ofalinimo osisaya vayaʼaifeʼmo ofalinimo hiyo, huno afaʼa osugiye.

^13-14 Lapakaemo kana yaʼmo alisageʼa mago vayaʼamo afaʼa maisayafeʼmo mani gemo nosufa mukiʼamo lapakaeʼe apakaeʼeʼmo magoke agufa alagepa kavaʼmo hutapa maisaya agufa gemo nehuve. Lapakaemo ani afinatetiʼmo alopa yaʼmo maleʼnayaʼmofeʼmo kafu huʼnisaya vayaʼaina hapa maetapa apamisaya kavaʼmo haneʼniye. Henagaʼamo lapakaemo kafu nehisageʼapaeʼmo lapa maeʼa lapamigayaʼmofeʼmae. Ani kavaʼmo hisageʼapaeʼmo kafu osuʼa alagepa huʼa lapakaeʼeʼmo magokepi lokaeʼa maigae.

¹⁵ Goti mukufiʼmo avoʼmo kae maleʼniya gemoʼmo hunoʼaeʼmo, Asole yaʼmo alino anupa hu maleʼnisiya vekamo yaʼmoʼa aliʼyaʼamo haneʼniya yaʼmo haneʼniye. Aise yaʼmo alino anupa hu maleʼnisiya vekamoʼmo kafu osuʼniye, huno huʼniye.

Taitasiʼa Kolitiyani taonifiʼmo uʼniya gemae

¹⁶ Nagaemo lapa maesuvafeʼmo lusi kava huʼna nagesamo neʼafuva kava huno Taitasiʼeʼmo lapa maesiyafeʼmo agesamo neʼafiye. Gotiʼa Taitasi aipafiʼmo agesamo afiʼniya kavaʼmo amiʼniyaʼmofeʼmo Gotifeʼmo hao ke nehove.

¹⁷ Taitasifeʼmo lagaemo ha paiʼnona gegeʼmo oʼafiʼniyaʼmonanafa magoʼe huno ayamukiki huno agaiʼamo hauʼnigeno lapakaetegamo uʼniye.

¹⁸ Mago avagi hisiya vekamo konagatimoʼeʼmo alita anateʼnonageʼana uʼnaʼae. Ani konagatimoʼa alagepa faigoko gemo aeno hakalo huno hapa nepaiya kavatetiʼmo muki siosiʼale siosiʼaleʼmo maiʼnaya vayaʼmogimo ala agiʼamo amiʼnae.

¹⁹ Lagaeʼeʼmo magokepi lokaeno visiyafeʼmo siosiʼale siosiʼaleʼmo maiʼnaya vayaʼmogimo lekana paiʼa ateʼnae. Hapa maesayafeʼmo lapauʼniya kavaʼmo alita apave lisunageʼa ageteʼa Ala kava neʼmo agiʼaleʼmo aliʼa asaga huʼa atesayafeʼmo ofalini monimo magokepi alinita ugune.

²⁰ Mago vayaʼamogimo alopa monimo alinituta apamisuna kavatefeʼmo vaiʼmo olamisayafeʼmae.

²¹ Ala kava neʼmo aulagalegeʼmo alagepa kavaʼmo osugunaʼmonanafa muki vayaʼai apaulagaleʼeʼmo alagepa kavaʼmo hugesune.

²² Lagaemo mago alu konagatimoʼa anakaeʼeʼmo alita lokaeta apateʼnonageʼa uʼnae. Lagaemo muki afinaʼmo amalageka huta ateʼnonagenoʼaeʼmo laha maesiyafeʼmo muki afinaʼmo ayamukiki huʼniye. Agaemo lapakaefeʼmo alagepa kavaʼmo hugae, huno lusi kava huno agesamo afiʼniyaʼmofeʼmo magoʼe huno ayamukiki huno uʼniye.

²³ Mago vayaʼmogi Taitasifeʼmo ge huʼa afigesayaʼmoʼmo, magoke agufa aliʼyaʼmo neʼaluʼaʼmofeʼmo nafaluʼnimoʼmo maiʼnigetaʼa nagaeʼeʼmo magokepi lokaetaʼa aliʼyaʼmo neʼaluʼae. Agaeʼeʼmo lokaeʼana uʼnaʼa konagatilaʼmoganifeʼmo ge huʼa anafi gesayaʼmoʼmo, siosiʼale siosiʼaleʼmo maiʼnaya vayaʼmogimo aliʼa anatageʼana uʼnaʼa apa vekalaʼmo maiʼnaʼae. Kalaisiʼa anakaetetiʼmo ala agiʼamo neʼaliye.

²⁴ Apakaefeʼmo lapau lapayamopafiʼmo lapauʼniya kavatapimo alita apave ligeʼapao na agufa kava nehagetaeʼmo lapakitapileʼmo alita asaga nehupigeʼa apakaemo muki siosiʼale siosiʼaleʼmo maiʼnaya vayaʼmogimo lapakeyo.