2 Kolitiyani 7 - The Keyagana NT and 25 OT books

¹ Nahau nayamopafiʼmo nahauʼniya vayaʼnimogitapae, huʼna, Gotiʼa ani kavaʼmo huguve, huno hu maleʼniya gemo ago afiʼnonaʼmofeʼmo lagaitimo muki hosu kavatimo lagufaleʼe laipa lagesafiʼeʼmo oʼaniʼya faiʼniya yakana huno haneʼniya kavaʼmo aeta kalo paeta atalegetao. Gotifeʼmo koli nehutaeʼmo aote kavaʼmo agetetaeʼmo alagi hume hume utah haita hapaigetao.

Poloʼa amogaga aiʼniya kavafeʼmo huʼniya gemae

² Lapakaemo lapaipa lapakesamo lamiyo. Mago vayaʼaitegamo hosu kavaʼmo osuʼnone. Mago vayaʼmo alita hosu huta oʼapateʼnone. Aigofe gemo huteta mago vayaʼai kagemi yaʼapimo kumayaʼmo oʼaliʼnone.

³ Lapakaepiʼmo aliʼna faiʼna lapatesuvafeʼmo mani gemo nehufiye. Haʼao, hogoteʼna huʼnaeʼmo, lapakaemo falisayana lapakaeʼeʼmo magokepiʼmo faligune. Afaʼa maisayana ani kava huta lapakaeʼeʼmo magokepiʼmo afaʼa maigune, huʼna huʼnove.

⁴ Lapakaemo alagepa kavaʼmo hugae, huʼna lokiya nagesamo afiteʼnaeʼmo huʼna ha leʼna lapa nepauve. Lusi kava huʼna namogaga aiʼna nelapateʼnaeʼmo lapava gemo huʼna hapa nepauve. Naipamoʼmo falu huʼniya kavaʼnimoʼmo havai teʼniye. Alopa hanageke yaʼmo aliʼnetaeʼmo nagaemo lusi kava huʼna namogaga neʼauve.

⁵ Lagaemo Masetoniya kotegamo eta maiʼnetaeʼmo maita haga oleʼnone. Hanageke yaʼmoʼa faino ku aino lateʼnigeʼapaeʼmo amega lagufaleʼmo kame huʼa nelatagetaeʼmo yuʼilaga laipafiʼmo koli huʼnone.

⁶ Huʼnonaʼmonanafa Gotiʼa apaipamoʼmo kana nehiya vayaʼai apaipamo alino falu nehiya vekamoʼmo Taitasiʼa alino ateʼnigeno halate lagaetegamo eʼniya kavatetiʼmo laipamo alino falu huʼniye.

⁷ Eʼniya kavafekeʼmo laipamoʼmo falu osuʼniyaʼmonanafa Taitasiʼa lapakaefeʼmo aipamoʼmo falu huʼniya kava huno laipamoʼmo falu huʼniye. Agaemo hunoʼaeʼmo, apakaemo lagesayafeʼmo lusi kava huno hapauʼnigeʼa yulagefa neʼaiye. Kagaetefeʼmo apayamukiki nehae, huno laha paiʼnigeʼnaeʼmo magoʼe huʼna namogaga aiʼnove.

⁸ Avoʼmo kaeʼna ataleʼnogetapa alita lekana paita afitetapaeʼmo lapaipamoʼmo kana huʼniyaʼmonanafa ani kavafeʼmo nahau osuʼnove. Hemenimo nahau osuʼnovaʼmonanafa hogoteʼna nahau huʼnove. Afiʼnovana ani avoʼmo alita lekana paita afitetapaeʼmo lapaipamoʼmo kana huʼniyaʼmonanafa aise afinaʼmo lapaipamoʼmo kana huʼniye.

⁹ Lapaipamoʼmo kana huʼniyaʼmofeʼmo namogaga oʼaiʼnofa lapaipamoʼmo kana huʼnigetapa lapaipamo alitapa afe leʼnaya kavafeʼmo hemenimo namogaga neʼauve. Lapakaemo getiletiʼmo alagepa hutapa oʼmaisayafeʼmo Gotiʼa hauʼniya kavatefeʼmo lapaipamoʼmo kana huʼniye.

¹⁰ Gotitefeʼmo apaipamoʼmo kana huʼniya kavaʼmoʼa vayaʼai apaipafiʼmo hapau osisaya kavaʼmoʼa aliʼyaʼmoʼaliʼnigenoʼaeʼmo Gotiʼa apakufamo alino katino neʼapate. Ma mopafi vayaʼmogi apaipamoʼmo kana nehiya kavaʼapimoʼa nefaliya kavaʼmo alino afole aino neʼate.

¹¹ Afiyo, huʼna, Gotiʼa hauʼniya agufa lapaipa kana huʼniya kavaʼmoʼa lapaipafiʼmo malage huno aliʼyaʼmo aliʼnigetapaeʼmo lapakaemo huʼnaya kavafeʼmo he titapa ava ge hutetapa lapakaitapieʼmo ge lapautetapa koli lapaipamo kaliʼnigetapaeʼmo hosu kavatapimo alitapa atalesayafeʼmo lusi kava huno lapauʼnigetapa lapayamukiki hutapa kayoʼmo amisayafeʼmo huʼnae. Alu alagepa kava alu alagepa kavaʼmo nehutapaeʼmo alagi alagepa hutapa alita api aita ateʼnae.

¹² Avoʼmo kaeʼnovaʼmonanafa hosu kavaʼmo huʼniya vekaeʼmo nagesamo alaʼamo oʼafige apakaetegamo hosu kavaʼmo huʼniya vekalegaeʼmo nagesa alaʼamo oʼafige huteʼnaeʼmo avoʼmo kaeʼnove. Goti aulagaleʼmo lapakaefeʼmo lagesamo afiʼnetaeʼmo yagaita nelapatona kavaʼmo aliʼna lapave lisugetapa agesayafeʼmo mani avoʼmo kaeʼnove.

¹³ Ani kavatefeʼmo laipamoʼmo falu hutapa lateʼnageta Taitasiʼa amogaga aiʼniya kavafeʼmo lusi kava huta lamogaga aiʼnone. Lapakaemo aipamo alita falu huʼnayaʼmofeʼmo amogaga aiʼniye.

¹⁴ Nagaemo Taitasifeʼmo lapakitapileʼmo aliʼna asaga huʼna lapateʼnova gelefeʼmo navagage nosiye. Lapa paiʼnona gemo lama gemo haneʼniya kava huno Taitasifeʼmo lapakitapileʼmo alita asaga huta lapateʼnona gemo afole yategamo afole aiʼnigeno lama gemo haneʼniye.

¹⁵ Taitasiʼa koli hutetapa atete nehutapaeʼmo lapayaʼmo amitetapa geʼamo afiʼnaya kavafeʼmo agesamo afino ho hutenoʼaeʼmo lapakaefeʼmo magoʼe huno hau ayamopafiʼmo hauʼniye.

¹⁶ Nagaemo lapakaefeʼmo huʼnaeʼmo, muki alagepa kavaʼamo afaʼa hugae, huʼna nagesamo neʼafuvaʼmofeʼmo namogaga neʼauve.