2 Kolitiyani 6 - The Keyagana NT and 25 OT books

¹ Lagaemo Gotiʼeʼmo magokepi lokaeta aliʼyaʼamo neʼaluna vayaʼmogitamo hutaeʼmo, Gotiʼa fikumo hapa maeno neʼapamiya kavaʼamo fikumo oʼalitapa agetapa alagepa huʼnetapageʼmo aliyo, huta ge huta nelapatone.

² Ani kavatefeʼmo hunoʼaeʼmo, Fikumo hapa maeʼna neʼapamuva afinaʼmo gekamo afiʼnove. Apakufamo aliʼna katiʼna neʼapatova afinaʼmo kaha maeʼnove, huno huʼniye. Afiyo, huʼna, hemenimo vayaʼmo fikumo hapa maeno neʼapamiya afinaʼmo haneʼniye. Afiyo, huʼna, hemenimo vayaʼai apakufamo alino katino neʼapateya afinaʼmo haneʼniye.

³ Aliʼyatieʼmo huʼa faipa huʼa olatesayafeʼmo vayaʼai apaiyafiʼmo hapaesiya yaʼmo noʼmalonaʼmonanafa

⁴ Goti aliʼyaʼamo alagepa huʼa neʼaliye, huʼa lagesayafeʼmo alu alagepa kava alu alagepa kavaʼmo nehune. Lagaemo oʼataleta atafauta alagi huta maige hanageke yaʼmo alige kafu huge kana yaʼmo alige nehune.

⁵ Vayaʼmogi lamagige kalavusi huʼa latege apano aeteʼa apavamusa gemoʼmo huge huʼnae. Lokiya aliʼyaʼmo aliʼnonageno alagaʼmo lahaege lau okalege neʼyaʼmo oʼnege huʼnone.

⁶ Aʼne anagaʼaitegamo lokiya yaveyave kavaʼmo huge afiteta ageta aeto huge yuna laipamo kalige falu laipamo kalige alita lao yaʼmo huge Aote Aunemeʼaleti kavaʼmo huge laipafatiʼmo lahau layamopafiʼmo lahauge huta maiʼnone.

⁷ Lama gemo huge Goti himamuʼaletiʼmo huge huta alagepa kavaʼmo huʼnone. Fatago kavatetiʼmo kame hisuna yaʼmo lamaga layapiʼmo alige hoga layapiʼmo alige huʼnone.

⁸ Mago vayaʼmogi lagitileʼmo aliʼa afepi nelatae. Mago vayaʼamogi huʼa faipa huʼa nelatageʼa mago vayaʼamogi ala lagitimo nelamiye. Mago vayaʼmogi huʼapaeʼmo, apakesamo nefaiya vayaʼmo maiʼnae, huʼa nehayaʼmonanafa lama ge vayaʼmo maiʼnone.

⁹ Ina agufa vayaʼmo maiʼnae, huʼa huteʼa nolagayaʼmonanafa Gotiʼa lageʼniye. Falisuna agufa kavaʼmo nehutaeʼmo lageyo, huta afaʼa maiʼnone. Lamagiʼnayaʼmonanafa alagi kamiti olamagiʼnae.

¹⁰ Laipamoʼmo kana nehiyaʼmonanafa muki afinaʼmo lamogaga neʼaune. Kagemi yatimo ohaneʼniya vayaʼmo maiʼnonaʼmonanafa alopa kagemi yaʼmo apamiʼnonageʼapaeʼmo alopa kagemi yaʼapimo haneʼniya vayaʼmo nehamalae. Ma mopafi yaʼmo oʼaliʼnonaʼmonanafa muki yaʼamo aliʼnone.

¹¹ O Kolitiyani vayaʼmogitapae, huta, muki lagesamo afiʼnona geʼamo huta afole aita lapa paiʼnone. Laipa lagesafiʼmo lahauʼniya kavaʼmo magoʼe huta lapamiʼnone.

¹² Laipamo atafauta oʼateta lapamiʼnonaʼmonanafa lapaipamo olamitapa atafautapa ateʼnae.

¹³ Mafaʼneʼnimogitapaeʼmo, huʼna, lapakaeʼeʼmo anonatilefeʼmo lapaipamo lamiyo.

Goti mono noʼamo maiʼnae, huno huʼniya gemae

¹⁴ Alu anagufaʼe alu anagufaʼe afulaʼmo magokepi lokaeʼana aliʼyaʼmo alisaʼafeʼmo yosaletiʼmo kiʼa anatafauʼana noʼanatae. Noʼanataya kava hutapa apakesamo afiʼa fatago osuʼnaya vayaʼeʼmo magokepi lokaeta aliʼyaʼmo oʼaliyo. Haiya kava huʼana alagepa kavaʼe hosu kavaʼeʼmo afalu afalugana huʼana magokepi lokaeʼana hanegaʼae. Haiya kava huʼana ha le yaʼe hani yaʼeʼmo afalu afalu huʼana magokepi lokaeʼana hanegaʼae.

¹⁵ Kalaisiʼe Sataniʼeʼmo magoke anaipa kaliʼana neʼmaiʼafiye. Haʼao. Apakesamo afiʼa fatago nehaya vayaʼai kavaʼapimo alu kavaʼmo haneʼnigeno apakesamo afiʼa fatago osuʼnaya vayaʼai kavaʼapimo alu kavaʼmo haneʼniyaʼmofeʼmo magoke hetamafatiʼmo oʼaligune.

¹⁶ Haiya kava huʼa alo nehaya aigofe gotiʼapimogi Goti aote ha le mono nopiʼmo hanegae. Alu ya alu yaʼmo haneʼnayaʼmofeʼmo ohanegae. Lagaemo afaʼa neʼmaiya Goti aote ha le mono noʼamo maiʼnonaʼmofeʼmae. Gotiʼa ani kavatefeʼmo hunoʼaeʼmo, Nagaemo apakaepiʼmo maiʼneʼna apakae folagapiʼmo umenitata huguve. Gotiʼapimoʼnamo maisugeʼa vayaʼnimo maigae, huno huʼniye.

¹⁷ Huʼniyaʼmofeʼmo Ala kava neʼmoʼa hunoʼaeʼmo, Apakae folagapatiʼmo apataletapa uta lapaote maiyo. Hosu yateʼmo ame oʼaliʼnigeʼnao lapavalegauve.

¹⁸ Afotapimoʼnamo maisugetapa mafaʼne aʼmafaʼneʼnimo maigae, huno Ala kava neʼmo ayamufaʼage vekamoʼmo ani gemo hu maleʼniye, huno huʼniye.