2 Kolitiyani 5 - The Keyagana NT and 25 OT books

¹ Ago afiʼnonana ma mopafi seli notimo atalagausiyaʼmoʼmo oʼatalagauno afaʼa hanege hanege huno hanesiya notimo kokuʼnapiʼmo haneʼniyaʼmofeʼmo laipamoʼmo kana osuʼniye. Vayaʼmogimo notimo apayatetiʼmo okiʼnayaʼmonanafa Gotiʼa ki maleʼniye.

² Seli notifiʼmo maiʼneta kage kage nehutaeʼmo kokuʼnapi notimo alita akalo huta vaisunafeʼmo lusi kava huno lahauʼniye.

³ Kukena yaʼamo ago alita vaiʼnisunaʼmoʼmo falisunageno Gotiʼa lagetenoʼaeʼmo, lapakufaʼalagaʼageʼmo maiʼnae, huno laha opaisigeta saufa kukenamo alita vaigune.

⁴ Lagaemo seli notifiʼmo maiʼnetaeʼmo lusi kava huta kana yaʼmo aliʼneta kage kage nehune. Kukenatimo asagita atalesunafeʼmo lagesamo oʼafita saufa kukenamo alita akalo huta vaisunageno maige maige huta maisuna kavatimoʼmo falisuna kavaʼmo alino hano huno atalesiyafeʼmo lahauʼniye.

⁵ Ani kavaʼmo huta maisunafeʼmo alo huno lateʼniya vekamo Gotiʼa maiʼniye. Agaemo lamisiya yapatiʼmo Aunemeʼamo ago alino lamiʼniyaʼmofeʼmo muki yaʼamo alagi lamigiye, huta ago afiʼnone.

⁶ Lamiʼniyaʼmofeʼmo koli osuta lokiya vaita maiʼnone. Ago afiʼnonana lagufafiʼmo maiʼnetaeʼmo Ala kava neʼeʼmo oʼmaiʼnone.

⁷ Hemenimo oʼageʼnonaʼmonanafa agaefeʼmo lagesamo afita fatago nehutaeʼmo ma mopafiʼmo maiʼnone.

⁸ Lagufaʼamo ataleta uta haita Ala kava neʼeʼmo maisunafeʼmo koli osuta he, kanalene, huta nehune.

⁹ Lagufafiʼmo maiʼnopi ataleta visupi nehutaeʼmo amuse huno latesiyafeʼmo aliʼyaʼamo neʼalune.

¹⁰ Kalaisiʼa siyaʼaleʼmo fai maiʼnenoʼaeʼmo kavatimo alino fako huno latesiya afinaʼmo mukiʼamogita uta haita aulagaleʼmo he tita maigune. Lagufafiʼmo maiʼnetaeʼmo alagepa kavaʼmo huʼnisupi hosu kavaʼmo huʼnisupigeta mukiʼamogitamo lamete lamete huta miyatimo aligune.

Poloʼa alino nanu aeno neʼapateya aliʼyafeʼmo huʼniya gemae

¹¹ Ala kava nefeʼmo koli nehutaeʼmo lagaefeʼmo alagi lama gemo nehae, huʼa apakesamo afiʼa fatago hisayafeʼmo apakesamo alita hapa nepaune. Gotiʼa laipafiʼmo ago agetenoʼaeʼmo, alagi lama gemo nehae, huno nehigetapaeʼmo lapaipafatiʼmo, alagi lama gemo nehae, hutapa nehafi huta lagesamo afitetaeʼmo, nehae, huta nehune.

¹² Halate hutaeʼmo, alagepa aliʼyaʼmo neʼalune, huta lagitileʼmo alita asaga huta atesunafeʼmo nosupa lapamogaga aita latesayafeʼmo mani gemo nehune. Lapakaemo apaipafiʼmo haneʼniya kavafeʼmo apamogaga oʼaiʼa amega apakufaleʼmo nehaneya kavafeʼmo apamogaga neʼaiya vayaʼai geʼapileʼmo afaʼa aeta atagaina hutapa hapa paisayafeʼmo mani gemo nehune.

¹³ Vayaʼai apaulagaleʼmo negi kavaʼmo nehisunana Gotitefeʼmo nehugune. Api kavaʼmo nehisunana lapakaetefeʼmo nehugune.

¹⁴ Kalaisiʼa lagaefeʼmo hau ayamopafiʼmo hauʼniya kavaʼamoʼa heno lavayu hulinuno nelate. Mani kavatefeʼmo alita fako huta lagesamo afiʼnonana magoke vekamoʼmo muki vayaʼaitefeʼmo falino apateʼniyaʼmofeʼmo mukiʼamogi agaeʼeʼmo faliʼnae.

¹⁵ Faliʼnayaʼmonanafa afaʼa maiʼnaya vayaʼmo apakaiʼapi hapauʼniya kavaʼmo magoʼe huʼa osuʼa faliteno he tiʼniya vekalefeʼmo muki kavaʼmo hisayafeʼmo ani muki vayaʼaitefeʼmo falino apateʼniye.

¹⁶ Lagaemo magoʼe huta ma mopafi vayakana huta vayaʼmogi kavaʼapimo alita fako huta noʼapatone. Lagaemo hogoteta Kalaisiʼa ma mopafi vekagana huta ageʼnonaʼmonanafa hemenimo magoʼe huta ma mopafi vekagana huta oʼagegaune.

¹⁷ Gotiʼa ina lagimo Kalaisipiʼmo maiʼnisafi ago saufa vayaʼmo alo huno apateʼniye. Afiyo, huʼna, atafa kavaʼapimo ago hano huʼnigenoʼaeʼmo muki saufa kavaʼapimo afole aiʼniye.

¹⁸ Muki ani kavaʼmo afoʼamoʼmo Gotiʼa maiʼniye. Agaemo Yesu Kalaisitetiʼmo agaiʼaʼeʼmo alino nanu aeno latetenoʼaeʼmo agaiʼaʼeʼmo alino nanu aeno lapateʼniye, huta hapa paisuna aliʼyaʼamo ago lamiʼniye.

¹⁹ Inagi Gotiʼa Kalaisipiʼmo alino ao yaʼmo hu maleʼniyaʼmofeʼmo hosu kavaʼapilefeʼmo vaiʼmo noʼapamiye. Agaemo alino ao yaʼmo hu maleʼniya geleʼmo alagepa huta yagaita atesunafeʼmo aliʼyaʼamo lamiʼniye.

²⁰ Ani aliʼyaʼamo lamiʼniyaʼmofeʼmo Kalaisi avayamo aliʼnonagenoʼaeʼmo Gotiʼa lavayafatiʼmo hunoʼaeʼmo, lapao ke hove, huno nehiya agufa gemo huta muki vayaʼaifeʼmo hutaeʼmo, lapao ke hone, huta Gotiʼa ago alino ao yaʼmo hu maleʼniyaʼmofeʼmo lapakaemo alita lapao yaʼmo hu maleʼnetapa agaeʼeʼmo magokepi lokaetapa maiyo, huta nehune.

²¹ Na kava higetaene. Lagaemo Kalaisipiʼmo maiʼnetaeʼmo Goti fatago kavaʼamo hamalesunafeʼmo Gotiʼa hosu kavaʼmo alagi osuʼniya vekamo alino hamaleno ateʼnigeno hosu kavaʼmo hamaleʼniye.