2 Kolitiyani 4 - The Keyagana NT and 25 OT books

¹ Gotiʼa hau huno lateteno ani aliʼyaʼmo lamiʼniyaʼmofeʼmo laipamoʼmo kana osuʼnigeta oʼatalone.

² Lagaemo lavagage osisiyafeʼmo hosu kavatimo aeta ati nokaone. Humi lapateteta Goti geʼamo alita afe leta anonale alu gemo nosune. Lagaemo Goti aulagaleʼmo lama geʼamo afole yateʼmo aeta hakalo huta hapa nepaunagenoʼaeʼmo muki vayaʼai yuʼilaga vekaʼapimoʼa hunoʼaeʼmo, lama gemo nehaya vayaʼmo maiʼnae, huno nehiye.

³ Alagepa faigoko getimo kenaletiʼmo aino ati kaeʼnisiyaʼmoʼmo Gotiʼa alino apagoʼya lagauno apatalesiya kateʼmo neʼvaya vayaʼai apaipafikeʼmo aino ati kae maleʼnigeʼa noʼagae.

⁴ Ma mopafi vayaʼmogi gotiʼapimoʼa apakesamo afiʼa fatago nosaya vayaʼai apakesamo afisaya apaulagamo alino fali kaeno apateʼnigeʼapaeʼmo afaʼa noʼagae. Kalaisiʼa Goti auneʼamo alagi maiʼniyaʼmonanafa apakaemo Kalaisi ha le konali yaʼaeʼmo alagepa faigoko geʼamoʼmo aeno ha neleya konali yaʼamo afaʼa oʼagegae.

⁵ Lagaemo lagaitieʼmo aeta hakalo nosupa Yesu Kalaisiʼa Ala kava netiekeʼmo aeta hakalo nehune. Lagaemo Yesu agiʼalefeʼmo aliʼyaʼamo neʼaluna vayatapimo maiʼnone.

⁶ Gotiʼa hani huʼniya yapifeʼmo, aeka ha lo, huno huʼniya Gotiʼa laipafifeʼmo hunoʼaeʼmo, aeka ha lo, huno huʼnigeno Goti ha le konali yaʼamo Kalaisi augosafatiʼmo aeno ha leʼnigeta ageʼnone.

Mopa samogana huta maiʼnone, huno huʼniya gemae

⁷ Vayaʼmogimo lageʼapaeʼmo, himamuʼapimo apakaemo yaʼmo ohaneʼnifa Gotitegatiʼmo aeno agaseʼniya himamuʼamo aliʼnae, huʼa hisayafeʼmo lagaemo ina agufa mopa samogana huta maiʼnonagenoʼaeʼmo ani lusi alagepa geʼamo mopa samofiʼmo maleʼniye.

⁸ Hanageke yaʼmoʼa faino ku aino lateʼniyaʼmonanafa kaʼmo afaʼa haneʼniye. Na agufa kava hugupi huta lagesamo noʼafunaʼmonanafa laipa lagesamo alagi asagauno noʼaiye.

⁹ Apaini huʼa nelatayaʼmonanafa Gotiʼa lataleno noʼviye. Lamagiʼnageta asagauta neʼaunaʼmonanafa nofalune.

¹⁰ Yesuʼa afaʼa maiʼniye, huta lagufaletiʼmo alita apave lisunafeʼmo Ala kava neʼmo Yesuʼa faliʼniya agufa kavaʼmo lagufaleʼmo alinita neʼune.

¹¹ Yesuʼa afaʼa maiʼniya himamuʼamo kasalisiya lagufaleʼmo lagesayafeʼmo afaʼa neʼmaiyategamo neʼmauna vayaʼmo Yesu agiʼalefeʼmo lamagisageta falisuna kavategamo maiʼnone.

¹² Inagi falisuna kavaʼmoʼa lagufafiʼmo aliʼyaʼmo neʼaliyaʼmonanafa Yesuʼa afaʼa maiʼniya himamuʼamoʼmo lapaipafiʼmo aliʼyaʼmo neʼaliye.

¹³ Goti mukufiʼmo avoʼmo kae maleʼniya gemoʼa hunoʼaeʼmo, Nagesamo afiʼna fatago huʼnovaʼmofeʼmo ge huʼnove, huno huʼnigeta ani magoke Auneʼaeʼmo lagesamo afita fatago nehuna kavaʼmo afoʼamoʼmo Auneʼamo aliʼnonaʼmofeʼmo lagaeʼeʼmo ge nehune.

¹⁴ Lagaemo afiʼnonana Ala kava neʼmo Yesuʼa ago alino he tino ateʼniya vekamoʼmo Yesuʼe lagaeʼeʼmo alino he tino latetenoʼaeʼmo lapakaeʼeʼmo lavalelinuno agaeʼeʼmo magokepi lokaeno latesigeta lokaeta maigune, huta afiʼnonaʼmofeʼmo ge nehune.

¹⁵ Lagaemo lapa maesunafeʼmo muki mani agufa kana yaʼmo alita neʼmaune. Gotiʼa asole vayaʼaina fikumo hapa maeno neʼapamiya kavaʼamo aino atagu faeno uneno hisigeʼa magoʼe magoʼe huʼa hao ke heteʼapaeʼmo Goti agiʼaleʼmo aliʼa asaga huʼa atesayafeʼmae.

¹⁶ Gotiʼa alino he tino lategaiyaʼmofeʼmo laipamoʼmo kana osuʼnigeta oʼataleʼnone. Afole vekatimo alino kalagu kime kime neʼviyaʼmonanafa muki afinaʼae afinaʼaeʼmo Gotiʼa yuʼilaga vekatimo alino saufa vekamo hamaleno neʼate.

¹⁷ Aise hanageke yaʼmo aise afinaʼmo neʼaluna kavaʼmoʼa alino alo huno nelateyanageta anonaʼaleʼmo lusi kava huno aeno agaseʼniya ha le konali yatimo hanege hanege huno hanesiya ha le konali yatimo aligune.

¹⁸ Lagaemo neʼagona yafeʼmo lagesamo oʼafita noʼagona yafekeʼmo lagesamo neʼafunagenoʼaeʼmo alo huno nelate. Neʼagona yaʼmo aupa afinaʼmo hanegaiyaʼmonanafa noʼagona yatimo hanege hanege huno hanegaiyamofeʼmae.