2 Kolitiyani 3 - The Keyagana NT and 25 OT books

Saufa kotalakeleʼmo aliʼyaʼmo neʼaliya vayaʼaifeʼmo huʼniya gemae

¹ Lagaemo mani geeʼmo hutaeʼmo halate alagepa aliʼyaʼmo neʼaluna vayaʼmo maiʼnone, huta lagaiti lagitileʼmo alita asaga huta nelatopiye. Mago vayaʼmogimo mono aliʼyaʼmo alisayafeʼmo alagepa mono aliʼyaʼmo neʼaliya vayaʼmo maiʼnae, huʼa avoʼmo kaeʼa apamiʼnageʼa aliniʼa neʼvae. Ani agufa avoʼmoʼa laha maesiya avoʼmo kaeta lapamisupi lapakaepatiʼmo alinituta alu vayaʼmo apamigupiye. Haʼao.

² Lapakaemo avoʼmo nekaya yakana hutapa maiʼnae. Kalaisiʼa ani avoʼmo laipafiʼmo kae maleʼnigeʼa mukiʼamogimo lapaketeʼapaeʼmo ani kava huʼa avoʼmo ageteʼa lekana nepaiye.

³ Kalaisiʼa aliʼyatiletiʼmo afole yateʼmo avoʼmo kae maleʼniye. Agaemo avoʼmo nekaya anitetiʼmo avoʼmo okaeʼnifa afaʼa neʼmaiya Goti Aunemeʼaletiʼmo avoʼmo kae maleʼniye. Latapa yafateʼmo avoʼmo okaeʼnifa malu male nehiya lapaipafiʼmo avoʼmo kae maleʼniye.

⁴ Lagaemo Kalaisitetiʼmo alino lokiya vaino lateʼnigetaeʼmo, Goti aulagaleʼmo ani alagepa aliʼyaʼmo aliʼnone, huta alita amufa neʼamune.

⁵ Himamutimo ohaneʼniyanageta lagaitimo alagepa lagesamo afaʼa oʼafigune. Goti aliʼyaʼamo alisuna himamutimo Gotitegatiʼmo afole neʼaiye.

⁶ Agaemo aliʼyaʼamo alisunafeʼmo lokiya vaino lateʼnigeta saufa kotalakeleʼmo aliʼyaʼamo neʼaluna vayaʼmo maiʼnone. Saufa kotalake gemo malaga yateʼmo avoʼmo kae maleʼniya keʼaepa gegana huno ohaneʼnifa Aunemeʼaʼe gemo yuʼilaga gemo haneʼniye. Keʼaepa gemoʼa vayaʼmo apamagigeʼa nefaliyaʼmonanafa Aunemeʼamoʼmo afaʼa maisaya yaʼmo neʼapamiye.

⁷ Vayaʼmo neʼapamagiya gemo yafateʼmo avoʼmo kae maleʼniya gemo aliʼyaʼamoʼmo ha le konali yaʼamo haneʼniye. Moseseʼa keʼaepa gemo aliʼniya afinaʼmo augosafatiʼmo aeno ha leʼnigeʼapaeʼmo Isaleli vayaʼmogimo alagi aulu haeʼa oʼageʼnayaʼmonanafa augosafatiʼmo aeno ha leʼniya yaʼamo aise aise huno hano hume hume eʼniya ha le konali yaʼamo haneʼniye.

⁸ Ani aliʼyaʼmoʼmo ha le konali yaʼamo haneʼniyaʼmonanafa Aunemeʼamoʼmo neʼaliya aliʼyaʼmo ha le konali yaʼamoʼmo magoʼe huno lusi kava huno aeno agaseʼniye.

⁹ Keʼaepa gemoʼa hunoʼaeʼmo, hosu vayaʼmo maiʼnae, huno nehiya gelefeʼmo aliʼyaʼmo neʼaliya ha le konali yaʼamo haneʼniyaʼmonanafa fatago kavaʼmo alino neʼapamiya gelefeʼmo aliʼyaʼmo neʼaliya ha le konali yaʼamoʼmo magoʼe huno lusi kava huno aeno agaseʼniye.

¹⁰ Akeyaʼvilaga aliʼyaʼmo ha le konali yaʼamo hemenimo ohaneʼniye. Magoʼe huno aeno agaseʼniya ha le konali yaʼmoʼa ago aeno ati kaeʼniyaʼmofeʼmae.

¹¹ Hano hugefe nehiya aliʼyaʼmo ha le konali yaʼamo haneʼniyana hano osuno hanege hanege huno hanesiya aliʼyaʼmo ha le konali yaʼamoʼa magoʼe huno lusi kava huno aeno agaseʼniye.

¹² Lagaemo saufa kotalake geʼaletiʼmo alagepa kavaʼmo afole aigiye, huta huteta lavayagunagu nehuta agava neʼmaunaʼmofeʼmo mago gemo fala okita muki geʼamo aeta hakalo huta hapa nepaune.

¹³ Mosese augosafatiʼmo aeno ha leʼniya yaʼmo hano hume hume eʼnigenoʼaeʼmo Isaleli vayaʼmogimo augosafiʼmo atupa afinaʼmo aulu haeʼa oʼagesayafeʼmo kenaletiʼmo aino ati kaeʼniyaʼmonanafa lagaemo mago gemo aeta ati nokaone.

¹⁴ Gotiʼa apaipa apakesamo aino akani maleʼnigeʼapaeʼmo ani kava huʼa maime maime eʼa hemenimo atafa kotalakemo lekana nepaigenoʼaeʼmo ani agufa kenamoʼmo apaipa apakesaleʼmo aino ati kaeʼniye. Gotiʼa ani agufa kenamo fikumo alino lageno oʼatalegaifa Kalaisitetikeʼmo alino lageno atalegaiye.

¹⁵ Kenamoʼmo apaipa apakesaleʼmo aino ati kaeno haneme haneme neʼegenoʼaeʼmo ani afinaʼmo Mosese gemo lekana nepaigenoʼaeʼmo ani kenamo afaʼa haneʼniye.

¹⁶ Haneʼniyaʼmonanafa mago vayaʼmo aiʼa afe leʼa Ala kava netegamo neʼagenoʼaeʼmo ani kenamo alino neʼatale.

¹⁷ Ala kava neʼmo Aunemeʼamo maiʼniyaʼmofeʼmo apaipafiʼmo aliʼyaʼmo neʼaliya vayaʼmogimo kalavusifiʼmo oʼmaiʼnafa afaʼa maiʼnae.

¹⁸ Gotiʼa laugosafatiʼmo kenamo ago alino ataleʼnigeta alaveʼyofatiʼmo laugosamo neʼagona kava huta Ala kava neʼmo ha le konali yaʼamo neʼagonagenoʼaeʼmo Ala kava neʼmo Aunemeʼamoʼmo alino hamaleno nelategetaeʼmo ha le konali yaʼamo alime alime uta Ala kava nekana huta hamaleme hamaleme neʼune.