Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Kolitiyani 2 - The Keyagana NT and 25 OT books

1 Nagaemo huʼnaeʼmo, apaipamoʼmo kana hisiyafeʼmo halate oʼuguve, huʼna naipafiʼmo ago nagesamo afiʼnove.

2 Nagaemo lapaipamoʼmo kana hisiya yaʼmo aliʼna lapamisugenoʼaeʼmo nagaemo ina lagimo namogaga aliʼa namisaya vayaʼmo maigae, lapaipamoʼmo kana hugiyaʼmofeʼmae.

3 Visugetapaeʼmo namogaga yaʼmo namisaya vayaʼmogitapamo naipamoʼmo kana hisiya yaʼmo oʼnamisayafeʼmo oʼuʼna avoʼmo kaeʼnove. Lole nagesamo oʼafiʼna lokiya vaiʼna magoke nagesamo afiʼnaeʼmo, namogaga aisuvana ani kava hutapa lapamogaga aigae.

4 Naipamoʼmo kana huteno nainagamo faiʼnigeno naunumo nelamigeʼna mani avoʼmo kaeʼnove. Lapaipamoʼmo kana hisiyafeʼmo mani avoʼmo okaeʼnovaʼmonanafa lapakaefeʼmo lusi kava huno nahau nayamopafiʼmo nahauʼniya kavaʼnimo agesayafeʼmo avoʼmo kaeʼnove.


Hosu kavaʼmo huʼniya vekaeʼmo, afa ato, hutapa ha paiyo, huno hapa paiʼniya gemae

5 Mago vayaʼamo apaipa kana yaʼmo alino apamiʼniya vekamoʼmo nagaetegamo osuʼniyana lapakaetegamo huʼniye. Aigofe gemo osisuvafeʼmo mukiʼamogitapa ani kana yaʼmo aliʼnae, huʼna osuʼnofa magoʼamogitapamo ani kana yaʼmo aliʼnae, huʼna huʼnove.

6 Asole vayaʼamogitapamo hosu kavaʼalefeʼmo anonaʼamo amiʼnaya kavaʼmo alagi amiʼnae.

7 Fiku yanageno aipamoʼmo lusi kava huno kana hisigeno atalegaiyanagi hosu kavaʼamo alita ataletetapa alita lokiya vaita ateyo.

8 Lapakaemo muki vayaʼai apaulagaleʼmo agaefeʼmo lapau lapayamopafiʼmo lapauʼniya kavatapimo alitapa ave liyo.

9 Hogoteʼna muki geʼanimo afitetapa akame hisafi, huʼna lapamalageka hisuvafeʼmo mago avoʼmo kaeʼnove.

10 Lapakaemo hosu kavaʼamo alitapa atalesageʼnaeʼmo nagaeʼeʼmo aliʼna atalegauve. Nagaetegamo hosu kavaʼmo huʼnisiyaʼmoʼmo aliʼna ataleʼnove. Lapa maesuvafeʼmo Kalaisi aulagaleʼmo hosu kavaʼamo aliʼna ataleʼnove.

11 Fiku yanageno Sataniʼa humi lateteno aeno lagasegaiye. Na agufa kavaʼmo alino afole aino atesiyafeʼmo hauʼnifi huta ageʼnone.


Poloʼa Toloasi taonifiʼmo maiʼnenoʼaeʼmo aipamoʼmo kana huʼniya gemae

12 Nagaemo Kalaisifeʼmo alagepa faigoko geʼamo aeʼna hakalo huʼna hapa paisuvafeʼmo Toloasi taonifiʼmo uʼna avaʼyi huʼnogenoʼaeʼmo Ala kava neʼmoʼa aliʼyaʼamo alisuvafeʼmo kaʼmo valino nateʼniye.

13 Nagaemo konagaʼnimoʼmo Taitasiʼa kahauya huʼna oʼageʼnovaʼmofeʼmo nahausoli huʼnigeʼnaeʼmo maitaleyo, huʼna huteʼna apataleʼna Masetoniya kotegamo uʼnove.

14 Vaehae, huʼna, Gotifeʼmo hao ke heʼnove. Gotiʼa muki afinaʼmo alagepa huno laha neʼmaegeta Kalaisipiʼmo maiʼnetaeʼmo kame vayatimo aeta apakaseta neʼune. Neʼunagenoʼaeʼmo Kalaisifeʼmo ava gemo afiʼa aeto hisaya faigoko geʼamo alagepa atumo aigekana huno muki kotegamo aino atagu faenuneno nehiye.

15 Lagaemo utaeʼmo apakufamo alino katino neʼapateya vayaʼaitegaʼe alino apagoʼya lagauno apatalesiya kateʼmo neʼvaya vayaʼaitegaʼeʼmo Kalaisifeʼmo alagepa faigoko geʼamo aeta hakalo huta hapa nepaunagenoʼaeʼmo Kalaisiʼa alagepa atumo neʼaigenoʼaeʼmo Gotiʼa atuʼamo neʼafiye.

16 Lagaemo alino apagoʼya lagauno apatalesiya vayaʼaitefeʼmo faliʼnaya vayaʼmogi hosu atumo aigekana huta maiʼnonageʼapaeʼmo atuʼamo neʼafiyanageʼa faligae. Lagaemo apakufamo alino katino neʼapateya vayaʼaitefeʼmo afaʼa maisaya yaʼmo alino neʼapamiya yaʼmo atumo aigekana huta maiʼnonageʼapaeʼmo atuʼamo neʼafiyanageʼa maige maige huʼa maigae. Ina lagimo ani kana huʼniya aliʼyaʼmo afaʼa aligae.

17 Asole tisa vayatapimogimo umenitata huʼa kagemi yaʼapimo maketi nehaya vayakana huʼa Goti geʼamo aeʼa hakalo huʼa hapa nepaiyaʼmonanafa lagaemo Kalaisipiʼmo maiʼnetaeʼmo Gotiʼa lamiʼniya aliʼyaʼamo neʼalitaeʼmo Goti aulagaleʼmo laipafatiʼmo aeta hakalo huta hapa nepaune.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ