2 Kolitiyani 13 - The Keyagana NT and 25 OT books

Ehetapiye, huno huʼniya gemae

¹ Hemenimo napa tali afinaʼmo uʼna lapakegauve. Agoti hugefeʼmo lole vekalaʼmofi loleʼe magoʼe vayaʼmogimofi huʼa apavayafatiʼmo magoke agufa gemo hisaya gemoʼmo lama gemo afole aigiye, huno huʼniye.

² Nagaemo napa tu afinaʼmo lapakaetegamo uʼna lapakaeʼeʼmo lokaeʼna maiʼneʼnaeʼmo hogoteʼna hosu kavaʼmo huʼnaya vayaʼaifeʼmo, ehetapiye, huʼna lapa paiʼnove. Lapa paiʼnovanageʼna hemenimo lapakaeʼeʼmo uʼna lokaeʼna oʼmaiʼneʼnaeʼmo halate hogoteʼna muki hosu kavaʼmo huʼnaya vayaʼaifeʼmo, uʼnaeʼmo afaʼa lapakegeʼna olapategauve, huʼna lapa paino.

³ Mani gemo Kalaisi avayamo aliʼna nehuve, huʼna aliʼna lapave lisuvafeʼmo lapauʼniyanageʼna afaʼa aliʼna lapave liguve. Kalaisiʼa lapakaeteʼmo ayamufa nosiya vekamo oʼmaiʼnifa lapakaepiʼmo lokiya aliʼyaʼmo neʼaliya vekamo maiʼniye.

⁴ Malipu yosaleʼmo nili aiteʼa aliʼa he tiʼa ateʼnagenoʼaeʼmo lokiyaʼamo ohaneʼniyaʼmonanafa hemenimo Goti himamuʼaletiʼmo afaʼa neʼmaiye. Ani kava huta agaeʼeʼmo magokepi lokaeta maiʼnetaeʼmo lokiyatimo ohaneʼniyaʼmonanafa lagaemo lapakaetegamo utaeʼmo Goti himamuʼaletiʼmo agaeʼeʼmo afaʼa maiʼneta aliʼyaʼamo aligune.

⁵ Lapaipa lapakesafiʼmo alita fako hutapa lapaketapaeʼmo, Kalisitini vayaʼmo maiʼneta lagesamo afita fatago huʼnopi osuʼnopi, hutapa lapamalageka hutapa lapakeyo. Lapakaitapimo lapamete lapamete hutapa alita fako hutapa lapakeyo. Yesu Kalaisiʼa laipafiʼmo neʼmaiye, hutapa oʼageʼnafiye. Lapaipafiʼmo oʼmaiʼnisiyana uta haitapa ohapaiʼnafa uta haita metaleʼnae.

⁶ Lapamalageka hutapa lapakegayaʼmonanafa lapakaemo lagetetapaeʼmo, uʼa haiʼa me otaleʼnae, hutapa hisaya geeʼmo lapakava maiʼneʼna navayagunagu huʼna maiʼnove.

⁷ Lapakaemo hosu kavaʼmo osisayafeʼmo Gotifeʼmo nunumuʼmo huta nelapatone. Lapakaemo lagetetapaeʼmo, Poloʼeʼmo alagepa aliʼyaʼmo neʼaliye, hutapa lagesayafeʼmo nunumuʼmo osuta alagepa kavaʼmo hisayafeʼmo nunumuʼmo huta nelapatone. Lapakaemo alagepa kavaʼmo hisagetaeʼmo lapaulagaleʼmo uʼa haiʼa metaleʼnaya vayakana huta maiʼnisunana kanalene.

⁸ Lagaemo lama gemo akame nehaya vayaʼaifeʼmo lama geleʼmo alita afepi atesuna himamutimo ohaneʼnifa lama geleʼmo alita asaga huta atesuna himamutikeʼmo haneʼniye.

⁹ Ani kavatefeʼmo lapakaemo alagepa kavaʼmo nehutapaeʼmo lapayamufa hutapa maiʼnagetaeʼmo lapakaeteʼmo layamufa nosunaʼmonanafa lamogaga neʼaune. Alagepa kavaʼmo hutapa lokaetapa maisayafeʼmo lahauʼniye.

¹⁰ Lapakaemo alagepa kavaʼmo nehisageʼna lapakaetegamo uʼnaeʼmo Ala kava neʼmoʼa namiʼniya himamuʼaletiʼmo lokiya gemo osisuvafeʼmo lapakaeʼeʼmo magokepi lokaeʼna oʼmaiʼneʼnaeʼmo mani gemo avoʼmo nekaove. Aliʼna hosu huʼna lapatesuvafeʼmo himamuʼamo oʼnamiʼnifa aliʼna lokiya vaiʼna lapatesuvafeʼmo himamuʼamo namiʼniye.

Ge apamamaeʼniya gemae

¹¹ Konagaʼnimogitapae, huʼna, hemenimo geʼnimo alagi huʼna hano huvanagi lapamogaga aitapa maiʼnetapaeʼmo kavatapimo alita api aitapa maiyo. Hiyo, huʼna avoʼmo kaeʼnova gemo afitetapa akame hiyo. Magoke lapaipa lapakesamo alitetapa maiyo. Alagepa hutapa magokepi lokaetapa maigenoʼao Gotiʼa hapau apayamopafiʼmo hapauʼnigeʼa alagepa huʼa magokepi lokaeʼa neʼmaiya kavaʼmo afoʼamoʼmoʼmo lapakaeʼeʼmo magokepi lokaeno maino.

¹² Konaga kavaʼmo hutapa lapakaitapimo lahapaetapa netetapa maiyo.

¹³ Muki apaote vayaʼmogimo ge lapamamaeʼnae.

¹⁴ Ala kava neʼmo Yesu Kalaisiʼa mukiʼamogitapa fikumo lapa maeno lapamino. Gotiʼa mukiʼamogitapaeʼmo hau ayamopafiʼmo hauʼniya kavaʼamo lapaipafiʼmo haneno. Aote Aunemeʼamoʼmo mukiʼamogitapaʼeʼmo magokepi lokaeno afalu afalu huno maino. He, lama ge.