2 Kolitiyani 12 - The Keyagana NT and 25 OT books

Poloʼa alagamuna agegekana huno ageʼniya kavafeʼmo huʼniya gemae

¹ Nagaiʼnieʼmo namogaga aisuvana naha oʼmaegaiye. Ataleʼna Ala kava neʼmoʼa alino nave liʼnigeʼna alagamuna agegekana huʼna ageʼnova kavafeʼmo lapa paiguve.

² Nagaemo mago Kalaisipiʼmoʼmaiʼniya vekamo ageʼnove. Akeyaʼvilaga fotiniʼa kafugamo Gotiʼa ani vekamo avalelino uno haino napa tali kokuʼnapiʼmo ateʼniye. Agufafiʼmo maiʼnifi oʼmaiʼnifi huʼna oʼageʼnovana Gotiʼa ageʼniye.

³ He, ani vekamo ageʼnovana agufafiʼmo maiʼnifi oʼmaiʼnifi huʼna oʼageʼnovana Gotiʼa ageʼniye.

⁴ Gotiʼa Palanaisi koteʼmo avalelino uno haino ateʼniyanageʼa afaʼa aeʼa hakalo osisaya agufa geeʼmo Gotiʼa hunoʼaeʼmo, ge osuvo, huno ha paiʼniya gemo afiʼniye.

⁵ Nagaemo ani vekaeʼmo namogaga aiguvaʼmonanafa nagaiʼnieʼmo namogaga oʼaigufa nayamufa nosuva kavafeʼmo afaʼa namogaga aiguve.

⁶ Nagaemo nagaiʼnieʼmo namogaga aiguve, huʼna hisuvana negi gemo osuʼna lama gemo huguvaʼmonanafa nagaiʼnieʼmo namogaga aiteʼna nagiʼnileʼmo afaʼa aliʼna asaga osuguve. Nehuva kavaʼmo agege nehuva gemo afige nehutapaeʼmo nagaefeʼmo alagepa hutapa lapakesamo afisayafeʼmo nahauʼniye. Fiku yanagetapa magoʼe hutapa nagiʼnileʼmo alita asaga hugae.

⁷ Gotiʼa magoʼe yaʼmo alino nave liʼniyaʼmonanafa ani yatefeʼmo nagiʼnileʼmo aliʼna asaga huʼna oʼnatesuvafeʼmo mago aufeʼe yakana yatetiʼmo nagufaleʼmo namagiʼniye. Ani yatefeʼmo nagiʼnileʼmo aliʼna asaga huʼna oʼnatesuvafeʼmo Satani apa vekaʼamoʼmo eno namagiʼniye.

⁸ Nagaemo ani kavaʼmo huʼniya kavatefeʼmo Ala kava nefeʼmo loleʼe magoʼe afinaʼmo, alika atalo, huʼna ge huʼnove.

⁹ Huʼna ge huʼnovaʼmonanafa naha painoʼaeʼmo, Fikumo kaha maeʼna kamisugeno kaha maesiyaʼmoʼmo kagaetefeʼmo alagi haiʼmae. Na kava hinageʼnaene. Himamuʼnimoʼa lokiya noʼvaiya kavatetiʼmo alagepa huno afole neʼaiye, huno naha paiʼniyaʼmofeʼmo Kalaisi himamuʼamo nagaeteʼmo emineno hanesiyafeʼmo lokiya noʼvauva kavafeʼmo amuse huteʼna namogaga aiguve.

¹⁰ Aiguvaʼmofeʼmo Kalaisi agiʼalefeʼmo lokiya noʼvauva kavanagi huʼa faipa huʼa neʼnataya gegi kafu nehuva kavanagi apaini huʼa neʼnataya kavanagi hanageke yaʼmo neʼaluva kavatefenagi huʼna lusi kava huʼna namogaga aiguve. Na kavaʼmo higeʼnaene. Lokiya noʼvaiʼnaeʼmo lokiya vaiʼna maiʼnovaʼmofeʼmae.

Poloʼa Kolitiyani vayaʼaifeʼmo agesamo afiʼniya gemae

¹¹ Negi vekagana huʼna negi gemo huʼnovaʼmonanafa ani kavatefeʼmo alita he titapa nateʼnae. Naha maetapa nagiʼnileʼmo alita asaga hutapa nateʼnaesinana kanale kavaʼmo huʼnaesine. Afa vekamo maiʼnovaʼmonanafa hogoteʼa aeʼa apakaseʼnaya apa vayatapimogi aeʼa oʼnagaseʼnaya vekamo maiʼnove.

¹² Nagaemo apa vayaʼmogi nehaya agufa alagena kavaʼmo lapakaetegamo huʼnove. Nagaemo hanageke yaʼmo aliʼneʼnaeʼmo oʼataleʼna atafauʼna alagi huʼneʼna Gotiʼa alino apave liʼnigeʼa hapau neʼaiya agufa naune kavaʼmo huʼnove.

¹³ Na agufa kavatefeʼmo siosiʼale siosiʼaleʼmo maiʼnaya vayaʼai apakamelega maiʼnae. Lapakaemo apakamelega oʼmaiʼnayaʼmonanafa magoke kavatetiʼmo yagaitapa natesaya agufa kavaʼmo osuʼnova kavatefeʼmo apakamelega maiʼnae. Vaehae, nahauʼnimogitapae, huʼna, ani hosu kavaʼnimo alita ataleyo.

¹⁴ Lole afinaʼmo utesigeʼna halate hemenimo uʼna lapakaeʼeʼmo maisuvafeʼmo alo huʼna maiʼnove. Nagaemo kagemi yatapimo alisuvafeʼmo oʼnahauʼniyaʼmonanafa lapakaekeʼmo alisuvafeʼmo nahauʼniyaʼmofeʼmo alagepa huʼna maisuvafeʼmo yagaitapa natesaya agufa kana yaʼmo aliʼna olapamiguve. Lapakaemo ago ageʼnayana mafaʼneʼapimogi itaʼapi afoʼapimogimo alagepa huʼa maisaya yaʼmo aliʼa anupa huʼa malesaya kavaʼmo ohaneʼnifa itaʼapi afoʼapimogigeʼmo mafaʼneʼapimo alagepa huʼa maisaya yaʼmo aliʼa anupa huʼa malesaya kavaʼmo haneʼniye.

¹⁵ Haneʼniyaʼmonanafa nagaemo lapa maesuvafeʼmo lusi kava huno nahauʼniyanageʼna muki yaʼnimo afaʼa atalegauve. He, lapa maesuvafeʼmo alagepa huʼna neʼmauva kavaʼniʼeʼmo afaʼa atalegauvaʼmonanafa lapakaefeʼmo nahau nayamopafiʼmo nahauʼniya kavaʼnimoʼa kosime kosime nehaigenoʼaeʼmo lapakaemo nagaefeʼmo lapau lapayamopafiʼmo lapauʼniya kavatapimoʼmo aise huno lapaume lapaume uno nelamiye.

¹⁶ Nelamiyaʼmonanafa magoʼamogitapamo hutapaeʼmo, Alagepa huno maisiyafeʼmo yagaita atesuna agufa kana yaʼmo alino olamiʼniyaʼmonanafa humi nami gemo nehiya vekamo maiʼniyaʼmofeʼmo aigofe geletiʼmo huno latafauno lateʼniye, hutapa nehae.

¹⁷ Nagaemo mago vayaʼmo aliʼna apateʼnogeʼapaeʼmo lapakaetegamo uʼnaya vayaʼaitetiʼmo aigofe gemo huteʼna mago yatapimo kumayaʼmo aliʼnofiye.

¹⁸ Nagaemo Taitasiʼmo aliʼna he tiʼna ateteʼna mago konagatimoʼeʼmo aliʼna anateʼnogeʼana lokaeʼana uʼnaʼae. Taitasiʼa unoʼaeʼmo lapakaefeʼmo aigofe gefatiʼmo yuna gemo huteno mago yatapimo kumayaʼmo aliʼnifiye. Nagaeʼe agaeʼeʼmo magoke laʼaipa laʼagesamo aliʼnetaʼa magoke kateʼmo oʼuʼnoʼafiye.

¹⁹ Lapakaemo mani gemo alita lekana paitetapaeʼmo, laulagaleʼmo halate apakaiʼapi hapa maesiya gemo nehae, hutapa lapakesamo neʼafifiye. Haʼao, Kalaisipiʼmo maiʼnetaeʼmo Goti aulagaleʼmo ani gemo nehune. Nahau nayamopafiʼmo nahauʼniya vayaʼnimogitapae, huʼna, muki kavaʼmo nehutaeʼmo lapa maesuna kavaʼeʼmo nehune.

²⁰ Uʼna lapakesuvana oʼnahauʼnisiya kavaʼmo hutapa maiʼnisageʼna lapakesufi huteʼna koli nehuve. Oʼnahauʼnisiya kavaʼmo nehisayana nagaeʼeʼmo olapauʼnisiya kavaʼmo lapakaetegamo huguve. Fiku yanagetapa ge vaige lapaipa kafa hapaege falo gemo huge lapaote lapaote hutapa maige huta faipa hutapa apatege sumi sumi gemo huge lapakufamo avalelitapa haige lapano aege hutapa maiʼnae.

²¹ Fiku yanageʼna halate lapakaetegamo visugenoʼaeʼmo Gotiʼnimoʼmo lapaulagaleʼmo navagage yaʼmo namigiye. Hogotetapa asole vayaʼmogitapamo kavatapileʼmo oʼyagaitapa oʼaniʼya kavaʼmo huge kumai kavaʼmo huge afela afugana hutapa hosu lapaʼye huge hutapa maiʼnisaya vayaʼmogitapamo halate lapaipamo alita afe oleʼnisayana yulagefaʼmo aiguve.