2 Kolitiyani 11 - The Keyagana NT and 25 OT books

Poloʼa agaiʼaenagi aigofe apa vayaʼaifenagi huno huʼniya gemae

¹ Nagaemo mago aiseʼamo negi nagi gemo lapa paisugetapaeʼmo afaʼa nageta nataleʼnetapa afisayafeʼmo nahauʼniye. Ani gemo huvaʼmonanafa nageta nataleʼnetapa geʼnimo afaʼa neʼafiye.

² Gotiʼa lapakaefeʼmo kaino nefaiya kava huʼna kaino nefauve. Nagaemo magoke vekamo Kalaisi aʼamo maisayafeʼmo, apavaleʼna kamiguve, huʼna Kalaisifeʼmo ha paiʼnove. Lapakaemo veʼeʼmo lokaeno ohavaeʼniya aʼmafaʼnemoʼa yaveyave kavaʼmo nehiya aʼmafaʼnegana hutapa maiʼnisageʼna lapavalelinuʼna haiʼna amisuvafeʼmo nehuve.

³ Nehuvaʼmonanafa nagaloʼyavemoʼa Ivifeʼmo aigofe geletiʼmo agesamo faiʼniya kava huʼa mago vayaʼmogimo lapaipa lapakesamo aliʼa hosu huʼa lapatesagetapa Kalaisifeʼmo lapaipafiʼmo lapakesamo oʼafitapa atalesaya kavafeʼmo koli nehuve.

⁴ Mago hogoteʼa eʼnaya vayanagi henagaʼamo esaya vayanagi huʼa lapakaetegamo eʼa alu Yesufeʼmo lagaemo aeta hakalo huta lapa opaiʼnona Yesufeʼmo aeʼa hakalo huʼa lapa paisagetapa afigae. Alu auneʼamo lagaetetiʼmo oʼaliʼnaya auneʼamo lapakaemo aliʼnisafi alu alagepa faigoko gemo lagaetetiʼmo oʼafiʼnaya agufa alagepa faigoko gemo afisafi hutetapa afaʼa apaketapa apataleʼnetapa geʼapimo afaʼa afigae.

⁵ Vaehae, huʼna, hogoteʼapa vayatapimogi aeʼa apakaseʼnaya apa vayatapimogimo mago aiseʼamo aeʼa oʼnagaseʼnae, huʼna nagesamo afiʼnove.

⁶ Gemo aeʼna hakalo hisuvafeʼmo aliʼa naya oʼmaleʼnaya vekamo maiʼnisuvana Goti geʼamo afiʼna aeto huʼnove. Lagaemo muki afinaʼmo muki agufa kavaʼamo ago alita lapave liʼnone.

⁷ Nagaemo Goti alagepa faigoko geʼamo aeʼna hakalo huʼna lapa nepaiʼnaeʼmo lapakaetegatiʼmo mago miyaʼnimo oʼaliʼna alagepa hutapa maisayafeʼmo aliʼna afepi nateʼnovaʼmofeʼmo nagaefeʼmo hutapaeʼmo, hosu kavaʼmo huʼniye, hutapa lapakesamo neʼafifiye.

⁸ Lapakaetegamo uʼna aliʼyaʼmo neʼalugeʼapaeʼmo alu siosile alu siosileʼmo maiʼnaya vayaʼmogimo miyaʼnimo namiʼnae. Lapa maesuvafeʼmo apakae yaʼmo kumaya aligekana huʼna aliʼnove.

⁹ Lapakaeʼeʼmo maiʼneʼnaeʼmo mago yafeʼmo kafu huʼnaeʼmo naha maetapa namisayafeʼmo kana yaʼmo aliʼna olapamiʼnove. Masetoniya kotega konagaʼnimogi ohaneʼniya yaʼmo alini eʼa namiʼnae. Muki yaʼaleʼmo naha maetapa yagaita natesayafeʼmo kana yaʼmo aliʼna olapamiʼnovanageʼna kana yaʼmo aliʼna olapamiguve.

¹⁰ Kalaisi lama geʼamo naipafiʼmo haneʼnigeʼna alagi lama gemo huʼnaeʼmo, lapakaetegatiʼmo mago yaʼmo oʼaliʼnova kavatefeʼmo namogaga neʼauva gemo navayaletiʼmo hisuvafeʼmo muki Akaiya kotega maiʼnaya vayapatiʼmo mago vekamoʼmo navayaleʼmo huno natafauno oʼnategaiye.

¹¹ Na kava higeʼnaene. Lapakaefeʼmo nahau nayamopafiʼmo oʼnahauʼniyaʼmofeʼmo nehufiye. Haʼao. Gotiʼa ago nageʼniye.

¹² Mago vayaʼmogimo apakaiʼapieʼmo apamogaga aisaya kaʼmo agesayafeʼmo, magoke agufa aliʼyaʼmo neʼalune, huʼa huteʼa apamogaga oʼaisayafeʼmo lapakae yaʼmo oʼaliʼnovanageʼna alagi oʼaliguve.

¹³ Ani agufa vayaʼmo aigofe apa vayaʼmo maiʼneʼa humi apateteʼa apakesamo nefaiya vayaʼmo maiʼnae. Apakaemo apakaiʼapimo aliʼa aiʼa afe leʼa Kalaisi apa vayaʼamo aliʼa hamaleʼa neʼapatae.

^14-15 Sataniʼa agaiʼamo alino aino afe leno ha le enisole vekagana huno alino hamaleno ateʼniyaʼmofeʼmo aigofe apa vayaʼmogi hisaya kavaʼapieʼmo lahau oʼaigune. Atupa afinaʼmo nehaya kavaʼapimo anonaʼapilefeʼmo alino hano huno apatalegaiye.

Kolitiyani vayaʼaifeʼmo kalafefa gemo huno hapa paiʼniya gemae

¹⁶ Halate lapa paiʼnaeʼmo, magoʼamogitapa nagaefeʼmo lapakesa afitapaeʼmo, negi vekae, hutapa lapakesamo oʼafiyo. Negi vekae, hutapa lapakesamo neʼafisayana nagaiʼnieʼmo aiseʼamo namogaga aisuvafeʼmo negi vayaʼmo apaketapa neʼapatalaya kava hutapa nagetapa nataleyo.

¹⁷ Nagaiʼnieʼmo namogaga neʼaiʼnaeʼmo Ala kava neʼmoʼa huʼniya agufa gemo osuʼna negi vekagana huʼna gemo nehuve.

¹⁸ Asole vayaʼmogimo amega apakufale kavafeʼmo apamogaga neʼaiyaʼmofeʼmo nagaiʼnieʼmo afaʼa namogaga aiguve.

¹⁹ Nahauʼnimogitapae, huʼna, afitetapa ageʼnaya vayaʼmo maiʼnayaʼmofeʼmo negi vayaʼmo afaʼa apaketapa neʼapatalae.

²⁰ Mago vayaʼmogimo aliʼyaʼapileʼmo kalavusi huʼa nelapatafi mago yatapimo aliʼa neʼnafi ane anagaʼaitefeʼmo aliʼa nelapatafi apaiyafiʼmo aliʼa nelapatafi huteʼa apayamo aliʼa atalelineʼa lapaugosafiʼmo lapamagige nehisayana afaʼa apaketapa neʼapatalae.

²¹ Ani agufa kavaʼmo hisunafeʼmo layamufa vayaʼmo oʼmaiʼnonaʼmofeʼmo lavagage nehiye. Mago vayaʼmogi apakaiʼapieʼmo apamogaga neʼaisayana negi vekagana huʼna koli osuʼna nagaiʼnieʼmo namogaga aiguve.

Poloʼa aliʼyaʼmo aliʼniya kavafeʼmo huʼniya gemae

²² Apakaemo Himulu nofi vayaʼmo maiʼnafiye. He, nagaeʼeʼmo Himulu nofi vekamo maiʼnove. Isaleli vayaʼmo maiʼnafiye. He, nagaeʼeʼmo Isaleli vekamo maiʼnove. Apakaemo Emalehamu aginago vayaʼmo maiʼnafiye. He, nagaeʼeʼmo Emalehamu aginago vekamo maiʼnove.

²³ Kalaisi aliʼyaʼamo neʼalifiye. Negi vekagana agufa gemo nehuʼnaeʼmo, aeʼna apakaseʼnove. Magoʼe huʼna lokiya aliʼyaʼmo aliʼnove. Lekana opaisuna agufa afinaʼmo namagiʼnaya kavatetiʼmo aeʼna apakaseʼnove. Magoʼe huʼa kalavusi huʼa nateʼnae. Magoʼe huʼna muki afinaʼmo falisuva agufa kavategamo maiʼnove.

²⁴ Naya magokayagaʼa afinaʼmo Yu vayaʼmogi nofi kayotetiʼmo teti naeniʼa afinaʼmo namagiʼnae.

²⁵ Alu nofi vayaʼmogi loleʼe magoʼe afinaʼmo kayotetiʼmo namagiʼnae. Magoke afinaʼmo yafa kayotetiʼmo namagiʼnae. Loleʼe magoʼe afinaʼmo sipimo anipiʼmo aeno lapaneʼnigeʼna falisuva agufa kavaʼmo huʼnove. Magoke afinaʼmo haniʼilagaʼe felugaʼeʼmo solovala aniʼmo agotofuleʼmo maiʼnove.

²⁶ Asole afinaʼmo nata neʼna umenitata huʼnove. Aniʼmo heʼniya yapatiʼmo lakaeʼna uge apatafauʼa apamagiteʼa kumaya neʼaliya vayaʼmogi folagapiʼmo uʼna maige Yu konagaʼnimogi namagisayafeʼmo huʼnaya folagapiʼmo uʼna maige alu nofi vayaʼmogi namagisayafeʼmo huʼnaya folagapiʼmo uʼna maige huʼna falisuva kavategamo uʼneʼna huʼna maiʼnove. Alopa taonifiʼmo uʼna maige kaʼme kotegamo uʼna maige solovala aniʼmo agotofuleʼmo uʼna maige aigofe konaga vayatimogi folagapiʼmo uʼna maige huʼna falisuva kavategamo uʼneʼna huʼna maiʼnove.

²⁷ Lusi aliʼyaʼmo alige alaga nahaege asole afinaʼmo nau okalege naga tege anifeʼmo nahauge asole afinaʼmo neʼyaʼmo oʼnege yasimo nahauge kukenaʼnimo ohanege huʼna maiʼnove.

²⁸ Magoʼe huʼna kana yaʼmo aliʼneʼnaeʼmo muki afinaʼae afinaʼaeʼmo siosi vayaʼaifeʼmo lusi kava huʼna nahausoli huteʼna nagesa alaʼamo afiteʼna magoʼe huʼna kana yaʼmo neʼaluve.

²⁹ Ina lagimo lokiyaʼapimo nohanefi ani kava huno nagaeʼeʼmo lokiyaʼnimo nohane. Ina lagimo aliʼa apagoʼya faitalageʼa asagauʼa neʼaifi naipamo nele.

³⁰ Alopa kaʼmo ohaneʼnisigeʼna nagaiʼnieʼmo namogaga aisuva kaʼmo haneʼnisiyaʼmoʼmo lokiya noʼvauva kavafeʼmo namogaga aiʼna ge huguve.

³¹ Ala kava netimo Yesu Kalaisi Gotiʼamo Afoʼamofekeʼmo muki afinaʼmo aliʼa auleʼa neʼataya Gotiʼa hunoʼaeʼmo, aigofe gemo nosiye, huno nageʼniye.

³² Nagaemo Namasakasi taonifiʼmo maiʼnogenoʼaeʼmo kini vekamo agiʼamo Aletasi aiyafiʼmo maiʼniya vekamo taonifiʼmo maiʼnaya vayaʼaiteʼmo yagaino neʼapateya vekamoʼmo kalavusi huʼa natesayafeʼmo ati vayaʼamo alino apateʼnigeʼa uʼa yafa kegiʼya kipateʼmo yagaiʼa maiʼnae.

³³ Yagaiʼa maiʼnayaʼmonanafa nagaemo hona yuvapagana yapiʼmo haiʼna maiʼnogeʼa yasi katetiʼmo aliʼa natageʼna lamiʼna malaga asagauʼna aiteʼna naune heʼna uʼnove.