2 Kolitiyani 10 - The Keyagana NT and 25 OT books

Polofeʼmo huʼa faipa huʼa ateʼnagenoʼaeʼmo geʼaletiʼmo huno aeno apakaseʼniya gemae

¹ Poloʼnamo nagaiʼnimo lapao ke hove. Kalaisiʼa yuna aipa vekamo maiʼneno yagu yaga gemo huʼniya agufa gemo huʼna lapa nepauve. Nagaemo lapaulagaleʼmo maiʼneʼnaeʼmo koli huteʼnaeʼmo ge nosuvaʼmonanafa lapakaeʼeʼmo magokepi lokaeʼna oʼmaiʼneʼnaeʼmo koli osuʼna lokiya gemo nehuva vekamoʼnamo lapa nepauve.

² Nehuvaʼmonanafa lapao ke heʼnaeʼmo fiku yanageʼna lapakaetegamo uʼna maiʼneʼna lagaefeʼmo, ma mopafi vayaʼai kavaʼmo apakufamo hauʼniya kavaʼmo nehae, huʼa apakesamo neʼafiya vayaʼaifeʼmo koli osuʼna himamuʼniletiʼmo lokiya gemo huguve.

³ Lagaemo ma mopafiʼmo maiʼnetaeʼmo lagufafiʼmo maiʼnonaʼmonanafa ma mopafi vayaʼmogi nehaya agufa kavaʼmo huta lagufaʼaletikeʼmo kamemo nosune.

⁴ Muki kame nehuna yatimo ma mopafi vayaʼmogi aliʼneʼa kame nehaya agufa yaʼmo ohaneʼnifa Goti lokiya himamuʼaletiʼmo kame vayaʼai yafa kegiʼyaʼapimo heta halagape vaisuna yaʼmo haneʼniye.

⁵ Lagaemo muki kame vayaʼmogi yatala noʼapimo heta vayu hulita emiteta afepi neʼatona agufa kavaʼmo huta vayaʼmogi himuʼnamu apakesamo neʼafiya kavaʼmo Gotifeʼmo kame huʼa ateteʼa geʼamo amagiʼa neʼatalaya kavatefeʼmo nofi kita neʼapatone. Lagaemo muki apakesamo neʼafiya kavaʼamo alita nofi kita apateteta Kalaisiʼmo akame hisaya kavategamo apavalelituta neʼapatone.

⁶ Lapakaemo alagepa hutapa lakame hisagetaeʼmo latale uʼa kame vayatiʼeʼmo maiʼnaya vayaʼaina apamagisuna kayoʼmo alo huta maleʼnone.

⁷ Amega apakufalefeʼmo lapakesamo neʼafifiye. Apakaiʼapieʼmo aliʼa amufa apamiʼapaeʼmo Kalaisi vayaʼamo maiʼnone, huʼa lokiya vaiʼa apakesamo neʼafiya vayaʼmogimo lagaeʼefeʼmo huʼapaeʼmo, Kalaisi vayaʼamo maiʼnae, huʼa halate apaipafiʼmo apakesamo afigae.

⁸ Ala kava neʼmoʼa lamiʼniya himamutiletiʼmo alita hosu huta lapatesunafeʼmo olamiʼnifa alita lokiya vaita lapatesunafeʼmo lamiʼniye. Lamiʼniya himamu lokiyaʼalefeʼmo magoʼe huʼna lagitileʼmo aliʼna asaga huʼna atesuvafeʼmo navagage osugiye.

⁹ Huno lamoʼya aisiyafeʼmo mani avoʼmo nekae, hutapa lapakesamo oʼafisayafeʼmo mani gemo nehuve.

¹⁰ Ani kavafeʼmo mago vayaʼamogi huʼapaeʼmo, mani avoʼmo kaeʼniya gemoʼa kana huʼnigeno lokiya vaiʼniyaʼmonanafa lagaeʼeʼmo lokaeno maiʼniya afinaʼmo ina agufa vekamo maiʼneno ge huʼniya geʼamoʼmo afa gegana huʼniye, huʼa nehae.

¹¹ Ani vayaʼmogimo ina kavafeʼmo afisaya gemo haneʼniye. Apakaeʼeʼmo oʼmaiʼnetaeʼmo na agufa gemo avoʼmo kaeʼnopi apakaeʼeʼmo magokepi lokaeta maiʼnetaeʼmo magoke agufa himamutiletiʼmo hugune, huʼa apakesamo afigae.

¹² Mago vayaʼmogimo apakaiʼapi apakiʼapileʼmo aliʼa asaga huʼa gemo nehae. Lagaemo, ani agufa vayaʼmo maiʼnone, huta hisupi aeta apakaseʼnone, huta hisupi ani agufa geeʼmo koli nehune. Ani vayaʼmogimo apakaiʼapi kavaʼapiletiʼmo magoke magoke huʼa aliʼa fako huʼa apateʼapaeʼmo, aeʼna agaseʼnofi aeno nagaseʼnifi, huʼa aliʼa fako nehayaʼmonanafa alagepa huʼa afiteʼa oʼageʼnae.

¹³ Nehayaʼmonanafa lagaemo aliʼyatilefeʼmo magoʼe huta lagitileʼmo alita asaga huta olategaune. Haʼao, Gotiʼa aliʼyaʼamo alisunafeʼmo lamiʼniya mopaleʼmo lapakaemo maiʼnaya folagapiʼmo uta hakuteʼmo aliʼyaʼmo neʼalune.

¹⁴ Lapakaemo haku maleno lamiʼniya mopaleʼmo oʼmaitapa malaga maiʼnaesinana lapakaetegamo oʼuʼnonesinaʼmonanafa lamiʼniya mopa hakuʼmo aeta agaseta lapakaetegamo Kalaisifeʼmo alagepa faigoko geʼamo alinita oʼuʼnone.

¹⁵ Lagaemo hakutimo haneʼniyana malaga vayaʼai aliʼyaʼapilefeʼmo, alagepa aliʼyaʼmo aliʼnone, huta nosune. Lapakesa afita fatago nehaya kavaʼmoʼa kosime kosime uno haisigetapaeʼmo aliʼyatimo magoʼe hutapa alita ala hutapa latesagetaeʼmo aeta lapakaseta visunafeʼmo lavayagunagu huta lapakava maiʼnone.

¹⁶ Lagaemo alu vayaʼaina apamiʼniya aliʼyaʼapilefeʼmo, alagepa aliʼyaʼmo aliʼnone, huta osuta lapakamelega vayaʼaitegamo uta alagepa faigoko geʼamo hapa paigesune.

¹⁷ Mago vekamoʼmo amogaga aisiyafeʼmo hauʼnisiyana Ala kava nefekeʼmo amogaga aino, huno huʼniye.

¹⁸ Apakaiʼapieʼmo huʼapaeʼmo, Alagepa aliʼyaʼmo aliʼnone, huʼa nehaya vayaʼmogi ala apakiʼapimo oʼaligafa Ala kava neʼmoʼa hunoʼaeʼmo, Alagepa aliʼyaʼmo aliʼnae, huno hisigeʼapaeʼmo ala apakiʼapimo aligae.