2 Kolitiyani 1 - The Keyagana NT and 25 OT books

¹ Nagaemo Poloʼnaeʼmo Gotiʼa hunoʼaeʼmo, apa vekaʼnimo maiʼneno aliʼyaʼnimo aligiye, huteno navaleno nateʼnigeʼna Kalaisi Yesu apa vekaʼamo maiʼnove. Nagaeʼe konagatimoʼmo Timotiʼeʼmo Kolitiyani taonifiʼmo maiʼnaya siosi vayaʼmogitapaʼe muki Goti vayaʼamo lapaote vayaʼmo Akaiya kotegamo maiʼnaya vayaʼmogitapaʼefeʼmo mani avoʼmo nekaoʼae.

² Afotimo Gotiʼe Ala kava netimo Yesu Kalaisiʼeʼmo fikumo lapa maeʼana lapamisaʼageno lapaipamoʼmo falu hino.

Poloʼa Gotifeʼmo hao ke heʼniya gemae

³ Ala kava netimo Yesu Kalaisi Afoʼamoʼmo alita auleta ategetao. Agaemo hau huno nelateya kavaʼmo Afoʼamoʼmo maiʼneno muki afinaʼmo laha maeno laipamo alino lokiya vaino nelateya vekamo maiʼniye.

⁴ Lagaemo muki agufa hanageke yaʼmo neʼalisaya vayaʼmo hapa maeta alita lokiya vaita apatesunafeʼmo Gotiʼa laha maeno alino lokiya vaino nelate. Lagaemo muki hanageke yaʼmo neʼalunagenoʼaeʼmo laha maeno alino lokiya vaino nelateya kavatetiʼmo hapa maeta alita lokiya vaita apatesunafeʼmo laha maeno alino lokiya vaino nelate.

⁵ Kalaisiʼa lusi kana yaʼmo aliʼniya kava huta lusi kana yaʼmo hetamatimo neʼalune. Lusi kava huta kana yaʼmo neʼaluna kavaʼmo huno Gotiʼa Kalaisitetiʼmo magoʼe huno laha maeno alino lokiya vaino nelate.

⁶ Gotiʼa lapa maeno alino lokiya vaino lapateteno lapakufamo alino katino lapatesiyafeʼmo kana yaʼmo neʼalune. Lapaipafiʼmo aliʼyaʼmo neʼaligetapaeʼmo neʼaluna agufa kana yaʼmo aliʼnetapaeʼmo oʼataletapa atafauta alagi nehae. Ani kava huno lapa maeno alino lokiya vaino lapateteno lapakufamo alino katino lapatesiyafeʼmo Gotiʼa laha maeno alino lokiya vaino nelate.

⁷ Kana yaʼmo neʼaluna kava hutapa kana yaʼmo neʼaliye. Ani kava huno alino lokiya vaino nelateya kava huno alino lokiya vaino lapategaiye, huta ago afiʼnonaʼmofeʼmo, oʼataleʼa atafauʼa alagi hugae, huta lagesamo neʼafune.

⁸ Konagatimogitapae, huʼna, Lagaemo Esiya kotegamo maiʼnonagenoʼaeʼmo hanageke yaʼmo lagaeteʼmo afole aiʼniya hanageke yafeʼmo ava gemo afisayafeʼmo lahauʼniye. Lusi kava huta kana yaʼmo aliʼnonagenoʼaeʼmo aeno lagaseʼnigetaeʼmo, faita kasalo paesuna kaʼmo alagi ohaneʼniyanageta faligune, huta huʼnone.

⁹ He, yasi vekamoʼmo hunoʼaeʼmo, faligae, huno huʼniya agufa gemo laipafiʼmo ago afole aiʼniye. Lagaitieʼmo alita amufa olamita Gotiʼa faliʼnayatetiʼmo alino he tino neʼapateya vekaekeʼmo alita amufa amigune, huta lagesamo afisunafeʼmo mani hanageke yaʼmo lagaeteʼmo afole aiʼniye.

¹⁰ Agaemo lusi hanageke yaʼmo falisuna agufa hanageke yaʼmo aliʼnonaʼmonanafa lagufamo alino katino lateʼniyanageno alino katino nelateyanageno alu afinaʼaʼe alu afinaʼaʼeʼmo magoʼe huno lagufamo alino katino lategaiye, huta agaefeʼmo alita amufa neʼamune.

¹¹ Lapakaemo asole vayaʼmogitapamo nunumuʼmo hutapa latesageno Gotiʼa lahau vaisigeʼapaeʼmo ani kava huʼa asole vayaʼmogimo Gotifeʼmo hao ke heʼa lategae.

Poloʼa alu agesamo afiʼniya gemae

¹² Lagaemo ma mopafi vayaʼmogi afiteʼa ageʼnaya agufa kavatetiʼmo mago kavaʼmo osuʼnonagenoʼaeʼmo Gotiʼa fikumo laha maeno lamiʼnigeta mago kavaʼmo aeta ati okaeta laipafatiʼmo laote kavaʼmo huʼnone. Lagaemo ma mopafi vayaʼai apaulagaleʼmo mani kavaʼmo nehuta lapakae lapaulagaleʼmo magoʼe huta mani alagepa kavaʼmo huʼnone. Yuʼilaga vekatimoʼmo mani alagepa kavatieʼmo faigoko gemo laha nepaigeta lamogaga neʼaune.

¹³ Lagaemo lole agufa gemo osuta mago gemo aeta ati okaeʼnonanagetapa afaʼa lekana paitapa afigae. Mukiʼamogitapamo muki getimo alagepa hutapa afime afime utapa atupa afinaʼeʼmo afisayafeʼmo avoʼmo kaeʼnone.

¹⁴ Magoʼamogitapamo lagetetapaeʼmo lagaefeʼmo lapamogaga neʼaiye. Ani kava huta Ala kava netimo Yesuʼa eminesiya afinaʼmo lapakaefeʼmo lamogaga aisuna kava hutapa lagaefeʼmo lapamogaga aigae.

¹⁵ Nagaemo lole nagesamo oʼafiʼna magoke nagesamo afiʼnaeʼmo, lole afinaʼmo lapakaetegamo uʼna lapa maegauve.

¹⁶ Lapakaetegamo uʼna maigeʼna lapataleʼna Masetoniya kotegamo uteʼna halate aiʼna atagi neʼna lapakaetegamo eʼna maiʼnisugetapaeʼmo Yutiya kotegamo visuvafeʼmo naha maegae, huʼna nagesamo neʼafuve.

¹⁷ Nagaemo huʼnaeʼmo, ani kavaʼmo huguve, huʼna huʼnova gemo navayaʼaletikeʼmo afa gemo huʼnofiye. Haʼao. Ma mopafi vayaʼmogi nehaya agufa ge huʼna hisuva kavafeʼmo lole gemo huʼnaeʼmo magoke afinaʼmo he, huʼna huteʼna, haʼao, huʼna osuʼnove.

¹⁸ Gotiʼa huguve, huno hu maleʼniya gemo ataleno alu gemo nosiya kava huta lapakaefeʼmo magoke afinaʼmo he, huta huteta, haʼao, huta nosune.

¹⁹ Sailasiʼagi Timotiʼagi nagaiʼnimogi huta Goti Mafaʼneʼamo Yesu Kalaisifeʼmo ava gemo aeta hakalo huta lapa paiʼnona vekamoʼmo lole agufa gemo afoʼamoʼmo oʼmaiʼniye. Agaetefeʼmo he, nehutaeʼmo aita atagineta, haʼao, huta nosune. Agaemo he gemo afoʼamoʼmo maiʼneno lama gemo afoʼamoʼmo maiʼniye.

²⁰ Gotiʼa muki asole geʼamo alagi lama ge huno ani kavaʼmo huguve, huno hu maleʼniya polomasi geʼamo Kalaisitetiʼmo, he, huno huteno alino afole aino neʼate. Alino afole aino neʼateyaʼmofeʼmo lagaemo Kalaisitetiʼmo, he, lama gemo haneʼniye, huteta Goti agiʼaleʼmo alita asaga nehune.

^21-22 Gotiʼa agaiʼa aliʼyaʼamo alisunafeʼmo lavaleno latesiyafeʼmo uvelimo lakino lategekana huno Aunemeʼaletiʼmo lakino lateʼniye. Alagena yaʼamo laipafiʼmo hu maleʼnenoʼaeʼmo, vayaʼnimo maiʼnae, huno huʼniye. Lamisiya yapatiʼmo Aunemeʼamo hogoteno ago laipafiʼmo lamiʼniyaʼmofeʼmo ago afiʼnonana muki alagepa yaʼamo lamigiye. Gotiʼa lamiteno lokiya vaino nelategetaeʼmo lagaeʼe lapakaeʼeʼmo Kalaisipiʼmo lokiya vaita maiʼnone.

²³ Gotiʼa nageʼniyanageno lama gemo nehiye, huno ageteno naha maeno faigoko gemo lapa paigiye. Lama gemo huʼnaeʼmo, kayoʼmo lapamisuvafeʼmo oʼnahauʼnigeʼnaeʼmo, Kolitiyani taonifiʼmo halate oʼuguve, huteʼna lapataleʼna aeʼna lapakaseʼnove.

²⁴ Lagaemo lapakesamo afita fatago hisaya kavatetiʼmo ala lagi vayatapimo maisunafeʼmo osuʼnonaʼmonanafa lapamogaga aisayafeʼmo lapa neʼmaone. Lapakesamo afita fatago nehutapaeʼmo atafautapa alagi huʼnetapa he titapa maiʼnae.