2 Kini 7 - The Keyagana NT and 25 OT books

¹ Ha paiʼnigenoʼaeʼmo Ilaisaʼmo hunoʼaeʼmo, Ala kava neʼmo geʼamo afiyo. Ala kava neʼmoʼa hunoʼaeʼmo, Egamo mani agufa kanaleʼmo vayaʼmo taonile kegiʼya kipateʼmo uʼa alagepa falaovamo tali kilomofi malimo sigisi kilomofi huʼa vani kinatoletiʼmo miya faigae, huno huʼniye, huno ha paiʼniye.

² Ani kini vekaleʼmo yagaino neʼateya vekamo kini vekaʼeʼmo magokepi eʼniya vekamoʼmo ani gemo afitenoʼaeʼmo ina gemo huno Goti vekaʼamo geʼaleʼmo aeno atagaina hunoʼaeʼmo, Afiyo, huno, Ala kava neʼmoʼa kokuʼnapi yasi kakoʼmo alo hisigeno ani kavaʼmo afole aisifiye, huno huʼnigeno Ilaisaʼmo ha painoʼaeʼmo, Alagi lama gemo nehuve. Kagaemo ani kavaʼmo afole aisigeka ageganaʼmonanafa ani neʼyapatiʼmo oʼnegane, huno ha paiʼniye.

Siliya ami vayaʼmo apaune heʼnaya gemae

³ Ani afinaʼmo Sameliya taonimo malagamo loleʼe loleʼe vayaʼmo lepolosi kaitaʼmo hapauʼniya vayaʼmogimo apakaiʼapimo huʼapaeʼmo, Lagaemo na agufa kavaʼmo higetaeʼmo afaʼa maiʼneta falisuna afinafeʼmo agava maiʼnone.

⁴ Lagaemo Sameliya taonifiʼmo uta haisunana taonifiʼmo lusi kava huʼa kafu nehaya afinaʼmogeta faligune. Lagaemo manileʼmo afaʼa fai maiʼnetaeʼmo faligune. Inagi lagaemo lagaiti lagufamo lavalelita uta Siliya vayaʼai apayapiʼmo apamigune. Apakaemo lagaemo afaʼa latesageta afaʼa maigune. Apakaemo kamitimo lahaesayana afaʼa faligune, huʼa huʼnae.

⁵ Inagi apakaemo aiseʼamo hani hugefeʼmo huʼnigeʼa he tiʼa Siliya ami vayaʼmogi seli noʼmo aliʼa he tiʼa ateʼnaya yategamo uʼa atupaʼaleʼmo avaʼyi huteʼapaeʼmo mago vekamo oʼmaiʼnigeʼa ageteʼapaeʼmo lusi kava huʼa hapau aiʼnae.

⁶ Siliya ami vayaʼmogi afiʼnayana Ala kava neʼmoʼa alopa agemo asole ami nofi vayaʼmogimo hosiʼapigi kame hisaya talalaʼapiʼenagi huʼa aliniʼa eʼnagenoʼaeʼmo apavamusa gemoʼmo huʼniya agufa kavaʼmo huʼnigeʼa Siliya vayaʼmogimo afiteʼa huʼapaeʼmo, Afiyo, huʼa, Isaleli kini vekamoʼmo miya faiʼnigeʼa Hiti kini vayanagi Isipi kini vayanagi ati vayaʼapigi huʼa eʼa kamemo lahaesayafeʼmo eʼnae, huʼa huʼnae.

⁷ Huʼa huʼnayaʼmofeʼmo aiseʼamo hani hugefeʼmo huʼnigeʼa he tiʼa malage huʼa seli noʼmo aliʼa he tiʼa ateʼnaya yategatiʼmo ataleʼa apaune heʼnae. Apakaemo ofalisayafeʼmo seli noʼapigi hosiʼapigi nokiʼapigi huʼa apataleʼa apaune heʼnae. Apakaemo mago yaʼapimo aliniʼa oʼuʼnae.

⁸ Ani lepolosi vayaʼmo eʼa seli noʼmo haneʼniya yateʼmo avaʼyi huteʼapaeʼmo mago seli nopiʼmo uʼa haiʼa neʼyaʼmo nege aniʼmo nege huʼnae. Apakaemo siluvagi goligi kukena yanagi huʼa aliteʼa alini uʼa mago haopalegamo fala ki maleʼnae. Halate eʼa alu seli nopiʼmo haneʼniya yaʼeʼmo alini uʼa fala ki maleʼnae.

⁹ Inagi apakaiʼapimo huʼapaeʼmo, Lagaemo kanale kavaʼmo osuʼnone. Hemenimo alagepa faigoko gemo huta hapa paisuna afinaʼmo afole aiʼniyana ge osuʼnone. Lagaemo ge osuta maiʼnisunageno neteʼmo eno afole aisiyaʼmoʼmo mago hanageke yaʼmo aligune. Hemenimo uta kini anaga vayaʼaifeʼmo hapa paigetao, huʼa huʼnae.

¹⁰ Inagi apakaemo uʼa Sameliya taonile yafa kegiʼyamo kipateʼmo yagaiʼnaya vayaʼaifeʼmo ina gemo huʼa keya aeʼnae. Lagaemo Siliya ami vayaʼmogi seli noʼmo haneʼniya yategamo uʼnonana mago vekamo oʼmaiʼnigeta lahau aiʼnone. Mago vekamo oʼmaiʼnigeta agege vayaʼmogimo apake aiʼnaya gemo oʼafige huʼnone. Siliya vayaʼmo ago uʼnageno muki yaʼapimo seli noʼapifiʼmo afaʼageʼmo haneʼniye. Apakaemo hosi anagaʼmogi nofiʼe noki anagaʼmogi nofiʼeʼmo hatu maeʼa oʼapateʼnae, huʼa huʼnae.

¹¹ Kipateʼmo neʼyagaiya vayaʼmogimo ani gemo afiteʼapaeʼmo keya aeʼa ge huʼnageʼa afiteʼapaeʼmo kini vekaeʼmo ha paiʼnae.

¹² Kini vekamoʼmo ani gemo afiteno haniʼilagamo he tino aliʼyaʼamo neʼaliya vayaʼaifeʼmo hapa painoʼaeʼmo, Siliya vayaʼmogimo ina kavafeʼmo apakesamo neʼafiye. Apakaemo lagaemo neʼyafeʼmo kafu huʼnona kavaʼmo lageteʼapaeʼmo seli noʼapimo ataleʼuʼa hiʼyagofa kotegamo fala kiʼnae. Apakaemo lagaemo taonimo ataleta malagamo uta nelamisunageʼapaeʼmo latafauteʼa taonitimo alisayafeʼmo apakesamo afiʼnae, huno hapa paiʼniye.

¹³ Magoke vekamo aliʼyaʼamo neʼaliya vekamoʼmo geʼaleʼmo aeno atagaina huno ha painoʼaeʼmo, Kahao ke hovanageta lagaemo mago vayaʼmo alita apatesunageʼa afaʼa maiʼnaya hosi anagapatiʼmo faefuʼa hosi anagaʼmo alini uʼa na agufa kavaʼmo afole aiʼnifigeʼa agegae. Siliya vayaʼmogimo hapaesayaʼmoʼmo kanalene. Apakaemo taonifiʼmo maiʼnaya vayaʼmo falisaya agufa kavaʼmo huʼageʼmo faligae, huno ha paiʼniye.

¹⁴ Inagi apakaemo mago vayaʼmo lekana paiʼnageʼa lole talalaʼe hosiʼeʼmo aliniʼa visayafeʼmo alo huʼnageno kini vekamoʼmo Siliya vayaʼaitegamo visayafeʼmo alino apatetenoʼaeʼmo, Na agufa kavaʼmo afole aiʼnifigi uta ageyo, huno hapa paiʼniye.

¹⁵ Inagi apakaemo Siliya vayaʼmo uʼnaya kateʼmo apakame huʼa Yoneni anitegamo uteʼa Siliya ami vayaʼmogi muki kukena yaʼe kame nehaya yaʼeʼmo kateʼmo ataleʼnageno asagauno aiʼnigeʼa ageʼnae. Ageteʼa ataleʼa atagineʼuʼa kini vekaeʼmo ha paiʼnae.

¹⁶ Taonifiʼmo maiʼnaya vayaʼmogimo ani gemo afiteʼapaeʼmo Siliya vayaʼmogi seli noʼapimo haneʼniya yategamo uʼa muki ataleʼa uʼnaya yaʼmo aliʼnae. Apakaemo asole falaovaʼmo alige malimo alige huʼnayaʼmofeʼmo Ala kava neʼmoʼa huʼniya agufa kavaʼmo huʼa kanale falaovamo tali kiloleʼmofi malimo sigisi kiloleʼmofi huʼa vani kinaleʼmo maketi huʼnae.

¹⁷ Kini vekamoʼmo ani agaeteʼmo yagaino neʼateya vekamo uno taonile kegiʼyamo alopa kipateʼmo afole aiʼniya kavateʼmo yagaisiyafeʼmo lekana paino ateʼniye. Yagaiʼniyaʼmonanafa magoʼe huʼa asole vayaʼmo apaya mukiki huʼa uʼa kipatetiʼmo aliʼa agoʼya faiʼa ataleʼnageno asagauno aiʼnigeʼa eʼa aeʼa lata paiʼnageno falisiya kavaʼmo huʼniye. Ilaisaʼmo Goti vekaʼalegamo kini vekamo eʼniya afinaʼmo Ilaisaʼmo ani kavafeʼmo aune gemo huʼniye. Ani afinaʼmo huʼniya geʼamo alagi afole aiʼniye.

¹⁸ Ilaisaʼmo kini vekaeʼmo ina gemo huno ha painoʼaeʼmo, Ega netepiʼmo mani agufa kanaleʼmo vayaʼmo Sameliya taonimo kipateʼmo uʼa kanale falaovamo tali kilomofi malimo sigisi kilomofi huʼa vani kinatoletiʼmo miya faigae, huno ha paiʼniye.

¹⁹ Ani neʼyagaiya vekamoʼmo Ilaisa geʼaleʼmo aeno atagaina hunoʼaeʼmo, Afiyo, huno, Ala kava neʼmoʼa kokuʼnapi yasi kakoʼmo alo hisigeno ani kavaʼmo afaʼa afole aisifiye, huno huʼnigeno Ilaisaʼmo ago ha painoʼaeʼmo, Alagi lama gemo huʼnaeʼmo, kagaemo ani kavaʼmo afole aisigeka ageganaʼmonanafa ani neʼyapatiʼmo oʼnegane, huno ha paiʼniye.

²⁰ Ani neʼyagaiya vekamo taonimo kipateʼmo he tino maiʼnigeʼa vayaʼmogi eʼa aeʼa lata paiʼnageno faliʼniya kavaʼmo Ilaisaʼmo huʼniya gemo afole aiʼniye.