2 Kini 6 - The Keyagana NT and 25 OT books

Koʼnemo aino katino anipiʼmo asagauno aiʼniya gemae

¹ Mago Gotitegati gemo aliniʼeʼa aeʼa hakalo nehaya vayaʼmogi Ilaisafeʼmo ha paiʼapaeʼmo, Afiyo, huʼa, Kagaeʼeʼmo maiʼnona mopamo aise mopatomogeno kanale huno nolate.

² Kahao ke honanagi, lagaemo afaʼa lategeta uta Yoneni anitegamo yosamo heʼya aiteta mukiʼamogitamo magoke magoke yosamo kofilituta Yoneni ani haigifiʼmo saufa notimo kigune, huʼa ha paiʼnagenoʼaeʼmo, Kanalenagi lapakaemo ani kavaʼmo hiyo, huno hapa paiʼniye.

³ Ani vayapatiʼmo mago vekamoʼmo hunoʼaeʼmo, Kahao ke honanagi, kagaemo lagaeʼeʼmo magokepiʼmo esanafeʼmo lahauʼniye, huno huʼnigenoʼaeʼmo, Kanalenageʼna lapakaeʼeʼmo magokepiʼmo ugune, huno huʼniye.

⁴ Inagi agaemo apakaeʼeʼmo magokepiʼmo uʼnae. Apakaemo uʼa Yoneni aniteʼmo avaʼyi huteʼapaeʼmo aepa faiʼa yosamo heʼya aiʼnae.

⁵ Apakaemo aliʼyaʼmo neʼaligenoʼaeʼmo mago vekamo koʼneʼamo aino katino anipiʼmo asagauno aiʼniye. Agaemo alopa gefatiʼmo ge hunoʼaeʼmo, Ala vekae, huno, Vaehae, mago vekamo koʼnemae, huno huʼniye.

⁶ Inagi Goti vekaʼamoʼmo hunoʼaeʼmo, Koʼnemo haiya yapiʼmo asagauno aiʼniye, huno ge huno afi geʼnigenoʼaeʼmo koʼnemo asagauno aiʼniya yapiʼmo ave liʼniye. Inagi Ilaisaʼmo mago aise yosamo akopamo heno yageno anipiʼmo yaga auʼnigeno koʼnemo aino anale huteno eno haineʼniye.

⁷ Ilaisaʼmo hunoʼaeʼmo, Kagaemo koʼnekamo aliyo, huno huʼnigeno ayaʼmo anipiʼmo atalegeno uno lamiʼnigeno aliʼniye.

Ilaisaʼmo Siliya ati vayaʼmo humi apateʼniya gemae

⁸ Siliya kini vekaʼe ami vayaʼaʼeʼmo Isaleli vayaʼeʼmo kamemo hisayafeʼmo eʼnae. Kini vekamoʼmo ati vayaʼaiteʼmo yagaiʼa apateʼnaya vayaʼaʼeʼmo magokepiʼmo gege huʼnagenoʼaeʼmo kini vekamoʼmo hunoʼaeʼmo, Mago mani koteʼmo uta yokamo maiteta ataleta mago muga koteʼmo uta yokamo maigune, huno hapa paiʼniye.

⁹ Hapa paiʼniyaʼmonanafa Goti vekaʼamo Ilaisaʼmo mago gemo avoʼmo kaeno atalegeno Isaleli kini vekalegamo uʼniye. Ani avopiʼmo hunoʼaeʼmo, Ehetapiye, huno, Siliya ami vayaʼmo mani koteʼmo egayaʼmofeʼmo uta hogo osiyo, huno huʼniye.

¹⁰ Inagi Isaleli kini vekamoʼmo ani gemo lekana paino afitenoʼaeʼmo mago vekamo alino ateʼnigeno uno Ilaisaʼmo ha paiʼniya koteʼmo Siliya vayaʼmo apakeʼniye. Ina kava huno Ilaisaʼmo kini vekaeʼmo alu koteʼe alu koteʼeʼmo oʼvisiyafeʼmo ehekae, huno ha paite ha paite huʼniye.

¹¹ Siliya kini vekamoʼmo ani kavafeʼmo hausoli huʼnigeno agesa alaʼamo afiʼniye. Agaemo yagaiʼa apateʼnaya vayaʼaifeʼmo ina ge huno ge huno apafi geʼniye. Lagae nofi vayapatiʼmo ina laʼmo muki afinaʼaeʼmo Isaleli kini vekamo ha neʼmae.

¹² Mago yagaino apateʼniya vekamoʼmo ha painoʼaeʼmo, O ala kini vekaʼnimogae, huno, lagaepatiʼmo mago vekamoʼmo ani kavaʼmo nosiyaʼmonanafa Ilaisakeʼmo ani Gotitegati gemo alinineno aeno hakalo nehiya vekamoʼmo Isaleli kini vekaeʼmo nehavana yapilagamo nehana gemo ha nepaiye, huno ha paiʼniye.

¹³ Inagi kini vekamoʼmo yagaiʼa neʼapataya vayaʼaifeʼmo hapa painoʼaeʼmo, Lapakaemo uta haiya haopalegamo neʼmaifigi kahauya huta ageyo. Nagaemo ati vayaʼnimo aliʼna apatesugeʼa uʼa atafaugae, huno hapa paiʼnigeʼa uʼa kahauya huʼa ageteʼapaeʼmo, Ilaisaʼmo Notani taonifiʼmo maiʼniye, huʼa huʼnae.

¹⁴ Hunayaʼmofeʼmo kini vekamoʼmo asole ati vayaʼmo alino apateʼnigeʼa apakaemo hosiʼapiʼe talalaʼapiʼeʼmo aliniʼa Notani taonifiʼmo haniʼilagamo uʼa avaʼyi huteʼa ani taonileʼmo faiʼa vego huʼnae.

¹⁵ Netepiʼmo Goti vekaʼamo aliʼyaʼamo neʼaliya vekamo nopatiʼmo he tino kumategamo uno lamino apakeyana Siliya ami vayanagi hosigi talalagi huʼa taonileʼmo ago faiʼa vego huʼnageno apakeʼniye. Agaemo uno Ilaisafeʼmo ha painoʼaeʼmo, Ala vekaʼnimogae, huno, Na agufa kavaʼmo hugune.

¹⁶ Ilaisaʼmo geʼaleʼmo aeno atagaina huno ha painoʼaeʼmo, Koli osuvo. Apakaemo asole ati vayaʼmo maiʼnayaʼmonanafa lagaemo magoʼe huʼa asole vayatimo maiʼnae, huno huteno.

¹⁷ Ilaisaʼmo ina gemo huno nunumuʼmo hunoʼaeʼmo, Ala kava nene, huno, Kagaemo ani vekamo aulagamo alika ayakeka ategenoʼa ani huʼnova nofi vayaʼmo apakeno, huno nunumuʼmo huʼnigeno Ala kava neʼmoʼa neya vekamo aulagamo alino ayakeʼnigeno Ilaisaʼmo maiʼniya aveleʼmo atagana huʼa hosi anaganagi talalagi huʼa maiʼa kili paeteʼa Ilaisateʼmo faiʼa vego huʼnageno apakeʼniye.

¹⁸ Inagi Siliya ami vayaʼmogimo Ilaisaʼmo atafausayafeʼmo neʼagenoʼaeʼmo Ilaisaʼmo nunumuʼmo hunoʼaeʼmo, Kagaemo ani Siliya vayaʼmogi apaulagamo alagi alika hani huka ataleʼnegeʼa afaʼa oʼageyo, huno huʼnigeno Ala kava neʼmoʼa apaulagamo alagi alino hani huno ataleʼniye.

¹⁹ Inagi Ilaisaʼmo Siliya vayaʼaitegamo uno ina gemo huno hapa painoʼaeʼmo, Lapakaemo ani ugune, hutapa huʼnaya taonifiʼmo mani kaʼmo oʼuʼniye. Kanalenagi lapakaemo eta nagaemo nakame higeʼna ani lapakaemo kahauya nehaya vekalegamo lapavaleliʼna uguve, huno huʼnigeʼa inagi apakaemo eʼa akame huʼnageno apavalelino Sameliya taonifilagamo uʼniye.

²⁰ Apakaemo taonifiʼmo ago uʼa haiteʼapaeʼmo Ilaisaʼmo nunumuʼmo hunoʼaeʼmo, Ala kava nene, huno kagaemo halate apaulagamo alika kanale huka apategeʼa ageʼa ayakeyo, huno huʼniye. Inagi Ala kava neʼmoʼa apaulagamo alino kanale huno apateʼnigeʼapaeʼmo, Sameliya taonifikeʼmo maiʼnone, huʼa ageʼnae.

²¹ Isaleli kini vekamoʼmo apaketenoʼaeʼmo Ilaisafeʼmo ha painoʼaeʼmo, Afoʼnimogae, huno, nagaemo kamitimo apamagisufiye, kamitimo apamagisufiye, huno ge huno afi geʼniyaʼmonanafa.

²² Ilaisaʼmo hunoʼaeʼmo, Haʼao, Kagaemo kame hutekaeʼmo apatafauʼnana vayaʼmo kamitimo nohapanaʼmofeʼmo ani vayaʼmo ohapao. Haʼao, kagaemo neʼyaʼe aniʼeʼmo apamitegeʼa kini vekaʼapilegamo viyo.

²³ Inagi kini vekamoʼmo alopa neʼyaʼmo yagita huno Siliya vayaʼmo apamiʼniye. Apakaemo ago neʼyaʼmo nege aniʼmo nege hutagenoʼaeʼmo inagi agaemo Siliya kini vekalegamo alino apateʼnigeʼa uʼnae. Ani afinatetiʼmo Siliya ati aise vayatoʼamo Isaleli koteʼmo magoʼe huʼa oʼmeʼnae.

Siliya ati vayaʼmogimo uʼa Sameliya taonileʼmo faiʼa vego huʼnaya gemae

²⁴ Mago kafugamo ago utegenoʼaeʼmo Meni-Henatiʼmo Siliya kini vekamoʼmo muki ati vayaʼamo apavaleno alino anupa hutegeʼa uʼa kame huteʼa Sameliya taonimo alisayafeʼmo eʼa malaga maiʼnae.

²⁵ Yatala afinaʼmo taonileʼmo faiʼa vego huteʼa maiʼnayaʼmofeʼmo Sameliya taonifi vayaʼmo neʼyafeʼmo lusi kava huʼa kafu huʼnae. Ani afinaʼmo nokiʼmo agenopamo miya faigefeʼmo huʼapaeʼmo 80 kinaletiʼmo miya faiʼnae. Vayaʼmogimo nama anagaʼmogi aifamo miya faigefeʼmo faefu kinaletiʼmo miya faiʼnae.

²⁶ Mago afinaʼmo Isaleli kini vekamoʼmo taonile yafa kegiʼyamo anagamo uneno nehigenoʼaeʼmo mago a kanomoʼmo agaefeʼmo keya aeno ge hunoʼaeʼmo, Ala kini vekaʼnimogae, huno, naha mao, huno huʼnigeno.

²⁷ Kini vekamoʼmo geʼaleʼmo aeno atagaina hunoʼaeʼmo, Ala kava neʼmoʼa kaha oʼmaeʼnisiyaʼmoʼmo nagaemo haiyategatiʼmo mago neʼyaʼmo aliʼna kamiguve. Kagaemo vitimofi nofi alagafati aniʼmofi huno haneʼnegaiye, huka kagesamo neʼafipiye.

²⁸ Inagi kini vekamoʼmo agaefeʼmo ge huno afi geʼniye. Kagaeteʼmo na agufa kavaʼmo afole aiʼnigenoʼaeʼmo kaipamoʼmo kana nehiye, huno huʼnigeno geʼaleʼmo ina ge huno aeno atagaina hunoʼaeʼmo, Ve mafaʼneʼnimo faliʼnigeno mago a kanomo ve mafaʼneʼeʼmo faliʼniye. Mani a kanomoʼmo naha painoʼaeʼmo, Hemenimo kagae ve mafaʼnemo kaetaʼa nesuʼafeʼmo alinika eno. Egamo nagae ve mafaʼnemo kaetaʼa negauʼae, huno naha paiʼniyaʼmofeʼmo

²⁹ mafaʼneʼnimo anipiʼmo kaetaʼa neʼnoʼae. Egamo nagaemo ha paiʼnaeʼmo, Ve mafaʼnekamo alinika egetaʼa kaetaʼa negauʼae, huʼna ha paiʼnovaʼmonanafa mafaʼneʼamo ago alino fala kiʼniye, huno ha paiʼniye.

³⁰ Kini vekamoʼmo ani gemo afitenoʼaeʼmo inagi agaemo kukena yaʼamo alino apake aiteno taonile yafa lafi kegiʼyamo anagamo neʼvigeʼapaeʼmo vayaʼmogimo agayana kukena yaʼamo afepiʼmo hau huʼniya kukenamo mekigana agufa kukena yaʼmo vaino aliʼnigeʼa ageʼnae.

³¹ Kini vekamoʼmo hunoʼaeʼmo, Nagaemo ani afinaʼmo Ilaisaʼmo Sefati mafaʼnemo lugoʼamo ohatagaisuvana Gotiʼa afaʼa kamitimo namagigiye, huno huteno

³² Ilaisaʼmo avalelino esiyafeʼmo mago vekamo alino ateʼnigeno uʼniye. Ani afinaʼmo Ilaisaʼmo noʼafiʼmo maiʼnigeʼapaeʼmo mago vayatama vayaʼmo eʼa agaeʼeʼmo magokepiʼmo maiʼnae. Kini vekamoʼmo ani alino ateʼnigeno eʼniya vekamo eno avaʼyi osuʼnigenoʼaeʼmo Ilaisaʼmo vayatama vayaʼaifeʼmo hapa painoʼaeʼmo, Ani kamitimo neʼapamagiya vekamoʼmo nagaemo lugoʼnimo hatagausiyafeʼmo mago vekamo alino ateʼnigeno neʼe. Neʼeyaʼmonanafa ani vekamo eno avaʼyi hisigetapaeʼmo kitamo kitapa alagi hu maleʼnigenoʼa agaemo nopiʼmo afaʼa eno haino meno. Kini vekageʼmo ani vekamo akame huno neʼe, huno hapa paiʼniye.

³³ Ilaisaʼmo ani gemo nehigenoʼaeʼmo ani vekamo ago eno avaʼyi nehigenoʼaeʼmo kini vekaʼeʼmo eno avaʼyi huʼniye. Kini vekamoʼmo Ilaisafeʼmo ha painoʼaeʼmo, Ala kava neʼmogeʼmo ani hosu afinaʼmo lagaeteʼmo alino afole aino ateʼniye. Na kava hinageʼnaeʼmo magoʼe huʼna agava maiguve, huno ha paiʼniye.