2 Kini 5 - The Keyagana NT and 25 OT books

Nemaniʼmo lepolosi kaitaʼamo hageʼniya gemae

¹ Mago vekamo agiʼamo Nemaniʼmo Siliya vayaʼmogi kini vekamo ami vayaʼaleʼmo yagaino apateʼniye. Ala kava neʼmoʼa Nemanitetiʼmo hapa maeʼnigeʼa Siliya vayaʼmogi kame vayaʼapiʼeʼmo kamemo huteno huno aeno apaka seʼniyaʼmofeʼmo Siliya kini vekamo aulagaleʼmo Nemaniʼmo hogote vekamo ala agi vekamo maiʼniye. Nemaniʼmo koli nosiya lokiya vekamo maiʼniyaʼmonanafa agaemo lepolosi kaitaʼmo hauʼniye.

² Mago afinaʼmo mago Siliya ati vayaʼmo kame hisayafeʼmo Isaleli kotegamo uteʼa Isaleli a mafaʼnemo atafauʼa avaleliʼa Siliya kotegamo eʼnageno Nemani aʼmo aliʼyaʼamo aliʼniye.

³ Agaemo Nemani a kanoeʼmo ha painoʼaeʼmo, Gotitegati gemo alinineno aeno hakalo nehiya vekamo Sameliya taonifiʼmo maiʼniye. Ani Goti vekaʼamoʼmo anaukamo kaitaʼamo afaʼa alino hageno ategaiyaʼmofeʼmo kanalenageno anaukamoʼmo agaetegamo afaʼa ugiye.

⁴ Inagi Nemaniʼmo ani gemo afitenoʼaeʼmo uno kini vekaeʼmo ha paiʼniye. Ani Isaleli a mafaʼnemoʼmo huʼniya gemo ha paiʼnigenoʼaeʼmo

⁵ Siliya kini vekamoʼmo agaefeʼmo ha painoʼaeʼmo, He, kanalene. Mago avoʼmo kaeʼna kamisugeka alinika uka Isaleli kini vekamo amigane, huno ha paiʼniyaʼmofeʼmo Nemaniʼmo tali hataleti tauseni kina siluvagi sigisiti kilo goligi alagepa kukena yaʼmo naya loleʼalanagi huno aliteno Sameliya taonifiʼmo alinino uʼniye.

⁶ Agaemo ani Siliya kini vekamoʼmo kaeʼniya avoʼmo alininuno Isaleli kini vekamo amiʼniye. Ani avopiʼmo hunoʼaeʼmo, Nagaemo aliʼyaʼnimo neʼaliya vekamo Nemaniʼmo lepolosi kaitaʼmo alagi alika hageka atesanafeʼmo kagaetegamo aliʼna ateʼnogeno uʼniye.

⁷ Isaleli kini vekamoʼmo ani avopiʼmo lekana paitenoʼaeʼmo kukena yaʼamo alino apake aitenoʼaeʼmo, Vae, na agufa kavaʼmo higenoʼaeʼmo Siliya kini vekamoʼmo nagaemo ani vekamo lepolosi kaitaʼamo aliʼna hageʼna atesuvafeʼmo ge huno atalegeno eʼniye. Nagaemo Gotiʼnamo maiʼnogeno lokiyaʼnimo haneʼninageʼna vayaʼmo afaʼa maisaya kavaʼmo huge vayaʼmo falisaya kavaʼmo huge hisufiye. Nagaemo afiʼnovana agaemo nagaemo kamemo nahaesiya kafeʼmo kahauya huʼnegaiye, huno huʼniye.

⁸ Inagi Goti vekaʼamo Ilaisaʼmo kini vekamo kukena yaʼamo alino apake aiʼniya gemo afitenoʼaeʼmo Ilaisaʼmo kini vekalegamo ina ge huno ge huno atalegeno uʼniye. Kagaemo na agufa kavaʼmo higekaeʼmo kukena yakamo alika apake aiʼnane. Kahaoke hovanagi ani vekamo alika ategeno nagaetegamo esigeʼna nagaemo aliʼna avelisugeno mago Gotitegati gemo alinineno aeno hakalo nehiya vekamo Isaleli kotegamo maiʼniye, huno hugiye.

⁹ Inagi Nemaniʼmo talalaʼafiʼmo uʼniye. Vayaʼagi hosigi huʼa magokepiʼmo uʼa Ilaisa no kipateʼmo avaʼyi huʼnae.

¹⁰ Ilaisaʼmo mago vekamo alino ateʼnigeno uno Nemanifeʼmo ha painoʼaeʼmo, Kagaemo uka Yoneni anipiʼmo seveniʼa kanaleʼmo aniʼmo falegenoʼa kaitakamo kahagesigeno afa kagufamo alino ha maleno, huno ha paiʼniye.

¹¹ Nemaniʼmo ani gemo afitenoʼaeʼmo lusi kava huno aipamo leʼnigeno agaemo Ilaisa notetiʼmo ataleno uʼniye. Agaemo hunoʼaeʼmo, Nagaemo nagesamo afiʼnaeʼmo, Agaemo emineno kumatetiʼmo nagetenoʼaeʼmo Ala kava neʼmo Gotiʼamofeʼmo nunumuʼmo huteno lepolosi yaʼmo nahauʼniya nahaopaleʼmo ayaʼmo alininuteno eteno huteno alino nahateno nategaiye, huno huʼniye.

¹² Namasakasi kotega Emana aniʼmoʼe Fapa aniʼmoʼeʼmo muki Isaleli kotega aniʼmo ago aeno aga seʼniye. Nagaemo ani lole anitalapiʼmo aniʼmo faleteʼna alagepa huʼna oʼmaigufiye, huno huteno lusi kava huno aipamo leʼnigeno ataleno uʼniye.

¹³ Inagi Nemani aliʼyaʼamo neʼaliya vayaʼmogi uʼa haopaletiʼmo agaefeʼmo huʼapaeʼmo, Afotimogae, huʼa, Gotitegati gemo alinineno aeno hakalo nehisiya vekamoʼmo alagi lokiya kavaʼmo huvo, huno kaha paiʼniyesinana afaʼa huʼnanesine. Agaemo kagaefeʼmo aniʼageʼmo falo, huno kaha paiʼniya kavaʼmo afaʼa akame huka hisana agufa gemo kaha paiʼniyanagi huvo, huʼa ha paiʼnae.

¹⁴ Inagi Nemaniʼmo geʼapimo afiteno uno Yoneni anipiʼmo Goti vekaʼamoʼmo huʼniya agufa kavaʼmo huno seveniʼa kanaleʼmo anipiʼmo nukuma neʼnigenoʼaeʼmo lepolosi kaitaʼamo alagi ago hageʼniye. Agufamo kanale agufamo saufa mafaʼnemo agufagana agufamo alino hamaleʼniye.

¹⁵ Agaeʼe aliʼyaʼamo neʼaliya vayaʼeʼmo halate atagineʼa Goti vekaʼalegamo eʼnae. Nemaniʼmo ha painoʼaeʼmo, Alagi lama gemo huʼnaeʼmo hemenimo nagaemo agovana ma mopafiʼmo muki kotegamo mago alu gotiʼa oʼmaiʼnifa Isaleli vayaʼmogitapa Gotikeʼmo maiʼniye. Maiʼniyaʼmofeʼmo nagaemo mago yaʼmo fikumo kamigesuve, huno huʼniyaʼmonanafa.

¹⁶ Ilaisaʼmo geʼaleʼmo ina ge huno aeno atagaina hunoʼaeʼmo, Ala kava neʼmo aulagaleʼmo alagi he tiʼna maiʼnova Gotiʼa maiʼniye, huʼna alagi lama gemo huʼnaeʼmo, Kagaetetiʼmo mago yaʼmo afaʼa oʼaliguve, huno huʼnigeno Nemaniʼmo Ilaisafeʼmo haʼao, huno, fikumo aliyo, huno lokiya vaino ge huʼniyaʼmonanafa Ilaisaʼmo oʼaliʼniye.

¹⁷ Inagi Nemaniʼmo hunoʼaeʼmo kahao ke hovanagi mago yaʼmo oʼalisanaʼmoʼmo kagaemo afaʼa nategeʼna mago mopamo lole nokilaʼmoganimo alisaʼa agufa mopamo kafiʼna aliguve. Nagaemo koʼnilegamo aliniʼnuʼna mopaletiʼmo Ala kava neʼmo ofalini hiʼyalamuʼmo huteʼna ofalinimo huguve. Nagaemo magoʼe huʼna alu gotigitefeʼmo atamoʼmo alagi leno saga lisiya ofalinimo osuge alu ofalinimo osuge huguve.

¹⁸ Osuguvaʼmonanafa Ala kava neʼmoʼa mago hosu kavaʼnimo alino atalesiyafeʼmo nahauʼniye. Ala vekaʼnimoʼmo uno Limani gotitefeʼmo mono hisiyafeʼmo mono nopiʼmo uno nehaigeʼnaeʼmo nagaemo agaeʼeʼmo magokepi lokaeʼna neʼuve. Kini vekamoʼmo nayateʼmo aliʼnigeʼna nagaeʼeʼmo naleʼyamo faiʼnove. Nagaemo Ala kava neʼmoʼa ani hosu kavaʼnimo alino atalesiyafeʼmo nahauʼniye. Hao ke nehove, huno huʼniye.

¹⁹ Ilaisaʼmo ha painoʼaeʼmo, Kagaemo kaipamoʼmo falu huʼninageka afaʼa uvo, huno ha paiʼnigeno Nemaniʼmo Ilaisaʼmo ataleno uʼniye.

Geheyiʼmo haʼye huʼniya gemae

²⁰ Geheyiʼmo Ilaisa aliʼyaʼamo neʼaliya vekamoʼmo agaiʼaeʼmo ina ge huno huʼniye. Ala vekaʼnimoʼmo Nemaniʼmo afaʼa ategeno uʼniye. Ani Nemaniʼmo amigefeʼmo huʼniya yaʼmo oʼaliʼniye. Ala kava neʼmo afaʼa maiʼniye, huʼna lama gemo huʼnaeʼmo, Nagaemo Nemaniʼmo akame huʼna nagu nagu huʼna uʼna agaetegatiʼmo mago yaʼmo aliguve, huno agesamo afiʼniye.

²¹ Inagi agaemo he tino Nemaniʼmo akame huno neʼvigenoʼaeʼmo Nemaniʼmo ageʼniyana mago vekamo akame huno nagu nagu huno eʼnigeno agetenoʼaeʼmo talalaʼamo atafauno ateʼneno uno lamino kateʼmo maiʼnigeno Geheyiʼmo eʼnigeʼana fotu huʼnaʼae. Nemaniʼmo Geheyifeʼmo hunoʼaeʼmo, Mago kavaʼmo lapakaetegamo afole aiʼnifiye, huno ge huno afi geʼnigenoʼaeʼmo.

²² Geheyiʼmo hunoʼaeʼmo, Haʼao, lagaemo alagepa huta maiʼnonaʼmonanafa ala vekaʼnimoʼmo alino nateʼnigeʼna eʼnova gemo kagaefeʼmo ina gemo huʼna kaha paigesuve. Hemenitomo Gotitegati gemo aliniʼeʼana aeʼana hakalo nehaʼa vekalaʼmo noʼaleʼmo eʼnaʼae. Anakaemo Ifalemu ave kotegatiʼmo eʼnaʼae. Kahao ke hovanagi kagaemo tali tauseni siluva moniʼe lole kukena yaʼeʼmo anamiyo.

²³ Nemaniʼmo hunoʼaeʼmo, Kahao ke hovanagi, sigisi tauseni siluva monimo aliyo, huno lokiya vaino ge hutenoʼaeʼmo sigisi tauseni siluva monimo lole kutalapiʼmo ku ai maleʼniye. Agaemo lole kukena yaʼeʼmo aliteno ani yaʼmo aliʼyaʼamo neʼaliʼa vekalaʼmo anamiteno Geheyiteʼmo utana hogotetetana alinitana Ilaisa notegamo viʼao, huno hana paiʼniye.

²⁴ Apakaemo Ilaisa noteʼmo uʼa avaʼyi huteʼapaeʼmo Geheyiʼmo ani yaʼmo aliteno alinino nopiʼmo uno haino maleʼnigeʼana lole vekalaʼmo Nemanitegamo atagineʼana uʼnaʼae.

²⁵ Anakaemo ago utaʼagenoʼaeʼmo Geheyiʼmo nopiʼmo uno haino Ilaisa aulagaleʼmo he tino maiʼnigeno Ilaisaʼmo ha painoʼaeʼmo, Geheyiyo, huno, Kagaemo haiyategamo uteka eʼnane, huno ge huno afi geʼniye. Geheyiʼmo hunoʼaeʼmo, Aliʼyakamo neʼaluva vekamo mago haopalegamo oʼuʼnove, huno ha paiʼniye.

²⁶ Ilaisaʼmo ha painoʼaeʼmo, Nauneʼnameʼmoʼa kagaeʼeʼmo magokepiʼmo lokaeno uʼnigeno ani vekamo talalafatiʼmo ataleno emineno kagaeʼeʼmo fotu huʼnaʼageno kageʼniye. Hemenimo monimo alige kukena yaʼmo alige olivi hoyamo alige nofi alaga hoyamo alige sipisipimo apavalege pulumakamo apavalege aliʼyaʼmo neʼaliya ve aʼnemo apavalege hisuna afinaʼmo haneʼnifiye.

²⁷ Ohaneʼniyaʼmofeʼmo Nemaniteʼmo haneʼniya agufa lepolosi kaitaʼmo kagaeteʼe kaginago vayaʼaiteʼeʼmo muki afinaʼmo haneme haneme ugiye, huno ha paiʼnigeno Geheyiʼmo lepolosi kaitaʼmo hauʼnigeno agufamo alagi alino yaveyaveʼage agufamo hamaleʼnigeno Ilaisategatiʼmo ataleno uʼniye.