2 Kini 4 - The Keyagana NT and 25 OT books

Ilaisaʼmo mago kogu a kanomo ha maeʼniya gemae

¹ Mago afinaʼmo mago Gotitegati gemo alinineno aeno hakalo nehiya vekamo aʼamo Ilaisategamo eno ha painoʼaeʼmo, Aliʼyakamo neʼaliya vekamo anauʼnimoʼmo faliʼniye. Kagaemo ageʼnanana agaemo Ala kava nefeʼmo koli huno maiʼnigeka ageʼnane. Anonaʼnimo haneʼnigeno hemenimo anonaʼalefeʼmo alisiya vekamo neʼe. Ani moni anonaʼaleʼmo oʼamisuvaʼmoʼmo mafaʼneʼnilaʼmo anavalesigeʼana aliʼyaʼaleʼmo kalavusi aliʼyaʼmo aligaʼae, huno huʼniye.

² Ilaisaʼmo ani gemo afitenoʼaeʼmo ha painoʼaeʼmo, Nagaemo haiya agufa kavaʼmo huʼna kaha maegauve. Kagae nopiʼmo mago na agufa yakamo haneʼniye, huno ge huno afi geʼnigenoʼaeʼmo, Nagaemo mago samofiʼmo olivi uvelitogeʼmo alagi haneʼniye. Alu yaʼnimo ohaneʼniye, huno ha paiʼniye.

^3-4 Inagi agaemo hunoʼaeʼmo, Uka muki kahaopaleʼmo maiʼnaya vayaʼaifeʼmo afaʼa haneʼnisiya samoeʼmo ge huka apafigeʼa samoʼapimo kamiyo. Magoke magoke samomo oʼalitapa asole samomo aliyo. Ani asole samomo nokafiʼmo alinika uka haiteka kitamo kiyo. Kagaeʼe mafaʼnekalaʼeʼmo ani asole samofiʼmo haneʼniya uvelimo alita samofiʼmo lakiyo. Lakika havaitetekaeʼmo mago haopaleʼmo malo, huno ha paiʼniye.

⁵ Agaemo atalenuno haopaleʼmo maiʼnaya vayaʼaitegatiʼmo samomo aliteno alinino agaeʼe mafaʼneʼalaʼeʼmo nopiʼmo uʼa haiteʼa kitamo kiʼniye. Mafaʼneʼalaʼmoganimo samomo aliniʼana agaetegamo eʼnaʼageno ani samofiʼmo uvelimo lakiʼniye.

⁶ A kanomoʼmo muki samoʼafiʼmo ago lakino havaitetenoʼaeʼmo agaemo mago mafaʼneʼaeʼmo ha painoʼaeʼmo, alu samomo alinika eno, huno huʼnigenoʼaeʼmo, Muki samoʼafiʼmo ago havaiteʼniye, huno ha paiʼniye. Inagi ani afinaʼatomo uvelimo magoʼe huno afole oʼaiʼniye.

⁷ Inagi a kanomoʼmo uno Goti vekaʼamo Ilaisafeʼmo ha paiʼnigeno Ilaisaʼmo ha painoʼaeʼmo, Kagaemo uka ani uvelimo maketi huteka monimo alika anonakalefeʼmo amiyo. Amiganaʼmonanafa mago atupa moniʼakamo afaʼa hanesigetapa kagaikaʼe mafaʼnekalaʼeʼmo ani moniletiʼmo afaʼa maisayafeʼmo miya faitetapa afaʼa maigae.

Mago Sunemi taonifi a kanomoʼmo Ilaisaʼmo yagaino ateʼniye gemae

⁸ Mago afinaʼmo Ilaisaʼmo Sunemi taonifiʼmo uʼniye. Ani taonifiʼmo agi haneʼniya a kanomo maiʼnenoʼaeʼmo Ilaisafeʼmo hunoʼaeʼmo, eka noʼnifatiʼmo neʼyaʼmo negapiye, huno ge huno afi geʼniye. Huʼniyaʼmofeʼmo Ilaisaʼmo muki afinaʼmo Sunemi taonifiʼmo unoʼaeʼmo ani a kanomo nopatiʼmo uno neʼyaʼmo neʼniye.

⁹ Mago afinaʼmo ani a kanomoʼmo anauʼamofeʼmo ha painoʼaeʼmo, Afiyo, huno, nagaemo ago ageʼnovana muki afinaʼmo notiʼalegamo neʼeya vekamo agaemo aote vekamo Goti vekaʼamo maiʼnigeʼna ageʼnove.

¹⁰ Kahao ke hovanagi laʼagaemo mago havaesiya yaʼmo lagae nopiʼmo anaga agotofulegamo ategauʼae. Ani anaga agotofulega nopiʼmo aeʼa hanagi maleʼnaya yapiʼmo hipagi hiʼyalamunagi siyagi lamugi hutaʼa malegauʼae. Ani vekamo esiya afinaʼmo inagi agaemo ani anaga agotofulega nopiʼmo maigiye, huno ha paiʼniye.

¹¹ Mago afinaʼmo Ilaisaʼmo halate enoʼaeʼmo ani anaga agotofule aeʼa hanagi maleʼnaya yapilaga uno haino hipaʼaleʼmo havaeʼniye.

¹² Agaemo maino hakaleʼnenoʼaeʼmo aliʼyaʼamo neʼaliya vekamo Geheyaifeʼmo ha painoʼaeʼmo, Ani Sunemi a kanoeʼmo keya aegeno eno, huno huʼnigenoʼaeʼmo ge hunigeno ani a kanomo eno aulagaleʼmo he tino maiʼniye.

¹³ Inagi Ilaisaʼmo Geheyaifeʼmo ha painoʼaeʼmo, Ani a kanoeʼmo ina ge huka ge huka afi go. Kagaemo ani lusi aliʼyaʼmo aliteka laʼagaemo alagepa huka laʼaha maeʼnane. Ilaisaʼmo haiya kava huno kaha maegaiye. Agaemo uno kini vekamofi ami vayaʼaiteʼmo yagaino apateʼniya vekamofi huno mago kanale kavaʼmo kagaetegamo hisiyafeʼmo ge huno afi gesifiye, huka ge huka afi go. Inagi Geheyaiʼmo uno ani a kanoeʼmo ge huno afi geʼnigenoʼaeʼmo a kanomoʼmo hunoʼaeʼmo, Haʼao, huno, Nagaemo vayaʼnimogi folagapiʼmo kanale huʼna maiʼnove, huno ha paiteno ataleno uʼniye.

¹⁴ Ilaisaʼmo ha painoʼaeʼmo, Ani gemo huʼniyaʼmonanafa agaetegamo na agufa kavaʼmo huguve, huno huʼnigeno Geheyaiʼmo hunoʼaeʼmo, Agaemo mafaʼneʼamo oʼmaiʼnigeno anauʼamoʼmo ago kosuna leʼniye.

¹⁵ Inagi Ilaisaʼmo Geheyaifeʼmo ha painoʼaeʼmo, Ani a kanoeʼmo ha paigeno eno. Geheyaiʼmo ha paiʼnigeno eno Ilaisa kipateʼmo he tiʼniye.

¹⁶ Ilaisaʼmo a kanoeʼmo ina gemo huno ha painoʼaeʼmo, Henaga kafugamo mani agufa kaileʼmo ve mafaʼnekamo anu kigane, huno ha paiʼnigeno, Haʼao, huno, Ala vekaʼnimogae, Goti vekaʼamogae, huno, nagaefeʼmo aigofe gemo osuvo, huno ha paiʼniye.

¹⁷ Ha paiʼniyaʼmonanafa ani a kanomo aipaguʼeʼmo maiteno henaga kafugamo lekana pai maleʼniya kaileʼmo Ilaisaʼmo huʼniya agufa kavaʼmo huno ve mafaʼnemo alino ateʼniye.

¹⁸ Mafaʼnemo kosino alopa hegekana nehunoʼaeʼmo mago afinaʼmo agaemo afoʼamotegamo uʼniye. Afoʼamoʼmo vitimo nehatagaya aliʼyaʼmo neʼaliya vayaʼeʼmo hoyafiʼmo maiʼniye.

¹⁹ Mafaʼnemoʼmo afoʼamofeʼmo hunoʼaeʼmo, Nagenopae, nagenopae, huno huʼnigeno afoʼamoʼmo mago aliʼyaʼamo neʼaliya vekaeʼmo ha painoʼaeʼmo, Ani mafaʼnemo avalelika itaʼamotegamo uvo, huno ha paiʼniye.

²⁰ Agaemo avalelino itaʼamotegamo uʼnigeno mafaʼnemo itaʼamo aluteʼmo havaeno maime uno feluga kukuʼmo faliʼniye.

²¹ Inagi itaʼamoʼmo ani mafaʼnemo agufaʼamo anagamo alinino uno haino Goti vekaʼamo hipaleʼmo maleteno kumategamo uno lamiteno kitamo ki maleʼniye.

²² Agaemo anauʼamofeʼmo keya aeno ge hunoʼaeʼmo, Kahao ke hovanagi nagaemo malage huʼna uʼna Goti vekaʼamo ageteʼna atagineʼna esuvafeʼmo mago aliʼyaʼmo neʼaliya vekaeʼmo ha paigenoʼa nokimo avalelino nagaetegamo eno, huno huʼnigenoʼaeʼmo.

²³ Anauʼamoʼmo hunoʼaeʼmo, Na agufa kava higekaeʼmo hemenimo visanafeʼmo nehane. Hemenimo Sapati afinaʼmofi saufa kaimo alopa hopa afinaʼmofi huno afole oʼaiʼniye, huno huʼnigenoʼaeʼmo, Kanalenagi, maiʼnegeʼnao, huno huʼniye.

²⁴ Aliʼyaʼmo neʼaliya vekamoʼmo a kanomo fai maisiya yaʼmo nokileʼmo maleʼnigeno a kanomoʼmo ha painoʼaeʼmo, Lagaemo utaeʼmo nokimoʼmo malage huno visiya kavaʼmo kagaemo huvo. Vase huka uvo, huʼna osisuvana malage huta ugune, huno ha paiʼniye.

²⁵ Inagi a kanoʼe aliʼyaʼmo neʼaliya vekaʼeʼmo Kamo avefiʼmo Goti vekaʼalegamo uʼnaʼae. Anakaemo afagiʼaleʼmo neʼaʼagenoʼaeʼmo Ilaisaʼmo anaketenoʼaeʼmo aliʼyaʼamo neʼaliya vekamo Geheyaifeʼmo ha painoʼaeʼmo, Ago, huno, Ani Sunemi a kanomo neʼe.

²⁶ Kahao ke hovanagi kagaemo agaetegamo nagu nagu hukuka agetekaeʼmo, Alagepa huka maiʼnapiye. Anaukamoʼmo afaʼa maiʼnifiye. Mafaʼnekamo afaʼa maiʼnifiye, huka ge huka afi go, huno ha paiʼnigeno Geheyaiʼmo uno ani ge huno afi geʼnigenoʼaeʼmo a kanomoʼmo afaʼa maiʼnone, huno ha paiʼniye.

²⁷ Ha paiʼniyaʼmonanafa a kanomo eno aveleʼmo Goti vekaʼalegamo avaʼyi hutenoʼaeʼmo ape huno maiʼneno Ilaisa aiyaleʼmo atafauʼniye. Geheyaiʼmo agaetegamo eno aiyaleʼmo oʼatafausiyafeʼmo aiseʼamo alino agoʼya faisiyafeʼmo huʼnigenoʼaeʼmo Goti vekaʼamoʼmo hunoʼaeʼmo, Afaʼa ato. Agupi mafanemoʼmo lusi kana yaʼmo aliʼniyaʼmonanafa Ala kava neʼmoʼa naha opaino alino fala kiʼniye.

²⁸ Inagi a kanomoʼmo hunoʼaeʼmo, Nagaemo Ala vekaʼnimogaeʼmo, ve mafaʼnemo namiyo, huʼna kaha paiʼnofiye. Humi oʼnato, huʼna kaha opaiʼnofiye.

²⁹ Ilaisaʼmo ani gemo afitenoʼaeʼmo Geheyaifeʼmo ha painoʼaeʼmo, Kagaemo alo huka hayopa kayoʼnimo aliteka Sunemi taonifilagamo malage huka uvo. Mago vekamo agetekaeʼmo he tika maiʼnekaeʼmo alagi ge oʼamamao. Mago vekamoʼmo ge kamamaesigekaeʼmo geʼaleʼmo aeka atagaina huka ge osuvo. Kagaemo alagi ani a kanomo noteʼmo uka hayopa kayoʼnimo ani mafaʼneʼamo augosafiʼmo malo, huno ha paiʼniyaʼmonanafa.

³⁰ Mafaʼnemo itaʼamoʼmo Ilaisafeʼmo ha painoʼaeʼmo, Hemenimo Ala kava neʼmo afaʼa maiʼnigeka kagaemo afaʼa maiʼnane, huʼna alagi lama gemo huʼnaeʼmo, Kataleʼna oʼuguve, huʼna lama gemo nehuve, huno ha paiʼniyaʼmofeʼmo Ilaisaʼmo he tino a kanomo akame huno uʼniye.

³¹ Geheyaiʼmo hogoteno uno Ilaisa hayopa kayoʼmo ani mafaʼnemo augosafiʼmo maleʼniyaʼmonanafa gemo oʼafige ge osuge huʼniye. Afole oʼaiʼniyaʼmofeʼmo Geheyaiʼmo ataleno Ilaisategamo uno fotu hutenoʼaeʼmo ina ge huno ha paiʼniye. Mafaʼnemo he otiʼniye, huno huʼniye.

³² Inagi apakaemo noteʼmo uʼa avaʼyi huteʼapaeʼmo Ilaisaʼmo uno anaga agotofulega noʼmo kipatetiʼmo ageyana ani mafaʼnemo agufaʼamo hipaleʼmo haneʼnigeno ageʼniye.

³³ Ageʼniyaʼmofeʼmo uno haiteno kitamo ki maleʼneno Ala kava nefeʼmo nunumuʼmo huʼniye.

³⁴ Agaemo hipaleʼmo uno haino mafaʼne kanomo agufaleʼmo ape huno maiʼnenoʼaeʼmo avayagi aulagagi ayatalanagi huno mafaʼne kanomo avayafinagi aulagalenagi ayatalatenagi huno maleʼniye. Ilaisaʼmo ani kavaʼmo huʼnigenoʼaeʼmo mafaʼne kanomo agufaletiʼmo aiseʼamo amuko huʼniye.

³⁵ Inagi Ilaisaʼmo hipaletiʼmo ataleno ani anaga nopiʼmo uneno huteno halate hipaleʼmo uno haino mafaʼne kanoleʼmo halate ape huʼnigeno mafaʼne kanomoʼmo seveniʼa afinaʼmo katamu huteno aulagamo ageno ayakeʼniye.

³⁶ Ilaisaʼmo Geheyaifeʼmo ina gemo huno ha painoʼaeʼmo, Kagaemo uka mafaʼne kanomo itaʼamofeʼmo ha paigeno eno. Inagi Geheyaiʼmo ani kavaʼmo huʼnigenoʼaeʼmo ani a kanomo eno haineno anaga agotofulega nopiʼmo uno haiʼnigeno Ilaisaʼmo ha painoʼaeʼmo, Mafaʼnekamo afaʼa avalegane, huno huʼniye.

³⁷ Inagi a kanomo uno haino Ilaisa haopaleʼmo aiyafiʼmo aleʼyamo faiʼneno ape huteno he tino mafaʼneʼamo avalelino uno lamiʼniye.

Ilaisaʼmo hosu neʼyaʼmo alino alagepa neʼyaʼmo hamaleno ateʼniya gemae

³⁸ Isaleli kotegamo mago hosu afinaʼmo afole aiʼnigeʼapaeʼmo vayaʼmo neʼyafeʼmo kafu huʼnae. Ani afinaʼmo Ilaisaʼmo halate uno Giligali taonifiʼmo maiʼniye. Mago afinaʼmo mago Gotitegati gemo aliniʼeʼa aeʼa hakalo nehaya vayaʼmo Ilaisa aulagaleʼmo itopaleʼmo maiʼnageno Ilaisaʼmo aliʼyaʼamo neʼaliya vekaeʼmo ha painoʼaeʼmo, Alopa samomo alika ani Goti gemo aliniʼeʼa aeʼa hakalo nehaya vayaʼmogi supumo kao.

³⁹ Ani vayapatiʼmo mago vekamoʼmo uno supuʼeʼmo kaesiya hagomupaeʼmo kahauya huʼniyaʼmonanafa afela konogeʼmo agetenoʼaeʼmo lagino kenaʼafiʼmo maleno havaiteʼniye. Agaemo alinineno lagauno lagauno supufiʼmo ateʼniye. Ateʼniyaʼmonanafa oʼageʼnaya yaʼmo haneʼniye.

⁴⁰ Supumo ago leʼnigeʼapaeʼmo inagi apakaemo nesayafeʼmo hatiʼa yuvapaʼapifiʼmo maleʼnae. Apakaemo neʼneʼapaeʼmo, Goti vekaʼamogae, huʼa, samofiʼmo haneʼniya neʼyaʼmo nesunana faligunanageta afaʼa oʼnegaune, huʼa huteʼa oʼneʼnae.

⁴¹ Inagi Ilaisaʼmo hapa painoʼaeʼmo, mago vitiletiʼmo alo huʼnaya falaovamo aliniteyo, huno hapa paiʼnigeʼa aliniʼa eʼnagenoʼaeʼmo Ilaisaʼmo alino samofiʼmo yaga autenoʼaeʼmo, Supumo hatika muki vayaʼaina apamiyo, huno ha paiʼnigeno samofi supumo afaʼa haneʼnigeʼa neʼnae.

Ilaisaʼmo vani hataletiʼa vayaʼmo neʼyaʼmo apamiʼniya gemae

⁴² Mago afinaʼmo mago vekamo Meyo Yaliya taonifatiʼmo ataleno mago hogoteʼa hatagauʼnaya malifatiʼmo tuvetiʼa mali peleti mayaʼe saufaʼmo leʼniya vitiʼeʼmo alino kuʼafiʼmo aino alinino Ilaisategamo eʼniye. Eno avaʼyi huteno ani neʼyaʼmo Ilaisaʼmo amiʼnigeno Ilaisaʼmo aliʼyaʼamo neʼaliya vekaeʼmo ha painoʼaeʼmo, Muki vayaʼmo nesayafeʼmo alika apamiyo, huno ha paiʼniyaʼmonanafa

⁴³ aliʼyaʼamo neʼaliya vekamoʼmo hunoʼaeʼmo, Ae, huno, mani aise neʼyaʼatomo vani hataletiʼa vayaʼmo apamisufiye kanale osugiye, huno huʼnigeno Ilaisaʼmo halate ha painoʼaeʼmo, Muki vayaʼmo nesayafeʼmo alika apamiyo. Ala kava neʼmoʼa naha painoʼaeʼmo, Mukiʼamogimo nesagenoʼaeʼmo atupa neʼyaʼamo afaʼageʼmo hanegaiye, huno naha paiʼniyaʼmofeʼmae, huno ha paiʼniye.

⁴⁴ Inagi aliʼyaʼamo neʼaliya vekamoʼmo muki vayaʼaina apamiʼnigeʼa neʼnageno apamu huʼnigeno Ala kava neʼmoʼa huʼniya agufa kavaʼmo huno atupa neʼyaʼamo afaʼa haneʼniye.