Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Kini 3 - The Keyagana NT and 25 OT books


Movapu vayaʼmogimo magoʼe huʼa Isaleli vayaʼai apaiyafiʼmo maisayafeʼmo Isaleli vayaʼeʼmo kamemo huʼnaya gemae

1 Yihosafatiʼmo Yuta vayaʼmogi kini vekamo eitiniʼa kafugamo maiʼnigenoʼaeʼmo Yiholamuʼmo Ehapi mafaʼnemoʼmo Isaleli vayaʼmogi kini vekamo hamaletenoʼaeʼmo Sameliya taonifiʼmo tuolofuʼa kafugamo yagaino apateʼniye.

2 Yiholamuʼmo Ala kava neʼmo aulagaleʼmo hosu kavaʼmo huʼniyaʼmonanafa agaemo ita afoʼalaʼmoganimo huʼnaʼa agufa hosu kavaʼmo alagi osuʼniye. Haʼao. Agaemo afoʼamoʼmo Meyotefeʼmo mono hisayafeʼmo aote posimo alo huʼniya posimo alino ataleʼniye.

3 Ataleʼniyaʼmonanafa agaemo kini vekamo Yelomovamuʼmo Nimati mafaʼnemoʼmo Isaleli vayaʼmogimo hosu kavaʼmo hisayafeʼmo aino apavayu hulino eʼniya agufa hosu kavaʼmo oʼataleʼnifa magoʼe huno huʼniye.

4 Movapu vayaʼmogi kini vekamo Misaʼmo asole sipisipi anagaʼamo maiʼniye. Agaemo Isaleli kini vekamo aiyafiʼmo maiʼniyaʼmofeʼmo muki kafugaʼae kafugaʼaeʼmo agaemo Isaleli kini vekamo vani hataleti tauseniʼa aikeli sipisipigi vani hataleti tauseniʼa ve sipisipigi vani hataleti tauseniʼa ve sipisipimogi apayokaʼmo lagauʼniya apayokaʼenagi huno amiʼniye.

5 Aminiyaʼmonanafa Isaleli kini vekamo Ehapiʼmo faliʼnigenoʼaeʼmo Misaʼmo Isaleli vayaʼmogi saufa kini vekamo gemo oʼafino magoʼe huno ani takesimo oʼamiʼniye.

6 Inagi kini vekamo Yiholamuʼmo Sameliya taonifatiʼmo ataleno muki Isaleli ati vayaʼamo apavaleno alino anupa huʼniye.

7 Agaemo Yuta kini vekamo Yihosafatitegamo ina ge huno ge huno atalegeno uʼniye. Movapu kini vekamoʼmo nagaetegamo ge oʼafi kavaʼmo huʼniye. Movapu vayaʼeʼmo kamemo hisuvategamo nagaeʼeʼmo magokepiʼmo egetaʼa utaʼa kame huguʼafiye. Yihosafatiʼmo geʼaleʼmo aeno atagaina hunoʼaeʼmo, Nagaemo uʼna haiguve. Kame hisunafeʼmo nagaemo kagaekana huʼna maige vayaʼnimo vayakagana huʼa maige hosi anagaʼnimo hosi anagakagana huʼa maige huʼnae.

8 Lagaemo haiya kateʼmo akame huta uta kame hugune, huno ge huno afi geʼnigenoʼaeʼmo, Lagaemo Inomu kaʼme kotega kateʼmo akame huta ugune, huno ha paiʼniye.

9 Inagi Isaleli kini vekamo Yiholamuʼagi Yuta kini vekagi Inomu kini vekagi huʼa ati vayaʼapimo apavaleteʼa uʼnae. Apakaemo ani kaʼmo aiʼa vego huʼa seveniʼa afinaʼmo uʼnagenoʼaeʼmo ati vayaʼe apakame huʼa uʼnaya afu anagaʼmogiʼeʼmo nesaya aniʼmo ohaneʼniye.

10 Isaleli kini vekamoʼmo hunoʼaeʼmo, Vae, huno, Ala kava neʼmoʼa lagaemo loleʼe magoʼe kini vayaʼmo lavaleno alino anupa huno lateʼniyanageno lavaleno Movapu vayaʼai apayapiʼmo apamigiye, huno huʼniye.

11 Huʼniyaʼmonanafa Yihosafatiʼmo Yiholamufeʼmo ina ge huno ge huno afi geʼniye. Magoke vekamo Ala kava netegati gemo alinineno aeno hakalo nehiya vekamo oʼmaiʼnifiye. Inagi maiʼnisiyaʼmoʼmo lagaemo agaefeʼmo ha paisunageno agaemo Ala kava nefeʼmo ge huno afi gegaiye. Isaleli kini vekamo mago aliʼyaʼamo neʼaliya vekamoʼmo geʼaleʼmo aeno atagaina hunoʼaeʼmo, Ilaisaʼmo Sefati mafaʼnemo maiʼniye. Hogoteno Ilaiya aliʼyaʼamo neʼaliya vekamo maiʼniye, huno ha paiʼnigeno

12 Yihosafatiʼmo afiteno hunoʼaeʼmo, Ala kava neʼmo geʼamo agaiʼaʼeʼmo haneʼniye, huno huʼniyaʼmofeʼmo Isaleli kini vekagi Yihosafatiʼagi Inomu kini vekagi huʼa Ilaisategamo uʼa lamiʼnae.

13 Inagi Ilaisaʼmo Isaleli kini vekaeʼmo hunoʼaeʼmo, Kagaeʼeʼmo na agufa kavaʼmo huguʼae. Kagaemo afokamoʼmo gemo aliniʼeʼa aeʼa hakalo nehaya vayaʼalegaʼe itakamoʼmo gemo aliʼniʼeʼa aeʼa hakalo nehaya vayaʼalegaʼeʼmo uvo, huno ha paiʼnigenoʼaeʼmo Isaleli kini vekamoʼmo hunoʼaeʼmo, Haʼao, Ala kava neʼmoʼa lagaemo loleʼe magoʼe kini vayaʼmo lavaleno alino anupa huno lateʼniyanageno lavaleno Movapu vayaʼai apayapiʼmo apamigiye, huno ha paiʼniye.

14 Inagi Ilaisaʼmo hunoʼaeʼmo, Nagaemo lama gemo huʼnaeʼmo, Ala kava neʼmoʼa muki vayaʼaiteʼmo yagaino neʼapateya vekamo aulagaleʼmo alagi he tiʼna maiʼnova Gotiʼa maiʼniye, huʼna lama gemo huʼnova kava huʼnaeʼmo, Nagaemo Yuta kini vekamo Yihosafatifeʼmo alagepa huʼna nagesamo oʼafiʼnovesinana okagege aiʼna afe leʼna okagege huʼnovesine.

15 Osuʼnovesinaʼmonanafa lapakaemo uta mago apayatetiʼmo ame aliʼnageno age aiʼniya kavateʼmo alagepa huno ageʼnisiya vekamo avalelita eyo, huno hapa paiʼniye. Inagi ani vekamo eno apayatetiʼmo ame aliʼnageno age aiʼnigeno Ala kava neʼmoʼa Ilaisa agufaleʼmo ayaʼmo maleno ateʼniye.

16 Inagi Ilaisaʼmo hapa painoʼaeʼmo, Ala kava neʼmoʼa hunoʼaeʼmo, Lapakaemo ani kagoʼmu koteʼmo asole ani kaʼmo valiyo, huno huʼniye.

17 Ani kavatefeʼmo Ala kava neʼmoʼa hunoʼaeʼmo, Lapakaemo yasimofi koʼmofi hutapa oʼagegayaʼmonanafa ani kagoʼmu koteʼmo ani yapiʼmo aniʼmo maleno havai tegaiyaʼmofeʼmo lapakaegi pulumaka anagatapigi muki alu afu anagatapigi huʼa afaʼa negae, huno hapa paiʼniye.

18 Ilaisaʼmo magoʼe gemo hunoʼaeʼmo, Ala kava neʼmoʼa aniʼmo lapamisiya kavafeʼmo alopa kavane, huno agesamo oʼafiʼniye. Aise yaʼatomo haneʼniyaʼmofeʼmo Ala kava neʼmoʼa Movapu vayaʼmo apavalelineno lapayapiʼmo apategaiye.

19 Lapakaemo muki kanale taonifiʼe muki lokiya yafa kegiʼyamo haneʼniya taonifiʼeʼmo kamemo hutetapa ani taonimo aligae. Lapakaemo muki kanale yosaʼapimo heʼya aige muki ani keli kotuʼapileʼmo aeta akani malege muki alagepa mopaʼaleʼmo yafaʼmo alita yaga au maleʼnisageʼa apakaemo magoʼe huʼa hoyamo aliʼa oʼvaige hugae, huno hapa paiʼniye.

20 Inagi egaʼamo netepiʼmo falaova ofalinimo nehaya kanaleʼmo malage huno aniʼmo Inomu haopalegatiʼmo eno kagoʼmu kotega ani kapiʼmo aniʼmo maleno havaiteʼniye.

21 Muki Movapu vayaʼmogimo afiʼapaeʼmo ani vayaʼmo loleʼe magoʼe kini vayaʼmogimo apakaeʼeʼmo kamemo hisayafeʼmo eʼnae, huʼa huʼnaya gemo ago afiʼnae. Afiteʼapaeʼmo afaʼa kamemo hisayafeʼmo kame hisaya neya vayaʼe alopa vayaʼeʼmo koʼapimo atupaleʼmo eʼa aliʼa anupa huʼa maiʼnae.

22 Egaʼamo netepiʼmo Movapu vayaʼmo he tiʼnageno yegemoʼmo aeno ha leʼniya yaʼmoʼa aniteʼmo aeʼnigenoʼaeʼmo aniʼmoʼa lusi kava huno haesaʼageʼmo huteno kolakana huʼnigeʼa ageʼnae.

23 Ageteʼapaeʼmo, ageyo, huʼa, kolaʼageʼmo huʼniye. Kini vayaʼmo apakaiʼapi apakaiʼapimo kamitimo apamagiʼnae. Movapu vayaʼmogitapae, huʼa, Hemenimo uta seli noʼapimo haneʼniya yatetiʼmo muki yaʼapimo aligune.

24 Inagi apakaemo Isaleli vayaʼmogi seli notegamo uʼa avaʼyi huʼnageʼapaeʼmo Isaleli vayaʼmo he tiʼa Movapu vayaʼeʼmo kamemo huteʼa alagi apavegala aeʼa kamitimo hapaeli hapaeliʼa Movapu koteʼmo uʼa haiʼnae.

25 Apakaemo muki taoniʼapimo aliʼa hosu huʼa atalege muki Isaleli vayaʼmogimo alagepa mopaʼapileʼmo yafaʼmo aliʼa yaga auʼnageno yafaʼmoʼa mopamo aeno ati kaeno atalege muki ani keli kotuʼapimo avayaleʼmo aeʼa akani malege muki kanale yosaʼapimo heʼya aiʼa atalege huʼnae. Movapu vayaʼmogi alopa taoniʼapimo Ki Halaseti taonimo afaʼa haneʼnigeʼa katipila atiletiʼmo nehaya ati vayaʼmogimo uʼa ani taonileʼmo faiʼa vego huʼneʼa kamemo huʼnae.

26 Movapu kini vekamoʼmo apakeʼniyana ani kame vayaʼnimogimo aeʼa naga segae, huno ageʼniyaʼmofeʼmo agaemo naipemo aliʼneʼa lusi kava huʼa kame nehaya ati vayaʼmo seveni hataletiʼamo apavaleʼnigeʼa apakaemo taonifatiʼmo ataleʼa apaune hetaleʼa Inomu kini vekalegamo ugefeʼmo amalageka huʼnayaʼmonanafa afaʼa visaya agufa kavaʼmo osuʼniye.

27 Inagi Movapu kini vekamo falisigenoʼaeʼmo agae aimuʼyaleʼmo maisiya yege mafaʼneʼamo kamitimo amagino Movapu vayaʼmogi gotiʼapimoʼmo atafiʼmo alagi leno saga lisiya ofalinimo taonile yafa kegiʼyaleʼmo huʼniye. Apakaemo Isaleli vayaʼaifeʼmo lusi kava huʼa apaipamo leʼa apateʼnageʼapaeʼmo ataleʼa koʼapilegamo halate uʼnae.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ