2 Kini 2 - The Keyagana NT and 25 OT books

Gotiʼa Ilaiyaʼmo kokuʼnapiʼmo avalelino uno haiʼniya gemae

¹ Ala kava neʼmoʼa Ilaiyaʼmo mago alino vego vego nehiya yasifiʼmo avalelino kokuʼnapiʼmo uno haisiya afinaʼmo ago hogo huʼnigeʼanaeʼmo Ilaiyaʼe Ilaisaʼeʼmo Giligali taonifatiʼmo ataleʼana uʼnaʼae.

² Ilaiyaʼmo Ilaisafeʼmo ha painoʼaeʼmo, Kahaoke hovanagi, Ala kava neʼmoʼa nagaefeʼmo, Meto taonifilagamo uvo, huno naha paiʼniyaʼmofeʼmo manileʼmo maiyo, huno ha paiʼnigenoʼaeʼmo Ilaisaʼmo ha painoʼaeʼmo, Ala kava neʼmo afaʼa maiʼnigekaeʼmo kagaemo afaʼa maiʼnane, huʼna alagi lama gemo huʼnaeʼmo, Kataleʼna oʼuguve, huʼna alagi lama gemo nehuve, huno ha paiʼnigeʼana Meto taonifiʼmo uʼnaʼae.

³ Gotitegati gemo aliniʼeʼa aeʼa hakalo huʼa hapa nepaiya vayaʼmogimo mago vayaʼmo aliʼa apaya maleʼnaya vayaʼmo Meto taonifiʼmo maiʼnaya vayaʼmogimo eʼa Ilaisafeʼmo ha paiʼapaeʼmo, Hemenimo Ala kava neʼmoʼa kava vekakamo avalelino visigeno magoʼe huno yagaino oʼnategaiye, huka afiʼnapiye, huʼa ge huʼa afi geʼnagenoʼaeʼmo, He, ago afiʼnovanagi ge osiyo, huno hapa paiʼniye.

⁴ Inagi Ilaiyaʼmo Ilaisafeʼmo ha painoʼaeʼmo, Ala kava neʼmoʼa nagaefeʼmo, Yeliko taonifilagamo uvo, huno naha paiʼniyaʼmofeʼmo kahaoke hovanagi, manileʼmo maiyo, huno ha paiʼniyaʼmonanafa Ilaisaʼmo ha painoʼaeʼmo, Ala kava neʼmo afaʼa maiʼnigekaeʼmo kagaemo afaʼa maiʼnane, huʼna alagi lama gemo huʼnaeʼmo, Kataleʼna oʼuguve, huno ha paiʼnigeʼana Yeliko taonifiʼmo uʼnaʼae.

⁵ Gotitegati gemo aliniʼeʼa aeʼa hakalo huʼa hapa nepaiya vayapatiʼmo Yeliko taonifiʼmo maiʼnaya vayaʼmogi eʼa Ilaisafeʼmo ha paiʼapaeʼmo, Hemenimo Ala kava neʼmoʼa kava vekakamo avalelino visigeno magoʼe huno yagaino oʼnategaiye, huka afiʼnapiye, huʼa ge huʼa afi geʼnagenoʼaeʼmo, He, ago afiʼnovanagi ge osiyo, huno hapa paiʼniye.

⁶ Ilaiyaʼmo Ilaisafeʼmo ha painoʼaeʼmo, Ala kava neʼmoʼa nagaefeʼmo, Yoneni anitegamo uvo, huno naha paiʼniyaʼmofeʼmo kahaoke hovanagi manileʼmo maiyo, huno ha paiʼniyaʼmonanafa Ilaisaʼmo ha painoʼaeʼmo, Ala kava neʼmo afaʼa maiʼnigeka kagaemo afaʼa maiʼnane, huʼna alagi lama gemo huʼnaeʼmo, Kataleʼna oʼuguve, huno ha paiʼnigeʼana uʼnaʼae.

⁷ Gotitegati gemo aliniʼeʼa aeʼa hakalo huʼa hapa nepaiya vayaʼmogimo aliʼa apaya maleʼnaya vayapatiʼmo fifitiʼa vayaʼmo afagiʼaleʼmo Yoneni aniʼmo mugagayaga faligamo maiʼnageʼana Ilaiyaʼe Ilaisaʼeʼmo ani agiʼnaleʼmo he tiʼana maiʼnaʼae.

⁸ Inagi Ilaiyaʼmo alolokukana kukena yaʼamo asagino aino kiteno Yoneni aniteʼmo ani alolokukana kukenaletiʼmo amagiʼniye. Amagiʼnigeno aniʼmo folagapatiʼmo aino akaka vaeno lole huʼnigeʼana anakaemo aniʼmo folagapiʼmo mopamo hau huʼnigeʼana mugagayaga faligamo uʼnaʼae.

⁹ Anakaemo ago lakaeʼana uteʼanaeʼmo Ilaiyaʼmo Ilaisafeʼmo ha painoʼaeʼmo, Hemenimo alagi ago hogo hiyanageno Ala kava neʼmoʼa nagaemo navalesigeʼnaeʼmo kagaemo katalegauve. Katalegauvaʼmofeʼmo hogoteʼna kaha maesuvafeʼmo na agufa kavaʼmo hisuve, huno huʼnigeno Ilaisaʼmo hunoʼaeʼmo, Kahaoke hovanagi, Gotiʼa lokiya kaunekameʼmoʼa alino fako huno apatesiya yapatiʼmo lole agufa yaʼmo aligesuve, huno ha paiʼniye.

¹⁰ Ilaiyaʼmo hunoʼaeʼmo, Kagaemo lokiya yaʼmo kamisuvafeʼmo nehane. Ala kava neʼmoʼa navalelino uno haisigekaeʼmo nagesanaʼmoʼmo ani lokiyaʼamo aligane. Uʼna haisuva afinaʼmo oʼnagesanaʼmoʼmo oʼaligane, huno ha paiʼniye.

¹¹ Anakaemo ge hume hume neʼvaʼagenoʼaeʼmo malage huno lole hosilaʼmo atagana hosilaʼmo mago atagana talalamo halauliʼana eʼana aliʼana fako huʼana anateʼnaʼageno mago alino vego vego huʼniya yasimoʼmo Ilaiyaʼmo avalelino kokuʼnapiʼmo uno haiʼniye.

¹² Ilaisaʼmo ageyana Ilaiyaʼmo uno haiʼnigenoʼaeʼmo keya aeno ge hunoʼaeʼmo, Afoʼnimogae, afoʼnimogae, huno, Kagaemo Isaleli vayaʼmogi talalaʼe hosileʼmo fai maiʼnaya ati vayakana huka maiʼnane, huno huteno magoʼe huno oʼageʼniye. Aipamoʼmo lusi kava huno kana huʼnigenoʼaeʼmo agaiʼa kukena yaʼamo alino apake aino lole huʼniye.

¹³ Ilaiyaʼmo uno nehaigenoʼaeʼmo alolokuʼamo mopafiʼmo asagauno aiʼnigeno Ilaisaʼmo alininuno Yoneni ani agiʼnaleʼmo he tino maiʼniye.

¹⁴ Agaemo Ilaiya alolokukana kukena yaʼaletiʼmo aniteʼmo neʼamaginoʼaeʼmo, Ala kava neʼmo Ilaiya Gotiʼamoʼmo haiyaʼaleʼmo maiʼniye, huno huʼniye. Malage huno aniʼmo aino akaka vaeno lole huʼnigeno Ilaisaʼmo mugagayaga faligamo uʼniye.

¹⁵ Gotitegati gemo aliniʼeʼa aeʼa hakalo huʼa hapa nepaiya vayapatiʼmo Yeliko taonifiʼmo maiʼnaya vayaʼmogimo ageʼnayana Ilaisaʼmo ani kavaʼmo huʼnigeʼa ageteʼapaeʼmo, Ilaiya aunemeʼamo eno Ilaisateʼmo maiʼniye, huʼa huteʼapaeʼmo eʼa agaeʼeʼmo fotu huteʼa aulagaleʼmo mopafiʼmo apaleʼyamo faiʼneʼapaeʼmo ape huʼnae.

¹⁶ Apakaemo Ilaisafeʼmo ha paiʼapaeʼmo, Lagae nofi vayapatiʼmo fifitiʼa lokiya vayaʼmo maiʼnagi, Kahaoke honanagi, kagaemo apatalegeʼa uʼa kava vekaeʼmo kahauya huʼa ageyo. Fiku yanageno Ala kava neʼmo Aunemeʼamoʼmo avalelinuno mago aveleʼmofi mago kagoʼmufiʼmofi huno ateʼnisigeno maiʼnegaiye, huʼa huʼnae. Ilaisaʼmo hapa painoʼaeʼmo, Haʼao, huno, Lapakaemo mago vayaʼmo alita apategeʼa oʼviyo, huno hapa paiʼniye.

¹⁷ Hapa paiʼniyaʼmonanafa apakaemo lusi kava huʼa lokiya gefatiʼmo ge huʼa afi geʼnayaʼmofeʼmo Ilaisaʼmo avagage huʼnigenoʼaeʼmo, Afaʼa alita apategeʼa viyo, huno hapa paiʼniye. Hapa paiʼnigeʼa apakaemo lokiyaʼapimo haneʼniya fifitiʼa vayaʼmo aliʼa apateʼnageʼa uʼa Ilaiyafeʼmo loleʼe magoʼe afinaʼmo kahauya huʼnayaʼmonanafa oʼageʼnae.

¹⁸ Ilaisaʼmo Yeliko taonifiʼmo maiʼnigeʼa apakaemo halate atagineʼa eʼnagenoʼaeʼmo agaemo hapa painoʼaeʼmo, Nagaemo na agufa yane, huʼna lapa paiʼnove, huno hapa paiʼniye.

Ilaisaʼmo aniʼmo alino alagepa huno ateʼniya gemae

¹⁹ Ilaisaʼmo Yeliko taonifiʼmo maiʼnigeʼapaeʼmo ani taonifi vayaʼmogimo eʼa ha paiʼapaeʼmo, Ala vekae, huʼa, ago, huʼa, mani taonimo alagepa taonimo haneʼniyaʼmonanafa aniʼmoʼa alagi kanale osuʼnigeʼa mafaʼnemo aliʼa apateʼnageʼapaeʼmo aigu nopilagatikeʼmo nefaliye, huʼa ha paiʼnageno

²⁰ agaemo hunoʼaeʼmo, Lapakaemo uta mago saufa yuvapamo alita mago hagemo alita maletetapa alinita eyo. Inagi apakaemo aliniʼa eʼnae.

²¹ Ilaisaʼmo yuvapamo alinino uno haino ani alupiʼmo hagemo yaga neʼaunoʼaeʼmo ina gemo hunoʼaeʼmo, Ala kava neʼmoʼa ina ge huno huʼniye. Mani aniʼmo aliʼna alagepa huʼna ateʼnove. Inagi mani aniʼmoʼa magoʼe huno vayaʼmo ohapaege aʼne anagaʼmo mafaʼne aliʼa apatesayafeʼmo alino hosu huno oʼapatege hugiye.

²² Ilaisaʼmo huʼniya agufa kavaʼmo huno aniʼmo afaʼa alagepa huno haneme haneme eno hemeniʼeʼmo afaʼa haneʼniye.

Ilaisaʼmo neya mafaʼne anagaʼmo lifanamo huno apateʼniya kavafeʼmo huʼniya gemae

²³ Inagi Ilaisaʼmo Meto taonifiʼmo neʼvigeʼapaeʼmo asole neya mafaʼne anagaʼmo taonifatiʼmo eʼa ageteʼapaeʼmo Ilaisafeʼmo huʼa faipa huʼapaeʼmo, Vae, kagaemo kagiyakamo alifa vekae, huʼa, Kaune heka uka haiyo. Kagaemo kagiyakamo alifa vekae, huʼa, Kaune heka uka haiyo, huʼa huteʼa kigi yokalo gemo huʼa aliʼa afepiʼmo ateʼnae.

²⁴ Huʼnagenoʼaeʼmo Ilaisaʼmo aino afe leno lokiya auluʼmo apaketenoʼaeʼmo Ala kava neʼmo agiʼaletiʼmo lifana huno apateʼnigeʼanaeʼmo lole a meyalaʼmo yahaofilagatiʼmo malage huʼana eʼana ani foti tuʼa neya mafaʼne anagaʼmo apakufamo hanige atalagauge huʼnaʼae.

²⁵ Inagi Ilaisaʼmo ani haopalegatiʼmo ataleno uno Kamo avemo alino ataleno halate Sameliya taonifiʼmo uno maiʼniye.